1. Mwafwa bika Yesu walombele Yehova ngwendi anyunge bandongesi bendi?

HA BUTSIKI bwa kwinduka litangwa libamutsiile, Yesu wakele na kusinganyeka ha bukalu bubaliwana nabwo bandongesi bendi. Kuzema bandongesi bendi kwamulingisile alombe Ishe ngwendi ‘abanyunge kuli muka-bubi.’ (Yowa 17:14, 15) Yesu wazibukile ngwendi omwo eluka mwilu, Satana Liyabolo atwalelelaho kulwisa baje bashaka kupangela Yehova. Cili bene, Yehova napande kunyungilila banu bendi.

2. Tunapande kulinga bika mangana Yehova akumbulule malombelo etu?

² Yehova wakumbulwile lilombelo lya Munendi Yesu mwafwa wamuzema. Nga tweseka mutwasela mwoshe kulinga byuma bije bizibisa Yehova kubwaha, co netu atuzema na kutukumbulula nga tumulomba ngwetu atukwase na kutunyungilila. Ha kupwa cisemi wa cizemo, Yehova atwalelelaho kunyunga bana bendi. Mwafwa nga kalingi ngoco, lizina lyendi lishauka.

3. Bika bitushakela ngwetu Yehova atunyungilile ano matangwa?

³ Ino ikeyo simbu itushaka manene ngwetu Yehova atunyungilile. Satana banamumbila hano hasi, co “nashulu na bukalu.” (Kujo 12:12) Nalingisa banu bamo balizibe ngwabo omwo batuyandesa, co bali na “kupangela Njambi.” (Yowa 16:2) Banu bamo baje kubakulahelele Njambi bakatuyandesa mwafwa kutwesi kulinga byuma bibakalingi. Nameme banu batuyandese, kutuzibi lyoba. Mwafwa bika? Mwafwa Lijwi lya Njambi lyendeka ngwalyo: “Mwene ikeye wa kulongwa, co akamitakamesa na kuminyunga kuli uje muka-bubi.” (2 Tesa 3:3) Yehova akatunyungilila bati? Tusimutwiyeniko bingila bibali mwakatunyungililamo.

4. Kwesekesa na Efeso 6:13-17, byuma muka byanatwana Yehova?

⁴ Yehova natwana byuma bya kupangesa mu nzita bije byasa kutunyungilila kuli Satana. (Tandeni Efeso 6:13-17.) Ebi byuma byakala na nzili, co byasa kutukwasa. Oloni nga tushaka ngwetu cuma na cuma citunyungilile, tunapande kutwalelelaho kucipangesa. Bika bicimanena cuma na cuma? Tusimutwiyeni ha cuma cimo na cimo.

5. Mwiba wa busunga wapwa uka, co mwafwa bika tunapande kulizitikawo?

⁵ Mwiba wa busunga wimanena busunga buli mu Lijwi lya Njambi. Mwafwa bika tunapande kulizitika ou mwiba? Mwafwa Satana wapwa “ishe ya makuli.” (Yowa 8:44) Nakwisi banu ha myaka yaingi, co nongumuna “kaye koshe.” (Kujo 12:9) Oloni busunga bwa mu Mbimbiliya butunyungilila ku makuli a Satana. Twasa kulizitika bati ou mwiba wa cifwisa? Tulinga ngoco nga tulilongesa bya Yehova, kumulemesa ‘mu sipilitu na mu busunga’ na kupwa ba kulongwa mu byuma byoshe.—Yowa 4:24; Efeso 4:25; Heve 13:18.

6. Ntelo ya ha nulo yapwa ika, co mwafwa bika tunapande kuizala?

⁶ Ntelo ya ha nulo imanena mashiko a Yehova a kusungama. Mwafwa bika tunapande kuzala ntelo ya ha nulo? Ntelo ya ha nulo ikanyungilila mbunge ya liswalale. Mu ngila imo lika, ntelo ya ha nulo ya ku sipilitu ikanyungilila bisinganyeka byetu mangana byuma bya mu kaye keti bitungumune. (Visi 4:23) Yehova washaka ngwendi tumuzeme na kumupangela na mbunge yetu yoshe. (Mateo 22:36, 37) Oloni Satana ashaka kutangula mbunge yetu mangana tuzeme byuma bya mu kaye bije byazinda Yehova. (Yako 4:4; 1 Yowa 2:15, 16) Nga onowa kutangula mbunge yetu, co atuyandesa mangana tupokole mashiko a Yehova.

7. Twasa kuzala bati ntelo ya ha nulo?

⁷ Tuzala ntelo ya ha nulo nga twononoka mashiko a Yehova mu kuyoya kwetu kwoshe. (Myaso 97:10) Banu bamo bakasinganyeka ngwabo kwononoka mashiko a Yehova kubonowesa kupwa ba kuzituka. Oloni nga twecela kupangesa binangulo bya mu Mbimbiliya, co tunapu ngwe liswalale uje ashulula ntelo ya ha nulo oku acili na kulwa mwafwa ya kusinganyeka ngwendi ilema manene. Obu bunapu bulema! Baje bazema Yehova kubesi kumona ngwabo mashiko endi apwa “amakalu,” oloni bakawamono ngwabo abanyungilila.—1 Yowa 5:3.

8. Kuzala biñaku ku mendi mu kulibwahesela cimweja kwambulula biñanda byabibwa kulumbununa bika?

⁸ Paulu watushongangeyeye ngwendi tuzale biñaku ku mendi etu mu kulibwahesela cimweja kwambulula biñanda byabibwa bya kwoloka. Awa majwi amwesa ngwawo simbu yoshe tunapande kulibwahesela kwambulula muzimbu waubwa wa Bumwene. Omwo tulekako bakwetu muzimbu wa mu Mbimbiliya, likulahelo lyetu likanyama. Tunabwahelela manene kuzibuka ngwetu banu ba Yehova mu kaye koshe bali na kulinga mubasela mwoshe kwambulula muzimbu waubwa kwoshe kubali. Cakumwenako, bakambulwila bakwabo nga bali ku bipangi, ku sikola, ku mitambela ya mingoso nambe kwambulwila ku njubo na njubo. Co lalo, bakambulwila babushoko bwabo na banu babatunga nabo nambe baje bakaija na kubamenekela ha njubo. Nga tuziba lyoba na kwecela kwambulula, co tunapu ngwe liswalale uje ashulula biñaku byendi oku acili na kulwa. Asa kubulumuka, co kumukaluwila kulyamena ku bitozi bendi na kukabangeya mashiko a shukulu yendi.

9. Mwafwa bika tunapande kwambata ntelo yakama?

 ⁹ Ntelo yakama ya likulahelo imanena likulahelo litwakala nalyo. Twakulahela ngwetu Yehova akashulisilila byuma byoshe byanatukulahesa. Eli likulahelo litukwasa tuzime “mikili ya tuhya ya uje muka-bubi.” Mwafwa bika tunapande kwambata ntelo yakama? Mwafwa nga tuyambata, co kutungumuka na bilongesa bya baka-kutengulukila nambe kuzeya omwo banu batushendumuna. Nga kutwesi na likulahelo, kutwasa kukolesa omwo bakwetu batushongangeya kupokola mashiko a Yehova. Oloni nga tukolesa omwo bakwetu batukapanga nabo nambe batukakobela nabo sikola batushongangeya kulinga byuma byabibi, co tumwesa ngwetu tunambata ntelo yetu yakama. (1 Petu 3:15) Tumwesa lalo ngwetu tunambata ntelo yetu yakama nga tubyana cipangi cije cituwanesa bimbongo byabingi oloni citwonowesa kupangela mwamubwa Yehova. (Heve 13:5, 6) Co lalo, nga tutwalelelaho kupangela Yehova nameme batulwisa, co tumwesa ngwetu tuli na likulahelo lya kukanyama.—1 Tesa 2:2.

10. Tepa ya kwoboka yapwa ika, co mwafwa bika tunapande kuizala?

¹⁰ Tepa ya kwoboka imanena lilabelelo lituli nalyo. Yehova nakulahesa ngwendi nga tulinga cizango cendi, akatupatula mu bundungo  bwa kutsa na kutwana cikandelela. (1 Tesa 5:8; 1 Tima 4:10; Tito 1:1, 2) Lilabelelo likanyungilila bisinganyeka byetu ngwe tepa muikanyungilila mutwe wa liswalale. Mu ngila muka? Lilabelelo litukwasa twake manene mbunge ku byuma byanatukulahesa Njambi na kujeneka kuzeya omwo tuliwana na bukalu. Twasa kuzala bati eyi tepa ya kwoboka? Tulinga ngoco nga tumona byuma mwakabimwena Njambi. Cakumwenako, tunapande kukulahela Njambi keti bufuko.—Myaso 26:2; 104:34; 1 Tima 6:17.

11. Moko ya mukwale ya sipilitu yapwa ika, co mwafwa bika tunapande kuipangesa?

¹¹ Moko ya mukwale ya sipilitu yapwa Lijwi lya Njambi, Mbimbiliya. Lijwi lya Njambi lyakala na nzili ya kukwasa banu bananguke bilongesa bya makuli na kubiseza, co lalo libakwasa becele bilinga byabibi. (2 Koli 10:4, 5; 2 Tima 3:16, 17; Heve 4:12) Munga ya Njambi ikatulongesa mwakupangesela mwamubwa eyi moko ya mukwale. Co lalo, tukalilongesa mwakuipangesela mwamubwa ha simbu ya cilongesa ca munu endi lika. (2 Tima 2:15) Yehova katwanene lika byuma bya kupangesa mu nzita ya ku sipilitu, oloni kuli ngila ikwabo yakapangesa mangana atunyungilile. Ngila muka bene oyo?

12. Bika bitunapande kulinga, co mwafwa bika?

¹² Munu uje napanga cipangi ca buswalale ha simbu yailaha azibuka ngwendi kasa kulwa na mbunga ya maswalale likalyendi, oloni napande kupangela hamo na bakwabo. Mu ngila imo lika, kutwasa kulwa na Satana likalyetu, oloni tunapande kupangela hamo na bandolome na bandokazi betu. Yehova natwana ‘bakwetu baka-kukulahela’ baje bakatukwasa.—1 Petu 2:17.

13. Kwesekesa na mukanda wa Vahevelu 10:24, 25, kukunguluka kutukwasa bati?

¹³ Ngila imo yakatukwaselamo Yehova inapu kukunguluka. (Tandeni Vahevelu 10:24, 25.) Tubaboshe tukazeye simbu imo, oloni mutukai na kukunguluka tukatakama. Bikumbululo bya bandolome na bandokazi bikatutakamesa. Co biñanda bitukatolilila na bimweso bitukamono bikatukwasa tutwaleleleho kupangela Yehova. Co lalo, tukalitakamesa umo na mukwabo simbu kanda biwano bishangumuke na munima yabyo. (1 Tesa 5:14) Kutundaho, mutukai na kukunguluka, tukakwasa bakwetu, co kulinga ngoco kukatulingisa tubwahelele. (Vili 20:35; Loma 1:11, 12) Biwano bikatukwasa lalo tubwezelele ku butongwe bwetu bwa kwambulula na kulongesa. Cakumwenako, tukalilongesa mwakupangesela mwamubwa bikwata bili mu cikasha ca bikwata bya kupangesa mu kulongesa. Ngeci, tunapande kulibwahesela-bwahesela na kutolilila mwamubwa nga tuli ku biwano. Co tunapande lalo kupangesa byuma bitunalilongesa. Nga tulinga ebi byuma byoshe, co tupwa ‘maswalale bababwa ba Kilistu Yesu.’—2 Tima 2:3.

14. Ngila muka ikwabo yali na kutukwaselamo Yehova?

¹⁴ Kuli lalo tungelo babangi-bangi baje bakatukwasa. Acisinganyekeni byuma byalingile kangelo umo lika. (Isaya 37:36) Co singanyekeni oni bibanasa kulinga tungelo babangi-bangi. Kukwesi munu nambe ndemone ali na nzili kutubakana tungelo ba Yehova. Yehova wakala manene na nzili. Ngeci, asa kutukwasa tukale manene na nzili kutubakana bitozi betu. (Maako 6:16) Awa majwi anapu a busunga, co munapande kuwanuka nga bamukapanga nabo, bamukakobela nabo sikola nambe babushoko bweni baje kubapwile Bakaleho bamijujwisa. Anukeni ngweni muli  na kwononoka mashiko a Yehova, co lalo kumwesi likalyeni.

15. Kwesekesa na mukanda wa Isaya 54:15, 17, bika twendekela ngwetu banu ba Njambi batwalelelaho kwambulula?

¹⁵ Kuli byuma byabingi bili na kulingisa banu ba muno mu kaye ka Satana batuzinde. Kutwesi kulikobelesa mu bupolitiki nambe kukobela buswalale. Tuli na kukwasa banu bazibuke lizina lya Njambi na kubakwasa bazibuke ngwabo Bumwene bwendi bukebwo lika bukanena kwoloka. Co lalo, tukononoka mashiko endi. Tuli na kukwasa lalo banu bazibuke ngwabo, Satana uje ali na kuyula kano kaye wapwa muka-makuli, co lalo wapwa muka-kutsiya. (Yowa 8:44) Tukambulula ngwetu kaye ka Satana ololo bakanyongesa. Satana na banu bendi kubasa kutwonowesa kwambulula. Ngeci, tutwaleleleniho kushangazala Yehova mutwasela mwoshe. Satana wakala na nzili, oloni kasele kwonowesa muzimbu wa Bumwene kweta ku banu mu kaye koshe. Cipangi ca kwambulula cili na kutwalelelaho mwafwa Yehova ali na kutunyungilila.—Tandeni Isaya 54:15, 17.

16. Yehova akanyungilila bati banu bendi ha simbu ya ñababa yakama?

¹⁶ Byuma muka byakalinga Njambi kulutwe? Ha simbu ya ñababa yakama Yehova akatunyungilila mu bingila bya kukomokesa. Akanyungilila bangamba bendi ba kulongwa ha simbu yakalingisa baka-kuyula bakanyongese Mbambilone Wakama nambe ngwetu bulombelo bwoshe bwa makuli. (Kujo 17:16-18; 18:2, 4) Kutundaho, akanyungilila banu bendi mwakanyongesa kaye ka Satana ha nzita ya Alamagidoni.—Kujo 7:9, 10; 16:14, 16.

17. Kukanyamesa busamba bwetu na Yehova kutukwasa bati?

¹⁷ Nga tutwalelelaho kukanyamesa busamba bwetu na Yehova, co Satana kasa kutunyongesa. Oloni ikeye bakamunyongesa. (Loma 16:20) Ngeci, twaleleleniho kupangesa byuma byoshe byanatwana Njambi bya kupangesa mu nzita ya ku sipilitu. Keti mulwise Satana na banu bendi likalyeni. Kwaseni bandolome na bandokazi beni na kwononoka mashiko a Yehova. Nga mulinga ebi byuma, co Ishweni wa mwilu amitakamesa na kuminyungilila.—Isaya 41:10.