Mwafwa bika “uje munalume” wendekele ngwendi nga ambata Lute, co hamo bana bendi ‘kubakasa kuswana’ lihya lyendi? (Lute 4:1, 6)

Mu simbu ibakele na kusoneka Mbimbiliya, nga munalume watsile oku kanda acikale na mwana, kwakele na kukatuka bihula bije byatondele bikumbululo. Bihula bya kufwa ngwe: Bika bilingiwa ku bufuko bwoshe bwanaseze mutsi? Kuma lizina lyendi linyonga ndi? Lishiko lya Mosesa lyakumbulwile ebi bihula.

Bika byalingiwile nga munalume atsa nambe nga alandesa lihya lyendi mwafwa ya buhutu? Ndolome ya uje munalume nambe kabushoko kendi ikeye wapandele kulanda lije lihya, mangana ije naanga itwaleleleho kukala na lije lihya.—Levi 25:23-28; Kula 27:8-11.

Kulinga ngoco kwanyungililile bati lizina lya mutsi? Munu uje walandele lihya wapandele kwambata na nyali yendi ngwe mukwafwililile kuli Lute. Munu wapandele kwambata munakazi wa ndolome yendi uje natsi mangana akite nendi mwana, co uje mwana ikeye enga bufuko bwa baishe. Kulinga ngoco kwakwasele uje fwile. (Kwitu 25:5-7; Mate 22:23-28)

Acisinganyekeni byalingiwile kuli Naumi. Washombokele kuli munalume wa lizina lya Elimeleke. Elimeleke mwatsile hamolika na bana bendi babali, kukwakele munalume mu naanga wa kunyunga Naumi. (Lute 1:1-5) Naumi mwelukile ku Juda walekele inamweno Lute, alombe Mbowasi mangana alande lihya lyabo. Mbowasi ikeye wapwile kabushoko ka Elimeleke wakama. (Lute 2:1, 19, 20; 3:1-4) Oloni Mbowasi wazibukile ngwendi kwakele kabushoko ka Elimeleke wakama manene uje ibanatumbula mu Mbimbiliya ngwabo “uje munalume.” Ngeci ikeye wapandele kulanda lije lihya.—Lute 3:9, 12, 13.

Hakulibanga, “uje munalume” watabele kukwasa Naumi. (Lute 4:1-4) Nameme wazibukile ngwendi wapandele kufweta bimbongo byabingi mangana alande lije lihya, oloni watabele mwafwa wazibukile ngwendi Naumi kasa kukala na mwana uje wapandele kwinga lihya lya Elimeleke. Uje munalume wazibukile ngwendi lije lihya lipwa lyendi, ngeci abwezelela ku buswana bwendi.

Oloni uje munalume watengulwile bisinganyeka byendi mubamulekele ngwabo uje alanda lihya lya Elimeleke, napande kwambata na Lute. Wendekele ngwendi: “Nga ngoconi, co eli lihya kunjasa kulilanda, omwo eci cikapwa cangoco, amo bana bange kubakasa kuliswana.”(Lute 4:5, 6) Mwafwa bika watengulwile biyongola byendi?

Nga uje munalume, nameme munalume weka ambata Lute, co Lute akala na mwana, uje mwana ikeye napande kwinga lihya lya Elimeleke. Mwafwa bika uje munalume wasinganyekele ngwendi nga alinga ngoco co bana bendi kubakasa kuswana lije lihya? Mbimbiliya kuyatulekele, oloni hamo byuma binatako bikebyo byamwendekesele ngoco.

• Cakulibanga, ngwe wabihisile bimbongo byendi, mwafwa lihya lya Elimeleke ngwe lyakupwile lya muna Lute.

• Camucibali, watewele kukala na citele ca kunyunga Naumi na Lute.

• Camucitatu, ngwe Lute wakitile bana kuli uje munalume, bana bendi ngwe balipangelele buswana na bana boshe ba kweka ba uje munalume.

• Camuciwana, ngwe uje munalume kakele na bana, ngwe mwana wa munalume wanesi kukitile Lute nesi kuswanene lihya lya Elimeleke na lya uje munalume. Watewele ngwendi, nga atsa, co muna Lute ikeye aswana lihya lyendi, oloni apangesa lizina lya Elimeleke, ngeci lizina lyendi linesi kunyonga. Uje munalume kashakele kunyongesa buswana bwendi mwafwa ya kushaka kukwasa Naumi. Ngeci washakele ngwendi Mbowasi alande lije lihya na kwambata Lute. Mbowasi watabele mwafwa watondele “kunyunga bufuko bwa naanga ya mutsi mu maboko a babushoko bwendi.”—Lute 4:10.

Uje munalume watondele lika kunyungilila lizina lyendi na buswana bwendi. Uje munalume wapwile muka-kulishaka manene. Uje munalume washakele kunyungilila lizina lyendi, oloni lyanyongele mwafwa na lelo lino kutuzibuka lizina lyendi. Co lalo katambwile bibezikiso ngwe bije byatambwile Mbowasi. Mbowasi nendi wakupwile kukulwila wa Mesiya, Yesu Kristu. Uje munalume walibindamesele ikeye babenya ha konwa kukwasa mukwabo uje watondele bukwasi.—Mate 1:5; Luka 3:23, 32.