1. Cuma muka cibanapande kulyangwila banu?

 BANU banapande kulyangwila byakulinga. Banasa kwangula kulinga byuma bije bimwesa ngwabyo Yehova Njambi ikeye nafwila Kuyula melu na kaye, co lalo banasa kwangula kulikwatasana na Satana Liyabolo uje wapwa citozi ca Njambi. Kutwasa kulyangwila kukala hakati-kati. Bitwangula kulinga ha ñanda ei, bimwesa indi tukayoya myaka yoshe nambe embwe. (Mateo 25:31-33, 46) Ha simbu ya kayando kakama banu bamo bakabaka cizibukiso ca kwoboka, bamo co ca kubanyongesa.—Kujo 7:14; 14:9-11; Ezeki 9:4, 6.

2. (a) Mukanda wa Vahevelu 10:35-39 utushongangeya kulinga bika? (b) Mukanda wa Kujombolola wasa kutukwasa bati kulinga ngoco?

² Tandeni Vahevelu 10:35-39. Nga munangula kukundwiya Bumwene bwa Yehova, co munangula cuma ca seho manene. Co mushaka kukwasa bakweni bangule mwamubwa bya kulinga. Ngeci, mwasa kupangesa biñanda bili ku mukanda wa Kujombolola mu kubakwasa. Mukanda wa Kujombolola unamwesa byuma bije bikalingiwa ku banu baje balwisa Yehova, co lalo unamwesa na bibezikiso bije bibakalikuwa banu baje batwalelelaho kupwa ba kulongwa kuli Yehova. Tunapande kulilongesa ebi biñanda bya seho. Kulinga ngoco kutukwasa tutwaleleleho kupangela Yehova. Kutundaho, twasa kulekako bakwetu byuma bitunalilongesa mangana bangule kupangela Yehova na kutwalelelaho kumupangela.

3. Bika bitusimutwiya muno mu cilongesa?

³ Muno mu cilongesa tusimutwiya ha bihula binatako: Bibezikiso muka bibakalikuwa banu baje bakundwiya ciyulo ca Njambi? Co byuma muka bikalingiwa ku banu baje bangula  kukundwiya cikashama wa kubenga ibanendeka ku mukanda wa Kujombolola?

4. Kapositolo Yowano wamwene cibunga muka cije cakele na Yesu mwilu?

⁴ Mu cimona kapositolo Yowano wamwene bibunga bibali bya banu baje bali na kukundwiya ciyulo ca Yehova, co batambwile cikandelela ca kuyoya myaka yoshe. Cibunga cakulibanga ca banu ba kupwa 144,000. (Kujo 7:4) Bali na kubangula hano hasi mangana bakayule na Yesu mwilu, co bakayula kaye. (Kujo 5:9, 10; 14:3, 4) Mu cimona Yowano wamwene aba banu banemana na Yesu mwilu ha Munkinda wa Siyone.—Kujo 14:1.

5. Byuma muka bikalingiwa kuli bakubwabesa baje banasala hano hasi?

⁵ Kushwa mu simbu ya Tupositolo, banu bamo bali na kubangula mangana bakayule na Yesu mwilu. (Luka 12:32; Loma 8:17) Oloni Yowano bamulekele ngwabo mu matangwa a kukotoka babandende lika bakubwabesa bakasala hano hasi. Aba bakubwabesa ‘banasala’ hano hasi bakatambula “kasateso” kutundilila kuli Yehova, simbu kanda kayando kakama kashangumuke. (Kujo 7:2, 3; 12:17) Ha simbu ya kayando kakama bakubwabesa baje banasala hano hasi, bakaya mwilu mangana bakakale hamo na bakubwabesa baje batwaleleleleho kupwa ba kulongwa kweta na ha kutsa kwabo. Co bakayula hamo na Yesu mu Bumwene bwa Njambi.—Mateo 24:31; Kujo 5:9, 10.

6-7. (a) Cibunga muka cikwabo camwene Yowano, co catundile kuli? (b) Mwafwa bika biñanda bili ku mukanda wa Kujombolola capita 7 binapu bya seho kuli bakubwabesa banasala hano hasi na “mbunga yakama”?

⁶ Yowano wamwene lalo “mbunga yakama.” Mbimbiliya kuyendekele nambala yei mbunga yakama. (Kujo 7:9, 10) Aba banu bakatunda kuli? Yowano bamulekele ngwabo: “Aba bakebo banu banatundu mu ñababa yakama kujeneka bushonde. Co banakushu buzalo bwabo na kubutokesa too mu maninga a Muna Manga” (Kujo 7:14) Ei “mbunga yakama” muikoboka kayando kakama, ikayoya hano hasi na kulikuwa bibezikiso bitunda kuli Njambi.—Myaso 37:9-11, 27-29; Visi 2:21, 22; Kujo 7:16, 17.

⁷ Kuma mwakulahela ngweni mukalimwena byuma bibanendeka ku mukanda wa Kujombolola capita 7 ndi? Tunapande kukulahela ngoco mwafwa mubikalishulisilila, bangamba ba Njambi bakakala hano hasi na baje bakakala mwilu, ba kapwa bakubwahelela. Tukalimwena ngwetu twalingile bwino kukundwiya ciyulo ca Yehova. Byuma muka bikwabo biwendeka mukanda wa Kujombolola ha kayando kakama?—Mateo 24:21.

8. Kayando kakama kakashangumuka bati, co banu babangi bakalinga bati?

⁸ Ngwe mucinamwesela cilongesa cinahu, bifulumende bikalwisa Mbambilone Wakama uje emanena bulombelo boshe bwa makuli. (Kujo 17:16, 17) Kunyonga kwa Mbambilone Wakama akewo akapwa maputukilo a kayando kakama. Kuma oku kukalingisa banu bashangumuke kupangela Yehova ndi? Embwe. Oloni mukanda wa Kujombolola capita 6 umwesa ngwawo ha simbu ei banu baje kubesi na kulemesa Yehova bakashakezeka bukwasi ku bifulumende na kuli baka-mingoso baje babanesekesa ku minkinda. Omwo bakalinga ngoco bakamwesa ngwabo kubesi na kwimanena Bumwne bwa Njambi.—Luka 11:23; Kujo 6:15-17.

9. Banu ba Njambi bakalisezela haka na banu baje kubesi na kumupangela, co bika bikalingiwa kuli bakebo?

 ⁹ Ha simbu ya kayando kakama bangamba ba Njambi ba kulongwa bakebo bakatwalelelaho ku kulahela Yehova. Co bakebo lika bakatwalelelaho kupangela Yehova Njambi na kubyana kukundwiya uje “cikashama.” (Kujo 13:14-17) Kulongwa kwabo kukalingisa bitozi ba Njambi balubale manene. Bifulumende bikalikwatasana hamo mu kulwisa banu ba Njambi boshe. Ebi bifulumende na banu balikwatasana hamo nabyo, bakebo babatumbula ngwabo Ngonge wa Mangonge.—Ezeki 38:14-16.

10. Kwesekesa na mukanda wa Kujombolola 19:19-21, bika byakalinga Yehova ku banu baje bakalwisa bangamba bendi?

¹⁰ Yehova akalinga bika mubakalwisa bangamba bendi? Natuleke ngwendi: “Njikalubala manene.” (Ezeki 38:18, 21-23) Mukanda wa Kujombolola capita 19 utuleka byakalinga. Yehova akatuma munendi mangana akwamene banu bendi na kunyongese bitozi babo. Yesu hamo lika na tungelo ba kulongwa na baka-Kilistu bakubwabesa baje banapu ‘bibunga bya maswalale ba mwilu’ bakalwisa bitozi ba Njambi. (Kujo 17:14; 19:11-15) Byuma muka bikalingiwa muikahwa ije nzita? Banu boshe baje bali na kulwisa Yehova bakanyonga.—Tandeni Kujombolola 19:19-21.

11. Ñanda muka ya seho manene ibanendeka ku mukanda wa Kujombolola?

¹¹ Banu ba Njambi ba kulongwa bakabwahelela manene bitozi ba Njambi mu bakabanyongesa. Ei ikapwa simbu yaibwa manene. Mbambilone Wakama mubakamunyongesa, mwilu kukakala kubwahelela manene, oloni kuli cuma cikwabo lalo cikanena kubwahelela kwakama. (Kujo 19:1-3) Eci cuma cinapu “bulo bwa Muna Manga.” Co ei ñanda ikeyo inapu ya seho manene mu mukanda wa Kujombolola.—Kujo 19:6-9.

12. Kwesekesa na mukanda wa Kujombolola 21:1, 2, bulo bwa Muna Manga bukakalako simbu muka?

¹² Obu bulo bukakalako simbu muka? Baka-Kilistu bakubwabesa boshe bakakala mwilu simbu kanda nzita ya Alamagidone ije. Oloni ei keti ikeyo ikapwa simbu ya bulo bwa Muna Manga. (Tandeni Kujombolola 21:1, 2.) Bulo bwa Muna Manga bukakalako munima ya nzita ya Alamagidone bitozi ba Njambi mubakabanyongesa.—Myaso 45:3, 4, 13-17.

13. Bika bikalingiwa ha simbu ya bulo bwa Muna Manga?

¹³ Bika bikalingiwa ha simbu ya bulo bwa Muna Manga? Bulo bukalingisa munalume na munakazi balyambata bakale hamo, mu ngila yakulifwa, bulo bwa Muna Manga bukalingisa Mwene Yesu Kilistu akale hamo na baka-Kilistu bakubwabesa baje bapwa “shombolwa” yendi. Munima ya bulo, yesu na baka-Kilistu bakubwabesa bakashangumuka kuyula hasi hoshe ha myaka 1,000.—Kujo 20:6.

14-15. Mukanda wa Kujombolola capita 21 unesekesa baka-kilistu bakubwabesa ku bika? (Taleni cikupulo cili ha liputa lya kulibanga)

¹⁴ Mukanda wa Kujombolola capita 21 unesekesa Baka-kilistu bakubwabesa ku nganda yaibwa manene ije ibatumbula ngwabo “Yelusalema yaiha.” (Kujo 21:2, 9) Ei nganda inemana ha lubula lwa mamanya 12 haje ha banasoneka ‘mazina a tupositolo ba Muna Manga likumi na babali.’ Mwafwa bika ei nganda yazibisile Yowano kubwaha? Mwafwa  wamwene limanya limo ha banasoneka lizina lyendi. Oku kwapwile kubezika kwakama manene!—Kujo 21:10-14; Efeso 2:20.

¹⁵ Ei nganda yaliseze na bingada byoshe. Yakele na bitapalo bya ngolinde ya kujela, yakele na mapito a makwalale akupwa 12, cibumbe cayo capwile ca mamanya amabwa, co lalo baisetekele mwamubwa. (Kujo 21:15-21) Oloni kuli cuma cimo kamwene muje mu nganda. Yowano atuleka ngwendi: “Co kunjamwene Njubo ya Shukulu Kalunga mu nganda, omwo Shukulu Kalunga Njambi Muka-nzili yoshe na Muna Manga bapwa Njubo yamwo. Muje mu nganda kumukakala lalo litangwa nambe ngonde, omwo bumpau bwa Njambi bukebwo bukatwilamo ceke, co Muna Manga ikeye ndeya yamwo.” (Kujo 21:22, 23) Baje bakapwa Yelusalema wamuha, bakakala hamo na Yehova. (Heve 7:27; Kujo 22:3, 4) Ngeci, Yehova na Yesu bakebo bakapwa Tembele ya muje mu nganda.

16. Bika bibakalikuwa banu, Bumwene bwa Njambi mu bukayula myaka 1,000?

¹⁶ Baka-Kilistu bakubwabesa bakabwahelela manene mubakasinganyekesesa hali ei nganda. Baka-Kilistu baje bali na lilabelelo lya kuyoya hano hasi, nabo banapande kubwahelela mubasinganyekesesa hali ei nganda. Bumwene bwa Njambi mu bukayula ha myaka 1,000, Yelusalema yaiha ikanena bibezikiso byabingi. Yowano wesekesele bibezikiso byamwene ku “ndonga ya mema a mwonyo.” Ku mukulo wei ndonga, kuli ‘miti ya mwonyo’ kuje kuli maputa a “kukangwisa miyati ya banu.” (Kujo 22:1, 2) Banu boshe bakakalako ha simbu oyo bakalikuwa ebi bibezikiso. Mukwita kwa simbu banu boshe ba kulongwa kuli Yehova bakapwa ba kulumbunuka. Kubakabinji nambe kuziba kubabala nambe kulila mwafwa ya busiwa.—Kujo 21:3-5.

17. Kwesekesa na mukanda wa Kujombolola 20:11-13, beya bakalikuwa bibezikiso bije bikakalako ha myaka 1,000 yakayula Yesu?

¹⁷ Beya bakalikuwa ebi bibezikiso? Cakulibanga, mbunga yakama ya banu baje bakoboka nzita ya Alamagidone hamo lika na banike baje bakasemukila mu kaye kakaha. Oloni mukanda wa Kujombolola capita 20 unakulahesa lalo ngwawo batsi bakasanguka. (Tandeni Kujombolola 20:11-13.) Baka-busunga hamo lika na baka-bubi baje  batsile oku kanda balilongese bya Yehova nabo bakasanguka na kuyoya hano hasi. (Vili 24:15; Yowa 5:28, 29) Kuma oku kulumbununa ngwabo batsi boshe bakasanguka mu myaka 1,000 yakayula Yesu ndi? Embwe. Baje babyanene kupangela Yehova simbu kanda batse kubakasanguka. Bakele na simbu ya kulilongesa busunga oloni bilinga byabo byamwesele ngwabyo kubasa kuyoya mu kaye kakaha.—Mateo 25:46; 2 Tesa 1:9; Kujo 17:8; 20:15.

18. Bika bikalingiwa hano hasi ku mamaneselelo a myaka 1,000?

¹⁸ Ku mamaneselelo a myaka 1,000 banu boshe bakakala hano hasi bakapwa ba kulumbunuka. Na umo wahi akakala na bubi buje butwatambwile kuli Adama. (Loma 5:12) Bubi butwatambwile kuli Adama bukahwa njwa. Ngeci, oku kumwesa ngwabo banu bakakala hano hasi ku mamaneselelo a myaka 1,000 ‘bakasanguka’ mwafwa bakapwa ba kulumbunuka.—Kujo 20:5.

19. Mwafwa bika kunapande kukakala ceseko ca mamaneselelo?

¹⁹ Tuzibuka ngwetu Yesu watwaleleho kupwa wa kulongwa kuli Njambi nameme Satana wamwesekele. Kuma banu ba kulumbunuka bakatwalelelaho kupwa ba kulongwa kuli Yehova omwo Satana akabeseka ndi? Munu na munu akalyangwila bya kulinga omwo Satana bakamupatula mu mbulu ku mamaneselelo a myaka 1,000. (Kujo 20:7) Baje bakatwalelelaho kupwa ba kulongwa ha simbu oyo bakatambula mwonyo wa myaka yoshe na kupwa ba kupatuka mu busunga. (Loma 8:21) Oloni baje bakalikwatasana na Satana mu kutengulukila Yehova bakabanyongesela kumo na Liyabolo na bandemone bendi.—Kujo 20:8-10.

20. Muliziba bati ha bupolofweto buli ku mukanda wa Kujombolola butunasimutwiya?

²⁰ Muliziba bati munima ya kusimutwiya ha biñanda bimo bili ku mukanda wa Kujombolola? Twabwahelela manene kuzibuka ngwetu netu tuli na kushulisilila obu bupolofweto. Kuma oku kukumishongangeya mulanyeko bakweni mangana nabo baije mu kulemesa kwa busunga ndi? (Kujo 22:17) Twabandamena manene kukamona ebi byuma mubikalishulisilila kulutwe. Ngeci, twasa kwendeka majwi endekele kapositolo Yowano uje wendekele ngwendi: “Mukemwo bene cipwemo. Ija, Mwene Yesu.”—Kujo 22:20.