CILONGESA 45
Yehova Akatukwasa Bati mu Cipangi ca Kwambulula?
‘Bakazibuka ngwabo kwakele kapolofweto hakati kabo.’ —EZEKI 2:5.
MWASO 67 “Ambulula Lijwi”
BILI MUNO MU CILONGESA a
1. Bika bituzibuka, co twakulahela bika?
TUZIBUKA ngwetu banu bamo banasa kutulwisa. Tuzibuka lalo ngwetu bakatulwisa manene kulutwe. (Ndanye 11:44; 2 Timo 3:12; Kujo 16:21) Oloni twakulahela ngwetu Yehova atukwasa. Mwafwa bika? Mwafwa Yehova natwalelelaho kukwasa bangamba bendi bapange bipangi byanabana, nameme banaliwana na bukalu bwakama. Cakumwenako, tusimutwiyeniko ha byuma bimo byaliwanene nabyo kapolofweto Ezekiyele omwo wakele na kwambulwila bajuda baje bakele mu bunzinda mu Babiloni.
2. Yehova wendekele ngwendi banu bakele na kwambulwila Ezekiyele bafwile bati, co bika bitusimutwiya muno mu cilongesa? (Ezekiyele 2:3-6)
2 Banu ba cifwa muka bakele na kwambulwila Ezekiyele? Yehova wendekele ngwendi bapwile: “baka-kujeneka kuziba,” “bakukaluwa bimbunge” na “baka-kutengulukila.” Bapwile bababi ngwe mingonga, co lalo bakele na bushungu ngwe manyewe. Mukemwo Yehova welukilile-ilukilile kuleka Ezekiyele ngwendi: “Keti uzibe lyoba.” (Tandeni Ezekiyele 2:3-6.) Ezekiyele wasele kupanga mwamubwa cije cipangi ca kwambulula cibamwanene mwafwa (1) Yehova ikeye wamutumine (2) sipilitu ya Njambi yamukwasele na (3) majwi a Njambi akanyamesele likulahelo lyendi. Ebi byuma bitatu byakwasele bati Ezekiyele? Co bikatukwasa bati ano matangwa?
YEHOVA WATUMINE EZEKIELE
3. Majwi muka atakamesele Ezekiyele, co Yehova wamukwasele bati akulahele ngwendi akala hamo nendi?
3 Yehova walekele Ezekiyele ngwendi: “Njili na kukutuma.” (Ezeki 2:3, 4) Twakulahela ngwetu awa majwi atakamesele Ezekiyele. Mwafwa bika? Mwafwa Ezekiyele hamo wanukile ngwendi Yehova wendekele majwi a kulifwa kuli Mosesa na Isaya omwo wabangwile kupwa tupolofweto bendi. (Kutu 3:10; Isaya 6:8) Ezekiyele wazibukile lalo omwo Yehova wakwaselelelemo aba tupolofweto babali kukolesa omwo baliwanene na bukalu. Ngeci omwo Yehova walekele Ezekiyele lubali ngwendi: “Njilinakukutuma,” ou kapolofweto wakulahelele na mbunge yendi yoshe ngwendi Yehova amukwasa. Kutundaho, Ezekiyele welukilile-ilukilile kwendeka ngwendi: “Shukulu Kalunga wendekele kuli yange.” (Ezeki 3:16) Co welukilile-ilukilile kwendeka lalo ngwendi: “Shukulu Kalunga wendekele lalo kuli yange.” (Ezeki 6:1) Cili bene, Ezekiyele wakulahelele ngwendi Yehova ikeye wamutumine. Ishe ya Ezekiyele wapwile kapilistu, ngeci twakulahela ngwetu walekele Ezekiyele ngwendi Yehova simbu yoshe walekele tupolofweto bendi ngwendi akala hamo nabo. Yehova walekele Isaki, Jakobu, na Jelemiya ngwendi: “Njili hamo nobe.”—Kusha 26:24; 28:15; Njele 1:8.
4. Yehova watakamesele bati Ezekiyele?
4 Baisalele babangi balingile bati mubazibile muzimbu wa Ezekiyele? Yehova wendekele ngwendi: “Banu Baisalele kubakakutolilila, nameme yange kubakanjitolilila.” (Ezeki 3:7) Banu mubabyanene kutolilila kuli Ezekiyele bamwesele ngwabo banabyana kutolilila kuli Yehova. Awa majwi akwasele Ezekiyele akulahele ngwendi konowele cipangi cendi ca kupwa kapolofweto nameme ngwabo banu kubatolililile majwi abalekele. Yehova wakulahesele lalo Ezekiyele ngwendi byuma byapolofwetele mubikalingiwa, banu ‘bakazibuka ngwabo kwakele kapolofweto hakati kabo.’ (Ezeki 2:5; 33:33) Awa majwi akuzembeleka atakamesele Ezekiyele apange cipangi ca kwambulula.
YEHOVA IKEYE AKATUTUMU
Tuzibuka ngwetu Yehova ali hamo netu nameme nga batulwisa ngwe mubalwisilile Ezekiyele (Taleni palagilafu 5-6)
5. Majwi muka ali ku mukanda wa Isaya 44:8 aje akatutakamesa?
5 Kuzibuka ngwetu Yehova ikeye natwana cipangi ca kwambulula netu kukatutakamesa. Natutumbula ngwendi tu “Bakaleho” bendi. (Isaya 43:10) Oku kunapu kubezika kwakama manene. Ngecilika Yehova mwalekele Ezekiyele ngwendi: ‘Keti uzibe lyoba,’ netu natuleke ngwendi: “Keti muzibe lyoba.” Mwafwa bika kutwapandele kutewa baje batulwisa? Mwafwa Yehova ikeye natwana eci cipangi, co ali na kutukwasa ngwe mwakwaselelele Ezekiyele.—Tandeni Isaya 44:8.
6. (a) Yehova natukulahesa bika? (b) Byuma muka bikatuzembeleka na kututakamesa?
6 Yehova natukulahesa ngwendi atukwasa. Cakumwenako, simbu kanda endeke ngwendi: “Munapu mu bakaleho bange,” Yehova wendekele ngwendi: “Omwo ukaita mu mema akuloba, njikakala nobe, kuwakakuzubika embwe. Omwo ukaita hakati ka tuhya, kuukenye embwe.” (Isaya 43:2) Mu cipangi cetu ca kwambulula tukaliwana na bukalu bwakama bwa kufwa ngwe mema akuloba na byeseko bya kufwa ngwe tuhya. Nameme ngoco, Yehova akatukwasa tutwaleleleho kwambulula. (Isaya 41:13) Banu babangi kubesi kutolilila ku muzimbu utukambulula ngwe mubalingililile banu bambulwilile Ezekiyele. Oloni oku kukulumbununa ngwabo kutwesi kubambulwila mwamubwa. Kuzibuka ngwetu Yehova akabwahelela omwo tutwalelelaho kwambulula muzimbu wendi, kukatutakamesa. Kapositolo Paulu wendekele ngwendi: “Munu na munu akatambula cikandelela kwesekesa na cipangi cendi.” (1 Kori 3:8; 4:1, 2) Ndokazi uje napu painiya ha simbu yailaha ngwendi: “Njikabwahelela manene kuzibuka ngwange Yehova akabezikisa kulifwita kwetu.”
SIPILITU YA NJAMBI YAKANYAMESELE EZEKIYELE
Cimona ca litemba lya Yehova camwene Ezekiyele camutakamesele na kumulingisa akulahele ngwendi Yehova amukwasa apange cipangi ca kwambulula (Taleni palagilafu 7)
7. Ezekiyele walizibile bati mwasinganyekesesele ha cimona camwene? (Taleni cikupulo cili ha liputa lyakulibanga.)
7 Ezekiyele walimwenenene ngwendi sipilitu ya Njambi yakala na nzili. Byuma byamwene Ezekiyele mu cimona byamukwasele ananguke ngwendi sipilitu ya kujela yakwasele tungelo ba nzili na kwendesa mawili akama manene a litemba. (Ezeki 1:20, 21) Ezekiyele walingile bati? Wasonekele ngwendi: “Munjacimwene, njawililile hasi.” Ezekiyele wakasamene manene ngeci wawililile hasi. (Ezeki 1:28) Mwasinganyekesesele ha cimona camwene, wakanyamene na kusinganyeka ngwendi sipilitu ya Njambi imukwasa apange cipangi ca kwambulula.
8-9. (a) Byuma muka byalingiwile kuli Ezekiyele omwo Yehova wamulekele ngwendi katuka? (b) Yehova watakamesele bati Ezekiyele mangana apange mwamubwa cipangi cendi ca kwambulula?
8 Yehova walekele Ezekiyele ngwendi: “Muna munu katuka. Njishaka kwendeka kuli yobe.” Awa majwi na sipilitu ya Njambi byalingisile Ezekiyele akale na nzili ya kukatuka. Ezekiyele wendekele ngwendi: ‘Sipilitu ya Njambi yakobelele muli yange, na kunjimika.’ (Ezeki 2:1, 2) Sipilitu ya Njambi yakwasele Ezekiyele omwo wakele na kupanga cipangi ca kwambulula. (Ezeki 3:22; 8:1; 33:22; 37:1; 40:1) Yamukwasele ambulule ku “ba kukaluwa bimbunge na kaleulwizi” baje bakele mu citingitingi mwakele na kwambulwila. (Ezeki 3:7) Yehova walekele Ezekiyele ngwendi: “Njikakaluwisa mbunge yobe, na kukukolesa ngwe bakebo. Njikakukolesa mbe ngwe limanya, na kukukolesa mbe ngwe ndaimani, kesi uzibe lyoba.” (Ezeki 3:8, 9) Kwapwile lika ngwe Yehova walekele Ezekiyele ngwendi: ‘Keti utewe kukaluwa bimbunge kwa banu, njikakutakamesa.’
9 Kutundaho, sipilitu ya Njambi yakwasele Ezekiyele apange mwamubwa cipangi ca kwambulula. Ezekiyele wendekele ngwendi: “Nzili ya Yehova yatwaleleleleho kukala hali yange.” Ou kapolofweto kwamwambatelele calumingo cimo mangana alilongese na kuzibisisa muzimbu wapandele kwambulula. (Ezeki 3:14, 15) Kutundaho, Yehova wamulekele ngwendi aye mu cana, co “sipilitu ya Njambi yakobelele muli [ikeye].” (Ezeki 3:23, 24) Ezekiyele walibwaheselele oni kushangumuka cipangi ca kwambulula.
SIPILITU YA NJAMBI IKATUTAKAMESA
Bika bikatukwasa kwambulula ngwe mwalingilile Ezekiyele? (Taleni palagilafu 10)
10. Byuma muka byasa kutukwasa tupange mwamubwa cipangi ca kwambulula, co mwafwa bika?
10 Bika byasa kutukwasa tupange mwamubwa cipangi ca kwambulula? Tusimutwiyeni ha byuma byalingiwile kuli Ezekiyele mangana tuwane cikumbululo. Simbu kanda ashangumuke cipangi ca kwambulula, sipilitu ya Njambi yamutakamesele. Na ano matangwa, tukapanga mwamubwa cipangi ca kwambulula mwafwa sipilitu ya Njambi ikatukwasa ngwe muyakwaselele Ezekiyele. Bika twendekela ngoco? Mwafwa Satana ali na kutulwisa mangana twecele cipangi ca kwambulula. (Kujo 12:17) Banu babangi bakasinganyeka ngwabo Satana wakala na nzili manene, co kutwasa kumulwisa. Oloni tuli na kumuhyana kwitila mu cipangi ca kwambulula. (Kujo 12:9-11) Mu ngila muka? Omwo twambulula tumwesa ngwetu kututewe Satana. Simbu yoshe mutukambulula tukahyana Satana. Ngeci, bika bitunapande kwanuka omwo tukatwalelelaho kwambulula nameme bitozi betu bali na kutulwisa? Tunapande kwanuka ngwetu sipilitu ya Yehova ikeyo ili na kutukwasa.—Mate 5:10-12; 1 Pita 4:14.
11. Sipilitu ya Njambi itukwasa bati, co bika bitunapande kulinga mangana itwaleleleho kutukwasa?
11 Kuzibuka ngwetu Yehova wakwasele Ezekiyele mangana apange mwamubwa cipangi ca kwambulula kutukwasa bati lalo? Kutukwasa twanuke ngwetu sipilitu ya Njambi itukwasa tukolese omwo tuliwana na bukalu bwoshe-bwoshe mu cipangi ca kwambulula. (2 Kori 4:7-9) Ngeci, bika bitunapande kulinga mangana sipilitu ya Njambi itwaleleleho kutukwasa? Tunapande kulomba sipilitu ya Njambi simbu yoshe na kukukalahela ngwetu Yehova akumbulula malombelo etu. Yesu walekele bandongesi bendi ngwendi: “Twaleleleniho kulomba, . . . twaleleleniho kutonda, . . . twaleleleniho kutota.” Nga tulinga ngoco, co Yehova ‘atwana sipilitu ya kujela nga tumulombayo.’—Luka 11:9, 13; Bili 1:14; 2:4.
MAJWI A NJAMBI AKANYAMESELE LIKULAHELO LYA EZEKIYELE
12. Kwesekesa na Ezekiyele 2:9–3:3, libulu lya kuzenga lyatundile kuli, co muzimbu muka wakelemo?
12 Sipilitu ya Njambi yakwasele Ezekiyele apwe wa kusimpa mangana ambulule muzimbu. Co majwi a Njambi akanyamesele lalo likulahelo lyendi. Mu cimona, Ezekiyele wamwene liboko linakwata libulu lya kuzenga. (Tandeni Ezekiyele 2:9–3:3.) Eli libulu lya kuzenga lyatundile kuli? Muzimbu muka wakelemo? Wakwasele bati Ezekiyele? Eli libulu lya kuzenga lyatundile ku litanda lya Njambi. Hamo Yehova watumine kangelo umo ku tungelo bawana bamwene Ezekiyele mangana akumwane libulu lya kuzenga. (Ezeki 1:8; 10:7, 20) Muje mu libulu lya kuzenga mwakele majwi a Njambi nambe ngwetu muzimbu wakunyongesa uje wapandele kuleka baje banu bakutengulukila. (Ezeki 2:7) Ou muzimbu bausonekele ku mitamba yoshe ya libulu lya kuzenga.
13. Yehova walekele Ezekiyele ngwendi alinge bika ku libulu lya kuzenga, co mwafwa bika lyatobalele?
13 Yehova walekele kapolofweto kendi ngwendi alye lije libulu lya kuzenga na ‘kukutisa lifu lyendi na libulu eli.’ Ezekiyele wononokele, co walile lije libulu lya kuzenga lyoshe. Ebi byuma byamwene byalumbunwine bika? Byalumbunwine ngwabo Ezekiyele wapandele kuzibisisa mwamubwa muzimbu wapandele kwambulula. Wapandele kukulahela uje muzimbu mangana umushongangeye kwambulula. Co kwalingiwile cuma cimo ca kukomokesa. Ezekiyele wanangukile ngwendi lije libulu lya kuzenga “lyatobalele ngwe buki.” (Ezeki 3:3) Mwafwa bika? Mwafwa Ezekiyele wamwene cipangi ca kwambulula kupwa cacibwa manene. (Myaso 19:8-11) Wakandelelele manene kuli Yehova ha kumwangula kupwa kapolofweto kendi.
14. Bika byakwasele Ezekiyele alibwahesele mwamubwa cipangi cibamwanene?
14 Kutundaho, Yehova walekele Ezekiyele ngwendi: “Tolilila mwamubwa na kwaka majwi oshe anjikuleka mu mbunge yobe.” (Ezeki 3:10) Yehova walekele Ezekiyele ngwendi ake mbunge ku majwi oshe akele mu libulu lya kuzenga na kusinganyekesesaho. Kulinga ngoco kwakanyamesele likulahelo lyendi. Co lalo kwamukwasele azibuke muzimbu wapandele kukambulula. (Ezeki 3:11) Ezekiyele mwazibisisile na kukulahela muzimbu wa Njambi, washangumukile kwambulula, co watwaleleleleho kulinga ngoco kweta noho hamaneselele cije cipangi camwanene Njambi.—Esekeseni Myaso 19:14.
MAJWI A NJAMBI AKAKANYAMESA LIKULAHELO LYETU
15. Bika bitunapande kwaka mu mbunge mangana tukolese omwo tupanga cipangi cetu ca kwambulula?
15 Kutanda Lijwi lya Njambi kukanyamesa likulahelo lyetu, co kulinga ngoco kutukwasa tukolese omwo tupanga cipangi cetu ca kwambulula. Tunapande ‘kwaka mu mbunge majwi oshe’ atuleka Yehova. Ano matangwa Yehova akendeka netu kupangesa Lijwi lyendi Mbimbiliya. Bika bitunapande kulinga mangana Lijwi lya Njambi litukwase kukala na bisinganyeka na bilinga byabibwa?
16. Bika bitunapande kulinga? Co bika bitukwasa tuzibisise Lijwi lya Njambi?
16 Kulya byakulya na kutakinya kukakanyamesa mubila. Mu ngila imolika, kutanda Lijwi lya Njambi na kusinganyekesesa ha byuma bitutanda kukanyamesa likulahelo lyetu. Tunapande kusinganyekesesa ha cilongesa ca libulu lya kuzenga. Yehova ashaka ngwendi ‘tukutise lifu lyetu na libulu eli’ lya kuzenga mangana tulizibisise mwamubwa. Twasa kulinga ngoco kwitila mu kulombela, kutanda na kusinganyekesesa ha byuma bitutanda. Cakulibanga, tunapande kulomba Yehova mangana atukwase kuzibisisa bitutanda. Asinoni tushangumukeko kutanda. Kutundaho, tunapande kusinganyekesesa manene ha byuma bitunatanda. Kulinga ngoco kutukwasa bati? Kusinganyekesesa ha byuma bitutanda kutukwasa tuzibisise mwamubwa Lijwi lya Njambi, co kulinga ngoco kukanyamesa likulahelo lyetu.
17. Mwafwa bika tunapande kusinganyekesesa ha byuma bitutanda mu Mbimbiliya?
17 Mwafwa bika kwapwa kwa seho kutanda Mbimbiliya na kusinganyekesesa ha byuma bitutanda? Kulinga ngoco, kutukwasa tutwaleleleho kwambulula muzimbu waubwa simbu ino, co lalo kukatukwasa tukambulule muzimbu wa kunyongesa kulutwe. Kutundaho, kusinganyekesesa ha bifwa byabibwa bya Yehova kutukwasa tukanyamese busamba bwetu nendi. Kulinga ngoco kutukwasa tupwe ba kushubuluka na kujauka na byuma bituli nabyo.—Myaso. 119:103.
BYUMA BIKATUSHONGANGEYA TUKOLESE
18. Bika bibakananguka banu batukambulwila, co mwafwa bika?
18 Ezekiyele wapwile kapolofweto, oloni yetu kutwapwile tupolofweto. Nameme ngoco tushaka kutwalelelaho kwambulula muzimbu wa Yehova uje uli mu Mbimbiliya kweta noho hakendekela ngwendi kunahu. Ha simbu yakasompa Njambi, banu kubakasa kwendeka ngwabo Njambi katunangwile. (Ezeki 3:19; 18:23) Oloni bakananguka ngwabo muzimbu utwabambulwilile watundile kuli Njambi.
19. Bika bitukwasa tutwaleleleho kwambulula?
19 Bika bitukwasa tutwaleleleho kwambulula? Byuma bitatu bije byakwasele Ezekiyele. Tukatwalelelaho kwambulula mwafwa tuzibuka ngwetu Yehova ikeye natutumu, sipilitu ya Njambi ikatukwasa, co majwi a Njambi akakanyamesa likulahelo lyetu. Yehova atukwasa tutwaleleleho kwambulula na kukolesa “kweta na kushongo.”—Mate 24:13.
MWASO 65 Tukoleni ku Sipilitu!
a Muno mu cilongesa, tusimutwiya ha byuma bitatu bije byakwasele kapolofweto Ezekiyele apange mwamubwa cipangi cibamwanene ca kwambulula. Tusimutwiya omwo Yehova wakwaselele kapolofweto kendi. Kulinga ngoco kutukwasa tukulahele ngwetu netu atukwasa tupange mwamubwa cipangi canatwana.