1-2. Beya basa kukwasa baje bacililongesa Mbimbiliya bakole ku sipilitu na kubambwitika?

AMY wa ku Fiji wendekele ngwendi: “Njazemene byuma binjakele na kulilongesa mu Mbimbiliya. Njazibukile ngwange byapwile bya busunga. Oloni kukunguluka kukekwo kwanjikwasele njitengululeko byuma bimo mu kuyoya kwange, co banjimbwitikile. Byuma byalingiwile kuli Amy bitulongesa cuma cimo ca seho. Tulilongesako ngwetu munu uje acililongesa Mbimbiliya asa kukola ku siplitu na kweta ha kumumbwitika nga bandolome na bandokazi mu cikungulukilo bamukwasa.

² Muka-kwambulula umo na umo asa kulingisa cikungulukilo cikole. (Efeso 4:16) Painiya wa lizina lya Leilani wa ku Vanuatu wendekele ngwendi: “Banu bamo bakendeka ngwabo kusema, likalyobe kulela mbunga. Njamono ngwange bikebyo bikalingiwa na ku banu batukalilongesa nabo Mbimbiliya. Kubanga cikungulukilo coshe cipangele hamo asina tubakwasa kwija mu busunga.” Bisemi, babushoko, babusamba na balongesi bakapangela hamo mangana mwanike akole mwamubwa. Bakamushongangeya alinge byuma byabibwa na kumulongesa mwakubilingila. Mu ngila imo lika, baka-kwambulula basa kunangula, kushongangeya na kumwesa baje bacililongesa Mbimbiliya mwanja waubwa mangana babakwase kukola ku sipilitu na kubambwitika.—Visi 15:22.

3. Bika bimulilongesa ku majwi endekele Ana, Daniel na Leilani?

³ Mwafwa bika muka-kwambulula napande kubwahelela nga bandolome na bandokazi bakwasa munu yakalilongesa nendi Mbimbiliya? Ana uje wapwa painiya wa kulitila ku Moldova wendekele ngwendi: “Munu uje acililongesa Mbimbiliya akatondo bukwasi mu byuma byabingi, co uje akamulongesa kasa kumukwasa likalyendi.” Daniel *  uje wapwa painiya wa kulitila ku Moldova wendekele ngwendi: “Kakangi, bakwetu baka-kwambulula bakendeka byuma bije bikete munu injikalilongesa nendi ku mbunge, co bisimpi bimo bibakendeka bikapu byabiha kuli yange.” Leilani nendi wendekele cuma cikwabo casa kutulingisa tubwahelele nga bakwetu bakwasa munu itukalilongesa nendi. Wendekele ngwendi: “Nga munu itukalilongesa nendi alimwena ngwendi bandolome na bandokazi bamuzema, co ananguka ngwendi tu banu ba Yehova.”—Yowa 13:35.

4. Bika bitusimutwiya muno mu cilongesa?

⁴ Munasa kulihula ngweni, ‘Njasa kukwasa bati munu uje acililongesa Mbimbiliya akole ku sipilitu nga keti yange njikalilongesa nendi?’ Tusimutwiyeni byuma bitwasa kulinga nga ndolome nambe ndokazi atulanya ku cilongesa cendi nambe nga munu yakalilongesa nendi ashangumuka kukunguluka. Tusimutwiya lalo bibanapande kulinga bakulunu mu cikungulukilo mangana bakwase baje bacililongesa Mbimbiliya babambwitike.

5. Bika bimunapande kulinga nga ndolome nambe ndokazi amilanya ku cilongesa cendi?

⁵ Cipangi ca kukwasa uje acililongesa Mbimbiliya azibisise Lijwi lya Njambi cinapu ca uje akamulongesa. Ngeci, nga ndolome nambe ndokazi amilanya ku cilongesa cendi, co cipangi ceni cinapu ca kumukwasa. (Kwambu 4:9, 10) Bika bimunapande kulinga mangana mumukwase mwamubwa ha simbu ya kulilongesa?

6. Mwasa kupangesa bati cinangulo cili ku mukanda wa Visimo 20:18 nga banamilanya ku cilongesa ca Mbimbiliya?

⁶ Libwaheseleni. Ca kulibanga, ihuleni owo ndolome nambe ndokazi amilekeko bya munu yakalilongesa nendi. (Tandeni Visimo 20:18.) Mwasa kumwihula ngweni: “Muli na kwendela ha cilongesa muka? Simpi muka imushaka ngweni munu imukalilongesa nendi akazibisise? Kuma kuli byuma bimo bije kunjapandele kulinga nambe kwendeka ha simbu ya kulilongesa ndi? Byuma muka binjinapande kulinga nambe kwendeka mangana njimukwase akole ku sipilitu?” Ndolome nambe ndokazi kasa kumileka biñanda bya kushwekesa bya munu yakalilongesa nendi, oloni biñanda byamileka bimikwasa manene. Ndokazi wa lizina lya Joy uje wapwa kamishinali akalekeko baka-kwambulula bakapanga nabo biñanda bya cifwa eci. Wendekele ngwendi: “Biñanda binjikabaleke bikabalingisa bashake kukwasa munu injikalilongesa nendi na kubakwasa bazibuke bya kwendeka ha simbu ya kulilongesa.”

7. Mwafwa bika munapande kulibwahesela nga banamilanya ku cilongesa?

⁷ Nga ndolome nambe ndokazi namilanya ku cilongesa cendi, munapande kulibwahesela ñanda ibakalilongesa. (Ezela 7:10) Ndolome Daniel itunabanga kusimutwiya wendekele ngwendi: “Njikabwahelela nga ndolome injinalanya nalibwahesela. Mwafwa kulibwahesela kumulingisa endeke byuma bije bikwasa munu injikalilongesa nendi.” Co lalo, nga munu imuli na kulilongesa nendi ananguka ngwendi mwalibwahesela mwamubwa,  nendi alibwahesela-bwahesela. Nameme kumwesi na simbu yaingi ya kulibwahesela mwamubwa, waneniko simbu ya kwituluka mu cilongesa mangana muzibuke bisimpi byakama.

8. Bika bimunapande kulinga mangana mulombele mwamubwa ha cilongesa ca Mbimbiliya?

⁸ Lilombelo likakwasa manene ha simbu ya kulilongesa Mbimbiliya. Ngeci, singanyekeleni cimweja bimunasa kukendeka nga bakamilomba ngwabo mulombele. Nga mulinga ngoco, co lilombelo lyeni likapwa lyalibwa manene. (Myaso 141:2) Hanae wa ku Japan acili na kwanuka malombelo a ndokazi uje wakele na kwija na mulongesi wendi. Wendekele ngwendi: “Mwakele na kulombela njakele na kunanguka ngwange busamba bwendi na Yehova bunakanyama, co njashakele kumutembwinina. Co lalo, mwakele na kutumbula lizina lyange mu lilombelo, njalizibile ngwange wanjizema.”

9. Kwesekesa na Yakomba 1:19, bika bimunapande kulinga nga ndolome nambe ndokazi namilanya ku cilongesa cendi?

⁹ Kwaseni muka-kwambulula imunasindikiya. Omamuyovbi uje wapwa painiya wa kulitila ku Nigeria wendekele ngwendi: “Mwasa kukwasa munu imunasindikiya nga mutolilila mwamubwa ha simbu ya kulilongesa. Neni mwasa kwendeka byuma bije bikwasa munu imuli na kulilongesa nendi. Oloni kumwapandele kwendeka manene mwafwa cipangi ca kutwamenena cilongesa cinapu ca uje namilanya.” Mwasa kuzibuka bati simbu imunapande kwendeka nebi bimunapande kwendeka? (Visi 25:11) Tolilileni mwamubwa omwo muka-kwambulula asimutwiya na munu yakalilongesa nendi. (Tandeni Yakomba 1:19.) Nga mulinga ngoco, co muzibuka simbu yaibwa imunapande kwendeka. Oloni munapande kusinganyekesesa simbu kanda mwendeke. Cakumwenako, kumwapandele kwendeka byuma byabingi, kubatwiya ndolome uje namilanya nambe kwendeka biñanda bije kubilitombola na ñanda imuli na kusimutwiya. Oloni mwasa kwendekako majwi amandondo, cakumwenako cacihi nambe kwihula cihula cije cikwasa munu imuli na kusimutwiya nendi azibisiseko simpi imo. Bisimbu bimo, munasa kuliziba ngweni kumwesi na byabingi bya kwendeka ha ñanda imuli na kusimutwiya, oloni nga mushangala munu imuli na kusimutwiya nendi, co mumulingisa azeme manene busunga.

10. Byuma bimunaliwana nabyo byasa kukwasa bati uje acililongesa Mbimbiliya?

¹⁰ Mulekeniko bimunaliwana nabyo. Lekeniko munu imuli na kulilongesa nendi mumwalilongeselele busunga, byuma byamikwasele muhyane byeseko nambe mwanamikwasela Yehova nga kulinga ngoco kunapande. (Myaso 78:4, 7) Byuma bimunaliwana nabyo byasa kukwasa manene munu imuli na kulilongesa nendi. Byasa kumukwasa akanyamese likulahelo lyendi na kupwisamo byuma bitondeka mangana bamumbwitike. Byasa lalo kumukwasa ahyane ceseko cali na kuliwana naco. (1 Petu 5:9) Painiya wa lizina lya Gabriel wa ku Brazil wendekele byuma byamukwasele omwo wakele na kulilongesa Mbimbiliya. Wendekele ngwendi: “Bandolome mubakele na kunjileka byuma bibanaliwana nabyo, njanangukile ngwange Yehova akamono bukalu butukaliwana nabwo. Co kuzibuka  ngwange bahyanene bukalu bubaliwanene nabwo kwanjikwasele njikulahele ngwange nange njasa kuhyana bukalu bunjili na kuliwana nabwo.”

11-12. Mwafwa bika tunapande kutambula mwamubwa munu uje acililongesa Mbimbiliya nga aija ku biwano?

¹¹ Nga munu uje acililongesa Mbimbiliya atwalelelaho kukunguluka, co apwisamo bitondeka mangana bamumbwitike. (Heve 10:24, 25) Ndolome nambe ndokazi uje akalilongesa nendi nasa kumulanya ku biwano, co nga aija ku biwano lwa kulibanga, tubaboshe tunapande kumushongangeya atwaleleleho kukunguluka. Twasa kulinga bati ngoco?

¹² Mutambuleni na nzanzu. (Loma 15:7) Nga uje acililongesa Mbimbiliya aliziba ngwendi bandolome na bandokazi banamutambula mwamubwa omwo aija ku Njubo ya Bumwene, co asa kutwalelelaho kwija ku biwano. Mutambuleni na nzanzu na kumuzimbula ku bakweni. Oloni keti mulinge ngoco mu ngila ije imuzibisa shwamwa. Keti musinganyeke ngweni muka-kwambulula uje akalilongesa nendi ikeye lika napande kumukwasa. Mwafwa simbu imo nasa kukotokela nambe kuzezama na bipangi bimo bya cikungulukilo. Mutolilileni mwamubwa omwo endeka na kumwesa ngweni mwamwaka mbunge. Kutambula na nzanzu munu uje acililongesa Mbimbiliya kumukwasa bati? Tuzibeni byaliwanene nabyo Dmitrii uje ibanambwitika ololo, co napu muka-kupangela mu cikungulukilo. Wendekele byuma byalingiwile litangwa lya kulibanga lyaile ku biwano ngwendi: “Ndolome umo wanjimwene oku njili na kubandamena hanja ya Njubo ya Bumwene, co wakobelele nange mukati. Banu babangi bezile na kunjimeneka. Njalikomokelele manene. Njabwahelelele, co njashakele ngwe litangwa na litangwa tukunguluke. Lwapwile lwa kulibanga kunjitambula mu ngila eyi.”

13. Bilinga byeni byabibwa byasa kukwasa bati uje acililongesa Mbimbiliya?

¹³ Mumweseni mwanja waubwa. Bilinga byeni byasa kukwasa munu uje acililongesa Mbimbiliya akulahele ngwendi nawana bulombelo bwa busunga. (Mateo 5:16) Painiya wa lizina lya Vitalii wa ku Moldova wendekele ngwendi: “Njalilongesele mubakamwenamo byuma, mubakabilingila nomwo mubakayoyela bandolome na bandokazi mu cikungulukilo. Co njakulahelele ngwange Bakaleho ba Yehova bapwa baka-Kilistu ba busunga.”

14. Mwanja weni waubwa wasa kukwasa bati uje acililongesa Mbimbiliya atwaleleleho kukola ku sipilitu?

¹⁴ Nga munu uje acililongesa Mbimbiliya apangesa byali na kulilongesa, co basa kumumbwitika. Keti kwakwasi kulinga ngoco. Oloni nga alimwena ngwendi kupangesa binangulo bya mu Mbimbiliya kuli na kumikwasa, co asa kumitembwinina. (1 Koli 11:1) Tusimutwiyeni hali Hanae itunendeka ha kulibanga. Wendekele ngwendi: “Njakele na kulimwena bandolome na bandokazi oku balinga byuma binjakele na kulilongesa. Njalilongesele munjasa kutakamesela bakwetu, kubakonekela na kubamwesa cizemo. Aba bandolome na bandokazi bakele na kwendeka byuma byabibwa  hali bakwabo simbu yoshe, co njashakele kubatembwinina.”

15. Mukanda wa Visimo 27:17 umwesa bati seho ya kulikuta busamba na uje acililongesa Mbimbiliya omwo ashangumuka kukunguluka?

¹⁵ Likuteni nendi busamba. Omwo munu uje acililongesa Mbimbiliya atwalelelaho kwija ku biwano, mumweseni ngweni mwamwaka mbunge. (Fili 2:4) Waneni simbu ya kusimutwiya nendi mangana mumuzibuke mwamubwa. Mwasa kumushangala mwafwa ya byuma bimo byanatengulula mu kuyoya kwendi. Mwasa lalo kumwihula mucili na kwendela cilongesa cabo nambe cipangi cendi nambe kumwihula bihula bya kukundama ku naanga yendi. Oloni kumwapandele kumwihula bihula bije byasa kumuzibisa shwamwa. Nga mulinga ngoco, co mulizilila. Nga mulikuta busamba na munu uje acililongesa Mbimbiliya, co mumukwasa apwisemo byuma bitondeka mangana bamumbwitike. (Tandeni Visimo 27:17.) Hanae itunabanga kusimutwiya napu oni painiya wa simbu yoshe. Wendekele byuma byalingiwile ha simbu yashangumukile kukunguluka ngwendi: “Munjalizililile na bandolome na bandokazi mu cikungulukilo njashangumukile kuzema manene biwano, co njakele na kuya na kukunguluka nameme ha simbu injalizibile kujuka. Njawanene babusamba bababwa mu cikungulukilo, co njecelele kulikwatasana na babusamba bange baje kubakele na kupangela Yehova. Njashakele kukanyamesa busamba bwange na Yehova na bandolome na bandokazi bange. Ngeci, njalikundikile kuli Yehova, co banjimbwitikile.”

16. Byuma muka bikwabo bimunapande kulinga mangana uje acililongesa Mbimbiliya ashake kulikwatasana na cikungulukilo?

¹⁶ Omwo munu uje acililongesa Mbimbiliya ashangumuka kutengululako byuma bimo, mukwaseni alizibe ngwendi nakundama ku cikungulukilo. Mwasa kulinga ngoco nga mumumwesa ngweni mwamutambula mwamubwa. (Heve 13:2) Denis wa ku Moldova wendekele byuma byalingiwile ha simbu yakele na kulilongesa Mbimbiliya ngwendi: “Ha bisimbu byabingi, bandolome na bandokazi bakele na kunjilanya na munakazi wange mangana tukasikame nabo. Bakele na kutuleka mwabakwaselelemo Yehova, co batutakamesele manene. Kulikwatasana na bandolome na bandokazi kwatushongangeyeye tulyangwile kupangela Yehova, co twazibukile ngwetu nga tulinga ngoco, tulikuwa kuyoya.” Nga munu uje acililongesa Mbimbiliya apwa muka-kwambulula, munasa kumulanya mangana mupange nendi mu lihya. Muka-kwambulula wa lizina lya Diego wa ku Brazil wendekele ngwendi: “Bandolome na bandokazi babangi bakele na kunjilanya mangana njipange nabo mu lihya. Oku kwanjikwasele njibazibuke mwamubwa. Munjakele na kupanga nabo, njalilongesele byabingi kuli bakebo, co njalizibile kukala muyehi na Yehova na Yesu.”

17. Bakulunu basa kukwasa bati baje bacililongesa Mbimbiliya?

¹⁷ Waneniko simbu ya kusimutwiya nabo. Nga bakulunu bamwesa ngwabo banaka mbunge baje bacililongesa  Mbimbiliya, co babakwasa bapwisemo byuma bitondeka mangana babambwitike. Munapande kusimutwiya-simutwiya nabo nga baija ku biwano. Baliziba ngwabo mwabaka mbunge nga mwanuka lizina lyabo, maneneni ha simbu ibakumbulula. Kuma mwasa kuwanako simbu ya kusindikiya baka-kwambulula ku bilongesa byabo ndi? Nga mulinga ngoco, co mukwasa manene baje bacililongesa Mbimbiliya. Painiya wa lizina lya Jackie wa ku Nigeria wendekele ngwendi: “Baka-kulilongesa Mbimbiliya babangi bakakomoka mubakazibuka ngwabo ndolome injinende nendi wapwa mukulunu mu cikungulukilo. Munu umo injakele na kulilongesa nendi wendekele ngwendi: ‘Ba pasta betu kubasa kulinga ngoco. Bakai na kusikama lika na banu ba kufuka, co kubanga banabafwete asina balinga ngoco.’” Ha simbu ino, ou muka-kulilongesa Mbimbiliya nashangumuka kukunguluka.

18. Bakulunu basa kulinga bati cipangi cabo cije cibanendeka ku mukanda wa Vilinga 20:28?

¹⁸ Longeseni na kushongangeya baka-kwambulula. Bakulunu bali na cipangi cakama ca kulongesa baka-kwambulula bazibuke kwambulula na kulongesa. (Tandeni Vilinga 20:28.) Nga muka-kwambulula imunasindikiya aziba shwamwa kutwamenena cilongesa oku hamuli, co citwameneneni yeni. Jackie itunabanga kusimutwiya wendekele ngwendi: “Bakulunu bakanjihula mubili na kwendela bilongesa byange, co munjikaliwana na bukalu omwo njitwamenena bilongesa bya Mbimbiliya bakanjinangula.” Kuli byuma byabingi bibasa kulinga bakulunu mangana bashongangeye na kutakamesa baka-kwambulula. (1 Tesa 5:11) Jackie wendekele lalo ngwendi: “Njikabwahelela nga bakulunu banjitakamesa na kunjileka ngwabo bali na kukandelela ku cipangi cinjili na kulinga. Majwi abo akanjishubulwisa manene, co njikalizibi ngwe uje nanu tumema twa kutonola ha simbu ya ntondwe. Mubakanjishangala, bakanjilingisa njisimpe na kupanga cipangi ca kulongesa banu Mbimbiliya mu kubwahelela.”—Visi 25:25.

19. Bika byasa kutulingisa tubwahelele?

¹⁹ Nameme kumwesi na kutwamenena cilongesa ca Mbimbiliya ha simbu ino, mwasa kukwasa baje bacililongesa Mbimbiliya bakole ku sipilitu. Nga muka-kwambulula umo namilanya ku cilongesa cendi mwasa kumukwasa nga mulibwahesela na kwendeka byuma bije bikwasa munu yakalilongesa nendi. Oloni kumwapandele kwendeka byabingi. Munapande lalo kumutambula mwamubwa omwo aija ku Njubo ya Bumwene na kumumwesa mwanja waubwa. Kutundaho, nga bakulunu bawanako simbu ya kusimutwiya na baje bacililongesa Mbimbiliya, co babashongangeya na kubatakamesa. Basa lalo kushongangeya baka-kwambulula nga babalongesa cipangi na kubashangazala. Tubwahelela manene nga tulingako bimo nameme byabindondo mangana tukwase munu uje acililongesa Mbimbiliya azeme Yehova na kushangumuka kumupangela.