Ku mukanda wa 1 Kolinte 15:8, Paulu wendekele ngwendi: “Mamaneselelo wakusholokele na kuli yange, ngeci njinapu ngwe mbututu uje nasemuka bubishu.” Kunima twakele na kwendeka ngwetu Paulu walumbunwine byuma byalingiwile kuli ikeye omwo wamwene Yesu mwilu mu cimona. Kwafwile lika ngwe wasemukile nambe kusanguka ku sipilitu simbu kanda kusanguka kwa cifwa eci kukaleko, mwafwa te kunasala myaka yaingi mangana kukaleko. Oloni mutunatondesesa biñanda byabingi bya kukundama oku ku cisoneka, tunamono ngwetu tunapande kutengululako mutuli na kucizibisisila.

Tuzibuka ngwetu Paulu wakele na kwendeka byalingiwile ha simbu yatengulukile. Oloni walumbunwine bika omwo wendekele ngwendi wapwile ngwe “mbututu uje nasemuka bubishu”? Hamo walumbunwine byuma binatako.

Kutenguluka kwendi kwapwile kwa bwasi-bwasi, co kwakomokesele banu. Mbututu uje akasemuka bubishu akasemuka ha simbu kuyapandele. Saulu (uje wakupwile Paulu) mwakele na kuya ku Damasika na kuyandesa baka-Kristu kasinganyekele ngwendi amona Yesu uje wasangukile. Kutenguluka kwa Paulu kwamukomokesele manene, co kwakomokesele na baka-Kristu ba ku Damasika baje bashakele kukayandesa. Kutundaho, byuma byalingiwile byakomokesele manene Paulu, co wecelele kumona ha simbu yaindondo.—Bili 9:1-9, 17-19.

Watengulukile ha simbu kuyapandele. Lijwi lya cigriki libananungulula ngwabo “mbututu uje nasemuka bubishu” lyasa kulumbununa lalo ngwalyo mbututu uje nasemuka ha simbu kuyapandele. Mbimbiliya ya The Jerusalem Bible ngwayo: “Njinapu ngwe mbututu uje nasemuka ha simbu ije banu kubabandamenene.” Ha simbu yatengulukile Paulu, Yesu te nai laja mwilu. Yesu mwasangukile kasholokele kuli Paulu, oloni washolokele kuli bakwabo babanendeka mu mavesi akulibanga simbu kanda aye mwilu. (1 Koli 15:4-8) Paulu wabezikile kumona Yesu uje wasangukile nameme washolokele kuli ikeye ha simbu ije yamonekele ngwe kuyapandele.

Wendekele byalingiwile kuli ikeye mu kulikehesa. Baka-kulilongesa bamo bendekele ngwabo majwi a Paulu amwesele ngwawo wakele na kulipaya. Nga mukemwo, co Paulu walizibile ngwendi kapandele kupwa kapositolo. Mukemwo wendekele ngwendi: ‘Yange wamundondo ku tupositolo boshe, co kunjafwililile kunjisana kapositolo, mwafwa njayandesele cikungulukilo ca Njambi. Oloni mu ngozi yakama ya Njambi, njinapu muno munjinapu.’—1 Koli 15:9, 10.

Ngeci, hamo Paulu walumbunwine ngwendi Yesu washolokele kuli ikeye ha simbu ije kabandamenene, nambe ngwendi watengulukile ha simbu kabandamenene nambe hamo walumbunwine ngwendi kapandele kumona Yesu. Byoshe-byoshe byalumbunwine, tuzibuka ngwetu Paulu wamwene byuma byalingiwile kuli ikeye kupwa bya seho manene. Byamulingisile akulahele na mbunge yendi yoshe ngwendi Yesu nasanguka ku batsi. Mukemwo kakangi mwakele na kwambulula kuli bakwabo bya kusanguka kwa Yesu, wakele na kwendeka byuma byalingiwile kuli ikeye ha simbu ije kabandamenene.—Bili 22:6-11; 26:13-18.