1-2. Ngila muka yaibwa ya mwakutandela na kulingeselamo Mbimbiliya? Endekeni cakumwenako.

 LINGENI ngwe muli na biyongola bya kushaka kulanda njibo. Bika bimwasa kushaka kumona simbu kanda muilande? Kuma mushaka lika kumona cikupulo cije cimwesa muinafwila halutwe ndi? Tukulahela ngwetu mwasa kushaka kulimwena muinafwila, kwendamo na kukengesesa mwamubwa milili yayo mangana muizibuke mwamubwa. Hamo mwasa kushaka kumona na plani yei njibo mangana muzibuke mubanaitungila. Cili bene, mulinga mwoshe mumwasela mangana muzibuke mwamubwa njibo imushaka kulanda.

² Twasa kulinga byuma bya kulifwa nga tulilongesa Mbimbiliya na kuitanda. Muka-kulilongesa bya Mbimbiliya umo nesekesa muzimbu wa mu Mbimbiliya ku “mutungo wakama waulaha uje uli na tuposhi twatulaha, co lalo uli na lubula luje lunashimbama manene mu libu.” Ngeci, bika byasa kutukwasa kuzibuka biñanda byoshe bili mu Mbimbiliya? Nga muitanda lika mu kuzambula mwasa kulilongesa lika biñanda byabindondo “bya mashangumukilo bya majwi a kujela a Njambi.” (Hebe 5:12) Ngwe mumunasa kulingila nga mushaka kulanda njibo, nga mutanda Mbimbiliya munapande kwakako mbunge mangana muizibisise mwamubwa. Ngila imo yaibwa imwasa kulilongeselamo Mbimbiliya inapu kumona mubinalitombwela biñanda bilimo. Lingeni mwoshe mumwasela kuzibisisa mwamubwa byuma bimwakulahela na kusinganyekesesa ha byuma bimilingisa mubikulahele.

3. Kapositolo Paulu washongangeyeye bakwabo baka-Kristu ngwendi balinge bika, co mwafwa bika? (Efeso 3:14-19)

³ Nga tushaka kuzibisisa mwamubwa Lijwi lya Njambi, tunapande kutanda biñanda bya kuloba bilimo. Kapositolo Paulu  washongangeyeye baka-Kristu balilongese mwamubwa Lijwi lya Njambi mangana ‘bazibisise busunga mu kushula, mu bwihi, mu bulaha, mu bulaha bwa kuya mwilu na mu kuloba.’ Kulinga ngoco kwasele kubakwasa ‘bashimbike mizi na kuzama ha lubula’ mu likulahelo lyabo. (Tandeni Efeso 3:14-19.) Netu bikebyo bitunapande kulinga. Tumoneni byuma byasa kutukwasa kulilongesa mwamubwa Lijwi lya Njambi mangana tulizibisise mwamubwa.

4. Bika bitunapande kulinga mangana tushwenye kuli Yehova? Aneni byakumwenako.

⁴ Ha kupwa baka-Kristu, kutwapandele lika kwaka mbunge ku biñanda byabyasi bya mu Mbimbiliya. Tushaka kulilongesa na “byuma bya kuloba bya Njambi,” co sipilitu ya kujela yasa kutukwasa kulinga ngoco. (1 Kori 2:9, 10) Ha cilongesa ca munu endilika, twasa kutondesesako byuma bimo bije bitukwasa kushwena manene kuli Yehova. Cakumwenako, mwasa kutondesesa ha biñanda bije bimwesa omwo Yehova wamweselelemo cizemo bangamba bendi ba kusañulu nomwo kulinga ngoco kumweselamo ngwabo neni wamizema. Mwasa lalo kutondesesa mwatondelele Yehova ngwendi Baisalele bamulemese na mukunalifwila nomu mubali na kulingila baka-Kristu ano matangwa. Nambe hamo mwasa kutanda mu kushula bupolofweto bwashulisilile Yesu mwayoyele hano hasi na kulinga cipangi cendi.

5. Kuma kuli ñanda imushaka kutondesesa ha simbu ya cilongesa ca munu endilika ndi?

⁵ Baka-kutondesesa biñanda bya mu Mbimbiliya bamo bendekele byuma bya kuloba bibashaka kutondesesa mu Mbimbiliya. Byuma bimo bibendekele bili mu cipalo ca “ Biñanda bya Kutondesesa ha Cilongesa ca Munu Endilika.” Nga mulyakela cilengo ca kutanda ebi biñanda, co mupwa bakubwahelela, mwasa kubiwana mu Watch Tower Publications Index nambe mu Buka ya Lipatisiso ya Lipaki za Jehova. Kutanda biñanda bya kuloba bya mu Mbimbiliya kukanyamesa likulahelo lyeni na kumikwasa ‘muwane mana a kuzibuka Njambi.’ (Visi 2:4, 5) Tusimutwiyenioni ha biñanda bya kuloba bya mu Mbimbiliya bimwasa kutondesesa.

6. (a) Kuliseza muka kuli mukati ka butumbe na cilengo? (b) Bika bitulingisa twendeke ngwetu biyongola bya Yehova ha banu na lifuti-libu byapwa bya “myaka yoshe”? (Efeso 3:11)

⁶ Cakumwenako, tumoneni biyendeka Mbimbiliya ha biyongola bya Njambi. Kuli kuliseza kuli mukati ka butumbe na cilengo. Twasa kwesekesa butumbe ku kwangula ngila ije itutwala ku mutambela kutushaka kuya. Cilengoco twasa kucesekesa ku mutambela kutushaka kuya. Tunasa kuzibuka kutushaka kuya oloni hamo kutuzibuka ngila itunapande kupangesa. Co nga ngila imo kuyesi mwamubwa, tunasa kupangesa yeka. Twabezika mwafwa Yehova natusholwela biyongola byendi mu Mbimbiliya kamandondo-kamandondo. (Taleni biñanda bitukwasa kuzibisisa Efeso 3:11.) Yehova asa kupangesa bingila bya kuliseza-seza mangana ashulisilile biyongola byendi. “Cuma coshe catangele Shukulu Kalunga cili na butumbe bwaco.” (Visimo 16:4) Ngeci, biyongola bya Yehova bikalako myaka yoshe. Biyongola muka byakala nabyo Yehova, co natengululako bika mu kushaka kubishulisilila?

7. Yehova watengulwile bati ngila yashulisililamo biyongola byendi bisemi betu bakulibanga mubamutengulukilile? (Mateu 25:34)

⁷ Njambi walekele banu bakulibanga biyongola byendi. Bapandele ‘kukita, ngeci batekulwila babo batume hano hasi oshe na kukala na moko ya kuswana bisi ba mu mema, na tuzila, na tusitu boshe.’ (Kusha 1:28) Adama na Eva mubatengulukilile Yehova, banenele bubi na kutsa ku banu boshe. Nameme ngoco, biyongola bya Yehova kubyatengulukile. Watengulwile ngila yashulisililamo biyongola byendi. Kutunda lika habamutengulukilile ba Adama na Eva, Yehova wayongwele kushimbika Bumwene mwilu buje bukashulisilila biyongola byendi byakulibanga ha banu na kaye. (Tandeni Mateu 25:34.) Yehova watumine Munendi wa ntwatwa kwija hano hasi mangana akulongese banu bya Bumwene bwa Njambi na kwana kuyoya kwendi kupwa ndando ya kupatula ije itupatula ku bubi na kutsa. Co Yehova wasangwile Yesu na kumupwisa Mwene wa Bumwene bwa Njambi mwilu. Oloni kuli byuma byabingi bitwasa kulilongesa ha biyongola bya Njambi.

8. (a) Ñanda muka yakama ili mu Mbimbiliya? (b) Kwesekesa na mukanda wa Efeso 1:8-11, byuma muka bikwabo byakalinga Yehova? (Taleni cikupulo cili ha liputa lyakulibanga.)

⁸ Lizina lya Yehova bakalijelesa mwakashulisilila biyongola byendi kwitila mu Bumwene bwendi muje mwali na kuyula Kristu. Ei ikeyo ñanda ya seho ili mu Mbimbiliya. Biyongola bya Yehova kubyasa kutenguluka. Nakulahesa ngwendi byuma byoshe byanendeka bikalingiwa bene. (Isaya 46:10, 11; Hebe 6:17, 18) Mu kwita kwa simbu, kaye bakakapwisa paradaisi. Bana ba Adama na Eva ba kulumbunuka bakalikuwa kuyoyamo myaka yoshe. (Myaso 22:26) Oloni ebi keti bikebyo lika byakalinga Yehova. Cilengo cendi cakama cinapu kukwatasanesa tungelo na banu. Co byuma byoshe bya kutanga bya mwilu na hasi bikononoka Yehova uje napu Mwene yabyo. (Tandeni Efeso 1:8-11.) Kuma kumwesi kuziba kubwaha mumukamono mwali na kushulisililamo Yehova biyongola byendi ndi?

9. Kutanda Mbimbiliya kutukwasa bati kumona byuma bija kulutwe?

⁹ Tucisimutwiyeni ha bupolofweto bwendekele Yehova mu lihya lya Edeni buje buli ku mukanda wa Kushangumuka 3:15. b Bwendekele ha byuma bikalingiwa bije bikashulisilila biyongola byendi. Nameme ngoco, kwapandele kwita myaka yaingi asina ebi byuma bilingiwe. Cakumwenako, Njambi walekele Abrahamu ngwendi  umo wabatekulwila bendi akapwa Kristu. (Kusha 22:15-18) Co mu mwaka wa 33 C.E., Yesu bamushumine ku linsinsinye ngwe mubwamweselele bupolofweto. (Bili 3:13-15) Bupolofweto buje bwendeka bya kusanyozola mutwe wa Satana bukalishulisilila kulutwe. (Kujo 20:7-10) Mbimbiliya inamwesa byuma bikwabo lalo bikalingiwa kulutwe Njambi mwakanyongesa Satana na kumanesa cizindo cili mukati ka kaye ka Satana na munga ya Njambi.

10. (a) Byuma muka bitunabandamena kuliwana nabyo? (b) Twasa kulibwahesela bati mu bisinganyeka na mu mbunge? (Taleni majwi a kwinikila.)

¹⁰ Acisinganyekeni ha byuma bya kukomokesa bije bikalingiwa biyapolofwetele Mbimbiliya. Cakulibanga, baka-mafuti bakendeka ngwabo “tuli mu kwoloka, kukwesi bushonde!” (1 Tesa 5:2, 3) “Oho bene” kayando kakama kakashangumuka omwo baka-mafuti bakanyongesa bulombelo bwoshe bwa makuli. (Kujo 17:16) Kutundaho, hamo kukasholoka cimweso ca kulitila ca “Muna munu aija ha mashelwa a mwilu na nzili na bumpau bwakama.” (Mate 24:30) Yesu akasompa banu. Co akangununa bimanga ku bimembe. (Mate 25:31-33, 46) Ha simbu ei, Satana anga acikatwalelelaho kulwisa Yehova. Mwafwa ya kuzinda banu ba Njambi, Satana akakokweya baka-mafuti balinge likwatasano libanatumbula mu Mbimbiliya ngwabo Ngonge wa Mangonge mu kushaka kulwisa bangamba ba Yehova. (Ezeki 38:2, 10, 11) Co kukakala simbu ibakakungulwila mwilu bakubwabesa boshe baje bakasala hano hasi mangana bakalikwatasane na Kristu na mbunga yoshe ya maswalale ba mwilu na kulwa nzita ya Amagidoni ije ikapwa mamaneselelo a kayando kakama. c (Mate 24:31; Kujo 16:14, 16) Co Myaka 1,000 ya Kuyula kwa Kristu hano hasi ikashangumuka.—Kujo 20:6.

11. Bika bimukalinga omwo mukayoya myaka yoshe? (Taleni na cikupulo.)

¹¹ Acisinganyekeni ha byuma bikalingiwa munima ya myaka 1,000. Mbimbiliya ngwayo Ishamatanga naka na kuyoya kwa myaka yoshe mu bimbunge byetu. (Kwambu 3:11) Ebi binamikundama bati hamolika na busamba bweni na Yehova? Libulu lya Mu Sutelele ku Jehova, ha liputa 319 ngwalyo: “Munima ya kuyoya bita bya myaka, makulukazi na maunzi, na myaka ikwabo  yaingi-ingi, tukazibuka byuma byabingi hali Yehova Njambi kutubakana bituzibuka hano. Oloni anga tucikaliziba ngwetu kuli byabingi byabibwa bitunapande kulilongesa hali ikeye. . . . Tukalikuwa manene kuyoya myaka yoshe, co kushwenya kuli Yehova cikeco kubezika cakama citukakala naco.” Bika bitunapande kulinga ha simbu ino omwo tutwalelelaho kulilongesa Lijwi lya Njambi?

12. Twasa kukenga bati mwilu? Aneni cakumwenako.

¹² Lijwi lya Njambi linendeka mu bwihi mutwasa kulizibila kukala hamo na Yehova uje “wakala mu melu.” (Isaya 33:5) Mbimbiliya inendeka byuma byabibwa hali Yehova na ha mutamba wa mwilu wa munga yendi. (Isaya 6:1-4; Ndanye 7:9, 10; Kujo 4:1-6) Cakumwenako, twasa kutanda biñanda byendeka ha byuma bya kukasamesa byamwene Ezekiyele omwo ‘lilu lyashokolokele, co wamwene bimona bya Njambi.’—Ezeki 1:1.

13. Byuma muka byabibwa byali na kulinga Yesu mwilu bibanendeka ku mukanda wa Bahebelu 4:14-16, bije bimilingisa mukandelele kuli Yehova na Yesu?

¹³ Singanyekeseseni lalo ha cipangi cali naco Yesu mwilu uje napu Mwene yetu, co lalo Kapilistu Wahakamwa wa mema ku mbunge. Kwitila muli ikeye twasa kushwenya ku ‘litanda lya Njambi lya ngozi yakama’ mu kulombela na kumulomba kutetela na bukwasi “ha simbu inapande.” (Tandeni Bahebelu 4:14-16.) Ha litangwa na litangwa tunapande kusinganyekesesa bibanatulingila Yehova na Yesu nebi bibali na kutulingila. Cizemo cibanatumwesa cinapande kutulingisa tupange na nzili bipangi bya Bumwene na kutwalelelaho kulemesa Njambi.—2 Kori 5:14, 15.

14. Byuma muka bimo byabibwa bitwasa kulinga mu kumwesa ngwetu twakandelela kuli Yehova na Yesu? (Taleni na bikupulo.)

¹⁴ Ngila imo yaibwa itwasa kumweselamo ngwetu twakandelela kuli Njambi na Munendi inapu kulinga mwoshe mutwasela kukwasa bakwetu  bapwe Bakaleho ba Yehova na kupwa bandongesi ba Yesu. (Mate 28:19, 20) Ebi bikebyo byalingile kapositolo Paulu mu kumwesa kukandelela kuli Njambi na Kristu. Wazibukile ngwendi Yehova ashaka ngwendi “banu ba miyati yoshe boboke na kweta ha kukala na mangana a busunga a kuzibuka busunga.” (1 Timo 2:3, 4) Wapangele na nzili mu cipangi ca kwambulula ‘mangana alinge mwoshe mwasela kwobolako bamo.’—1 Kori 9:22, 23.

15. Kwesekesa na mukanda wa Myaso 1:2, bika bitulingisa tupwe ba kubwahelela?

¹⁵ Muka-kwimba uje wasonekele mutamba wakulibanga wa mukanda wa Myaso ngwendi munu wa kubwahelela uje ali na kuyoya mwamubwa napu munu uje “abwahelela mu kwononoka lishiko lya Shukulu Kalunga,” co akasinganyekesesa ha Lijwi lya Yehova “mutanya na butsiki.” (Myaso 1:1-3) Omwo wendekele ha cisoneka eci mu libulu lyendi lya Studies in the Psalms, muka-kunungulula Mbimbiliya umo wa lizina lya Joseph Rotherham wendekele ngwendi munu napande “kushaka manene ngwendi Njambi amutwamenene, co napande kushakezeka mashiko na binangulo byendi, kulilongesabyo na kuwana simbu ya kubisinganyekesesa.” Wendekele lalo ngwendi “nga litangwa lita kwa kujeneka kutanda Mbimbiliya, co munu kapangesele bwino olyo litangwa.” Kutanda Mbimbiliya na kutondesesa mwamubwa biñanda bilimo, kumona mubinalitombwela na kubizibisisa mwamubwa kumilingisa mupwe ba kubwahelela!

16. Bika bitusimutwiya mu cilongesa cinatako?

¹⁶ Mashiko na binangulo bili mu Lijwi lya Njambi kubyapwile byabikalu kubizibisisa. Mu cilongesa cinatako tusimutwiya ha ñanda imo ya kuloba ya tempele ya Yehova yakama ya ku sipilitu ije yalumbunwine Paulu omwo wasonekelele baka-Kristu ba Bahebelu mukanda. Co twakulahela ngwetu kusimutwiya na kulilongesa bya ñanda ei kumilingisa mupwe ba kubwahelela.