1-2. Mwafwa bika tunapande kulilongesa biñanda bili ku mukanda wa Kujombolola?

 KUMA simbu imo mwayongweleho bikupulo bya munu umo? Omwo mukenga ebi bikupulo munanguka ngweni kuli banu babangi kumuzibuka. Oloni mumweta ha cikupulo cimo, mwimana kamandondo na kucitalesesa. Mwafwa bika? Mwafwa neni hamuli. Omwo mucitalesesa mwanuka litangwa libamikupwile nokwo kubamikupwilile cikupulo. Co lalo mucitalesesa mwamubwa mangana muzibuke banu boshe baliho. Eci cikupulo ca seho manene kuli yeni.

² Mukanda wa Kujombolola unapu ngwe cije cikupulo citunendeka. Mwafwa bika? Mwafwa ya byuma bibali. Cakulibanga, owu mukanda bausonekelele yetu. Mu vesi ya kulibanga muli majwi akwendeka ngwawo: ‘Mu libulu eli banasonekamo byuma bije byajombolwele Yesu Kilistu. Njambi wamwanene kujomboloka oku ngeci asholole kuli bangamba ba Njambi bije bikalingiwa bwasi-bwasi.’ (Kujo 1:1) Ngeci, byuma bibanasoneka omu mu mukanda kubabisonekelele banu boshe, oloni banabisonekela bangamba ba Njambi. Ha kupwa banu ba Njambi kutwapandele kukomoka kuzibuka ngwetu netu tuli na kushulisilila bupolofweto buli oku ku mukanda. Ngeci, omwo tutanda mukanda wa Kujombolola, tutanda biñanda bije binatukundama.

3-4. Kwesekesa na mukanda wa Kujombolola, obu bupolofweto bukalishulisilila simbu muka, co bunatukundama bati?

³ Cuma camucibali citulingisa tulilongesa obu bupolofweto, inapu simbu ibulishulisilila. Kapositolo Yowano wa polofwetele byei simbu omwo wendekele ngwendi: ‘Ha litangwa  lya Mwene sipilitu ya Njambi yakele hamo nange.’ (Kujo 1:10) Yowano mwasonekele awa majwi, mu 96 C.E., “litangwa lya Mwene” te licili kulako. (Mateo 25:14, 19; Luka 19:12) Oloni kwesekesa na bupolofweto bwa mu Mbimbiliya lije litangwa lyashangumukile mu 1914 omwo Yesu washangumukile kuyula mwilu. Kushwa mu 1914, bupolofweto bwa ku mukanda wa Kujombolola, buje bunakundama banu ba Njambi bwashangumukile kulishulisilila. Cili bene, tuli na kuyoya mu simbu ibatumbula mu Mbimbiliya ngwabo “litangwa lya Mwene.”

⁴ Tunapande kwaka manene mbunge ku majwi ali ku mukanda wa Kujombolola 1:3. Ou mukanda ngwawo: ‘Abwahelela uje ali na kutanda mu kutambekela, co lalo babwahelela baje batolilila ku majwi a bupolofweto na kwononoka bije bibanasoneka mu libulu eli! Omwo simbu ili muyehi omwo byoshe ebi bikalingiwa.’ Cili bene, tunapande kutanda mu kutambekela na ‘kutolilila ku majwi a bupolofweto’ na ‘kuwononoka.’ Majwi muka atunapande kwononoka?

5. Mukanda wa Kujombolola umwesa bati seho ya kulemesa Yehova mu ngila ije inapande?

⁵ Capita ya kulibanga ya mukanda wa Kujombolola itumwesa ngwayo Yesu azibuka byuma byoshe bije bili na kulingiwa mu bikungulukilo bya banu bendi. (Kujo 1:12-16, 20; 2:1) Yesu wamwesele ngoco mu majwi asonekekelele bikungulukilo bya kupwa 7 bya ku Asia Minor. Mu majwi endi, wendekele byuma bibapandele kulinga baka-Kilistu ba kulibanga mangana balemese Yehova mungila ije inapande. Co byuma byendekele byakundama baka-Kilistu boshe ano matangwa. Majwi endekele Yesu atulongesa bika? Amwesa ngwawo Yesu ha kupwa ntwama yetu, azibuka mubunafwila busamba bwetu na Yehova. Yesu ali na kumona byuma byoshe bili na kulingiwa. Azibuka bitunapande kulinga mangana tutwaleleleho kuzibisa Yehova kubwaha ku mbunge. Majwi muka endekele Yesu aje atunapande kwononoka ano matangwa?

6. (a) Kwesekesa na majwi a Yesu ali ku mukanda wa Kujombolola 2:3, 4, bukalu muka bubakele nabo baka-Kilistu ba ku cikungulukilo ca Efeso? (b) Bika bitulilongesako?

⁶ Tandeni Kujombolola 2:3, 4. Twaleleleniho kuzema Yehova ngwe mumwalingililile lwa kulibanga. Majwi a Yesu kuli baka-Kilistu ba mu cikungulukilo ca Efeso amwesa ngwawo bakolesele, co lalo batwaleleleleho kupangela Yehova nameme baliwanene na tuyando twa kuliseza-seza. Oloni mu kwita kwa simbu, kubatwaleleleho kuzema Njambi ngwe mubalingililile lwa kulibanga. Bapandele kuzema Njambi ngwe mubalingilile lwa kulibanga mangana bamulemese mu ngila ije inapande. Mu ngila imo lika, netu kutwapandele lika kukolesa, oloni tunapande kusinganyekesesa na ha byuma bitulingisa tukolese. Njambi kesi kwaka lika mbunge ku byuma bitukalingi, oloni akaka mbunge na ku byuma bikatulingisa tulinge obyo byuma. Ashaka ngwendi tumulemese mwafwa twamuzema, co lalo tukakandelela ku byuma byanatulingila.—Visi 16:2; Mako 12:29, 30.

7. (a) Kwesekesa na mukanda wa Kujombolola 3:1-3, bukalu muka bwa mwene Yesu kuli baka-Kilistu ba ku cikungulukilo ca Salendisiya? (b) Bika bitunapande kulinga?

⁷ Tandeni Kujombolola 3:1-3. Tunapande kutwalelelaho kupwa ba kutona. Baka-Kilistu ba ku cikungulukilo ca Salendisiya nabo bakele na bukalu. Nameme ha kulibanga bakele na kupangela Yehova na ntwima, oloni mu kwita kwa simbu bashangumukile kuzeya, mukemwo Yesu wabalekele ngwendi ‘benduke.’  Ei ñanda itulongesa bika? Tuzibuka ngwetu Yehova kakebala bipangi byetu. (Heve 6:10) Oloni kutwapandele kusinganyeka ngwetu ha simbu ino kutwapandele kupangela Yehova mwafwa twamupangelele laja kunima. Nameme kuli byuma bimo binasa kutwonowesa kupanga ngwe mutwakele na kupangela kunima, oloni tunapande kutwalelelaho kuzezama na ‘bipangi bya Mwene’ mangana tutwaleleleho kupwa ba kutona kweta na kushongo.—1 Koli 15:58; Mateo 24:13; Mako 13:33.

8. Bika bitulilongesa ku Majwi abasonekelele baka-Kilistu ba ku cikungulukilo ca Laondisiya aje atuwana ku mukanda wa Kujombolola 3:15-17?

⁸ Tandeni Kujombolola 3:15-17. Tunapnde kupangela Yehova na mbunge yetu yoshe. Majwi a Yesu alekele baka-Kilistu ba ku cikungulukilo ca Laondisiya amwesele ngwabo nabo bakele na bukalu. Kulemesa kwabo kwapwile kwa “ngwinye-ngwinye.” Mukemwo Yesu wabalekele ngwendi bakele mu “tuyando.” Bapandele kulemesa Yehova na ntwima. (Kujo 3:19) Bika bitulilongesako? Tunapande kukandelela Yehova ku byuma byali na kutwana kwitila mu munga yendi, mangana tutwaleleleho kumupangela na ntwima. (Kujo 3:18) Kushakezeka bufuko kukwapandele kutwonowesa kupangela Yehova na ntwima.

9. Kwesekesa na majwi a Yesu alekesele baka-Kilistu ba ku Pelengamu na Tiyatila bika bitunapande kubyana?

⁹ Kutwapandele kutolilila ku bilongesa bya baka-kutengulukila. Yesu wanangwile baka-Kilistu bamo ba ku Pelengamu baje bakele na kunena lyangununo. (Kujo 2:14-16) Washangalele baka-Kilistu baku ku Tiyatila baje babyanene “cisiñiko ca kuloba ca Satana” co wabashongangeyeye ngwendi ‘bakakateye’ ku busunga. (Kujo 2:24-26) Baka-Kilistu baje bongumukile na bilongesa bya makuli bapandele kutenguluka. Bika bitulilongesako yetu? Tunapande kubyana bilongesa byoshe bije kubilitombola na mashiko a Yehova. Baka-kutengulukila banasa ‘kulimwesa ngwe bali na kulinga bya bunjambi,’ oloni kubesi na kuyoya mu ngila ya bunjambi. (2 Tima 3:5) Nga tulilongesa Lijwi lya Njambi, co tuzibuka bilongesa bya makuli na kubibyana.—2 Tima 3:14-17; Yunda 3, 4.

10. Bika bikwabo bitulilongesa ku majwi a Yesu alekele baka-Kilistu baku cikungulukilo ca Pelengamu na Tiyatila

¹⁰ Kutwapandele kukala na bilinga bya bupangala nambe kubikundwiya mu ngila yoshe-yoshe. Kuli bukalu bukwabo lalo bubakele nabwo baka-Kilistu ba ku Pelengamu na Tiyatila. Yesu wapayele baka-Kilistu bamo bomu mu bikungulukilo, mwafwa bakele na bilinga bya bupangala.  (Kujo 2:14, 20) Bika bitulilongesako? Nameme tunapangela Yehova ha myaka ya ingi, co lalo ha simbu ino tuli na bipangi byabingi mu cikungulukilo, oloni nga tuli na kulinga bupangala, co Yehova katubezikisa. (1 Samwe 15:22; 1 Petu 2:16) Tunapande kwononoka mashiko a Yehova nameme banu babangi mu kaye kubesi na kuwononoka.—Efeso 6:11-13.

11. Bika bitunalilongesa? (taleni cipalo ca “ Byuma bitulilongesako.”)

¹¹ Bika bitunalilongesa? Twalilongesa ngwetu tunapande kulemesa Yehova mungila ije inapande. Nga tuli na kulinga byuma bimo bije kubilitombola na mashiko a Yehova, co tunapande kubyecela bwasi-bwasi mangana tulemese Yehova mu ngila ije inapande. (Kujo 2:5, 16; 3:3, 16) Oloni kuli majwi akwabo endekele Yesu kuli baka-Kilistu bomu mu bikungulukilo. Majwi muka bene owo?

12. Byuma muka byendekele Yesu ku cikungulukilo ca Simina na Filandelufiya bije binatukundama? (Kujombolola 2:10)

¹² Tusimutwiyeni oni ha majwi endekele Yesu kuli baka-Kilistu bamu bikungulukilo bya Simina na Filandelufiya. Wabalekele ngwendi kubapandele kutewa kubayandesa mwafwa kulutwe Yehova akababezikisa nga batwalelelaho kupwa ba kulongwa. (Tandeni Kujombolola 2:10; 3:10) Bika bitulilongesako? Tunapande kulibwahesela ngwetu simbu yoshe-yoshe banasa kutuyandesa. (Mateo 24:9, 13; 2 Koli 12:10) Ngeci, tunapande kukolesa nga batuyandesa. Mwafwa bika kunapu kwa seho kulinga ngoco?

13-14. Biñanda bili ku mukanda wa Kujombolola capita 12 binakundama bati banu ba Njambi?

¹³ Mukanda wa Kujombolola utumwesa ngwawo banu ba Njambi bakabayandesa “ha litangwa lya Mwene” kulumbununa ano matangwa a kukotoka. Mukanda wa Kujombolola capita 12 umwesa ngwawo Bumwene bwa Njambi mubwashangumukile kuyula, kwa katukile nzita mwilu. Mingeli ujwe wapwa Yesu Kilistu hamo lika na tungelo bendi balwisile Satana na bandemone bendi. (Kujo 12:7, 8) Ngeci, aba bitozi ba Njambi babahyanene na kubombila hano hasi, co bali na kuyandesa manene banu. (Kujo 12:9, 12) Ei ñanda yakundama bati banu ba Njambi?

¹⁴ Mukanda wa Kujombolola utuleka byanalingi Satana mu banamusheke mwilu. Ha simbu ino kasa kwiluka mwilu, ngeci ali na kuyandesa bakubwabesa baje bacili hano hasi. Aba bakubwabesa bali na kwimanenako Bumwene bwa Njambi, co ‘bali na cipangi ca kwambulula busunga buje bwajombolwele Yesu’ (Kujo 12:17; 2 Koli 5:20; Efeso 6:19, 20) Obu bupolofweto bunalishulisilila bati?

15. Beya bemaneneneko ‘bakaleho babali’ babanendeka ku mukanda wa Kujombolola capita 11, co bika byalingiwile kuli bakebo?

 ¹⁵ Satana walingisile bitozi ba Njambi balwise bandolome bakubwabesa baje bakele na kutwamenena cipangi ca kwambulula. Aba bakubwabesa bemaneneneko ‘bakaleho babali’ baje babanendeka ku mukanda wa Kujombolola ngwabo babatsiile. * (Kujo 11:3, 7-11) Mu 1918, bandolome bakupwa 8 baje bakele na kutwamenena mu munga, bababangeyeye biñanda bya makuli, co babakutile ha myaka yaingi. Kwasholokele ngwe cipangi cibakele na kulinga aba bakubwabesa cahwile.

16. Byuma muka byakukomokesa byalingiwile mu mwaka wa 1919, co Satana natwalelelaho kulinga bika kutunda ha simbu ije?

¹⁶ Bupolofweto buli ku mukanda wa Kujombolola capita 11, bumwesa lalo ngwabo baje ‘bakaleho babali’ bakasanguka munima ya ka simbu kakandondo. Obu bupolofweto bwalishulisilile mwafwa mukwetile lika mwaka umo kutunda haje habakutilile baje bandolome, kwalingikile cuma cimo ca kukomokesa. Mashangumukilo a mwaka wa 1919, baje bandolome bakubwabesa babafumisile mu kamenga, co munima babalekele ngwabo kubakele na mulonga. Oho bene, aba bandolome bashangumukile kupanga cipangi ca kwambulula. Oloni Satana kecelele kulwisa banu ba Njambi. Kushwa bene ha simbu ije, Satana napangesa mapakeso akufwa ngwe “ndonga” mu kuyandesa banu ba Njambi. (Kujo 12:15) Ngeci, tubaboshe tunapande kukala na lukakateya na likulahelo lya kukanyama.—Kujo 13:10.

17. Nameme Satana na yandesa banu ba Njambi, bukwasi muka bubanatambula ku banu baje kubabandamenene ngwabo basa kubakwasa?

¹⁷ Mukanda wa Kujombolola capita 12 umwesa ngwabo banu ba Njambi bakatambula bukwasi ku banu baje kubasinganyekele ngwabo basa kubakwasa. Kunapu lika ngwe “kaye” kakalehula ndonga ije imanena mapakeso. (Kujo 12:16) Ebi bikebyo binalingiwa. Simbu imo binkuta bimo bya muno mu kaye ka Satana bikemanenako banu ba Njambi. Ha bisimbu byabingi bangamba ba Njambi banahyana biñanda mu binkuta, co oku kunabalingisa bapange mu kuzituka. Bakapangesa  bati ei simbu ibakapu bakuzituka? Bakaipangesa mukulinga cipangi canabana Yehova. (1 Koli 16:9) Bika byalibungila omu mu cipangi?

18. Cipangi muka ca seho cituli na kulinga muno mu matangwa a kukotoka?

¹⁸ Yesu wapolofwetele ngwendi banu bendi bakambulula “biñanda byabibwa bya Bumwene” mu kaye koshe simbu kanda mamaneselelo aije. (Mateo 24:14) Mubakalingi eci cipangi, bakatambula bukwasi kutundilila ku kangelo umo nambe tungelo babangi baje bali na “biñanda byabibwa bya kwambulula kuli banu ba hano hasi na ku mafuti oshe ku miyati yoshe na ku bindaka byoshe na ku banu boshe.”—Kujo 14:6.

19. Muzimbu muka ukwabo ubanapande kwambulula baje bazema Yehova?

¹⁹ Muzimbu waubwa wa Bumwene keti ukewo lika ubanapande kwambulula banu Njambi. Banapande lalo kukwasa mu cipangi cibali na kupanga tungelo babanendeka ku mukanda wa Kujombolola capita 8 kutwala ha 10. Aba tungelo bali na kwendeka bukalu buje bukezila banu baje bali na kubyana Bumwene bwa Njambi. Ngeci Bakaleho ba Yehova bali na kwambulula muzimbu wa kunyongesa uje unalifu na “nyonzi ya mamanya na tuhya.” Ou muzimbu umwesa ngwawo Yehova akanyongesa kaye ka Satana. (Kujo 8:7, 13) Banu banapande kuzibuka ngwabo kukotoka kwa kaye kuli muyehi na kutengulula bilinga byabo byabibi mangana bakwoboke litangwa lya Yehova lya bukalu. (Zefa 2:2, 3) Oloni ou muzimbu kutwesi na kuwambulula manene. Tunapande kupwa ba kusimpa asina tuwambulule. Mu simbu ya kayando kakama, ou muzimbu, ukalubalesa manene banu.—Kujo 16:21.

20. Bika bitukasimutwiya mu bilongesa bibali binatako?

²⁰ Tunapande kwononoka awa ‘majwi a bupolofweto’ mwafwa netu tuli na kushulisilila bibanendeka ku mukanda wa Kujombolola. (Kujo 1:3) Oloni twasa kutwalelelaho bati kukolesa na kwambulula ei mizimbu mu kusimpa? kuli byuma bibali byasa kutukwasa tukolese. Cakulibanga, byuma bibanendeka ku mukanda wa Kujombolola bije bikalingiwa ku bitozi ba Njambi. Camucibali, bibezikiso bitukalikuwa nga tutwalelelaho kupwa ba kulongwa. Tukasimutwiya ebi biñanda mu bilongesa bibali binatako.