CILONGESA 44
Twaleleleniho Kukanyamesa Lilabelelo Lyeni
“Kulahela Yehova.”—MYASO 27:14.
MWASO 144 Taleni Mesho Eni ha Fweto!
BILI MUNO MU CILONGESA a
1. Lilabelelo muka lyanatwana Yehova?
YEHOVA natwana lilabelelo lyalibwa lya kukayoya myaka yoshe. Bamo bali na lilabelelo lya kukayoya myaka yoshe mwilu. (1 Koli 15:50, 53) Oloni bwingi bwa banu bali na lilabelelo lya kukayoya myaka yoshe hano hasi mu kubwahelela oku banalikangula. (Kujo 21:3, 4) Nameme tuli na lilabelelo lya kukayoya myaka yoshe mwilu nambe hano hasi, lilabelelo lyetu lyapwa lya seho.
2. Lilabelelo lyetu lyemana haka, co bika twendekela ngoco?
2 Mu Mbimbiliya, lijwi lya “lilabelelo” lilumbununa “kubandamena byuma byabibwa bikalingiwa kulutwe.” Twakulahela ngwetu byuma bitunabandamena kulutwe bikalingiwa mwafwa Yehova ikeye natukulahesabyo. (Loma 15:13) Tuzibuka byuma byanakulahesa, co lalo tuzibuka ngwetu akashulisilila byanakulahesa. (Kula 23:19) Tuzibuka ngwetu Yehova ashaka kukashulisilila byuma byoshe byanakulahesa, co tuzibuka lalo ngwetu ali na nzili ya kulinga ngoco. Lilabelelo lyetu kulyemanene ha byuma byakulisinganyekela nambe byuma bitushungwiya ngwetu bikalingiwe, oloni lyemana ha byuma bituzibuka ngwetu bya busunga.
3. Bika bitusimutwiya muno mu cilongesa? (Myaso 27:14)
3 Tate yetu wa mwilu watuzema, co ashaka ngwendi tumukulahele. (Tandeni Myaso 27:14.) Nga tukanyamesa lilabelelo lyetu, co tukolesa omwo tuliwana na byeseko, co lalo tupwa ba kusimpa na kubwahelela nameme tuliwane na byeseko. Tusimutwiyeni oni mulyasa kutunyungilila lilabelelo. Tusimutwiya tahi ha cihula eci: Lilabelelo lyapwa bati ngwe cimikiso ca bwato na tepa ya cikubo? Kutundaho, tusimutwiya mutwasa kukanyamesela lilabelelo lyetu.
LILABELELO LYETU LYAPWA NGWE CIMIKISO CA BWATO
4. Lilabelelo lyapwa bati ngwe cimikiso ca bwato? (Bahebelu 6:19)
4 Mu mukanda wasonekelele baka-Kristu ba Bahebelu, kapositolo Paulu wesekesele lilabelelo lyetu ku cimikiso ca bwato. (Tandeni Bahebelu 6:19.) Kapositolo Paulu wendele manene mu mato, ngeci wazibukile ngwendi cimikiso ca bwato cikakwasa bwato mangana keti bungumuke. Simbu imo mwakele mu bwato kwezile lihunzi lyakama. Wamwene baka-kujabula mubakele na kwaka bimikiso bya bwato mu ndonga mangana bwato keti bungumukile ku mamanya. (Bili 27:29, 39-41) Ngwe mwa cimikiso ca bwato mucikakwasa bwato mangana keti bungumuke, lilabelelo lyetu likatukwasa tutwaleleleho kukanyamesa busamba bwetu na Yehova mangana keti tungumuke omwo tuliwana na bukalu bwa kufwa ngwe lihunzi lyakama. Lilabelelo likatukwasa tukolese omwo tuliwana na bukalu mwafwa tukakulahela ngwetu byuma bikala mwamubwa. Anukeni ngweni Yesu watunangwile ngwendi bakatuyandesa. (Yiwa 15:20) Ngeci, kusinganyekesesa ha byuma byabibwa byanatukulahesa Yehova kukatulingisa tutwaleleleho kumupangela mu kulongwa.
5. Lilabelelo lyatakamesele bati Yesu nameme wazibukile ngwendi bamutsiya?
5 Singanyekeni omwo lilabelelo lyakwaselelemo Yesu atwaleleleho kupwa wa kulongwa nameme wazibukile ngwendi bamutsiya. Ha Pentekosita ya 33 C.E., kapositolo Pita wendekele majwi a bupolofweto ali ku mukanda wa Myaso aje amwesa lilabelelo lyakele nalyo Yesu. Ou mukanda ngwawo: “Co njikala na lilabelelo. Mwafwa kuukanjiseze mu cihilo, nambe kwecelela wa kulongwa wobe abole . . . Co unjilingisa njibwahelele manene ku mesho obe.” (Bili 2:25-28; Myaso 16:8-11) Nameme Yesu wazibukile ngwendi bamutsiya, oloni wakulahelele ngwendi Njambi akamusangula, co akabwahelela kukala hamo na Ishe wa mwilu.—Hebe 12:2, 3.
6. Bika byendekele ndolome umo ha lilabelelo?
6 Lilabelelo linakwasa bandolome na bandokazi babangi bakolese. Tucisimutwiyeni ha byuma byalingiwile kuli ndolome wa kulongwa, Leonard Chinn wa ku England. Ha simbu ya Nzita ya Kaye Yakulibanga, bamwakele mu kamenga mwafwa wabyanene kukobela buswalale. Bamukutilile kwa likalyendi ha bingonde bibali na kumwana bipangi byabikalu manene. Wendekele ngwendi: “Byuma binjaliwanene nabyo byanjilingisile njinanguke ngwange tunapande kukala na lilabelelo mangana tukolese. Mu Mbimbiliya muli bikulaheso byabibwa na mwanja wa Yesu na tupositolo na tupolofweto. Ebi byuma byoshe bikakanyamesa lilabelelo lyetu na kutukwasa tukolese.” Lilabelelo lyapwile ngwe cimikiso ca bwato kuli Leonard, co lyasa kupwa ngoco na kuli yetu.
7. Byeseko bikakanyamesa bati lilabelelo lyetu? (Loma 5:3-5; Jemusi 1:12)
7 Nga tukolesa omwo tuliwana na byeseko na kumona mwatukwasela Yehova, co lilabelelo lyetu likanyama mwafwa tuzibuka ngwetu byuma bitunalingi binamuzibisa kubwaha ku mbunge. (Tandeni Loma 5:3-5; Jemusi 1:12.) Lilabelelo lyetu likanyama kutubakana mulyapwile ha kulibanga mutwazibile muzimbu waubwa. Satana ashaka ngwendi tuzeye omwo tuliwana na byeseko, oloni Yehova atukwasa tukolese omwo tuliwana na bukalu bwoshe-bwoshe.
LILABELELO LYETU LYAPWA NGWE TEPA YA CIKUBO
8. Lilabelelo lyapwa bati ngwe tepa ya cikubo? (1 Tesalonika 5:8)
8 Mbimbiliya inesekesa lalo lilabelelo lyetu ku tepa ya cikubo. (Tandeni 1 Tesalonika 5:8.) Liswalale akazala tepa ya cikubo mangana anyungilile mutwe wendi ku bitwa bitunda ku bitozi bendi. Mu nzita yetu ya ku sipilitu, tunapande kunyungilila bisinganyeka byetu mangana Satana keti atungumune. Akapangesa byuma bya kuliseza-seza mangana atulingise kukala na bisinganyeka bya kuhenga. Ngwe omwo tepa ya cikubo ikanyungilila mutwe wa liswalale, lilabelelo lyetu likanyungilila bisinganyeka byetu mangana tutwaleleleho kupwa ba kulongwa kuli Yehova.
9. Bika bibakalingi banu nga kubesi na lilabelelo?
9 Kukala na lilabelelo lya kukayoya myaka yoshe kutulingisa tukale na mana na kwangula mwamubwa byakulinga. Oloni nga tuzeya na kutabesa mbunge yetu kusinganyeka lika ha byuma bya ku mubila, co twibala lilabelelo lyetu lya kukayoya myaka yoshe. Tucisimutwiyeni ha byuma byalingiwile kuli baka-Kristu bamo bayoyele mu Kolinte. Becelele kukulahela bikulaheso bya Njambi bya kufwa ngwe lilabelelo lya kusanguka kwa batsi. (1 Koli 15:12) Paulu wendekele ngwendi baje kubakele na lilabelelo lya kusanguka kwa batsi bakalilingila byuma mubashakela. (1 Koli 15:32) Ano matangwa banu baje kubakele na lilabelelo mu bikulaheso bya Njambi, bakalingi byuma byoshe-byoshe mangana bapwe ba kubwahelela. Oloni yetu tuli na lilabelelo mu byuma byanakulahesa kukatulingila Njambi. Lilabelelo lyetu lyapwa ngwe tepa ya cikubo ije ikanyungilila bisinganyeka byetu na kutukwasa tujeneke kusinganyeka ha byuma bitushaka bije byasa kubiisa busamba bwetu na Yehova.—1 Koli 15:33, 34.
10. Lilabelelo lyasa kutukwasa bati mangana keti tukale na bisinganyeka bya kuhenga?
10 Lilabelelo lyetu lyasa kutukwasa tujeneke kusinganyeka ngwetu kutwasa kuzibisa Yehova kubwaha ku mbunge. Cakumwenako, bamo banasa kwendeka ngwabo: ‘Yange kunjasa kukayoya myaka yoshe. Kunjapandele, mwafwa kunjasa kulinga byuma byoshe byabibwa byazema Njambi.’ Anukeni ngweni Elifaze nendi bikebyo byendekele omwo wakele na kuzembeleka Yombi. Wendekele ngwendi: “Kuma munu asa kupwa wa kujela ndi?” Watwaleleleho kwendeka hali Njambi ngwendi: ‘Kenga, Njambi kakulahelele tungelo bendi ba kujela, na melu kuwapwile a kujela ku mesho endi.’ (Yombi 15:14, 15) Awa apwile makuli. Anukeni ngweni Satana ikeye ashaka ngwendi musinganyeke ngoco. Azibuka ngwendi nga mutwalelelaho kukala nebi bisinganyeka, co lilabelelo lyeni lizeya. Ngeci byaneni makuli ali na kupangesa Satana na kutwalelelaho kusinganyekesesa ha byuma byanakulahesa Yehova. Kulaheleni ngweni Njambi ashaka ngwendi mukayoye myaka yoshe, co amikwasa mushulisilile cilengo ceni.—1 Timo 2:3, 4.
TWALELELENIHO KUKANYAMESA LILABELELO LYENI
11. Mwafwa bika kutwapandele kusinganyeka ngwetu Njambi ali na kwishwala kushulisilila byuma byanakulahesa?
11 Kukwapwile kwakwasi kutwalelelaho kukanyamesa lilabelelo lyetu. Tunasa kuliziba ngwetu Njambi ali na kwishwala kushulisilila bikulaheso byendi. Oloni Yehova wakalako myaka yoshe, ngeci mwakamwena simbu kunaliseze nomwo mutukaimwena. (2 Pita 3:8, 9) Akalinga byuma byoshe byanakulahesa, oloni hamo kakabilingi ha simbu itusinganyeka yetu. Bika byasa kutukwasa tukanyamese lilabelelo lyetu omwo tubandamena ngwetu Njambi ashulisilile bikulaheso byendi?—Jemu 5:7, 8.
12. Kwesekesa na mukanda wa Bahebelu 11:1, 6, lilabelelo na likulahelo byalitombola bati?
12 Nga tukanyamesa busamba bwetu na Yehova uje akatwana byuma bitunalabelela, co lilabelelo lyetu litwalelelaho kupwa lya kukanyama. Lilabelelo na likulahelo byalitombola mwafwa Mbimbiliya imwesa ngwayo nga tushaka kukala na lilabelelo, co tunapande kukulahela ngwetu Njambi kwali, co ikeye “muka-kwana cikandelela kuli baje bali na kumutonda manene.” (Tandeni Bahebelu 11:1, 6.) Nga tukulahela ngwetu Yehova kwali, co tukulahela ngwetu akashulisilila byuma byanakulahesa. Tusimutwiyeni ha byuma bitunapande kulinga mangana tukanyamese busamba bwetu na Yehova na kutwalelelaho kukanyamesa lilabelelo lyetu mu byuma byanakulahesa.
Kulombela na kusinganyekesesa kutukwasa tutwaleleleho kukanyamesa lilabelelo lyetu (Taleni palagilafu 13-15) b
13. Twasa kushwenya bati kuyehi na Njambi?
13 Lombeleni kuli Yehova na kutanda Lijwi lyendi. Nameme kutwasa kumona Yehova, oloni twasa kushwenya kuyehi nendi. Twasa kulombela kuli ikeye na kukulahela ngwetu atutolilila. (Njele 29:11, 12) Twasa kutolilila kuli Njambi nga tutanda Mbimbiliya na kusinganyekesesa ha byuma bitutanda. Omwo tutanda mizimbu imwesa omwo Yehova wakwaselelemo baje bapwile ba kulongwa kuli ikeye kunima, lilabelelo lyetu litwalelelaho kukanyama. Byuma byoshe bibanasoneka mu Lijwi lya Njambi “babisonekelele kutulongesa, co tuli na lilabelelo mwafwa ya kukolesa kwetu na kutuzembeleka kutuli na kuwana mu Bisoneka.”—Loma 15:4.
14. Mwafwa bika tunapande kusinganyekesesa ha byuma byanalingi Yehova ku bakwetu?
14 Singanyekeseseni ha byuma bimwesa ngwabyo Yehova akashulisilila bikulaheso byendi. Tusimutwiyeni ha byuma byalingile Njambi kuli Abrahama na Sala. Basinganyekele ngwabo kubasa kukala na bana mwafwa bakulubalele manene. Oloni Njambi wabakulahesele ngwendi bakala na mwana. (Kusha 18:10) Abrahama walingile bati? Mbimbiliya ngwayo: “Wakulahelele ngwendi apwa ishe ya baka-mafuti amangi.” (Loma 4:18) Nameme kwasholokele ngwe Abrahama kasa kukala na mwana, oloni wakulahelele ngwendi Yehova ashulisilila byanamukulahesa. Njambi walingile byakulahesele ou munalume wa kulongwa. (Loma 4:19-21) Ei ñanda itulongesa ngwayo tunapande kutwalelelaho kukulahela ngwetu Yehova akashulisilila byuma byanakulahesa, nameme kunasa kusholoka ngwe kubyasa kulingiwa.
15. Mwafwa bika tunapande kusinganyekesesa ha byuma byanatulingila Yehova?
15 Singanyekeseseni ha byuma byanamilingila Yehova. Singanyekeseseni ha bukwasi bumunawana mu kulishulisilila kwa byuma byakulahesele Yehova bije bili mu Mbimbiliya. Cakumwenako, Yesu wakulahesele ngwendi Ishe amikwasa ku mubila. (Mateu 6:32, 33) Yesu namikulahesa lalo ngwendi Yehova amyana sipilitu ya kujela nga mumulomba. (Luka 11:13) Yehova nashulisilila ebi bikulaheso. Mwasa kusinganyekesesa ha byuma bikwabo byali na kumilingila Yehova. Cakumwenako, nakulahesa kumikonekela, kumizembeleka na kumyana byuma bimikwasa mukanyamese busamba bweni nendi. (Mateu 6:14; 24:45; 2 Koli 1:3) Kusinganyekesesa ha byuma byanamilingila Yehova, kumikwasa mukanyamese lilabelelo lyeni mu byuma byanakulahesa kukamilingila kulutwe.
BWAHELELENI MWAFWA YA LILABELELO LYENI
16. Bika twendekela ngwetu lilabelelo lyapwa bwana bwa seho?
16 Njambi natwana lilabelelo lya seho manene lya kukayoya myaka yoshe. Twabandamena kukayoya mwamubwa kulutwe, co twakulahela ngwetu Njambi akashulisilila byanakulahesa. Lilabelelo lyetu lyapwa ngwe cimikiso ca bwato mwafwa likatukwasa tukolese omwo tuliwana na byeseko nomwo batuyandesa, co lalo likatukwasa tujeneke kutewa kutsa. Lyapwa ngwe tepa ya cikubo mwafwa likanyungilila bisinganyeka byetu mangana tulinge byuma byabibwa na kujeneka kulinga byuma byabibi. Eli lilabelelo libanendeka mu Mbimbiliya likatukwasa tulikute busamba na Njambi na kuzibuka mwatuzemena. Kutwalelelaho kukanyamesa lilabelelo lyetu kutukwasa manene.
17. Mwafwa bika lilabelelo lyetu likatulingisa tubwahelele?
17 Mu mukanda wasonekelele Baloma, kapositolo Paulu wabashongangeyeye ngwendi: “Bwaheleleni mwafwa ya lilabelelo lyeni.” (Loma 12:12) Paulu wabwahelelele mwafwa wazibukile ngwendi nga atwalelelaho kupwa wa kulongwa, co akayoya myaka yoshe mwilu. Netu tunapande kubwahelela mwafwa ya lilabelelo lituli nalyo, mwafwa twakulahela ngwetu Yehova akashulisilila byuma byanakulahesa. Muka-kwimba wasonekele ngwendi: “Nabezika munu uje . . . lilabelelo lyendi lili muli Yehova Njambi yendi . . . muka-kulongwa simbu yoshe.”—Myaso 146:5, 6, NWT.
MWASO 139 Lingeni Ngwe Muli mu Kaye Kakaha
a Yehova natwana lilabelelo lyalibwa lya byuma bya kulutwe. Eli lilabelelo likatukanyamesa na kutukwasa tujeneke kwaka mbunge ku bukalu butuli na kuliwana nabwo. Likatwana nzili ya kutwalelelaho kupangela Yehova. Likatunyungilila ku byuma bije byasa kutulingisa tukale na bisinganyeka bya kuhenga. Ebi byuma bikebyo binapande kutulingisa tutwaleleleho kukanyamesa lilabelelo lyetu ngwe mutumwena muno mu cilongesa.
b KULUMBUNUNA CIKUPULO: Tepa ya cikubo ikanyungilila mutwe wa liswalale, co cimikiso ca bwato cikalingisa bwato bujeneke kungumuka. Mu ngila imolika, lilabelelo lyetu likanyungilila bisinganyeka byetu, co lalo likatukwasa tukolese omwo tuliwana na byeseko. Ndokazi ali na kulombela kuli Yehova, co nakulahela ngwendi amutolilila. Ndolome ali na kusinganyekesesa omwo Njambi washulisilile byuma byakulahesele Abrahama. Ndolome mukwabo ali na kusinganyekesesa mwanamubezikisila Njambi.
