1-2. Mwafwa bika kumwapandele kuzeya nga kanda mupwisemo bitondeka mangana bamimbwitike? (Taleni cikupulo cili ha liputa lyakulibanga.)

 NGA muli na biyongola bya kushaka kumimbwitika, co mwalyakela cilengo cacibwa manene. Kuma mwalibwahesela kulinga ngoco hano bene ndi? Nga muliziba ngweni mwalibwahesela, co lalo bakulunu nabo banataba ngwabo mwapwisamo bitondeka, keti mukwate-kwate ku masinde. Nga mulyangwila kumimbwitika, co mulikuwa bibezikiso byabingi mu kupangela Yehova.

² Oloni hamo kuli munu umo naminangula ngwendi munapande kutengululako tahi byuma bimo mangana mupwisemo bitondeka. Nambe hamo yeni babenya mwalimwena ngweni kanda mupwisemo bitondeka mangana bamimbwitike. Nga mukemwo, co keti muzeye. Mwasa kulinga byuma bitondeka bije bimikwasa mushulisilile eci cilengo cacibwa manene, ipwe mu banike nambe bakulunu.

3. Munalume wa Kaithopia wehwile bika Filipu, co oku kutulingisa tulihule cihula muka? (Bili 8:36, 38)

³ Tandeni Bilinga 8:36, 38. Munalume wa Kaithopia wehwile Filipu uje wapwile muka-kwambulula ngwendi: “Bika binjonowesa kunjimbwitika?” Nameme uje munalume wa Kaithopia watondele kumumbwitika, kuma cili bene wapwisilemo bitondeka mangana bamumbwitike ndi?

4. Munalume wa Kaithopia wamwesele bati ngwendi washakele kutwalelelaho kulilongesa byabingi?

⁴ Munalume wa Kaithopia “waile ku Jelusalema na kulemesa Njambi.” (Bili 8:27) Twakulahela ngwetu watengulukile na kukabangeya bilongesa bya Bajuda. Co lalo walilongesele bya Yehova mu Bisoneka bya kujela bya Cihebelu. Nameme ngoco anga watondele kuzibuka byabingi. Filipu wawanene ou munalume ha  ngila te ali na kulinga bika? Wamuwanene te ali na kutanda libulu lya kuzenga lyasonekele kapolofweto Isaya. (Bili 8:28) Ebi byapwile bilongesa bya kuloba. Uje munalume wa Kaithopia washakele kuzibuka byabingi keti bilongesa bya maputukilo lika bya mu Mbimbiliya embwe.

5. Munalume wa Kaithopia wapangesele bati byuma byalilongesele?

⁵ Ou munalume wa Kaithopia wapwile wa seho manene mwafwa “ikeye wakele na kutala bufuko bwoshe” bwa Kandasi, uje wapwile mwene wa munakazi wa baka-Ithopia. (Bili 8:27) Ngeci, twakulahela ngwetu ou munalume wakele na kuzezama mwafwa wakele na bipangi byabingi. Nameme ngoco wawanene simbu ya kulemesa Yehova. Kalilongesele lika busunga oloni wapangesele byalilongesele. Ngeci, wendele bungezi bwabulaha kutunda ku Ithopia mangana akalemese Yehova mu Jelusalema. Twakulahela ngwetu simbu na byuma byabingi byahwililile kuje ku bungezi, oloni uje munalume wendele buje bungezi mwafwa kulemesa Yehova kwapwile manene kwa seho kuli ikeye.

6-7. Bika byakwasele munalume wa Kaithopia azeme manene Yehova?

⁶ Filipu wakwasele uje munalume wa Kaithopia azibuke Mesiya, co lalo wamulongesele biñanda bikwabo bya seho bije byapwile byabiha kuli ikeye. (Bili 8:34, 35) Uje munalume wa Kaithopia wabwahelelele manene mwazibukile byuma byabibwa byanamulingila Yesu. Walingile bika mwazibukile ebi byuma? Ngwe washakele ngwe walilongesele lika bilongesa bya Bajuda na kutwalelelaho na cipangi cendi ca kulitila. Oloni byuma byalilongesele byamulingisile azeme manene Yehova na Munendi. Ngeci, walyangwilile kumumbwitika na kupwa muka-kukabangeya Yesu Kristu. Filipu mwamwene ngwendi uje munalume wa Kaithopia wapwisilemo bitondeka, wamumbwitikile.

⁷ Nga mutembwinina byuma byalingile munalume wa Kaithopia, co mupwisamo bitondeka mangana bamimbwitike. Neni mwendeka mu kusimpa ngweni, “Bika binjonowesa kunjimbwitika?” Tumoneni mumwasa kutembwinina uje munalume wa Kaithopia. Watwaleleleleho kulilongesa, wapangesele byuma byakele na kulilongesa, co lalo watwaleleleleho kuzema manene Njambi.

8. Mukanda wa Iwano 17:3 umishongangeya kulinga bika?

⁸ Tandeni Iwano 17:3. Kuma awa majwi a Yesu amishongangeyeye mulyangwile kulilongesa Mbimbiliya ndi? Bwingi bwetu akewo majwi atushongangeyeye. Oloni kuma awa majwi atushongangeya lalo tutwaleleleho kulilongesa ndi? Eyo. Tutwalelelaho kulilongesa nambe  ngwetu “kuzibuka . . . Njambi umolika wa busunga.” (Kwambu 3:11) Tutwalelelaho kulilongesa myaka yoshe. Tushwena manene kuli Yehova omwo tutwalelelaho kulilongesa byendi.—Myaso 73:28

9. Byuma muka bikwabo bitunapande kulinga munima ya kulilongesa bilongesa bya mashangumukilo bya mu Mbimbiliya?

⁹ Bilongesa bya mashangumukilo bikebyo bikatukwasa kuzibuka Yehova. Mu mukanda wasonekelele Bahebelu, kapositolo Paulu wendekele ebi bilongesa ngwendi, “byuma bya mashangumukilo.” Paulu kakele na kwombwanesa “bilongesa bya mashangumukilo,” oloni wakele na kubyesekesa ku mabele aje akakwasa mbututu. (Hebe 5:12; 6:1) Ngeci, washongangeyeye lalo baka-Kristu ngwendi balilongese na bilongesa bya kuloba bya mu Lijwi lya Njambi, keti bilongesa bya mashangumukilo lika embwe. Kuma mushaka kulilongesa bilongesa bya kuloba bya mu Mbimbiliya ndi? Kuma mushaka kutwalelelaho kukola ku sipilitu mu kulilongesa bya Yehova na cizango cendi ndi?

10. Mwafwa bika banu bamo kukabakaluwila kulilongesa?

¹⁰ Yetu bamo hamo kukatukaluwila kulilongesa. Yeni mwamona bati kulilongesa? Kuma mumwakele ku sikola mwalizilisile kutanda na kulilongesa mwamubwa ndi? Kuma mwakele na kulikuwa kulilongesa ndi? Indi hamo mwakele na kuliziba ngweni yeni byakutanda-tanda mabulu kumubyasa? Nga mukemwo, co keti likalyeni, banu babangi bakalizibi ngoco. Oloni Yehova asa kumikwasa. Wapwa wa kulumbunuka, co lalo ikeye Mulongesi wamubwa manene.

11. Yehova napu bati ‘Mulongesi Wakama Manene’?

¹¹ Yehova nalitumbula ngwendi ikeye ‘Mulongesi Wakama Manene.’ (Isaya 30:20, 21) Wapwa mulongesi uje wakala na mbunge ya kubandamena na ngozi, co lalo wapwa muka-kuzibisisa. Akaka manene mbunge ku byuma byabibwa bibalinga bandongesi bendi. (Myaso 130:3) Co lalo kesi kutonda ngwendi tulinge byuma bije kutwasa. Anukeni ngweni ikeye watangele bwongo bweni buje bwapwa bwana bwabubwa manene. (Myaso 139:14) Natutanga na lishungu lya kushaka kulilongesa. Ishamatanga wetu washaka ngwendi tutwaleleleho kulikuwa kulilongesa myaka yoshe. Ngeci, kunapu kwa seho manene ‘kukala na lishungu’ lya kulilongesa Mbimbiliya. (1 Pita 2:2) Lyakeleni bilengo bimwasa kushulisilila, co kabangeyeni cinoneko ceni ca kutanda Mbimbiliya na kulilongesayo ha litangwa na litangwa. (Yosh 1:8) Yehova amikwasa mulikuwe kutanda Mbimbiliya na kutwalelelaho kulilongesa byendi.

12. Mwafwa bika kunapu kwa seho kuli yetu kulilongesa bya buyoye na cipangi calingile Yesu?

¹² Nonekeni simbu ya kusinganyekesesa ha buyoye bwa Yesu na cipangi ca kwambulula calingile. Nga tushaka kupangela Yehova, co tunapande kukabangeya mwamubwa mwanja wa Yesu maneneni muno mu matangwa a kukotoka. (1 Pita 2:21) Yesu walekele bandongesi bendi bukalu bubaliwana nabwo. (Luka 14:27, 28) Oloni wazibukile ngwendi bandongesi bendi batwalelelaho kupwa ba kulongwa kuli Njambi ngwe ikeye. (Iwano 16:33) Lilongeseni manene bya Yesu mangana muzibuke mwayoyelele, co lyakeleni cilengo ca kumutembwinina ha litangwa na litangwa.

13. Bika bimunapande kutwalelelaho kulomba Yehova, co mwafwa bika?

¹³ Kuzibuka lika Yehova kukwapwilemo. Tukalilongesa byabingi hali Yehova, mwafwa tushaka kumuzema na kumukulahela. (1 Kori 8:1-3) Omwo mutwalelelaho kulilongesa, lombeni Yehova mangana amikwase kukala na likulahelo lya kukanyama. (Luka 17:5) Akumbulula lilombelo lyeni. Kuzibuka mwamubwa Njambi yetu na kukala na likulahelo lya kukanyama kumikwasa mukole ku sipilitu.—Jems 2:26.

14. Kapositolo Pita wamwesele bati seho ya kupangesa bituli na kulilongesa? (Taleni na cikupulo.)

¹⁴ Kapositolo Pita wamwesele ngwendi kunapu kwa seho manene kuli baka-Kristu kupangesa bibali na kulilongesa. Wendekele ha muzimbu wa mu Mbimbiliya wa Nowa. Yehova walekele Nowa ngwendi akanena libazi mangana anyongese banu bababi bakeleko ha simbu ije. Kuzibuka lika ngwabo kukaija libazi kukwasele kwobola Nowa na naanga yendi. Pita watalesele ku simbu ije te libazi kanda lyete na simbu ije ‘ibakele na kushonga bwato.’ (1 Pita 3:20) Nowa na naanga yendi bapangesele bibalilongesele kuli Njambi mubatungile buje bwato bwakama. (Hebe 11:7) Pita wesekesele byuma byalingile Nowa ku cimbwitiko mwasonekele ngwendi: “Cimbwitiko cije cinalifu neci cuma, hano naco cili na kumyobola.” (1 Pita 3:21) Mu ngila imolika, tunasa kwesekesa byuma bimuli na kulinga mu kulibwahesela kupwisamo bitondeka mangana bamimbwitike, ku bipangi byalingile Nowa na naanga yendi ha myaka yaingi mubakele na kutunga bwato. Bika bimunapande kulinga mangana mulibwahesele kumimbwitika?

15. Mwasa kumwesa bati ngweni munatenguluka mu busunga?

¹⁵ Cuma cakulibanga citunapande kulinga cinapu kutenguluka na kwecela bilinga byabibi. (Bili 2:37, 38) Nga twatenguluka mu busunga na futisi yetu itenguluka. (Bili 2:37, 38) Kuma munecela byuma byazinda Yehova bya kufwa ngwe futisi ya kujwala, kusipa makaya nambe endekesi yaibi ndi? (1 Kori 6:9, 10; 2 Kori 7:1; Efeso 4:29) Nga kanda mulinge ngoco, esekeni mumwasela mwoshe kutengulula futisi yeni. Simutwiyeni na munu imukalilongesa nendi Mbimbiliya nambe bakulunu mu cikungulukilo mangana bamikwase. Nga mu banike, lombeni bisemi beni bamikwase kwecela tulingolingo twatubi tuje tumyonowesa kupwisamo bitondeka mangana bamimbwitike.

16. Bika bitunapande kulinga nga tushaka kulemesa Yehova simbu yoshe?

¹⁶ Kutundaho, kunapu kwa seho manene kulinga byuma bya ku sipilitu simbu yoshe. Ebi byuma binambateselela kukunguluka na kulingako bimo ku biwano. (Hebe 10:24, 25)  Co lalo nga munapwisamo bitondeka mangana mupwe baka-kwambulula, co ambululeni simbu yoshe. Nga mwambulula simbu yoshe, co mulikuwa cipangi ca kwambulula. (2 Timo 4:5) Lihuleni ngweni, ‘Kuma bisemi bange bakebo bakanjanukisa kuya na kwambulula nambe kuya na kukunguluka ndi? Indi njikanuka kulinga ngoco yange babenya?’ Nga mulinga ebi byuma, co mumwesa ngweni muli na likulahelo na kumwesa ngweni mwakandelela ku byuma byoshe byanamilingila Njambi. Ebi “bilinga bya kulyana kupangela Njambi,” binapu bwana butukana kuli Yehova. (2 Pita 3:11; Hebe 13:15) Bwana bwoshe butukana kuli Njambi kutundilila kwisi ya mbunge yetu, bukamuzibisa kubwaha. (Esekeseni 2 Korinte 9:7.) Tukalingi ngoco mwafwa mutukana Yehova byuma byabibwa manene tukapu ba kubwahelela.

17-18. Cifwa muka cimikwasa mupwisemo bitondeka mangana bamimbwitike, co mwafwa bika? (Visimo 3:3-6)

¹⁷ Omwo mulinga mumwasela mwoshe kupwisamo bitondeka mangana bamimbwitike, muliwana na byeseko. Bamo banasa kumiyandesa nambe kumishenduma mwafwa ya likulahelo lyeni. (2 Timo 3:12) Simbu imo munasa kwilukila tulingolingo twatubi tuje tumuli na kulifwita kwecela. Munasa kulubala mwafwa ya kuliziba ngweni cilengo ceni kucesi na kulishulisilila bwasi. Bika bimikwasa mangana mukolese? Kuzema Yehova.

¹⁸ Cifwa cacibwa manene cimunapande kukala naco cinapu kuzema Yehova. (Tandeni Visimo 3:3-6.) Nga mwazema manene Yehova, co kumulikele kumupangela nameme nga muliwana na bukalu. Mbimbiliya imwesa ngwayo Yehova akamwesa bangamba bendi cizemo cije kucesi kutenguluka. (Myaso 100:5) Njambi watutangele mu cifwa cendi. (Kusha 1:26) Twasa kutembwinina bati cizemo ca Yehova?

19. Mwasa kumwesa bati ngweni mwakandelela manene ku byuma byoshe byanamilingila Yehova? (Galatiya 2:20)

¹⁹ Pweni baka-kukandelela. (1 Tesa 5:18) Ha litangwa na litangwa lihuleni ngweni, ‘Yehova nanjimwesa bati cizemo?’ Co lombeni Yehova na kukandelela ku byuma bije byanamilingila. Nangukeni byuma byali na kumilingila Yehova mu buyoye bweni bije bimwesa ngwabyo wamizema ngwe mwalingilile kapositolo Paulu. (Tandeni Galatiya 2:20.) Lihuleni ngweni, ‘Njinapande kulinga bika mangana njimwese ngwange njinakandelela ku cizemo cananjimwesa Yehova?’ Kuzema Yehova kumikwasa mukolese mumuliwana na byeseko. Co lalo kumikwasa  mutwaleleleho kumulemesa ha litangwa na litangwa na kumwesa ngweni mwamuzema manene.

20. Bika bimunapande kulinga mangana mulikundike kuli Yehova, co mwafwa bika kulinga ngoco kunapu kwa seho?

²⁰ Mu kwita kwa simbu, kuzema Yehova kumishongangeya mulikundike kuli ikeye kwitila mu lilombelo. Anukeni ngweni kulikundika kuli Yehova kumikwasa mutwaleleleho kumupangela myaka yoshe. Omwo mulikundika kuli Yehova mumukulahesa ngweni mutwalelelaho kumupangela nameme byuma bili mwamubwa nambe bikaluwe. Eci cikulaheso bakacilingi lumolika mu kuyoya. Kulikundika kuli Yehova cinapu cuma cakama manene. Anukeni ngweni nameme mwangule bati byuma byabibwa mu kuyoya, byahi bitubakana kwangula kulikundika kuli Yehova. (Myaso 50:14) Satana alinga mwasela mwoshe kumyonowesa kuzema Ishweni mangana mwecele kupwa ba kulongwa. Keti mumutabese amihyane. (Yombi 27:5) Kuzema manene Yehova kumikwasa mutwaleleleho kuyoya mu kulitombola na cikumiiyo ceni, co lalo kumilingisa mukanyamese manene busamba bweni nendi.

21. Bika twendekela ngwetu cimbwitiko anapu mashangumukilo keti mamaneselelo?

²¹ Munima ya kulikundika kuli Yehova mu lilombelo, lekeni bakulunu cuma ca seho cimunayongola kulinga. Oloni simbu yoshe anukeni ngweni kumimbwitika kunapu mashangumukilo lika. Anapu mashangumukilo a kupangela Yehova myaka yoshe. Ngeci lingeni byuma bije bimilingisa muzeme manene Ishweni. Lyakeleni bilengo mangana mutwaleleleho kuzema Yehova ha litangwa na litangwa. Kulinga ngoco kumikwasa mupwisemo bitondeka mangana bamimbwitike. Litangwa lya cimbwitiko lyapwa lyalibwa manene. Oloni awa anapu mashangumukilo lika. Tushungwiya ngwetu cizemo ceni ca kuzema Yehova na Munendi, citwaleleleho kukola myaka yoshe.