CILONGESA 39
Kuma Lizina Lyeni Banalisoneka mu “Libulu lya Kuyoya” Ndi?
‘Co basonekele baje bazibilile Yehova lyoba na kumusingimika mu libulu lya canukiso ku mesho endi.’—MALA 3:16.
MWASO 61 Twaleni Lutwe Yeni Bakaleho!
BILI MUNO MU CILONGESA a
Kushwa kusañulu, Yehova natwalelelaho kusoneka mazina a banu mu “libulu lya kuyoya” (Taleni palagilafu 1-2)
1. Kwesekesa na mukanda wa Malaki 3:16, libulu muka lyanatwalelelaho kusoneka Yehova, co bika bilimo?
KUSHWA kusañulu, Yehova natwalelelaho kusoneka libulu lya kulitila. Omu mu libulu muli mazina a banu, kushangumukila ha lizina lya mukaleho wa kulongwa Abele. b (Luka 11:50, 51) Kushwa kusañulu, Yehova natwalelelaho kusoneka mazina a banu omu mu libulu, co ha simbu ino muli mazina a banu babangi-bangi. Mu Mbimbiliya, eli libulu banalitumbula ngwabo “libulu lya canukiso,” nambe ngwetu “libulu lya kuyoya.” Muno mu cilongesa tulyendeka ngwetu “libulu lya kuyoya.” —Tandeni Malaki 3:16; Kujo 3:5; 17:8.
2. Mazina a beya abanasoneka mu libulu lya kuyoya, co bika bitunapande kulinga mangana netu mazina etu bawasonekemo?
2 Omu mu libulu muli mazina a banu boshe baje bakalemesa Yehova na kumuzibila lyoba nambe ngwetu kumusingimika na kuzema lizina lyendi. Bakatambula mwonyo wa myaka yoshe. Netu basa kutusoneka omu mu libulu nga tulikuta busamba bwa kukanyama na Yehova kwitila mu ndando ya kupatula ya Munendi Yesu Kilistu. (Yiwa 3:16, 36) Tubaboshe tushaka ngwetu mazina etu bawasoneke omu mu libulu, nameme tuli na lilabelelo lya kukayoya mwilu nambe hano hasi.
3-4. (a) Nga lizina lyetu banalisoneka mu libulu lya kuyoya, kuma kulumbununa ngwabo tukawana mwonyo wa myaka yoshe ndi? Lumbununeni. (b) Bika bitusimutwiya muno mu cilongesa na mu cilongesa cinatako?
3 Kuma oku kulumbununa ngwabo boshe babanasoneka omu mu libulu bakawana mwonyo wa myaka yoshe ndi? Majwi endekele Yehova kuli Mosesa ku mukanda wa Kutuhuka 32:33 atukwasa tuzibuke cikumbululo. Yehova wendekele ngwendi: “Aba lika banalingi bubi kuli yange bakebo banjikatundisa mazina abo mu libulu lyange.” Ngeci mazina ali omu mu libulu banasa kuwatundisamo. Kunapu lika ngwe Yehova nasoneka awa mazina na penso. (Kujo 3:5) Tunapande kweseka mutwasela mwoshe mangana mazina etu atwaleleleho kukala omu mu libulu, kweta noho habakawasonekela na peni.
4 Oloni oku kunasa kutulingisa tulihule bihula bimo. Cakumwenako, bika biyendeka Mbimbiliya ha banu babanasoneka omu mu libulu lya kuyoya na baje kubasonekelemo? Baje batwalelelaho kukala omu mu libulu bakatambula tangwa lika mwonyo wa myaka yoshe? Bika bikalingiwa kuli baje banatsi kwa kujeneka kuzibuka Yehova? Kuma mazina abo basa kuwasoneka omu mu libulu ndi? Ebi bihula banabikumbulula muno mu cilongesa na mu cilongesa cinatako.
MAZINA A BEYA ABANASONEKA OMU MU LIBULU?
5-6. (a) Kwesekesa na Filipu 4:3, mazina a beya abanasoneka mu libulu lya kuyoya? (b) Simbu muka ibakasoneka mazina abo na peni mu libulu lya kuyoya?
5 Mazina a beya abanasoneka omu mu libulu lya cifwisa? Tusimutwiyeni ha bibunga bitanu bya banu mangana tukumbulule eci cihula. Bamo mazina abo banawasoneka mu libulu lya kuyoya, bamo co kubawasonekelemo.
6 Cibunga cakulibanga cinapu ca baje babanangula kukayula na Yesu mwilu. Kuma mazina abo banawasoneka laja mu libulu lya kuyoya ndi? Eyo. Majwi a kapositolo Paulu asonekelele baje ‘bakele na kupanga hamo nendi’ mu Filipu amwesa ngwawo mazina a bakubwabesa baje babanangula kukayula na Yesu banawasoneka mu libulu lya kuyoya. (Tandeni Filipu 4:3.) Oloni banapande kutwalelelaho kupwa ba kulongwa mangana mazina abo atwaleleleho kukala omu mu libulu. Co mubakabaka ciganto camamaneselelo simbu kanda batse nameme simbu kanda kayando kakama kashangumuke, mazina abo bakawasoneka na peni omu mu libulu.—Kujo 7:3.
7. Mukanda wa Kujombolola 7:16, 17 umwesa ngwawo tangwa lika libakasoneka na peni mazina a mbunga yakama ya bimanga beka mu libulu lya kuyoya?
7 Cibunga camucibali cinapu ca mbunga yakama ya bimanga beka. Kuma mazina abo banawasoneka laja mu libulu lya kuyoya ndi? Eyo. Kuma mazina abo akatwalelelaho kukala mu libulu lya kuyoya munima ya nzita ya Alamagidoni ndi? Eyo. (Kujo 7:14) Yesu wendekele ngwendi aba banu bakufwa ngwe bimanga “bakayoya myaka yoshe.” (Mate 25:46) Oloni baje bakoboka nzita ya Alamagidoni kubakatambula mwonyo wa myaka yoshe oho bene. Mazina abo akakala mu libulu lya kuyoya, oloni akapwa lika ngwe aje abanasoneka na penso. Yesu mwakayula ha myaka 1,000, ‘akapwa kanyungi kabo, co akabatwamenena ku tubwelu-bwelu twa mema a mwonyo.’ Baje bakononoka kutwamenena kwa Kristu na kutwalelelaho kupwa ba kulongwa kuli Yehova, bakasoneka mazina abo na peni mu libulu lya kuyoya.—Tandeni Kujombolola 7:16, 17.
8. Mazina a beya kubasonekele mu libulu lya kuyoya, co bika bikalingiwa kuli bakebo?
8 Cibunga camucitatu cinapu ca bimembe baje bakanyonga ha nzita ya Alamagidoni. Mazina abo kubawasonekele mu libulu lya kuyoya. Yesu wendekele ngwendi “bakabanyongesa ku myaka yoshe.” (Mate 25:46) Paulu bamuhwimininine asoneke ngwendi: “Aba banu bakabasompa kuli Mwata wetu, co kashitiko kabo kakapwa kubanyongesa myaka yoshe.” (2 Tesa 1:9; 2 Pita 2:9) Ebi bikebyo bikalingiwa na kuli baje babulumwina sipilitu ya kujela oku bazibuka ngwabo kulinga ngoco kunapu kwakubi. Nabo kubakayoyo myaka yoshe, oloni bakanyonga. Co lalo kubakasanguka. (Mate 12:32; Maki 3:28, 29; Hebe 6:4-6) Tusimutwiyeni oni ha bibunga bibali bya banu bakasanguka na kuyoya hano hasi.
BEYA BAKASANGUKA?
9. Kwesekesa na Bilinga 24:15, bibunga muka bibali bya banu baje bakasanguka na kuyoya hano hasi, co ebi bibunga binaliseze bati?
9 Mbimbiliya imwesa ngwayo kuli bibunga bibali bya banu bakasanguka na kuyoya hano hasi myaka yoshe, “baka-busunga” na “baka-kujeneka busunga.” (Tandeni Bilinga 24:15.) “Baka-busunga” banapu banu baje batwaleleleleho kupangela Yehova mu kulongwa ha simbu ibakele na kuyoya. Oloni “baka-kujeneka busunga” banapu banu baje kubapangelele Yehova ha simbu ibakele na kuyoya. Kakangi bilinga byabo kubyapwile byabibwa. Kuma mutunendeka ngwetu banu bali omu mu bibunga bibali bakasanguka tulumbununa ngwetu mazina abo banawasoneka mu libulu lya kuyoya ndi? Tusimutwiyeni ha cibunga cimo na cimo mangana tukumbulule mwamubwa eci cihula.
10. Mwafwa bika baka-busunga bakasanguka, co bamo bakakala na cipangi muka? (Taleni lalo ñanda ya “Bihula Bya Baka-Kutanda” ili muno mu Kaposhi ka Kukengela, ije yendeka bya banu bakasanguka na kuyoya hano hasi.)
10 Cibunga camuciwana cinapu ca “baka-busunga.” Mazina abo bawasonekele mu libulu lya kuyoya simbu kanda batse. Kuma mazina abo bawatundisile omu mu libulu omwo batsile ndi? Embwe, mwafwa Yehova ali na kubanuka, co kuli ikeye banapu lika ngwe bali na “kuyoya.” Yehova “wapwa Njambi ya baje bali na kuyoya, mwafwa kuli ikeye boshe bali na kuyoya.” (Luka 20:38) Oku kulumbununa ngwabo baka-busunga mubakasanguka na kuyoya hano hasi, bakawana mazina abo mu libulu lya kuyoya, oloni akapwa ngwe akusoneka na penso. (Luka 14:14) Banu bamo mubakasanguka bakapwa “baka-kuswana hano hasi hoshe.”—Myaso 45:16.
11. Bika bibanapande kukalilongesa “baka-kujeneka busunga” mangana mazina abo bakawasoneke mu libulu lya kuyoya?
11 Tusimutwiyeni oni ha cibunga camamaneselelo ca “baka-kujeneka busunga.” Hamo kubalingile byuma byabibwa simbu kanda batse mwafwa kubazibukile mashiko a Yehova. Ngeci mazina abo kubawasonekele mu libulu lya kuyoya. Oloni Njambi akabasangula na kubana simbu ya kulinga byuma bije bikalingisa babasoneke mu libulu lya kuyoya. Ngeci aba banu “baka-kujeneka busunga” banapande kukalilongesa mashiko a Yehova. Mukemwo Bumwene bwa Njambi bukabwahesa ngwabo kukakale cipangi cakama ca kulongesa aba banu.
12. (a) Beya bakalongesa baka-kujeneka busunga? (b) Bika bikalingiwa kuli baje kubakapangesa byuma bibakalilongesa?
12 Beya bakalongesa baka-kujeneka busunga? Mbunga yakama ije ikoboka na baka-busunga baje bakasanguka. Baka-kujeneka busunga banapande kukalikuta busamba na Yehova na kulikundika kuli ikeye, asina mazina abo bakawasoneke mu libulu lya kuyoya. Yesu Kristu na bakubwabesa bakakako manene mbunge mangana bamone bibakalinga aba baka-kujeneka busunga mubakabalongesa. (Kujo 20:4) Baje kubakononoka mashiko a Yehova bakabanyongesa nameme banayoyo lika myaka 100. (Isaya 65:20) Yehova na Yesu bakamono bili mu mbunge ya munu, ngeci kubakatabesa munu umo abihise byuma mu kaye kakaha.—Isaya 11:9; 60:18; 65:25; Yiwa 2:25.
BEYA BAKASANGUKILA KUYOYA NA BAJE BAKASANGUKILA KUBASOMPA?
13-14. (a) Twakele na kuzibisisa bati majwi a Yesu ali ku Yiwano 5:29? (b) Bika bitunapande kunanguka ha majwi endekele Yesu?
13 Yesu nendi wendekeleko bimo hali baje bakasanguka na kuyoya hano hasi. Cakumwenako, wendekele ngwendi: “Simbu ili na kwija omwo boshe bali mu bimbumbo bya canukiso bakaziba lijwi lyendi, co bakatuhukamo. Baje balingile byuma byabibwa, bakasangukila kuyoya, co baje balingile byuma byabibi, bakasangukila kubasompa.” (Yiwa 5:28, 29) Yesu walumbunwine bika?
14 Kunima twakele na kuzibisisa ngwetu Yesu walumbunwine byuma bibakalinga banu mubakasanguka. Twazibisisile ngwetu bamo mubakasanguka bakalinga byuma byabibwa, bamo co bakalinga byuma byabibi. Yesu kendekele ngwendi banu bakalinga byuma byabibwa nambe kulinga byabibi mubakasanguka. Oloni nendeka ngwendi baje balingile. Wendekele bya banu baje “balingile byuma byabibwa” na baje “balingile byuma byabibi.” Oku kulumbununa ngwabo ebi byuma babilingile simbu kanda batse. Omu mukemwo mubinapande kufwila byuma mwafwa wahi ibakatabesa kulinga byuma byabibi mu kaye kakaha. Baka-kujeneka busunga balingile ebi byuma byabibi simbu kanda batse. Ngeci bika byalumbunwine Yesu mwendekele ngwendi bamo “bakasangukila kuyoya,” bamo co “bakasangukila kubasompa”?
15. Beya “bakasangukila kuyoya,” co mwafwa bika?
15 Baka-busunga baje balingile byuma byabibwa simbu kanda batse, “bakasangukila kuyoya” mwafwa bakasanguka oku mazina abo banawasoneka laja mu libulu lya kuyoya. Oku kulumbununa ngwabo kusanguka kwa banu baje “balingile byuma byabibwa” kubanendeka ku Yiwano 5:29, kukekwo kusanguka kwa “baka-busunga” kubanendeka ku Bilinga 24:15. Oku kunalitombola na majwi ali ku mukanda wa Loma 6:7 uje wendeka ngwawo: “Uje natsi, nasamba ku bubi bwendi.” Ngeci aba baka-busunga mubatsile, Njambi wakonekelele bubi bubalingile simbu kanda batse, oloni akanuka byuma byabibwa bibalingile. (Hebe 6:10) Nameme ngoco, baka-busunga baje bakasanguka banapande kukatwalelelaho kupwa ba kulongwa mangana mazina abo akatwaleleleho kukala mu libulu lya kuyoya.
16. Yesu walumbunwine bika mwendekele ngwendi banu bamo “bakasangukila kubasompa”?
16 Oloni bika bikalingiwa kuli baje balingile byuma byabibi simbu kanda batse? Nameme Yehova wakonekelele bubi bwabo mubatsile, oloni kubamupangelele mu kulongwa ha simbu ibakele na kuyoya. Mazina abo kubawasonekele mu libulu lya kuyoya. Ngeci kusanguka kwa baje “balingile byuma byabibi,” kukekwo kusanguka kwa “baka-kujeneka busunga” kubanendeka ku Bilinga 24:15. Bakebo “bakasangukila kubasompa.” c Oku kulumbununa ngwabo baka-kujeneka busunga bakabasompa kwesekesa na byuma bibakalinga ha simbu oyo. (Luka 22:30) Mu kwita kwa simbu, Yesu akazibuka indi banapande kubasoneka mu libulu lya kuyoya. Baka-kujeneka busunga bakasoneka mazina abo mu libulu lya kuyoya nga bakecela bilinga byabo byabibi na kulikundika kuli Yehova.
17-18. Bika bibanapande kukalinga boshe baje bakasanguka na kuyoya hano hasi, co bilinga muka bibanendeka ku Kujombolola 20:12, 13?
17 Banu baje bapwile baka-busunga na baje kubapwile baka-busunga simbu kanda batse, banapande kukononoka mashiko a mu mabulu a kuzenga aje akakalako Yesu mwakayula ha myaka 1,000. Kapositolo Yiwano wendekele byamwene mu cimona ngwendi: ‘Njamwene batsi bakama na babandondo, bemanene kulutwe lwa litanda, co kwakele mabulu a kuzengununa. Oloni kwakele libulu likwabo lya kuzengununa, likelyo libulu lya kuyoya. Co batsi babasompele kwesekesa na bilinga byabo bibalingile, ngwe mubabisonekelele mu mabulu.’—Kujo 20:12, 13.
18 Baje bakasanguka bakabasompela “bilinga” muka? Kuma bakabasompela bilinga bibalingile simbu kanda batse ndi? Embwe. Anukeni ngweni bubi bubalingile simbu kanda batse babukonekelele mubatsile. Ngeci “bilinga byabo” bibalumbununa aha keti bije bibalingile simbu kanda batse. Oloni binapu bilinga bibakalinga munima ya kulilongesa busunga mu kaye kakaha. Nameme banu ba kulongwa ba kufwa ngwe Nowa, Samwele, Devidi, na Daniele, nabo banapande kukalilongesa bya Yesu na kukala na likulahelo mu ndando yendi ya kupatula. Nga aba banu nabo bakalilongesa mu kaye kakaha, co baka-kujeneka busunga byabingi banapande kukalilongesa.
19. Bika bikalingiwa kuli baje kubakapangesa byuma bibakalilongesa?
19 Bika bikalingiwa kuli baje kubakapangesa byuma bibakalilongesa? Mukanda wa Kujombolola 20:15 utuleka ngwawo: ‘Woshe uje kubasonekele mu libulu lya kuyoya bamumbilile mu lishali lya tuhya.’ Awa majwi amwesa ngwawo bakabanyongesa. Ngeci tunapande kweseka mwoshe mutwasela mangana lizina lyetu balisoneke mu libulu lya kuyoya na kutwalelelaho kukalamo.
Ndolome ali na kupanga cipangi cakama ca kulongesa cije cikakalako mu myaka 1,000 yakayula Yesu (Taleni palagilafu 20)
20. Cipangi muka ca kulitila cikalingiwa ha myaka 1,000 yakayula Yesu? (Taleni cikupulo cili ha liputa lyakulibanga.)
20 Myaka 1,000 yakayula Yesu ikapwa ya kulitila. Banu ba Njambi bakapanga cipangi cakama manene ca kulongesa baje bakasanguka. Oloni ha simbu ei lalo, Yesu na bakubwabesa bakaka manene mbunge ku byuma bibakalinga baka-busunga na baka-kujeneka busunga. (Isaya 26:9; Bili 17:31) Cipangi ca kulongesa cikalingiwa bati? Cilongesa cinatako cikatukwasa kuzibisisa mwamubwa ei ñanda na kukandelela kuli Yehova ha kutwana obu bwana.
MWASO 147 Njambi Natukulahesa Kuyoya kwa Myaka Yoshe
a Muno mu cilongesa tusimutwiya bya kuzibisisa kwakuha kwa majwi a Yesu ali ku Yiwano 5:28, 29 aje amwesa bya banu “bakasangukila kuyoya” na baje “bakasangukila kubasompa.” Tusimutwiya bikulumbununa kusangukila kuyoya na kusangukila kusompa.
b Eli libulu bashangumukile kulisoneka “hakashangumukilile kukalako kaye.” Aka kaye kemanena banu baje bawana bukwasi mu ndando ya kupatula ya Yesu. (Mate 25:34; Kujo 17:8) Ngeci, Abele uje wapwile wa kulongwa ikeye ibabangele kusoneka omu mu libulu.
c Kunima twakele na kwendeka ngwetu lijwi lya “kusompa” libanendeka oku ku mukanda, lilumbununa kusompa munu mwafwa ya byuma byabibi byanalingi. Bikebyo bilinasa kulumbununa eli lijwi. Oloni ha simbu ei Yesu mwapangesele lijwi lya “kusompa” wakele na kulumbununa kukengesesa mwamubwa munu na kumona mwamubwa byali na kulinga ngwe muimwesela Mbimbiliya imo ya Cigriki ngwayo “kwilula bilinga bya munu.”
