Nameme aba bandongesi 70 kubakele ku cilika ca Kulya kwa Mwene kwa Mangwezi oku kukulumbununa ngwabo Yesu wababyanene nambe hamo bakebo bamusezele. Ha simbuei Yesu washakele kukala na bandongesi bendi ba kupwa 12.

Baje bakupwa 12 na baje bapwile 70 boshe bapwile bandongesi ba Yesu. Yesu wangwile banalume 12 mangana bapwe tupositolo bendi. (Luka 6:12-16) “Wakungulwile baje 12” mwakele mu Galileya, co “wabatumine na kwambulula Bumwene bwa Njambi na kukangwisa banu.” (Luka 9:1-6) Kutundaho Yesu mwakele mu Judeya, “wangwile bakwabo 70, co wabatumine babali-babali.” (Luka 9:51; 10:1) Yesu wakele na baka-kumukabangeya babangi mu mitambela yeka.

Bajuda baje bapwile bandongesi ba Yesu bakele na kulinga Paseka ha mwaka na mwaka na binaanga byabo. (Kutu 12:6-11, 17-20) Simbu ya kumutsiya muyakele muyehi Yesu na tupositolo bendi baile mu Jelusalema. Oloni kalanyele bandongesi bendi boshe ba mu Judeya, Galileya na Peleya mangana bakulingile hamo cilika ca Paseka. Cisholoka Yesu washakele lika kukala na tupositolo bendi ha simbuei. Ngeci wabalekele ngwendi: “Njashungwiiye manene kulya neni ei Paseka simbu kanda njiyande.”—Luka 22:15.

Kuli bimo byamulingisile ngoco. Yesu wakele muyehi na kutsa mangana apwe “Muna Manga wa Njambi uje atundisa bubi bwa kaye.” (Iwano 1:29) Watsililile mu Jelusalema muje mubakele na kwanena milambu kuli Njambi kunima. Manga wa Paseka wakele na kukwasa baIsalele banuke ngwabo Yehova wabapatwile mu Ijipiti. Oloni kwitila mu Ndando ya Kupatula Yesu walingile byuma bya seho manene. Wapatwile banu boshe ku bubi na kutsa. (1 Kori 5:7, 8) Byuma byalingile Yesu byalingisile tupositolo bendi 12 bapwe mutamba wa lubula lwa cikungulukilo ca baka-Kristu. (Efeso 2:20-22) Co lalo Jelusalema nganda ya kujela ya mwilu yakele na “lubula lwa mamanya 12.” Co haje ha mamanya hakele “mazina 12 a tupositolo 12 ba Muna Manga.” (Kujo 21:10-14) Ngeci tupositolo ba kulongwa bakele na cipangi ca seho manene mu kushulisilila cizango ca Njambi. Oku kutulingisa tuzibisise byalingisile Yesu alinge Paseka na bandongesi bendi 12 na kulingila hamo nabo cilika ca Kulya kwa Mwene kwa Mangwezi.

Bandongesi 70 na bakwabo beka kubakele ku cilika ca Kulya kwa Mwene kwa Mangwezi. Nameme ngoco bandongesi bendi boshe baje batwaleleleho kupwa ba kulongwa bawanene bukwasi ku cilika calingile. Co baka-Kristu bakubwabesa boshe bakobelele mu cikumiiyo ca bumwene cije calikumiiye Yesu na tupositolo bendi buje butsiki.—Luka 22:29, 30.