LISA wendekele byamulingisile alilongese busunga ngwendi: “Ngozi ibanjimwesele bandolome na bandokazi ikeyo yanjishongangeyeye manene.” * Anne nendi wendekele ngwendi: “Ngozi ibanjimwesele ikeyo yanjishongangeyeye manene kutubakana binjalilongesele.” Hano aba bandokazi babali boshe bakalikuwu kutanda Mbimbiliya na kusinganyekesesa ha byuma bibatanda, oloni ngozi ibabamwesele ikeyo yabashongangeyeye manene.

Twasa kumwesa bati ngozi ije yasa kushongangeya bakwetu? Tusimutwiya ha bingila bibali. Mu majwi na mu bilinga. Co lalo tusimutwiya ha banu batunapande kumwesa ngozi.

Munakazi wamubwa ibanendeka ku mukanda wa Visimo capita 31, akendeka na ngozi. (Visi 31:26) Ngozi ikamulingisa angule mwamubwa byakwendeka na ngila yaibwa yakubyendekelamo. Bisemi ba banalume nabo banapande kukala na ngozi. Bisemi babangi bazibuka ngwabo kutenuka kwasa kulubalesa munabo na kumwonowesa kutolilila ku byuma bibamuleka. Nga bisemi bamwesa ngozi omwo basimutwiya na bana babo, babatolilila na kubononoka.

Twasa kumwesa bati ngozi omwo tusimutwiya na bakwetu? Cikumbululo cili ku Visimo 31:26. Ou mukanda ngwawo: “Akendeka . . . na mana.” Oku kulumbununa ngwabo tunapande kwangula mwamubwa majwi. Tunapande kulihula ngwetu: ‘Ebi byuma binjishaka kwendeka bilubalesa banu indi binena kwoloka?’ (Visi 15:1) Kwapwa kwa seho kusinganyeka ha byuma bitushaka kwendeka simbu kanda tubyendeke.

Mukanda wa Visimo wendeka lalo ngwawo: “Majwi a lishamena abinjisa ku mbunge ngwe munu batibi moko ya mukwale.” (Visi 12:18) Kusinganyekesesa mubalizibila bakwetu ha majwi atwendeka na endekesi yetu, kutulingisa twangule mwamubwa bya kwendeka. Kukala na ngozi kutulingisa tujenjuke ku kwendeka majwi amabi na kutenuka. (Efeso 4:31, 32) Ngozi itulingisa twendeke majwi amabwa na kwendeka mu kuwa mbunge. Yehova wamwesele mwanja waubwa omwo wasimutwiiye na ngamba yendi Elinja uje walubalele manene. Kangelo uje wemaneneneko Yehova wendekele nendi na “lijwi lya kuyebeta kamandondo.” (1 Vimye 19:12) Oloni kukala na ngozi kukulumbununa lika kupangesa majwi amabwa. Tunapande kulinga byuma bimwesa ngwabyo tuli na ngozi. Twasa kulinga bati ngoco?

Tutembwinina Yehova nga twendeka majwi amabwa na kulinga byuma bimwesa ngwabyo tuli na ngozi. (Efeso 4:32; 5:1, 2) Lisa itunabanga kwendeka wendekele ha ngozi ibamumwesele Bakaleho ngwendi: “Mubatulekele ngwabo tujaluke mu njibo mukukasumuna, ndolome na mwebwendi batwakele na kukunguluka nabo balombele lisesa ku bipangi byabo mangana bakutukwase kulongekeya. Ha simbu oyo te kanda njishangumuke na kulilongesa Mbimbiliya.” Ngozi ibamwesele aba Bakaleho kuli Lisa yamushongangeyeye ashangumuke kulilongesa busunga.

Anne itunabanga kwendeka wakandeleleleko manene ku ngozi ibamumwesele Bakaleho. Wendekele ngwendi: “Kwakele na kunjikaluwila manene kukulahela banu mwafwa banu babangi ano matangwa kubesi na busunga.”  Watwaleleleho kwendeka ngwendi: “Munjaliwanene na Bakaleho, kunjabakulahelele. Njalihwile ngwange, ‘bika bibanjimwesela cizemo?’ Oloni ngozi yanjimwesele ndokazi uje wakele na kunjilongesa Mbimbiliya yanjilingisile njimukulahele.” Bubwa muka bwatundilemo? “Mu kwita kwa simbu, njashangumukile kwaka manene mbunge ku byuma binjakele na kulilongesa.”

Twamono ngwetu Lisa na Anne bashangumukile kulilongesa busunga mwafwa ya ngozi ibabamwesele bandolome na bandokazi mu cikungulukilo. Ngozi ibabamwesele bandolome na bandokazi ikeyo yabalingisile bakulahele Yehova na banu bendi.

Bamo bakapangesa majwi amabwa mwafwa ku mwela kubakolelele bakapangesa majwi amabwa. Kulinga ngoco kukwabihile. Oloni kumwesa ngozi mwafwa ya cisemwa cetu kukulumbununa ngwabo tuli na kutembwinina Njambi.—Esekeseni Vilinga 28:2.

Ngozi yapwa bushuka bwa sipilitu. (Ngala 5:22, 23) Ngeci, tunapande kulomba sipilitu  ya kujela mangana itukwase. Tunapande kutembwinina Yehova na Yesu. Co ha kupwa baka-Kilistu twazema bakwetu. Ngeci, tukamwesa ngozi mwafwa twazema Yehova Njambi na bakwetu. Yehova akabwahelela mwafwa tukamwesa ngozi kutundilila kwisi ya mbunge.

Kakangi kukapu kwakwasi kumwesa ngozi kuli baje batumweseleho ngozi. (2 Samwe 2:6) Ngila itwasa kubamweselamo ngozi inapu kubakandelela. (Kolo 3:15) Oloni twasa kulinga bati nga tuliziba ngwetu kutwapandele kumwesa munu umo ngozi?

Anukeni ngweni Yehova natwakela mwanja waubwa wa kumwesa ngozi ku banu boshe. Co Lijwi lyendi litulongesa ngwalyo netu tunapande kukala na ngozi. Lijwi lya “ngozi” banalipangesa manene mu Bisoneka bya Cigriki bya baka-Kilistu. Njambi akatumwesa bati ngozi?

Yehova namwesa ngozi ku banu boshe ha kubana byuma bije bibakwasa balikuwe kuyoya. (Mateo 5:45) Yehova watumwesele ngozi nameme ha simbu ije kutwamuzibukile. (Efeso 2:4, 5, 8) Cakumwenako, watwanene Munendi umo lika mangana atutsile. Kapositolo Paulu wendekele ngwendi Yehova watwanene ndando ya kupatula mwafwa ‘kutetela kwendi kunapu kwakama.’ (Efeso 1:7) Co lalo namene twabihisa, oloni Yehova akatwalelelaho kutulongesa na kututwamenena. Mashiko endi na majwi endi apwa ngwe “nyonzi.” (Kwitu 32:2) Kutwasa kumufweta ha byuma byabingi byanatulingila. Tuzibuka ngwetu ngozi ya Yehova ikeyo inatulingisa tukale na lilabelelo lya byuma bya kulutwe.—Esekeseni 1 Petulu 1:13.

Cili bene, ngozi ya Yehova yapwa yakama manene. Ngeci, netu tunapande kutembwinina Yehova uje akamwesa ngozi ku banu boshe. Tunapande kumwesa ngozi ku bakwetu simbu yoshe. (1 Tesa 5:15) Nga tutwalelelaho kumwesa ngozi, co tuzembeleka binaanga byetu, bandolome na bandokazi, batukapanga nabo, batukakobela nabo sikola na batwalyata nabo.

Majwi eni amabwa na bilinga byabibwa byasa kushongangeya bamo mu naanga yeni nameme mu cikungulukilo. Mwasa kukwasako umo mu cikungulukilo ceni uje ashaka kumukwasa kujelesa ha njibo nambe kulima nambe kulanda byuma. Co lalo mu lihya nga kuli umo atondeka bukwasi, mwasa kumukwasa.

Tutwaleleleniho kumwesa ngozi mu bilinga na majwi. Nga tulinga ngoco, co tutembwinina Yehova.