CILONGESA 34
“Twaleleleniho Kwenda mu Busunga”
“Twaleleleniho kwenda mu busunga.”—3 YOWA 4.
MWASO 111 Byuma Bitulingisa Tubwahelele
BILI MUNO MU CILONGESA *
1. Kusimutwiya na bakwetu byuma byatulingisa twije mu “busunga” kutukwasa bati?
“MWEZILE bati mu busunga?” Tuzibuka ngwetu munakumbulula eci cihula ha bisimbu byabingi. Kakangi eci cihula tukacihula ndolome nambe ndokazi itushaka kulizibuka nendi mwamubwa. Tukashaka kuzibuka mubalilongeselele busunga bakwetu, co netu tukabaleke binatulingisa tuzeme busunga. (Loma 1:11) Kusimutwiya na bakwetu mu ngila ei, kukatulingisa tusinganyeke byuma binatulingisa tulyangwile kupwa Mukaleho wa Yehova. Co lalo kukatulingisa ‘tutwaleleleho kwenda mu busunga’ nambe ngwetu kulinga byuma bije bizibisa Yehova kubwaha.—3 Yowa 4.
2. Bika bitusimutwiya muno mu cilongesa?
2 Muno mu cilongesa, tusimutwiya ha byuma byatulingisa tuzeme busunga. Co lalo tusimutwiya ha byuma bitunapande kulinga mangana tutwaleleleho kubuzema. Kusimutwiya ha byuma ebi kutulingisa tukandelele manene kuli Yehova ha kutunena mu busunga. (Yowa 6:44) Co lalo kutushongangeya tulongese bakwetu busunga bwa mu Mbimbiliya.
MWAFWA BIKA TWAZEMA “BUSUNGA”?
3. Cuma muka ca seho manene cinatulingisa tuzeme busunga?
3 Kuli byuma byabingi binatulingisa tuzeme busunga. Kuzema Yehova cikeco cuma ca seho manene cinatulingisa tuzeme busunga, mwafwa ikeye babenya busunga. Lijwi lyendi linatukwasa tuzibuke ngwetu Yehova ikeye watangele melu na lifuti libu, co lalo wapwa Tate yetu uje watuzema. (1 Petu 5:7) Tuzibuka ngwetu Njambi yetu “washula na kutetela na mema ku mbunge, uje kesi kulubala bwasi, muka-kulongwa na muka-kumwesa cizemo cije kucesi kutenguluka.” (Kutu 34:6) Yehova wazema busunga. (Isaya 61:8) Akazibi kubabala ku mbunge mwakatumono tuyanda, co akamanesa tuyando twoshe ha simbu yananoneka. (Njele 29:11) Oyo ikapwa simbu yaibwa manene. Mukemwo twazema manene Yehova.
Busunga bwa mu Mbimbiliya Bwapwa Ngwe . . . Cimikiso ca Bwato
Cimikiso ca bwato cikabukwasa bujeneke kungumuka. Mu ngila imo lika, lilabelelo likatukwasa tupwe ba kusimpa omwo tuliwana na bukalu. Kuzibuka busunga bwa mu Mbimbiliya kukatulingisa tulekeko bakwetu byuma bitunalilongesa (Taleni palagilafu 4-7)
4-5. Mwafwa bika kapositolo Paulu wesekesele lilabelelo ku cimikiso ca bwato?
4 Cuma muka cikwabo cinatulingisa tuzeme busunga? Twazema busunga mwafwa bukatukwasa mu bingila byabingi. Cakumwenako, busunga bwa mu Mbimbiliya bunatulingisa tukale na lilabelelo. Kapositolo Paulu wamwesele seho ya lilabelelo omwo wendekele ngwendi: “Tuli neli lilabelelo lije linapu ngwe cimikiso ca bwato ca myonyo yetu lije linapu lya busunga co lalo lyakukanyama.” (Heve 6:19, NWT.) Cimikiso ca bwato cikabukwasa mangana keti bungumuke, mu ngila imolika, lilabelelo likatukwasa tukolese omwo tuliwana na bukalu.
5 Paulu wakele na kwendeka bya lilabelelo lya kukayoya mwilu libakala nalyo baka-Kilistu ba kubwabesa. Oloni byendekele bikwasa na baka-Kilistu baje bali na lilabelelo lya kukayoya myaka yoshe hano hasi. (Yowa 3:16) Kukala na lilabelelo lya kukayoya myaka yoshe kulutwe kunatulingisa tupwe ba kubwahelela.
6-7. Kuzibuka byuma bikalingiwa kulutwe kwakwasele bati ndokazi Yvonne?
6 Tusimutwiyeni ha byuma byaliwanene nabyo ndokazi Yvonne. Simbu kanda alilongese busunga mwapwile mwanike, watewele manene kutsa. Litangwa limo watandele majwi amo aje amukwatele manene ku mbunge akwendeka ngwawo: “Munu na munu tangwa limo akatsa.” Wendekele ngwendi: “Awa majwi anjonowesele kulala tulo. Mwafwa njakele na kusinganyeka manene ha byuma bikalingiwa mu buyoye bwange kulutwe. Njasinganyekele ngwange bikoni bitukayoyela lika simbu yaindondo. Yange kunjishaka kutsa, co bikoni bitukatsila?”
7 Mu kwita kwa simbu, Yvonne waliwanene na Bakaleho ba Yehova. Wendekele ngwendi: “Njashangumukile kukala na lilabelelo lya kukayoya myaka yoshe mu Paradaisi hano hasi.” Kulilongesa busunga kunakwasa bati ndokazi Yvonne? Wendekele ngwendi: “Ano matangwa kunjesi na kwingama butsiki mu kulishoshomwena kutsa nambe byuma byeka bije binasa kulingiwa mu buyoye bwange kulutwe.” Twakulahela ngwetu Yvonne wazema manene busunga bwa mu Mbimbiliya, co akalikuwu kulekako bakwabo byuma byanalilongesa.—1 Tima 4:16.
Busunga bwa mu Mbimbiliya Bwapwa Ngwe . . . Bufuko
Kupangela Yehova na kukala na lilabelelo lya kukatwalelelaho kukamupangela mu kaye kakaha mu Bumwene bwendi kunapu ngwe bufuko. Kunapu kwa seho manene kutubakana byuma byoshe bitunaseze (Taleni palagilafu 12-13)
8-9. (a) Munalume wa mu cisimo ca Yesu, wamwesele bati ngwendi bufuko bwawanene bwapwile bwa seho manene? (b) Kuma mwamona busunga kupwa bwa seho manene ndi?
8 Busunga bwa mu Mbimbiliya bunambateselela na muzimbu waubwa wa Bumwene bwa Njambi. Yesu wesekesele busunga bwa kukundama ku Bumwene, ku bufuko bwa kushweka. Ku Mateo 13:44, Yesu wendekele ngwendi: “Bumwene bwa mwilu bunalifu ngwe bufuko bwa kushweka mu lihya, buje munu awana, co abushweka. Asinoni ha kubwahelela kwendi aya na kulandesa byuma byoshe bije alinabyo, co alanda lije lihya.” Nangukeni ngweni ou munalume kakele na kushakazeka buje bufuko, oloni omwo wa buwanene walandesele byuma byoshe byakele nabyo mangana abwambate. Mwafwa bika? Wazibukile ngwendi buje bufuko bwapwile bwa seho manene kutubakana byuma byoshe byakele nabyo.
9 Kuma neni mukemwo mumukamwena busunga ndi? Mukemwo bene. Tuzibuka ngwetu nacimo cahi cili muno mu kaye, cilyeseka na kubwahelela kutunawana mwafwa ya kupangela Yehova na lilabelelo lituli nalyo lya kukayoya myaka yoshe mu Bumwene bwa Njambi. Kulikuta busamba na Yehova kunapu kwa seho manene kutubakana byuma byoshe bitunaseze. Tukabwahelela manene nga ‘tumuzibisa kubwaha mu byuma byoshe.’—Kolo 1:10.
10-11. Bika byalingisile Michael atengulule yoyesi yendi?
10 Bwingi bwetu tunaseze byuma byabingi bitwazema manene mangana tulikute busamba na Yehova. Bamo banatengulula bilengo byabo mangana bapangele Yehova. Bamoco banatengulula yoyesi yabo mubanazibuka busunga. Bikebyo byalingile Michael. Kakolelele mu busunga. Ngeci mwapwile mukwenje, walilongesele kulwa. Wendekele ngwendi: “Cuma capwile ca seho kuli yange capwile kulinga byuma bije bikanyamesa mubila wange. Simbu imo njakele na kuliziba ngwange kunjasa kutenguluka.” (Myaso 11:5) Michael wendekele hali ndolome na munakakazi wendi bakele na kulilongesa nabo ngwendi: “Kubanjilekele ngwabo njilikele kulwa, oloni batwaleleleho lika kunjilongesa busunga bwa mu Mbimbiliya.”
11 Michael wazibile manene kubwaha mwalilongesele ngwendi Yehova wazema manene bangamba bendi. Mu kwita kwa simbu, Michael wanangukile ngwendi wapandele kutengululako bimo mu kuyoya. Wendekele ngwendi: “Njazibukile ngwange kwecela kulwa kunjikaluwila manene. Oloni njazibukile lalo ngwange kulinga ngoco kuzibisa Yehova kubwaha, co lalo kumupangela kwapwa kwa seho kutubakana byuma byoshe.” Michael wanangukile ngwendi busunga bwalilongesele bwapwile bwa seho, co oku kwamulingisile atengululeko bimo mu kuyoya.—Yako 1:25.
Busunga bwa mu Mbimbiliya Bwapwa Ngwe . . . Ndeya
Ndeya ikatukwasa tumone mwamubwa nga tuli mu lisusulungu. Mu ngila imo lika Lijwi lya Njambi likatukwasa tupwe ba kutona mu kaye ka Satana ka lisusulungu (Taleni palagilafu 12-13)
12-13. Kuzibuka busunga bwa mu Mbimbiliya kwakwasele bati Mayli?
12 Mbimbiliya yamwesa ngwayo busunga bwapwa bwa seho omwo inabwesekesa ku ndeya ije iteteka mu lisusulungu. (Myaso 119:105; Efeso 5:8) Mayli wa ku Azerbaijan wamona busunga bwanalilongesa mu Lijwi lya Njambi kupwa bwa seho manene. Bisemi bendi bakele mu bulombelo bwakuliseza. Baishe bapwile Bamuzilemu, bainaco bapwile Bayunda. Wendekele ngwendi: “Nameme njakulahelele ngwange Njambi kwakala, oloni njakele na bihula byabingi. Njalihwile ngwange, ‘Njambi watangelele bika banu, co lalo mwafwa bika banu bakayanda mu buyoye bwabo bwoshe kutundaho nawa bakatwalelelaho kuyanda myaka yoshe mu litende lya tuhya?’ Banu babangi bakendeka ngwabo Njambi ikeye akalingisa byuma byoshe bilingiwe. Ngeci njalihwile ngwange, ‘Kuma ikeye akangwila banu byuma bibaliwana nabyo kutundaho lalo abwahelela mwabamona bayanda ndi?’”
13 Mayli watwaleleleleho kutondesesa bikumbululo ku bihula byendi. Mu kwita kwa simbu washangumukile kulilongesa Mbimbiliya. Wendekele ngwendi: “Busunga bwa mu Mbimbiliya bwanjikwasele njipwe wa kubwahelela. Bikumbululo binjawanene mu Lijwi lya Njambi byanjikwasele njikale mu kwoloka.” Ngwe mwa Mayli tubaboshe tuli na kushangazala Yehova ‘uje watusanene kututundisa mu lisusulungu na kutunena mu ceke cendi ca kukomokesa.’—1 Petu 2:9.
14. Bika bitunapande kulinga mangana tuzeme manene busunga? (Taleni cipalo ca “ Byuma Bikwabo Bibanesekesa ku Busunga bwa mu Mbimbiliya.”)
14 Twasimutwiyako ha myanja ije imwesa ngwayo busunga bwapwa bwa seho. Oloni kuli myanja ikwabo yaingi. Mwasa kutondesesa byuma bikwabo bije bitulingisa tuzeme busunga. Kuzema manene busunga kutulingisa tubumone kupwa manene bwa seho.
TWASA KUMWESA BATI NGWETU TWAZEMA BUSUNGA?
15. Twasa kumwesa bati ngwetu twazema busunga?
15 Twasa kumwesa ngwetu twazema busunga nga tutanda Mbimbiliya simbu yoshe na mabulu a kukundama ku Mbimbiliya. Tunapande kutwalelelaho kulilongesa Mbimbiliya nameme tuneshwala mu busunga nambe embwe. Kaposhi ka Kukengela kakulibanga kendekele ngwako: “Busunga bwapwa ngwe nemo yaindondo ili mu mambo ya kuyoya ije ibanazengeleka ku makuli aje anapu ngwe mwila uje ushaka kuyonowesa kukola mwamubwa. Munapande kukengesesa mwamubwa mangana muiwane. . . . Nga mushaka kukala nayo, co munapande kukulama mangana muyambate. Kumwapandele kujauka na nemo imolika ya busunga imunawana. . . . Tondeseseni mangana muwane binemo bikwabo byabingi.” Kulilongesa busunga keti kwakwasi, oloni kwapwa kwa seho.
16. Ngila muka imukapangesa mu kulilongesa Mbimbiliya? (Visimo 2:4-6)
16 Keti tubaboshe twashaka kutanda na kulilongesa. Oloni Yehova atuleka ngwendi tunapande kutwalelelaho ‘kushakezeka,’ mangana tuzibisise mwamubwa busunga. (Tandeni Visimo 2:4-6.) Kulinga ngoco kutukwasa manene. Corey ngwendi mwakatanda Mbimbiliya akashaka kuzibisisa vesi na vesi. Wendekele ngwendi: “Njikatanda mikanda yoshe na biñanda byoshe bije bilitombola na vesi na vesi injitanda. . . . Co lalo njikatondesesa na biñanda bikwabo. Kulinga ngoco kukanjikwasa njililongese byabingi.” Twasa kupangesa ngila yoshe-yoshe mu kulilongesa Mbimbiliya, oloni tumwesa ngwetu busunga bwapwa bwa seho kuli yetu nga tunoneka simbu ya kulilongesa na kwakako mbunge.—Myaso 1:1-3.
17. Twasa kulinga bati mangana tupangese byuma bituli na kulilongesa? (Yakomba 1:25)
17 Tuzibuka ngwetu kulilongesa lika busunga kukwapwilemo. Oloni tunapande kupangesa bitulilongesa mangana busunga butukwase mu kuyoya kwetu. Nga tulinga ngoco, co tupwa ba kubwahelela. (Tandeni Yakomba 1:25.) Twasa kulinga bati mangana tupangese byuma bituli na kulilongesa? Ndolome umo wendekele ngwendi tunapande kulilula mangana tumone haje hatuli na kulinga mwamubwa na haje hatunapande kupangela. Kapositolo Paulu wendekele ngwendi: “Hoshe-hoshe hatunete mu kukola, tutwaleleleniho kwenda mwamubwa omu mu ngila ya kulifwa.”—Fili 3:16.
18. Mwafwa bika tunapande kulinga mwoshe mutwasela mangana “tutwaleleleho kwenda mu busunga”?
18 Kuli bubwa bwabwingi butuwana nga “tutwalelelaho kwenda mu busunga.” kutukwasa tutengulule futisi yetu na kuzibisa Yehova kubwaha ku mbunge hamolika na bandolome na bandokazi betu. (Visi 27:11; 3 Yowa 4) Cili bene ebi bikebyo byuma binapande kutulingisa tuzeme busunga na kubupangesa.
MWASO 144 Taleni Mesho Eni ha Fweto!
^ Kakangi lijwi lya “busunga” likatalesa ku byuma bitwakulahela na yoyesi yetu. Kusimutwiya ha byuma binatulingisa tuzeme busunga kutukwasa nameme tuneshwala mu busunga indi embwe. Kulinga ngoco kutukwasa tutwaleleleho kulinga byuma bizibisa Yehova kubwaha.
