CILONGESA 36
MWASO 89 Tolilileni, Ononokeni, Co Mubezika
Pweni Baka-kulinga Bili mu Lijwi lya Njambi
“Pweni baka-kulinga byuma bili mu lijwi lya Njambi, keti baka-kuziba lika.”—JEMS 1:22.
BILI MUNO MU CILONGESA
Cino cilongesa citukwasa tukale na lishungu lya kutanda Mbimbiliya ha litangwa na litangwa, kusinganyekesesa ha byuma bitutanda na kubipangesa mu buyoye bwetu.
1-2. Bika bikalingisa bangamba ba Yehova babwahelele? (Jemusi 1:22-25)
YEHOVA na munendi Yesu bashaka ngwabo tubwahelele. Mukanda wa Samu 119:2 wendeka ngwawo: “Banabwahelela baje banyunga byanukiso byendi, baje bamutonda na bimbunge byabo byoshe.” Yesu wendekele ngwendi: “Banabwahelela baje baziba lijwi lya Njambi na kulinyunga.”—Luka 11:28.
2 Banu ba Yehova bapwa ba kubwahelela. Mwafwa bika? Kuli byuma byabingi bikatulingisa tubwahelele, oloni cuma cakama manene capwa kutanda Mbimbiliya na kupangesa byuma bitunatanda.—Tandeni Jemusi 1:22-25.
3. Kupangesa byuma bitutanda mu Mbimbiliya kutukwasa bati?
3 Kupwa “baka-kulinga byuma bili mu lijwi lya Njambi” kutubezikisa mu bingila byabingi. Cakumwenako, kulinga byuma bili mu Mbimbiliya inapu ngila itukazibisila Yehova kubwaha. Co kulinga ngoco kukatulingisa tubwahelele. (Ekele 12:13) Kukabangeya binangulo bya mu Lijwi lya Njambi kutukwasa tuyoye mwamubwa na baka-naanga yetu hamolika na bakwetu baka-Kristu. Twakulahela neni mwalimwena ngoco mu kuyoya kweni. Co lalo kukabangeya binangulo bya mu Mbimbiliya kutunyungilila ku bukalu bubakaliwana nabwo baje kubesi kubikabangeya. Cili bene tulitabasana na byuma byendekele mwene Devidi. Munima ya kwendeka bya mashiko na binangulo mu mwaso wendi, Devidi wendekele ngwendi: “Mu kuwanyunga muli cikandelela cakama.”—Samu 19:7-11.
4. Mwafwa bika kukwapwile kwakwasi kupangesa byuma bitutanda mu Lijwi lya Njambi?
4 Kukwapwile kwakwasi kulinga byuma bili mu Lijwi lya Njambi. Tunapande kuwanako simbu ya kutanda na kulilongesa Lijwi lya Njambi mangana tulinge byuma byatonda. Ngeci tusimutwiyeni ha byuma bitukwasa tutande Lijwi lya Njambi simbu yoshe. Tusimutwiya lalo bitukwasa tusinganyekesese ha byuma bitunatanda na kumona mutwasa kubipangesela mu kuyoya kwetu.
WANENIKO SIMBU YA KUTANDA MBIMBILIYA
5. Bipangi muka bikatuzezeka manene?
5 Bwingi bwa bangamba ba Yehova bapwa ba kuzezama. Tukapangesa simbu yetu yaingi mu kulinga byuma bya seho manene. Cakumwenako, bamo bakapanga na nzili mangana bawanene naanga yabo byuma bya ku mubila. (1 Timo 5:8) Bwingi bwa baka-Kristu bali na kunyunga babushoko bwabo baje banakulubala na baje bali na kubinja. Co lalo tubaboshe tukapanga na nzili mu kunyungilila bukangule bwetu. Tuli lalo na bipangi bya seho manene mu cikungulukilo. Co cipangi ca seho manene cituli naco tubaboshe cinapu kwambulula muzimbu waubwa. Nameme mwazezama manene, bika bimikwasa muwaneko simbu ya kutanda Mbimbiliya na kusinganyekesesa ha byuma bimutanda na kubipangesa mu kuyoya kweni?
6. Bika bimikwasa mutande Mbimbiliya ha litangwa na litangwa? (Taleni na cikupulo.)
6 Kutanda Mbimbiliya ‘kwapwa kwa seho manene’ ngeci ha kupwa baka-Kristu tunapande kutanda Mbimbiliya ha litangwa na litangwa. (Filp 1:10) Mukanda wa Samu umwesa ngwawo munu uje ‘wazema mashiko a Yehova, co awatanda na kuwasinganyekesesa mutanya na butsiki’ apwa wa kubwahelela. (Samu 1:1, 2) Oku kumwesa ngwabo tunapande kuwanako simbu ya kutanda Mbimbiliya ha litangwa na litangwa. Simbu muka yaibwa ya kutanda Mbimbiliya? Simu yoshe imumona ngweni yaibwa. Munapande kwangula simbu yaibwa ije imikwasa mutande Mbimbiliya ha litangwa na litangwa. Ndolome Victor wendekele ngwendi: “Njashaka kutanda Mbimbiliya mutondo. Nameme kunjesi kushaka kwinduka mutondo, ei simbu ikeyo yapwa yaibwa manene kutanda mwafwa kukwesi bikanjitanganesa.” Kuma neni mukalizibi ngoco ndi? Lihuleni ngweni, ‘Simbu muka yaibwa injasa kutanda Mbimbiliya?’
Simbu muka yaibwa imwasa kutanda Mbimbiliya? Mwasa kuitanda bati ha litangwa na litangwa? (Taleni paragirafu 6)
SINGANYEKESESENI HA BYUMA BIMUNATANDA
7-8. Bika byasa kutwonowesa kuwana bukwasi ku byuma bitutanda? Endekeni cakumwenako.
7 Simbu imo tunasa kutanda byuma byabingi na kwonowa kubizibisisa. Kuma mwatandaho laja byuma bimo, oloni munima ya kutanda mwanukako lika byabindondo ndi? Byuma bya cifweci bikalingiwa kuli yetu tubaboshe. Calubinda bikebyo binasa kulingiwa ha simbu itutanda Mbimbiliya. Hamo tunalyangwila kutanda macapita a kupwamo ha litangwa na litangwa. Nga mukemwo, co muli na kulinga mwamubwa. Tunapande kulyakela bilengo na kulifwita kubishulisilila. (1 Kori 9:26) Nameme ngoco kushangumuka kutanda Mbimbiliya kukwapwilemo. Kuli byuma byabingi bikwabo bimunapande kulinga mangana muwane bukwasi ku byuma bimutanda mu Lijwi lya Njambi.
8 Cakumwenako nyonzi yapwa ya seho manene mwafwa ikakwasa bimena bikole. Oloni nga nyonzi inyoka manene mu simbu yaindondo lika, co bimbuto bibihya. Oloni nga inyoka mu kwesekela mema akobela mwamubwa mu libu, co oku kukwasa bimbuto bikole mwamubwa. Mu ngila imolika, kutwapandele kutanda Mbimbiliya bwasi-bwasi mwafwa kulinga ngoco kutwonowesa kuzibisisa mwamubwa bitunatanda na kwonowa kubipangesa mu kuyoya kwetu.—Jems 1:24.
Kukambata simbu mangana mema akobele mu libu nga nyozi yanyoko. Mu ngila imolika netu tunapande kuwanako simbu ya kusinganyekesa na kupangesa bitunatanda mu Lijwi lya Njambi (Taleni paragirafu 8)
9. Bika bitunapande kulinga nga twananguka ngwetu tukatanda Mbimbiliya bwasi-bwasi?
9 Kuma mwananguka ngweni simbu imo mukatanda Mbimbiliya bwasi-bwasi ndi? Bika bimunapande kulinga? Tandeni mu kulibandeka mangana musinganyekesese ha byuma bimunatanda. Kukwapandele kumikaluwila kulinga ngoco. Mwasa kubwezelela ku simbu imukatanda na kulilongesa Mbimbiliya. Co lalo munasa kwangula kutanda mavesi amandondo lika na kupangesa simbu inasalako mu kusinganyekesesa ha byuma bimunatanda. Victor itunabanga kwendeka wendekele ngwendi: “Njikatanda byuma byabindondo lika. Co njikasinganyekesesa ha byuma binjinatanda, litangwa lyoshe.” Twasa kwangula mwakutandela Mbimbiliya oloni tunapande kuitanda mu kulibandeka mangana tuzibisise mwamubwa byuma bitutanda.—Samu 119:97; taleni cipalo “ Bihula Bimunapande Kulihula.”
10. Endekeni cakumwenako cimwesa mumwasa kupangesela byuma bimuli na kulilongesa. (1 Tesalonika 5:17, 18)
10 Nga twatanda Mbimbiliya tunapande kuwana bingila bya mwakupangesela byuma bitunatanda. Omo mutanda Lijwi lya Njambi, lihuleni ngweni, ‘Njasa kupangesa bati binjinatanda, ha simbu ino nambe kulutwe?’ Cakumwenako, hamo munakala na kutanda mukanda wa 1 Tesalonika 5:17, 18. (Tandeni.) Munima ya kutanda awa mavesi abali, mwasa kulyakela cilengo ca kulombela simbu yoshe kutundilila kwisi ya mbunge. Mwasa kusinganyekesesa ha byuma byanamilingila Yehova. Hamo mwasa kwendekako byuma bitatu byanamilingila na kukandelela kuli ikeye. Nameme mupangesa minutu ya kupwamo, kusinganyekesesa ha byuma bimunatanda mu Mbimbiliya kumikwasa muzibisise lijwi lya Njambi na kupangesa byuma bimunalilongesa. Nga simbu yoshe mupangesa byuma bimuli na kulilongesa mu Mbimbiliya, co mupwa bangamba ba Yehova ba kulongwa. Batico nga munanguka ngweni kuli byuma byabingi bimunapande kutengulula mu kuyoya kweni?
LYAKELENI BILENGO BIMWASA KUSHULISILILA
11. Bika byasa kutulingisa tulizibe kuzeya simbu imo? Endekeni cakumwenako.
11 Omwo tutanda Mbimbiliya simbu imo tunasa kuzeya nga twananguka ngwetu kuli byabingi bitunapande kutengulula mu kuyoya kwetu. Hamo twendeke ngwetu lelo munatanda cinangulo ca mu Mbimbiliya cije cendeka bya kujeneka kukala na kangu. (Jems 2:1-8) Co munanguka ngweni kumwapandele kukala na kangu ngeci mutengululako mumukalingila bakweni. Mwalingi mwamubwa. Imene mutanda mavesi aje amwesa ngwawo munapande kwangula mwamubwa bimwendeka. (Jems 3:1-12) Co munanguka ngweni byuma bimukendeka simbu imo bikazeyesa na kubabalesa bakweni ku mbunge. Ngeci mutengululako mumukendekela mangana bimwendeka bikwase bakweni. Indele mutanda cinangulo cije cendeka ngwaco kutwapandele kulikwatasana na kaye. (Jems 4:4-12) Co munanguka ngweni munapande kwangula mwamubwa byakulizima nabyo buli mangana keti mulikwatasane na kaye. Kalenge munanguka ngweni kuli byuma byabingi bimunapande kutengula mu kuyoya kweni.
12. Mwafwa bika kumwapandele kuzeya nga munananguka ngweni kuli byabingi bimunapande kutengulula mu kuyoya kweni? (Taleni na futunoti.)
12 Nga munanguka ngweni kuli byabingi bimunapande kutengulula mu kuyoya kweni, co keti muzeye. Kunanguka hamunapande kupangela kumwesa ngwabo mubakulikehesa co lalo muli na mbunge yaibwa. Nga tu ba kulikehesa, co tutanda Mbimbiliya na kumona hatunapande kupangela. a Anukeni lalo ngweni tunapande kutwalelelaho kuzala “bunu bwabuha.” (Kolo 3:10) Bika bimikwasa mutwaleleleho kulinga bili mu lijwi lya Njambi?
13. Ngila muka yaibwa mumwasa kupangesela bimunalilongesa? (Taleni na cikupulo.)
13 Kutubakana kupangesa byoshe bimunatanda ha simbu imolika, lyakeleni bilengo bimwasa kushulisilila. (Prov 11:2) Esekeni kulinga ebi. Sonekeni mukana wa byuma hamunapande kupangela. Co pangeleniko ha cimo nambe bibali, simbu yekaco mwakupangela hali ebi bikwabo. Munapande kushangumukila hali?
Kutubakana kupangesa byoshe bimunatanda ha simbu imolika lyakeleni bilengo binapande. Hamo mwasa kupangela ha cuma cimo nambe bibali (Taleni paragirafu 13-14)
14. Bilengo muka bimwasa kushangumukila kulyakela?
14 Shangumukileni kulyakela bilengo bije bimwasa kushulisilila bwasi. Nambe kushangumuka kupangela ha kapenga kakama kamwakala nako. Nga munangula hamunapande kupangela, co tondeseseni mu mabulu nambe kupangesa Watch Tower Publications Index nambe Buka ya Lipatisiso ya Lipaki za Jehova. Lombeni Yehova amyane “lishungu na nzili ya kulinga byuma” bimunangula kulinga. (Filp 2:13) Kutundaho pangeseni bimunalilongesa. Kushulisilila cilengo ceni cakulibanga kumikwasa mangana mushulisilile na bikwabo. Nga munanguka ngweni munashulisilila cilengo ceni ca kutengululako cuma cimo mu kuyoya kweni, co mukala na lishungu lya kutengululako na byuma bikwabo.
TABESENI LIJWI LYA NJAMBI “LIPANGE MULI YENI”
15. Banu ba Yehova banaliseze bati na banu bamo baje bakatanda Mbimbiliya? (1 Tesalonika 2:13)
15 Bamo bakalishasha ngwabo banatanda Mbimbiliya bisimbu byabingi. Oloni kuma banakulahela biyendeka ndi? Bakayoyo mu kulitombola nebi biilongesa ndi? Embwe. Banu babangi kubesi kukabangeyeya binangulo bya mu Mbimbiliya. Oloni banu ba Yehova bakebo bakakabangeya binangulo bya mu Mbimbiliya. Ngecilika mwa baka-Kristu bakulibanga netu twataba Mbimbiliya ‘ngwe muje bene muinafu, ngwe lijwi lya Njambi.’ Co lalo tukeseka mwoshe mutwasela kupangesa binangulo bilimo.—Tandeni 1 Tesalonika 2:13.
16. Bika bitukwasa tupwe baka-kulinga bili mu Lijwi lya Njambi?
16 Kukwapwile kwakwasi kutanda na kupangesa bitunatanda mu Lijwi lya Njambi. Tunasa kulifwita kuwana simbu ya kutanda. Nambe hamo tunasa kutanda bwasi-bwasi na kujeneka kuzibisisa byuma bitutanda. Co lalo tunasa kuzeya nga tusinganyeka ha byuma byabingi bitunapande kutengulula mu kuyoya kwetu. Nameme byuma bifwe bati kubyasa kutwonowesa kutanda Mbimbiliya na kusinganyekesesa ha byuma bitunatanda. Yehova atukwasa kuhyana bukalu bukatwonowesa kutanda Mbimbiliya. Ngeci tutambuleni bukwasi bwatwana Yehova na kujeneka kupwa baka-kutolilila lika, oloni baka-kulinga bili mu Lijwi lya Njambi. Mwabusunga bene nga tutanda Lijwi lya Njambi na kupangesa bitutanda mu kuyoya kwetu, co tupwa ba kubwahelela manene.—Jems 1:25.
MWASO 94 Tukandelela Kuli Njambi ha Kutwana Lijwi Lyendi
a Kengeni vidio ya Kutanda Mbimbiliya ha jw.org.
