CILONGESA 10
Kuzema Yehova Kumishongangeya Bamimbwitike
“Bika lalo byasa kunjibindika kunjimbwitika?”—VILI 8:36.
MWASO 37 Kusebeleza Jehova ka Moyo Kaufela
BILI MUNO MU CILONGESA *
1-2. Kwesekesa na Vilinga 8:27-31, 35-38, bika byashongangeyeye uje Kaisopya bamumbwitike?
KUMA mushaka bamimbwitike na kupwa ndongesi ya Kilistu ndi? Kuzema Yehova na kumukandelela ha byuma byanatulingila, kunalingisa banu babangi babambwitike. Tucisimutwiyeni hali munalume umo wa bulemu uje wakele na kupangela mwene wa munakazi wa ku Isopya.
2 Uje Kaisopya walyangwilile kumumbwitika, munima lika ya kumulongesa. (Tandeni Vilinga 8:27-31, 35-38.) Bika byamushongangeyeye bamumbwitike? Wamwene Lijwi lya Njambi kupwa lya seho. Ngeci, wakele na kutanda mavesi a ku mukanda wa Isaya mwakele mu litemba lyendi. Co Filipu mwasimutwiiye nendi, uje Kaisopya wamwesele kukandelela mwazibukile byuma byamulingilile Yesu. Oloni bika byamulingisile aye ku Yelusalema? Mwafwa wazemene Yehova. Tuzibuka bati? Tuzibuka ngoco, mwafwa waile ku Yelusalema mu kulemesa Yehova. Hamo uje munalume wasezele bulombelo bwendi na kulikwatasana na banu baje balikundikile kuli Njambi wa busunga. Kuzema Yehova kukekwo kwamushongangeyeye lalo alingeko cuma cikwabo ca seho. Walyangwilile kumumbwitika na kupwa ndongesi ya Kilistu.—Mateo 28:19.
3. Bika byasa kwonowesa munu kumumbwitika? (Taleni cipalo ca “ Mbunge Yeni Inalifu na Libu Muka?”)
3 Cizemo ceni kuli Yehova casa kumishongangeya bamimbwitike. Oloni cizemo casa kumyonowesa kumimbwitika. Mu ngila muka? Cakumwenako, hamo mwazema manene babushoko bweni na babusamba beni baje kubapwile Bakaleho, co mwasa kulishoshomwena ngweni nga bamimbwitika, co bamizinda. (Mateo 10:37) Indi hamo muli na tulingolingo tumo tuje twazinda Yehova, co kuli na kumikaluwila kutwecela. (Myaso 97:10) Indi hamo munezilila kulinga bilika bya mu bulombelo bwa makuli kushwa ku bwanike bweni. Co hamo mukazibi kubwaha mumukanuka bimwakele na kulinga kuje ku bilika. Ngeci, kwasa kumikaluwila kwecela kulinga bilika byazinda Yehova. (1 Koli 10:20, 21) Oloni munapande kulihula ngweni: “Bika binjazema manene nambe iya injazema manene?”
IYA IMUNAPANDE KUZEMA MANENE?
4. Bika bimishongangeya bamimbwitike?
4 Kuli byuma byabingi bya seho bimwasa kuzema na kusingimika. Cakumwenako, simbu kanda mushangumuke kulilongesa Mbimbiliya na Bakaleho ba Yehova, hamo mwasingimikile Mbimbiliya. Co hamo mwazemene Yesu. Co lalo kulikwatasana na Bakaleho ba Yehova na kubazibuka mwamubwa kunamilingisa mubazeme. Oloni kusingimika lika Mbimbiliya na kuzema Yesu na Bakaleho ba Yehova kukumilingisa mulikundike kuli Yehova na kumimbwitika. Kuzema Yehova kukekwo kumishongangeya bamimbwitike. Nga muzema manene Yehova, co kumutabesa cuma coshe coshe cimyonowese kumupangela. Cizemo ceni kuli Yehova cimishongangeya bamimbwitike, co lalo cimikwasa mupangele Yehova mu kulongwa.
5. Bika bitusimutwiya muno mu cilongesa?
5 Yesu wendekele ngwendi tuzeme Yehova na mbunge yetu yoshe na mwonyo wetu woshe na mana etu oshe na nzili yetu yoshe. (Mako 12:30) Bika bimikwasa muzeme manene Yehova na kumusingimika? Tunapande kusinganyekesesa mwatuzemena Yehova. (1 Yowa 4:19) Muno mu cilongesa tusimutwiya byuma bitukwasa tuzeme manene Yehova. Tusimutwiya lalo bitunapande kulinga mwafwa ya kuzema manene Yehova. *
6. Kwesekesa na Loma 1:20, twasa kulilongesa bati bya Yehova?
6 Lilongeseni bya Yehova kwitila mu byuma byanatanga. (Tandeni Loma 1:20; Kujo 4:11) Singanyekeseseni ha bimena na tusitu mangana mumone mubili na kusholwela mana a Yehova. Singanyekeseseni lalo mubila weni mubautangela mu kukomokesa. (Myaso 139:14) Co lalo singanyekeseseni nzili yanaka Yehova mu litangwa. Litangwa lyapwa ngongonosi. Oloni kuli bingongonosi * byabingi bije bili na nzili bije byatangele Yehova. (Isaya 40:26) Kulinga ngoco kumikwasa muzeme manene Yehova. Kuli byuma bikwabo lalo bimikwasa mukanyamese busamba bweni na Yehova keti kuzibuka lika ngweni Yehova wakala na nzili na mana. Nga mushaka kuzema manene Yehova na kukanyamesa busamba bweni nendi, co munapande kumuzibuka mwamubwa.
7. Bika bimunapande kukulahela mangana muzeme manene Yehova?
7 Kulaheleni ngweni Yehova wamizema manene. Kuma kukamikaluwila kukulahela ngweni Ishamatanga wa lilu na kaye amizibuka, co wamyaka mbunge ndi? Nga mukemwo, co zibukeni ngweni Yehova “kakele kulyala netu embwe.” (Vili 17:26-28) “Azibuka biyongola byetu byoshe,” co lalo namikulahesa ngwendi ‘nga mumushakezeka, co mumuwana.’ (1 Mizi 28:9) Yehova namikoko mukemwo muli na kulilongesa Mbimbiliya. (Yowa 6:44) Nga mukandelela Yehova ha byuma byoshe byanamilingila, co mumuzema manene.
8. Mwasa kumwesa bati ngweni mwakandelela ku cizemo ca Yehova?
8 Ngila ikwabo imwasa kumweselamo ngweni mwakandelela ku cizemo ca Yehova, inapu kulombela. Nga muleka Yehova bishoti byeni byoshe na kumukandelela ha byuma byanamilingila, co mumuzema manene. Omwo mulimwena mwakumbulwila malombelo eni, busamba bweni nendi bukanyama. (Myaso 116:1) Oku kumikwasa mukulahele ngweni amizibisisa. Oloni nga mushaka ngweni busamba bweni nendi bukanyame manene, co munapande kumona byuma ngwe mwabimwena ikeye. Munapande lalo kuzibuka byatonda ngwendi mulinge. Mwasa kubizibuka nga mulilongesa Lijwi lyendi Mbimbiliya.
Kulilongesa Mbimbiliya kutukwasa tushwenye kuyehi na Njambi na kuzibuka byatonda ngwendi tulinge (Taleni palagilafu 9) *
9. Mwasa kumwesa bati ngweni mwamona Mbimbiliya kupwa ya seho?
9 Moneni Mbimbiliya kupwa ya seho. Mu Mbimbiliya, mukemwo lika muli busunga buje bwendeka hali Yehova na ha byuma byanamikulahesa. Mumwesa ngweni mwamona Mbimbiliya kupwa ya seho nga muitanda ha litangwa na litangwa. Mumwesa ngoco lalo nga mulibwahesela simbu kanda mulilongese na munu uje akamilongesa Mbimbiliya na kupangesa bimuli na kulilongesa. (Myaso 119:97, 99; Yowa 17:17) Kuma mwakala na cinoneko ca kutanda Mbimbiliya ha litangwa na litangwa ndi? Mukacikabangeya ndi?
10. Mbimbiliya yapwa bati ya kulitila?
10 Mbimbiliya yapwa ya kulitila, mwafwa ili na biñanda bije bibasonekele banu baje bamwene Yesu. Ikeyo lika inalumbununa mwamubwa byuma byanamilingila Yesu. Omwo mulilongesa byuma byendekele Yesu nebi byalingile, co mupwa babusamba bendi.
11. Bika bimikwasa muzeme Yehova?
11 Zemeni Yesu, co muzema manene Yehova. Bika bitwendekela ngoco? Mwafwa Yesu akatembwinina mwamubwa bifwa bya Ishe. (Yowa 14:9) Nga mulilongesa manene bya Yesu, co muzibuka mwamubwa Yehova na kumumona kupwa wa seho. Yesu wazibilile ngozi banu baje babayengwile, ba kufwa ngwe tuhutu, babezi na banu baje kubakele na munu wa kubamena. Co lalo wanene banu binangulo byabibwa. Nga mubipangesa mu buyoye bweni, co bimikwasa.—Mateo 5:1-11; 7:24-27.
12. Kuzibuka byamilingilile Yesu kumishongangeya mulinge bika?
12 Muzema manene Yesu omwo musinganyekesesa ha ñombelo yendi ije inalingisa bubi bwetu babukonekele. (Mateo 20:28) Kuzibuka ngweni Yesu wamitsililile kumishongangeya mutenguluke na kulomba Yehova amikonekele. (Vili 3:19, 20; 1 Yowa 1:9) Kuzema manene Yesu na Yehova kumishongangeya lalo mulikwatasane na bandolome na bandokazi.
13. Yehova amikwasa muwane bika?
13 Zemeni bandolome na bandokazi. Babushoko bweni na babusamba beni baje kubapwile Bakaleho kubasa kuzibisisa byuma bimilingisa mulikundike kuli Yehova. Banasa kumilwisa. Oloni Yehova amikwasa muwane lalo bandolome na bandokazi. Omwo mulikwatasana naba bandolome na bandokazi, co bamizema na kumikwasa. (Mako 10:29, 30; Heve 10:24, 25) Mu kwita kwa simbu, babushoko bweni nabo banasa kupangela Yehova na kukabangeya mashiko endi.—1 Petu 2:12.
14. Kwesekesa na 1 Yowano 5:3, bika bimunalimwena ha mashiko a Yehova?
14 Singimikeni mashiko a Yehova na kuwakabangeya. Hamo mwakele na kulinga byuma mwoshe mumwashakelele te kanda muzibuke Yehova. Oloni ha simbu ino, mwalimwena ngweni kukabangeya mashiko a Yehova kwakubwa manene. (Myaso 1:1-3; tandeni 1 Yowano 5:3.) Cakumwenako, mwalimwena bubwa butundamo nga baje bali mu malo na bisemi na bana bapangesa binangulo bya mu Mbimbiliya. (Efeso 5:22–6:4) Kuma naanga yeni inapu ya kubwahelela, mwafwa ya kupangesa ebi binangulo ndi? Kuma buyoye bweni bunapu bwabubwa, mwafwa ya kukabangeya binangulo bya Yehova bije byendeka ngwabyo mwangule babusamba bababwa ndi? Kuma hano munapwoni ba kubwahelela ndi? (Visi 13:20; 1 Koli 15:33) Hamo munakumbulula ngweni eyo.
15. Bika bimunapande kulinga nga kukamikaluwila kupangesa binangulo bya mu Mbimbiliya?
15 Simbu imo, kunasa kumikaluwila kupangesa binangulo bya mu Mbimbiliya bimuli na kulilongesa. Ngeci, Yehova ali na kupangesa munga yendi mu kumyana mabulu a kukundama ku Mbimbiliya aje amikwasa munanguke byuma byabibwa nebi byabibi. (Heve 5:13, 14) Nga mutanda na kulilongesa awa mabulu, co muzibuka mumunapande kupangesela binangulo bya mu Mbimbiliya mu buyoye bweni na bubwa butunda mu kulinga ngoco. Oku kumishongangeya mulikwatasane na munga ya Yehova.
16. Bika byanalingi Yehova mangana akongweye banu bendi?
16 Zemeni munga ya Yehova na kuikundwiya. Yehova nakongweya banu bendi na kubanena mu bikungulukilo. Co Munendi Yesu ikeye mutwe webi bikungulukilo. (Efeso 1:22; 5:23) Yesu nangula cibunga cacindondo ca bandolome ba kubwabesa ngwendi batwamenene cipangi catonda ngwendi bandongesi bendi balinge. Yesu watumbwile eci cibunga ca aba bandolome ngwendi, “ndungo wa kulongwa na kunyanyama.” Aba bandolome bamona cipangi cabo ca kumilisa na kuminyungilila ku sipilitu kupwa ca seho. (Mateo 24:45-47, NWT) Ngila imo yali na kuminyungililamo ndungo wa kulongwa, inapu kwangula bakulunu bakuhya ku sipilitu baminyunge. (Isaya 32:1, 2; Heve 13:17; 1 Petu 5:2, 3) Bakulunu balinga mwoshe mubasela kumizembeleka na kumikwasa mangana mushwenye kuyehi na Yehova. Oloni cuma cimo ca seho cibalinga, cinapu kumikwasa muzibuke mwakulongesela bakweni bya Yehova.—Efeso 4:11-13.
17. Kwesekesa na Loma 10:10, 13, 14, bika bituli na kwambulwila bya Yehova ku bakwetu?
17 Kwaseni bakweni bazeme Yehova. Yesu walekele bandongesi bendi ngwendi balongese bakwabo bya Yehova. (Mateo 28:19, 20) Keti mulingile lika lishiko omwo mupanga eci cipangi. Omwo muzema manene Yehova, co muliziba ngwe mwalizibilile kapositolo Petulu na kapositolo Yowano baje bendekele ngwabo: “Kutwasa kwoloka kwendeka byuma bije bitwamono nebi bitwazibi.” (Vili 4:20) Tupwa ba kubwahelela omwo tukwasa bakwetu bazeme Yehova. Filipu wabwahelelele mwakwasele uje Kaisopya azibisise Bisoneka na kumumbwitika. Nga mutembwinina Filipu na kwononoka lishiko lya Yesu lya kwambulula, co mumwesa ngweni mushaka kupwa Mukaleho wa Yehova. (Tandeni Loma 10:10, 13, 14.) Ngeci, mwasa kulihula cihula cehwile uje Kaisopya ngwendi: “Bika lalo byasa kunjibindika kunjimbwitika?”—Vili 8:36.
18. Bika bitusimutwiya mu cilongesa cinatako?
18 Cuma ca seho manene cimwasa kulinga mu buyoye bweni, cinapu kulyangwila kumimbwitika. Oloni munapande kusinganyekesesa byuma byalibungila mu kumimbwitika, mwafwa mwangula kulinga cuma ca seho manene. Bika byalibungila mu kumimbwitika? Bika bimunapande kulinga simbu kanda bamimbwitike na munima ya kumimbwitika? Ebi bihula tubikumbulula mu cilongesa cinatako.
MWASO 2 Jehova ki Lona Libizo Lahao
^ par. 5 Banu bamo baje bazema Yehova bakalizibi ngwabo kubalibwaheselele kubambwitika mangana bapwe Bakaleho ba Yehova. Nga neni mukalizibi ngoco, co cino cilongesa cimileka byuma bimo bimunapande kulinga mangana bamimbwitike.
^ par. 5 Banu banalisezaseza, ngeci bamo kubesi kupangesa ebi bisimpi kwesekesa nomu mutunabinonekela muno mu cilongesa.
^ par. 6 Nga mushaka kuzibuka byabingi, co taleni kalibulu ka Was Life Created? naka ka The Origin of Life—Five Questions Worth Asking.
^ par. 61 KULUMBUNUNA CIKUPULO: Ndokazi ali na kulanda byuma ha maketi, co ali na kwana tilakiti kuli mumbanda uje alandesa bisapasapa.
