1-2. Bika twendekela ngwetu kutenguluka kwa byuma mu kuyoya kwasa kutulingisa tuzibisise mwamubwa Bisoneka bimo?

 HA LITANGWA lya cilika ca bulo, baka-kulyambata bakatolilila mwamubwa ku ñanda ya Mbimbiliya ije yendeka ha bulo. Binangulo bibakasimutwiya omu mu ñanda keti byabiha kuli bakebo. Oloni kushwa aha ha litangwa, ebi binangulo bikapu bya seho manene kuli bakebo. Mwafwa bika? Mwafwa bashangumuka kubipangesa mu bulo bwabo.

² Ebi bikebyo bikalingiwa na kuli baka-Kilistu baje banalyambata mubakala na bana. Hamo ha myaka yaingi banatolilila ku biñanda bya Mbimbiliya bije bimwesa mwakulelela bana. Oloni mubakala na bana, ebi binangulo bikapu bya seho manene kuli bakebo. Banapande kulongesa munabo byuma bya ku sipilitu. Eci cinapu cipangi cakama. Kutenguluka kwa byuma mu kuyoya kukatulingisa tuzibisise mwamubwa bisoneka bimo. Mukemwo banu ba Yehova bakatanda Mbimbiliya na kusinganyekesesaho ha “matangwa oshe a kuyoya” kwabo, ngwe mubakele na kulingila bimyene ba mu Isalele.—Kwitu 17:19.

3. Bika bitusimutwiya muno mu cilongesa?

³ Bisemi mwabezika manene mwafwa muli na cipangi cakama ca kulongesa bana beni bya Yehova. Oloni kumwapandele lika kukwasa bana beni bazibuke Njambi. Munapande kubakwasa lalo bamuzeme manene. Bika bimunapande kuliga mangana mukwase bana beni bazeme Yehova? Muno mu cilongesa,  tusimutwiya ha binangulo biwana bije byasa kumikwasa. (2 Tima 3:16) Tusimutwiya lalo omwo kupangesa binangulo bya mu Mbimbiliya kunakwasela bisemi baka-Kilistu.

4. Cinangulo muka casa kukwasa bisemi balongese bana babo kuzema Yehova? (Yakomba 1:5)

⁴ Cinangulo 1: Lombeni Yehova amitwamenene. Lombeni Yehova amikwase kuzibuka mwakukwasela bana beni bamuzeme. (Tandeni Yakomba 1:5.) Ikeye lika asa kuminangula mu ngila inapande. Bika twendekela ngoco? Tusimutwiyeniko ha byuma bibali bitulingisa twendeke ngoco. Cakulibanga, Yehova napu cisemi ha myaka yaingi. (Myaso 36:9) Camucibali, binangulo byendi bikakwasa simbu yoshe.—Isaya 48:17.

5. (a) Munga ya Yehova ili na kukwasa bati bisemi? (b) Kwesekesa na vidio, bika byakwasele ndolome na ndokazi Amorim balele mwamubwa bana babo?

⁵ Yehova akapangesa Lijwi lyendi na munga yendi mangana amikwase kuzibuka mwakukwasela bana beni bamuzeme. (Mateo 24:45) Cakumwenako, mwasa kuwana binangulo byabibwa mu biñanda bibakele na kusoneka mu Toneni! Ha mutwe wa “Litaba Zetusa Mabasi.” Ano matangwa ebi biñanda banabyaka na ha webusaiti yetu. Co lalo ha webusaiti ya jw.org hali mavidio amangi aje asa kukwasa bisemi bazibuke mwakulelela bana babo mwamubwa. *—Visi 2:4-6.

6. Munga ya Yehova inakwasa bati cisemi umo wa munalume na muka-limbo lyendi?

⁶ Bisemi babangi bakakandelela manene ku bukwasi bwanabana Yehova kupangesa munga yendi. Cisemi umo wa lizina lya Joe ngwendi: “Kulongesa bana batatu busunga kukwapwile kwakwasi. Nange na muka-limbo lyange tukalombo Yehova mangana atukwase. Kakangi tukalizibi ngwetu ñanda imo ya mu libulu nameme vidio, inaija ha simbu yaibwa mangana itukwase mu bukalu butuli nabwo. Simbu yoshe tukalombo Yehova mangana atutwamenene.” Joe na muka-limbo lyendi banananguka ngwabo ebi bilongesa na mavidio bili na kukwasa bana babo bashwenye kuli Yehova.

7. Mwafwa bika bisemi banapande kweseka mubasela mwoshe kwakela bana babo mwanja waubwa? (Loma 2:21)

 ⁷ Cinangulo 2: Akeleni bana beni mwanja waubwa. Kakangi bana bakamono bibakalingi bisemi babo, co bakabatembwinina. Bisemi boshe kubapwile ba kulumbunuka. (Loma 3:23) Nameme ngoco, bisemi banapande kweseka mubasela mwoshe kwakela bana babo mwanja waubwa. (Tandeni Loma 2:21.) Cisemi umo wa munalume wendekele ngwendi: “Bana bapwa ngwe ciponji cije cikanu byuma byoshe-byoshe mumucimbwitika.” Wendekele lalo ngwendi: “Bakatuleke nga simbu imo twonowa kulinga byuma bitubalongesa.” Ngeci nga tushaka ngwetu bana betu bazeme Yehova, co banapande kulimwena ngwabo netu twamuzema.

8-9. Bika bimulilongesa ku majwi a ndolome Andrew na ndokazi Emma?

⁸ Bisemi basa kulongesa bana babo bya Yehova mu bingila byabingi. Ndolome Andrew wa myaka 17 ngwendi: “Simbu yoshe bisemi bange bakele na kunjileka ngwabo kulombela kwapwa kwa seho manene. Simbu yoshe butsiki, batate bakele na kulombela hamo nange nameme njalombela laja. Bakele na kutuleka ngwabo: ‘Wasa kulombela kuli Yehova simbu yoshe-yoshe iushaka.’ Kulinga ngoco kwanjikwasele njimone lilombelo kupwa lya seho manene. Ha simbu ino njikalombela kuli Yehova mu kuzituka, co lalo njikalizibi ngwange wapwa Tate wa cizemo.” Ngeci bisemi, keti mwibale ngweni nga muzema Yehova, co mushongangeya bana beni nabo bamuzeme.

⁹ Tusimutwiyeni lalo ha cakumwenako ca Emma. Baishe mubasezele naanga, basezelele baina mikuli yaingi. Emma ngwendi: “Kakangi banana kwakele na kubakaluwila kutuwanena byuma bya kulikwasesa, oloni simbu yoshe bakele na kutuleka omwo Yehova akakwaselamo bangamba bendi. Yoyesi ya banana yamwesele ngwayo bakulahelele ngwabo Yehova abakwasa. Banana bakele na kulinga byuma bibakele na kutulongesa.” Bika bitulilongesako? Tulilongesa ngwetu bisemi basa kwakela bana babo mwanja waubwa nameme byuma binabakaluwila.—Ngala 6:9.

10. Bika twendekela ngwetu bisemi ba Baisalele bakele na kuwana simbu yaingi ya kusimutwiya na bana babo? (Kwituluka mu Mashiko 6:6, 7)

¹⁰ Cinangulo 3: Simutwiyeni na bana beni simbu yoshe. Yehova washikile Baisalele ba kusañulu ngwendi balongese bana babo simbu yoshe. (Tandeni Kwituluka mu Mashiko 6:6, 7.) Aba bisemi bakele na kuwana simbu yaingi ya kukala na bana babo na kubalongesa bazeme Yehova na bimbunge byabo byoshe. Cakumwenako, mwana wa mukwenje wakele na kupanga na baishe simbu yailaha binpangi bya kufwa ngwe kukuna bimbuto na kuteja. Mwana wa mumbanda nendi wakele na kupangela hamo na baina bipangi bya kufwa ngwe kutunga na bipangi bikwabo bya ha njibo. Kupangela hamo na bana babo kwakele nakukwasa bisemi basimutwiye nabo ha byuma bya seho. Cakumwenako, simbu imo bakele na kusimutwiya ha bifwa byabibwa bya Yehova nomwo mwakele na kukwaselamo naanga yabo.

11. Simbu muka yaibwa ibanasa kusimutwiya bisemi na bana babo?

¹¹ Byuma binatenguluka. Mu mafuti amangi bisemi kubesi kuwana simbu ya kukala hamo na bana babo. Kakangi bisemi bakai ku bipangi, bana nabo bakai ku masikola. Ngeci bisemi banapande kweseka mubasela mwoshe kuwanako simbu ya kusimutwiya na bana babo. (Efeso 5:15, 16; Fili 1:10) Simbu ya kulemesa kwa naanga yapwa simbu yaibwa ya  kusimutwiya na bana. Ndolome Alex wa myaka 15 ngwendi: “Simbu yoshe batate bakabwahesa mukunapande kwendela kulemesa kwa naanga, co kubesi kutabesa cuma coshe-choshe citutanganese. Munima ya kulemesa kwa naanga, tukalikuwu lika kusimutwiya.”

12. Byuma muka kapandele kulinga mutwe wa naanga ha simbu ya kulemesa kwa naanga?

¹² Nga mwapwa mutwe wa naanga, bika bimunapande kulinga mangana bana beni balikuwe kulemesa kwa naanga? Mwasa kushangumuka kulilongesa nabo mu libulu lyaliha lya Likuweni Kuyoya Myaka Yoshe! Eli libulu limikwasa musimutwiye mwamubwa na bana beni. Mushaka ngweni bana beni bamileke mubali nakulizibila. Ngeci, ha simbu ya kulemesa kwa naanga kumwapandele kubapaya. Kumwapandele kubatenukila nga bendeka byuma bimo bije kubilitombola na mashiko a mu Mbimbiliya. Oloni munapande kubwahelela omwo bazituka kumileka bili ku bimbunge byabo, co bashongangeyeni batwaleleleho kulinga ngoco. Kuzibuka mubali na kulizibila bana beni kumilingisa mubakwase mwamubwa.

13. Ngila muka ikwabo ibanasa kupangesa bisemi mu kukwasa bana babo bashwenye kuli Yehova?

¹³ Bisemi esekeni mumwasela mwoshe kuwanako simbu ha litangwa na litangwa ya kukwasa bana beni bashwenye kuli Yehova. Mwasa kulongesa bana beni simbu yoshe-yoshe keti kubandamena lika simbu ya kulemesa kwa naanga, embwe. Lisa uje wapwa cisemi wa munakazi wendekele ngwendi: “Twapangesele byuma bya kutanga mu kulongesa bana betu bya Yehova. Cakumwenako, katali wetu mwalingile byuma bije byabajolesele, twabalekele ngwetu Yehova wapwa Njambi wa kubwahelela, co ashaka ngwendi netu tupwe ba kubwahelela na kulikuwa byuma byabibwa.”

14. Mwafwa bika bisemi banapande kukwasa bana babo bangule babusamba bababwa? (Visimo 13:20)

¹⁴ Cinangulo 4: Kwaseni bana beni bakale na babusamba bababwa. Lijwi lya Njambi limwesa ngwalyo babusamba betu basa kutushongangeya tulinge byuma byabibwa nameme byabibi. (Tandeni Visimo 13:20.) Bisemi, kuma muzibuka babusamba ba bana beni  ndi? Mwabamonaho laja na kusimutwiya nabo ndi? Mwasa kukwasa bati bana beni balikute busamba na banu baje bazema Yehova? (1 Koli 15:33) Mwasa kukwasa bana beni bangule mwamubwa babusamba nga mulanyako bandolome na bandokazi ba kuhya ku sipilitu mangana bakulingile hamo na naanga yeni byuma bimo.—Myaso 119:63.

15. Bisemi basa kukwasa bati bana babo balikute busamba na banu bababwa?

¹⁵ Tucisimutwiyeni ha byuma byaliwanene nabyo cisemi wa munalume wa lizina lya Tony. Wendekele byuma byamukwasele hamo lika na mwebwendi mangana bakwase bana babo kukala na babusamba bababwa. Wendekele ngwendi: “Ha myaka yaingi, tunalanya bandolome na bandokazi ba kuliseza-seza ku njibo yetu. Tukali nabo byakulya na kulingila hamo nabo kulemesa kwa naanga. Kulinga ngoco kukatukwasa tuzibuke bandolome na bandokazi baje bazema Yehova na kumupangela mu kubwahelela. Tukatambula tunyungi ba kuzenguluka na bamishinali na bandolome na bandokazi bakwabo ku njibo yetu. Byuma bibanaliwana nabyo na ntwima yabo mu kupangela Yehova na sipilitu yabo ya kulyana binakwasa manene bana betu bashwene kuyehi na Yehova.” Bisemi twaleleleniho kukwasa bana beni bakale na babusamba bababwa.

16. Mwasa kulinga bati nga muneni endeka ngwendi shendi kupangela Yehova?

¹⁶ Mwasa kulinga bati nga muneni amileka ngwendi kashaka kupangela Yehova nameme muneseka mumwasela mwoshe kumulongesa busunga? Keti musinganyeke ngweni munonowa cipangi ceni ha kupwa bisemi. Yehova naana banu boshe nzili ya kulyangwila bya kulinga kwambateselela na bana beni. Ngeci tunasa kwangula kumupangela nambe kujeneka kulinga ngoco. Nga muneni atunda mu cikungulukilo, keti musinganyeke ngweni hamo kakeluka lalo. Anukeni cisimo ca Yesu ca mwana wa kuzimbala. (Luka 15:11-19, 22-24) Uje mukwenje walingile byuma byabingi byabibi, oloni mu kwita kwa simbu welukile kuli Ishe. Bamo banasa kwendeka ngwabo: “Cije capwile lika cisimo, kubyasa kulingiwa.”  Byasa kulingiwa. Bikebyo byalingiwile kuli mukwenje wa lizina lya Elie.

17. Byuma byaliwanene nabyo Elie bimikwasa bati?

¹⁷ Elie wendekele ngwendi: “Bisemi bange besekele mubaselele mwoshe kunjikwasa njizeme Yehova na Lijwi lyendi Mbimbiliya. Oloni munjakele na myaka 15 njashangumukile kungumuka.” Elie washangumukile kulinga byuma byabibi ku bushweke, co bisemi bendi besekele mubaselele mwoshe kumukwasa oloni kabatolililile. Watundile ha njibo na kutwalelelaho kulinga byuma byabibi. Nameme ngoco, simbu imo wakele na kusimutwiyako na bakwabo bya Yehova. Elie wendekele ngwendi: “Kusimutwiya na bakwetu bya Yehova kwakele na kunjilingisa njisinganyekesese manene hali ikeye. Mu kwita kwa simbu mbuto ya busunga bwa mu Mbimbiliya ibakunine bisemi bange mu mbunge yange yashangumukile kukola.” Kukapwa muje, Elie welukile kuli Yehova. * Bisemi bendi banangukile ngwabo balingile mwamubwa kumukwasa azeme Yehova oku acili mwanike.—2 Tima 3:14, 15.

18. Mukalizibi bati nga mumona bisemi baje bakeseka mubasela mwoshe kukwasa bana babo bazeme Yehova?

¹⁸ Bisemi, Yehova namyana cipangi cacibwa manene ca kukwasa babaha balemese Yehova. (Myaso 78:4-6) Eci kucapwile cipangi cacasi embwe. Ngeci, tuli na kumishangala manene mumuli na kupanga na nzili mu kukwasa bana beni bazibuke busunga. Tate yetu wa mwilu uje watuzema manene abwahelela manene nga mutwalelelaho kukwasa bana beni bazibuke busunga na kumwononoka.—Efeso 6:4.