CILONGESA 27
‘Kulahela Yehova’
“Kulahela Yehova, simpa, co kolesa.”—Myaso 27:14, NWT.
MWASO 128 Kakateyeni Kweta na Kushongo
BILI MUNO MU CILONGESA *
1. (a) Byuma muka byanakulahesa Yehova? (b) Kukulahela Yehova kulumbununa bika?
YEHOVA nakulahesa banu baje bamuzema byuma byabibwa. Ololo amanesa mishongo, busiwa na kutsa. (Kujo 21:3, 4) Akakwasa “baka-kulikehesa” baje bamukulahela mangana bakatengulule kano kaye kupwa paradaisi. (Myaso 37:9-11) Kutundaho, akakwasa umo na umo wetu alikute nendi busamba, co busamba bwetu nendi bukakanyama manene kutubakana mubunakanyamena ha simbu ino. Ei ikapwa simbu yaibwa manene. Oloni byuma muka bitulingisa tukulahele ngwetu byuma byanakulahesa Njambi bikalishulisilila? Yehova akashulisilila byuma byoshe byakakulahesa mukemwo ‘twamukulahela.’ (Myaso 27:14) Tumwesa ngwetu twamukulahela nga tubandamena simbu yakashulisilila byuma byoshe byanakulahesa.—Isaya 55:10,11.
2. Cikulaheso muka canashulisilila laja Yehova?
2 Yehova namwesa ngwendi akashulisilila byuma byakakulahesa. Cakumwenako, ku mukanda wa Kujombolola, Yehova wakulahesele ngwendi mu matangwa a kukotoka akakungulula banu ba ku mafuti a kuliseza-seza na bindaka bya kuliseza-seza mangana balikwatasane na kumulemesa mu ngila inapande. Ano matangwa aba banu bakebo babatumbula ngwabo “mbunga yakama.” (Kujo 7:9, 10) Nameme ei mbunga yapwa ya banalume, banakazi na banike ba miyati, bindaka na bisemwa bya kuliseza-seza, oloni bapwa ba kulikwatasana. (Myaso 133:1; Yowa 10:16) Co lalo bapwa baka-kwambulula ba ntwima. Simbu yoshe banalibwahesela kulekako bakwabo bya kaye kakaha. (Mateo 28:19, 20; Kujo 14:6, 7; 22:17) Nga neni muli mu mbunga yakama, co mwamona lilabelelo lyeni kupwa lya seho manene.
3. Satana ashaka kulinga bika?
3 Liyabolo kashaka ngwendi mukale na lilabelelo. Ashaka mukulahele ngweni Yehova kamyakele mbunge, co lalo kashulisilila byanakulahesa. Nga Satana atwonowesa kukala na lilabelelo, co tuzeya na kulikela kupangela Yehova. Ngwe mutumwena muno mu cilongesa, Liyabolo washakele kuzeyesa likulahelo lya Yombi na kumwonowesa kupangela Yehova.
4. Bika bitusimutwiya muno mu cilongesa? (Yombi 1:9-12)
4 Muno mu cilongesa, tusimutwiya bingila byapangesele Satana mangana onowese Yombi kupwa wa kulongwa kuli Yehova. (Tandeni Yombi 1:9-12.) Tusimutwiya lalo bitulilongesa kuli Yombi na byuma bitulingisa tukulahele ngwetu Njambi watuzema, co lalo akashulisilila bikulaheso byendi.
SATANA WASHAKELE KUZEYESA LIKULAHELO LYA YOMBI
5-6. Bika byalingiwile kuli Yombi mu simbu yaindondo lika?
5 Yombi wakele na kuyoya mwamubwa, co wapwile kabusamba ka Yehova wakama. (Yombi 1:1-5) Wakele na naanga yakama ije yalikwatasanene, co lalo wakele na bufuko bwabwingi. (Yombi 1:13-17) Oloni byuma byoshe byakele nabyo byanyongele mu litangwa limo lika. Cakulibanga bufuko bwendi bwoshe bwanyongele. Kutundaho bana bendi boshe batsile. Acisinganyekeni mwalizibilile Yombi. Bisemi bakazibi manene busiwa nga batsisa mwana. Ngeci, Yombi na munakazi wendi bazibile manene busiwa, co bapokokele manene bimbunge omwo bazibile ngwabo bana babo ba kupwa 10 boshe banatsi. Mukemwo Yombi wazibile manene kubabala ku mbunge, co watabwile buzalo bwendi na kulyumbila hasi oku ali na kulila.—Yombi 1:18-20.
6 Kutundaho Satana walingisile Yombi abinje mushongo wakama manene uje wamulingisile ashauke. (Yombi 2:6-8; 7:5) Simbu kanda aliwane nobu bukalu, banu bakele na kumusingimika manene mu citingitingi mwakele. Banu bakele na kwija kuli ikeye kwakulomba mangana abanangule. (Yombi 31:18) Oloni ha simbu eyi bandolome bendi, babusamba bendi ba ha mbunge na bangamba bendi bamuyengwile.—Yombi 19:13, 14, 16.
Bandolome na bandokazi babangi bakazibisisa mwalizibililemo Yombi omwo waliwanene na bukalu (Taleni palagilafu 7) *
7. (a) Yombi wasinganyekele ngwendi bukalu bwendi bwatundile kuli, oloni kalingile bika? (b) Bukalu muka bwanasa kuliwana nabwo muka-Kilistu buje bunasa kulifwa nobu bubanamwesa ha cikupulo?
7 Satana washakele Yombi asinganyeke ngwendi wakele na kuyanda mwafa Yehova wamulubalelele. Cakumwenako, Satana walingisile lihunzi lilundumune njibo mubakele na kulila bana ba Yombi boshe ba kupwa 10. (Yombi 1:18, 19) Co lalo walingisile tuhya tutunde mwilu na kwenyeka bimuna ba Yombi boshe na bangamba bendi boshe bakele na kunyunga aba bimuna. (Yombi 1:16) Yombi wasinganyekele ngwendi Yehova ikeye watumine lije lihunzi na tuhya mwafwa byatundile mwilu. Ngeci, wasinganyekele ngwendi hamo kuli byuma bimo byalingile bije byalubalesele Yehova Njambi. Nameme ngoco Yombi kashawile ishe wa mwilu. Yombi wanukile ngwendi Yehova wamwanene byuma byabibwa ha myaka yaingi. Ngeci wasinganyekele ngwendi kapandele lika kutambula byuma byabibwa, oloni wapandele kutambula nebi byabibi. Co wendekele ngwendi: “Lizina lya Yehova batwaleleleho kulishangazala.” (Yombi 1:20, 21; 2:10) Yombi watwaleleho kupwa wa kulongwa kuli Yehova nameme bufuko bwendi bwahwile, co bana bendi batsile, co lalo wakele na kubinja. Oloni Satana kalikelele kumweseka.
8. Cuma muka cikwabo calingile Satana mangana azeyese Yombi?
8 Satana wapangesele lalo babusamba ba Yombi batatu baje bamulingisile alizibe ngwendi kapwile wa seho. Aba banalume bendekele ngwabo Yombi wakele na kuyanda mwafwa walingile byuma byabibi byabingi. (Yombi 22:5-9) Besekele lalo mubaselele mwoshe kumulingisa asinganyeke ngwendi nameme akeseka bati kulinga byuma byabibwa, oloni kulifwita kwendi kwapwile kwangoco kuli Yehova. (Yombi 4:18; 22:2, 3; 25:4) Aba banalume bashakele lika ngwabo Yombi asinganyeke ngwendi Njambi kamuzemene, co na kumupangela bene kukwapwile kwa seho. Majwi abo alingisile Yombi alizibe ngwendi bukalu bwendi kubukahu.
9. Bika byakwasele Yombi apwe wa kusimpa na kukolesa?
9 Acisinganyekeni byalingiwile ha simbu ije. Yombi wakele na kutumama mu lito oku aziba kubabala mutanya na butsiki. (Yombi 2:8) Ha simbu yaziba kubabala ngoco babusamba bendi nabo bamutatokesa na kumuleka ngwabo kapwile munu wamubwa, co na byuma byabibwa byalingile byoshe kubyapwile bya seho. Twanukeni lalo ngwetu ha simbu eyi wakele mu busiwa bwakama manene mwafwa ya bana bendi baje batsile. Yombi waliwanene na bukalu bwa kulinga na ha mesho ngengu. Hakulibanga, Yombi wolokele lika. (Yombi 2:13–3:1) Nga baje banalume basinganyekele ngwabo ha simbu yolokele Yombi, wakele na kusinganyeka bya kutengulukila Yehova, co balimbenjele. Mu kwita kwa simbu, Yombi wandwile mutwe wendi, co watalele babusamba bendi na kubaleka ngwendi: “Kunjumbila kuti kulongwa kwange kweta noho hanjikatsila.” (Yombi 27:5) Bika byakwasele Yombi apwe wa kusimpa na kukolesa nameme wakele na kuyanda? Nameme wazeyele manene watwaleleleho kukulahela ngwendi Njambi yendi uje wamuzema manene tangwa akamukwasa. Wazibukile ngwendi nameme atsa, Yehova akamusangula.—Yombi 14:13-15.
TWASA KUTEMBWININA BATI YOMBI?
10. Muzimbu wa Yombi utulongesa bika?
10 Byuma byaliwanene nabyo Yombi bimwesa ngwabyo Satana kasa kutusindiya tutengulukile Yehova, co lalo Yehova azibuka byuma byoshe bitukaliwana nabyo. Byuma byalingiwile kuli Yombi bitukwasa tuzibisise mwamubwa ñanda yakatwile Satana. Tusimutwiyeni ha byuma bimo bitulilongesa kuli Yombi.
11. Byuma muka byasa kulingiwa nga tukulahela Yehova? (Yakomba 4:7)
11 Yombi wamwesele ngwendi nga tutwalelelaho kukulahela Yehova, co twasa kukolesa mu ceseko coshe-coshe na kubyanena Satana. Bubwa muka bwasa kutunda mu kulinga ngoco? Bisonoka bimwesa ngwabyo Liyabolo atujenjuka.—Tandeni Yakomba 4:7.
12. Kukulahela ngwabo batsi bakasanguka kwatakamesele bati Yombi?
12 Tunapande kutwalelelaho kukulahela ngwetu batsi bakasanguka. Ngwe mutunamwenenene mu cilongesa cinahu, Satana akatulingisa tutewe kutsa mangana twonowe kutwalelelaho kupwa ba kulongwa. Satana wendekele ngwendi Yombi asa kulinga cuma coshe-coshe nameme kulikela kupangela Yehova mangana anyungilile mwonyo wendi. Satana wendekele makuli mwafwa Yombi watwaleleho kupwa wa kulongwa kuli Yehova nameme ha simbu yalizibile ngwendi ashaka kutsa. Yombi watwaleleho kukolesa mwafwa wakulahelele ngwendi Yehova akalingi byabibwa simbu yoshe, co lalo mu kwita kwa simbu akabwahesa byuma. Yombi wakulahelele ngwendi nameme nga mushongo wendi umutwala ku kutsa oloni Njambi akamusangula kulutwe. Yombi wakulahelele ngwendi batsi bakasanguka. Nga netu twakulahela na mbunge yetu yoshe ngwetu batsi bakasanguka, co kutwecela kupangela Yehova mwafwa ya kutewa kutsa.
13. Mwafwa bika tunapande kunanguka myeto yapangesele Satana mu kweseka Yombi?
13 Tunapande kunanguka myeto yapangesele Satana mu kweseka Yombi mwafwa ikeyo yali na kupangasa na matangwa ano. Satana wendekele ngwendi: “Munu [keti Yombi lika] ana byoshe bije ali nabyo ngeci ayoye.” (Yombi 2:4, 5) Satana walumbunwine ngwendi kutwazemene Yehova Njambi na bimbunge byetu byoshe, Co tunasa kulinga byuma bije kubilitombola na mashiko endi nga kulinga ngoco kunyungilila mwonyo wetu. Satana wamwesele lalo ngwendi Njambi katuzemene, co nameme tulifwite bati kulinga byuma bije bimuzibisa kubwaha tulisina ngoco. Oloni Satana kasa kutukwisa, yetu tunakulahela Yehova mwafwa tuzibuka myeto yakapangesa.
14. Bika bitwasa kunanguka nga tuliwana na byeseko? Endekeni cakumwenako.
14 Tunapande kunanguka ngwetu byeseko bimo bitukaliwana nabyo bikatukwasa tunanguke buzeye bwetu. Byeseko byaliwanene nabyo Yombi byamukwasele ananguke buzeye bumo bwakele nabwo na kupangelaho. Cakumwenako, walilongesele ngwendi wapandele kupwa wa kulikehesa manene. (Yombi 42:3) Netu nga tuli mu byeseko, twasa kuzibuka buzeye bwetu. Ndolome Nikolay * uje ibakele mu kamenga oku ali na kubinja mishongo yakama wendekele ngwendi: “Kamenga kapwa ngwe X-ray mwafwa kanasa kukwasa muka-Kilistu anangukeko hamo hanapande kupangela.” Kunanguka buzeye bwetu kutukwasa mangana tupangeleho.
15. Iya itunapande kutolilila, co mwafwa bika?
15 Tushaka kutolilila kuli Yehova keti ku bitozi betu embwe. Yombi watolilile mwamubwa Yehova mwakele na kusimutwiya nendi. Ha simbu ije kwafwile lika ngwe Njambi ali na kwihula Yombi bihula binatako. Kuma unananguka nzili yange mu byuma binjinatanga ndi? Njizibuka byuma byoshe biuli na kuliwana nabyo. Kuma usinganyeka ngwobe kunjasa kukunyungilila ndi? Yombi wakumbulwile mu kulikehesa, co wakandelelele kuli Yehova mwafwa ya bubwa bwendi. Wendekele ngwendi: ‘Njazibukile lika byuma bije bibanjilekele bakwetu, oloni hano njinakumono na mesho ange.’ (Yombi 42:5) Yombi mwakele na kwendeka awa majwi, hamo watumamene mu lito oku ali na bimbandu ha mubila wendi hoshe, co lalo te acili na kulila bana bendi baje batsile. Nameme ngoco Yehova wakwasele Yombi ananguke ngwendi wamuzema, co lalo akamono byuma byabibwa byakalingi.—Yombi 42:7, 8.
16. Kwesekesa na mukanda wa Isaya 49:15, 16 bika bitunapande kwanuka nga tuliwana na byeseko?
16 Ano matangwa banu banasa kutushaula na kutumona ngwe tubangoco. Banasa kutubiisa lizina nameme kubiisa munga yoshe lizina na ‘kutubangeya biñanda bya makuli byeka na byeka.’ (Mateo 5:11) Byuma byaliwanene nabyo Yombi bitulongesa ngwabyo Yehova nakulahela ngwendi tutwalelelaho kupwa ba kulongwa nga tuliwana na byeseko. Yehova watuzema, co kakombila kuti banu baje bamukulahela. (Tandeni Isaya 49:15, 16.) Keti mutolilile ku biñanda bya makuli bibakendeka bitozi ba Njambi. Ndolome James wa ku Turkey uje naanga yendi yaliwanene na byeseko bya kuliseza-seza, wendekele ngwendi: “Twalimwena ngwetu kutolilila ku biñanda bya makuli ha bangamba ba Njambi kwasa kutuzeyesa. Ngeci, twakele mbunge ku byuma bitukatambula kulutwe na kuzezama mu cipangi ca Yehova. Kulinga ngoco kwatukwasa tutwaleleleho kupwa ba kubwahelela.” Netu tukatolilila lika kuli Yehova ngwe mwalingilile Yombi. Makuli abakendeka bitozi betu kuesi kuzeyesa likulahelo lyetu.
LIKULAHELO LIMIKOLESA
Yehova wabezikisile Yombi mwafwa ya kulongwa kwendi. Yombi na munakazi wendi balikuwile kuyoya mu kubwahelela (Taleni palagilafu 17) *
17. Bika bimulilongesa ku banalume na banakazi ba kulongwa babanendeka ku mukanda wa Vahebelu capita 11?
17 Kuli bangamba ba Yehova babangi baje batwaleleleho kupwa ba kusimpa na kukolesa omwo baliwanene na byeseko ngwe mwalingililile Yombi. Kapositolo Paulu wendekeleko bamo mu mukanda wasonekelele Bahebelu. Wabatumbwile ngwendi “mbunga ya bakaleho.” (Heve 12:1) Nameme baliwanene na byeseko byakama, oloni boshe batwaleleho kupwa ba kulongwa kuli Yehova. (Heve 11:36-40) Kuma kukolesa na kulifwita kwabo kwapwile kwa ngoco ndi? Embwe. Nameme bikulaheso bya Njambi kubyalishulisilile ha simbu ibakele na kuyoya, oloni batwaleleleho kukulahela Yehova. Bakulahelele ngwabo bakalimwena bikulaheso bya Yehova mubikalishulisilila mwafwa bazibukile ngwabo bali na kulinga byuma byabibwa. (Heve 11:4, 5) Byuma bibalingile byasa kutukwasa tutwaleleho kukulahela Yehova.
18. Bika bimunalyangwila kulinga? (Vahevelu 11:6)
18 Ano matangwa byuma bili na kubihya manene mu kaye. (2 Tima 3:13) Satana acili na kutwalelelaho kweseka banu ba Njambi. Nameme tukaliwane na bukalu bwakama kulutwe, tutwaleleleniho kupangela Yehova na kumwesa ngwetu ‘tunaka likulahelo lyetu muli Njambi wa kuyoya.’ (1 Tima 4:10) Byuma byalingile Njambi kuli Yombi bimwesa ngwabyo “Mwene [Yehova wapwa] muka-kutetela na mema ku mbunge.” (Yako 5:11) Ngeci, netu tutwaleleleniho kupwa ba kulongwa kuli Yehova na kukulahela ngwetu akabezikisa “baje bali na kumushakezeka.”—Tandeni Vahevelu 11:6.
MWASO 150 Shakezekeni Njambi Mangana Mukoboke
^ Nga tuziba bya banu baje bakolesele mu byeseko, kakangi tukanuka Yombi. Bika bitulilongesa kuli Yombi uje wapwile wa kulongwa? Tulilongesa ngwetu Satana kasa kutusindiya tutengulukile Yehova. Co lalo tulilongesa ngwetu Yehova azibuka bituli na kuliwana nabyo simbu yoshe. Yehova tangwa akamanesa tuyando twoshe tutuli na kuliwana natwo ngwe mwamaneselele tuyando twa Yombi. Nga tulinga byuma bije bimwesa ngwabyo awa majwi apwa a busunga, co tumwesa ngwetu twakulahela Yehova.
^ Mazina amo banawatengulula.
