Bimyene Babali ba mu Matangwa a Kukotoka Balilwisa
Bupolofweto bumo bubanendeka aha ha cati bwalishulisilile ha simbu ya kulifwa. Co bumwesa ngwabwo tuli mu matangwa a kukotoka.—Ndanye 12:4.
Cisoneka Kujo 11:7; 12:13, 17; 13:1-8, 12
Bupolofweto “Cikashama” nayulu banu ha myaka ya kutubakana 3,000. Mu matangwa a kukotoka, mutwe wendi wa bu 7 baubulumwine. Mu kwita kwa simbu, uje mutwe wolele, co ‘banu boshe ba hasi’ bakabangeyeye cikashama. Satana ali na kupangesa ou cikashama mu kulwisa “baje banasalaho.”
Mubunalishulisilila Bifulumende bya banu byabingi binayulu hano ha kaye kushwa halyahwilililile Libazi lya Nowa. Co ha Nzita ya Kaye ya Kulibanga, nzili ya fulumende ya Britain yatepulukile manene. Eyi fulumende ikeyo yakele na kuyula ha simbu ije. Yakele na nzili lalo muyalikwatasanene na fulumende ya baka-America. Satana ali na kupangesa biyulo bya bupolitiki mangana ayandese banu ba Njambi, maneneni muno mu matangwa a kukotoka.
Cisoneka Ndanye 11:25-45
Bupolofweto Muno matangwa a kukotoka, mwene wa ku kunto na mwene wa ku mbwela bali na kulwila nzili ya kuyula.
Mubunalishulisilila Ciyulo ca Germany na ciyulo ca Anglo-America cili na kulwila nzili. Mu 1945, mwene wa ku kunto wapwile fulumende ya Soviet Union na bifulumende bije byalikwatasanene nayo. Mu 1991, fulumende ya Soviet Union yahwile, co mu kwita kwa simbu, lifuti lya Russia na mafuti aje alikwatasanene nalyo akewo akupwile mwene wa ku kunto.
Bisoneka Isaya 61:1; Mala 3:1; Luka 4:18
Bupolofweto Yehova watumine “muluwa” wendi mangana ‘abwahese ngila’ simbu kanda Bumwene bwa Mesiya babushimbike. Eci cibunga cambulwile muzimbu waubwa ku banu bababotsi.
Mubunalishulisilila Kushwa mu 1870, C. T. Russell na bakwabo bashangumukile kulilongesa Mbimbiliya mangana bawane busunga. Mu 1881, bashangumukile kushongangeya banu ba Njambi bambulule na nzili. Ngeci, basonekele ñanda ya mutwe wa, “Tutonda Baka-Kwambulula ba Kupwa 1,000” nei ya kwendeka ngwayo “Banamyangula Mangana Mwambulule.”
Cisoneka Mateo 13:24-30, 36-43
Bupolofweto Munalume umo wakunine tiliku mu lihya lyendi, co citozi cendi wakuninemo shaku. Ije shaku yakolele kutubakana tiliku, oloni ha simbu ya kuteja, tiliku bayangunwine ku shaku.
Mubunalishulisilila Kushwa mu 1870, baka-Kilistu ba busunga balyangunwine ku baka-Kilistu ba makuli. Muno mu matangwa a kukotoka, baka-Kilistu ba busunga bali na kubakungulwila mu munga ya Njambi, co bali na kulyangununa ku baka-Kilistu ba makuli.
Cisoneka Ndanye 2:31-33, 41-43
Bupolofweto Kamponya wa kumunga ha bikubo bya kuliseza-seza ali na bilyato bya buma na bikubo.
Mubunalishulisilila Buma bwimanena banu baje bali mwisi ya Ciyulo ca Nzili ca mu Kaye Koshe ca Anglo-America, baje bali na kulwisa eci ciyulo. Ngeci, eci ciyulo kucasa kukala manene na nzili mwafwa ya aba banu.
Cisoneka Mateo 13:30; 24:14, 45; 28:19, 20
Bupolofweto “Tiliku” baikungulwilile mu “cishete,” co ‘ndungo wa kulongwa na kunyanyama’ bamwangwile mangana anyunge “bakwabo bangamba.” Co muzimbu waubwa wa Bumwene bashangumukile kuwambulula mu kaye koshe.
Mubunalishulisilila Mu 1919, ndungo wa kulongwa bamwangwile mangana atwamenene banu ba Njambi. Kushwa mu mwaka uje bene, baka-kulilongesa Mbimbiliya batwaleleleho kwambulula na ntwima. Ano matangwa, Bakaleho ba Yehova bali na kwambulula mu mafuti a kutubakana 200, co bali na kusoneka mabulu a kukundama ku Mbimbiliya mu bindaka bya kutubakana 1,000.
Bisoneka Ndanye 12:11; Kujo 13:11, 14, 15
Bupolofweto Cikashama wa bimbinga bibali washongangeyeye banu bamunge cifwisa ca cikashama. Co wacihwiminine mwonyo.
Mubunalishulisilila Ciyulo ca Nzili ca mu Kaye Koshe ca Anglo-America camungile munga ya League of Nations. Co kwakele mafuti akwabo alikwatasanene neyi munga. Kushwa mu 1926 kutwala 1933, mwene wa ku kunto nendi walikwatasanene neyi munga. Bumwene bwa Njambi bukebwo lika bwasa kunena kwoloka mu kaye. Oloni banu bakulahelele munga ya League of Nations ngwabo yasa kunena kwoloka mu kaye ngwe mubali na kulingila lalo banu matangwa ano ha munga ya United Nations (UN).
Cisoneka Ndanye 8:23, 24
Bupolofweto Mwene wa kutewesa “akabiisa manene byuma mu ngila ya kukomokesa.”
Mubunalishulisilila Ciyulo ca Nzili ca mu Kaye Koshe ca Anglo-America cinatsii banu babangi na kubiisa manene byuma. Cakumwenako, ha Nzita ya Kaye ya mu Cibali baka-America bashele bimbomba bibali byakama mu lifuti lije lyalwisile Britain na America. Kanda kukaleho laja bimbomba byabiisile manene byuma ngwe bije.
Bisoneka Ndanye 11:31; Kujo 17:3, 7-11
Bupolofweto “Cikashama wa kubenga” wa bimbinga 10 watundile mu mbulu ya kujeneka masima, co ikeye mwene wa bu 8. Mukanda wa Ndanyele unatumbula ou mwene ngwawo napu ‘cuma ca bunyengwe cije cinena kunyonga.’
Kulishulisilila Nzili ya munga ya League of Nations yahwile ha Nzita ya Kaye ya mu Cibali. Muyahwile nzita, bashimbikile munga ya UN. Eyi munga bali na kuyana kasingimiko kaje kanapande Bumwene bwa Njambi ngwe mubakele na kusingimikila munga ya League of Nations. Munga ya UN ikalwisa bulombelo.
Bisoneka 1 Tesa 5:3; Kujo 17:16
Bupolofweto Baka-kuyula bakatambeka ngwabo “byuma byoshe bili mwamubwa kunoloka kulu.” Co ‘bimbinga likumi’ na “cikashama bakalwisa “cikwizi” na kumunyongesa. Co aba baka-kuyula bakabanyongesa.
Kulishulisilila Baka-kuyula bakalishasha ngwabo bananene kwoloka. Co mafuti aje analikwatasana na munga ya UN akanyongesa bulombelo bwoshe bwa makuli. Awa akewo akapwa mashangumukilo a ñababa yakama. Eyi ñababa ikahwa omwo Yesu akanyongesa kano kaye ka Satana ha nzita ya Alamagidoni.
Bisoneka Ezeki 38:11, 14-17; Mateo 24:31
Bupolofweto Ngonge akakobela mu lifuti lya banu ba Njambi. Co tungelo bakakungulula “baje baangwile.”
Kulishulisilila Mwene wa ku kunto na bifulumende byoshe bya mu kaye bakalwisa banu ba Njambi. Mubakashangumuka lika kulwisa banu ba Njambi, co bakubwabesa baje bakakalako bakabakungulwila mwilu.
Bisoneka Ezeki 38:18-23; Ndanye 2:34, 35, 44, 45; Kujo 6:2; 16:14, 16; 17:14; 19:20
Bupolofweto Uje walondele ha kabalu wa kutoka akamanesa kuhyana kwendi omwo akanyongesa Ngonge na maswalale bendi. Co “cikashama” bakamumbila mu lishali lya tuhya, co lalo kamponya wakama nendi bakamutika-tika.
Kulishulisilila Yesu uje wapwa Mwene wa Bumwene bwa Njambi, akaamena banu ba Njambi. Co akalikwatasana na baje bakayula nendi ba kupwa 144,000, na maswalale bendi ba tungelo, bakanyongesa mafuti oshe aje akalikwatasana mu kulwisa banu ba Njambi. Co kaye ka Satana hakeho hakakahwila koshe njwa.
