Banu bamo baje bakatanda bwasi ou mukanda na kujeneka kusinganyekesesa, bakalihula eci cihula. Oloni oku ku mukanda banendekako bya banalume babali baje bakele na lizina lya Mefimboshete, co kuzibuka byuma byalingiwile kutukwasa tulilongeseho bimo.

Mwene Saulu wa mu Isalele wakele na bana ba banalume ba kupwa 7 naba ba banakazi babali. Yonatana ikeye wapwile mwana wa ntwatwa wa Saulu. Mu kwita kwa simbu, Saulu wakitile mwana uje ibalukile ngwabo Mefimboshete. Ou mwana wamukitile na Lizepa munakazi wa mbanja. Yonatana nendi wakele na mwana wa lizina lya Mefimboshete. Ngeci, Mwene Saulu wakele na mwana na mutekulu wa lizina lya Mefimboshete.

Simbu imo, Mwene Saulu washangumukile kuzinda Bangimbiyone, co washakele kubanyongesa boshe. Ha simbu oyo, Bangimbiyone babangi batsile. Ebi biyongola byapwile byabibi. Bika twendekela ngoco? Mwafwa mu simbu ya Yoshwa bimyata ba Baisalele balikumiiye kukala mu kwoloka na Bangimbiyone.—Yosh 9:3-27.

Ngeci, cije cikumiiyo anga cakele na kupanga na mu simbu ya Mwene Saulu. Oloni Mwene Saulu wombwanesele cije cikumiiyo, co washakele kunyongesa Bangimbiyone boshe. Ngeci, ‘Saulu na naanga yendi bakele na mulonga wa kutsiya.’ (2 Samwe 21:1) Mu kwita kwa simbu Ndabiti wapwile mwene mu Isalele. Bangimbiyone baje bobokele balekele Mwene Ndabiti bubi bwakama bwalingile Saulu. Ndabiti wabehwile ha byuma bibapandele kulinga Baisalele mu kufwika mulonga walingile Saulu mangana Yehova ababezikise. Bangimbiyone kubendekele ngwabo babane bimbongo, oloni balombele ngwabo bana ba kupwa 7 ba munalume uje ‘washakele kubanyongesa’ babatsiye. (Kula 35:30, 31) Ndabiti watabele kulinga bibamulombele.—2 Samwe 21:2-6.

Ha simbu oyo, Saulu na Yonatana te banatsila laja mu nzita. Oloni Mefimboshete muna Yonatana te acili na kuyoya. Mefimboshete wapwile ciyanga kushwa ku bwanike, co wasalele bakuku yendi mubaile na kulwisa Bangimbiyone. Ndabiti na Yonatana balikumiiye ngwabo bapwa babusamba, co cije cikumiiiyo cakwasele bana ba Yonatana kwambateselela na munendi Mefimboshete. (1 Samwe 18:1; 20:42) Mbimbiliya ngwayo: ‘Omwo ha cikulaeso ca kujela cije cibalingile kuli Yehova, Ndabiti wamenene Mefimboshete muna Yonatana, mutekulu wa Saulu.’—2 Samwe 21:7.

Ndabiti walingile byuma bibamulombele Bangimbiyone. Watabele ngwendi muna Saulu wa lizina lya Mefimboshete na mukwabo, hamo lika na batekulu ba Saulu batanu babatsiye. (2 Samwe 21:8, 9) Byuma byangwile Ndabiti byafwikile mulonga wa maninga ubakele nawo Baisalele.

Ei ñanda ili na cilongesa cakama na matangwa ano. Lishiko lya Njambi lyamwesele mubapandele kulingila byuma. Lyamwesele ngwalyo: “Bana kubapandele kutsila bubi bwa bisemi babo embwe.” (Kwitu 24:16) Ngwe bana ba Saulu babali hamo lika na batekulyendi batanu kubakele na mulonga ngwe Yehova katabesele ngwendi babatsiye. Eli lishiko lyendekele lalo ngwalyo: “Munu na munu napande kutsila bubi bwendi.” Kumoneka ngwe bana ba Saulu babali hamo lika na batekulyendi batanu baje babatsiile, balikwatasanene nendi mu kushaka kunyongesa Bangimbiyone. Mukemwo babatsiile.

Eyi ñanda imwesa ngwayo nga munu nabulumuna kapandele kusinganyeka nambe kwendeka ngwendi njinakala na kukabangeya lika bibananjilekele. Cisimo cimo cendeka ngwaco: ‘Zibuka kuje kuuli na kuya, co bingila byobe byoshe bisungama.’—Visi 4:24-27; Efeso 5:15.