Sara * wendekele ngwendi: “Njakala na shwamwa, co kunjapwile wa kusimpa. Ngeci, kunjesi kuzituka kukala na banu baje bashaka ngwabo bakwabo bakabangeye byuma bibashaka bakebo. Oloni njikazituka kukala na munu wa kuwa mbunge, co lalo wa kulikehesa. Njikamuleke byuma byoshe bili ku mbunge yange na bukalu bwange. Babusamba bange bapwa bakuwa mbunge, co lalo ba kulikehesa.”

Byanendeka Sara bimwesa ngwabyo nga tulikehesa, co bakwetu balikuta busamba netu. Yehova nendi washaka banu ba kuwa mbunge. Mbimbiliya ngwayo: “Munapande . . . [kuwa mbunge]” (Kolo 3:12) * Kuwa mbunge kwapwa kuka? Yesu wamwesele bati ngwendi wawile mbunge? Kuwa mbunge kutukwasa bati tupwe ba kubwahelela?

Kuwa mbunge kwapwa kukala mu kwoloka. Munu wa kuwa mbunge akalikwatasana mwamubwa na bakwabo, co akakwata mbunge nga kuli bimo binamulubalesa.

Banu bamo bakamono munu wa kuwa mbunge ngwabo kesi na nzili, oloni keti mukemwo. Lijwi lya Cingiliki libananungulula ngwabo “kuwa mbunge” bakele na kulitalesa ku kabalu wa mushwata uje ibanezilisa kukala na banu. Nameme nezilila kukala na banu, oloni oku kukulumbununa ngwabo banamumanesa nzili. Banamwizilisa lika kukala na banu. Mu ngila imolika, kuwa mbunge kutukwasa tutengulule futisi yetu mangana tuyoye mu kwoloka na bakwetu.

Twasa kwendeka ngwetu, ‘Yange kunjawile mbunge.’ Cili bene, kwasa kutukaluwila kuwa mbunge, mwafwa tuli na kuyoya mu kaye muje munashulu banu bakukenyuka na baka-kujeneka kukwata bimbunge. (Loma 7:19) Ngeci, tunapande kulomba Yehova atwane sipilitu ya kujela mangana itukwase kuwa mbunge, mwafwa kutwasa kukala neci cifwa mu nzili yetu lika. (Ngala 5:22, 23) Kuwa mbunge kutukwasa bati?

Kuwa mbunge kutukwasa tulikute busamba na bakwetu. Ngwe mwendekele Sara, tukazibi kubwaha mutukakala na banu ba kuwa bimbunge. Yesu wawile mbunge, co lalo wakele na ngozi. Ngeci, natumwesa mwanja waubwa. (2 Koli 10:1, NWT) Nameme banike baje kubamuzibukile, bazitukile kukala nendi mwafwa wawile mbunge.—Mako 10:13-16.

Kuwa mbunge kutukwasa, co lalo kukwasa na bakwetu. Kuwa mbunge kutukwasa tujeneke kulubala-lubala bwasi. (Visi 16:32) Kutukwasa lalo  tujeneke kulinga byuma bitukalibeya. Co lalo, kuwa mbunge kukwasa bakwetu, mwafwa kutulingisa tujeneke kubazibisa kubabala ku mbunge.

Yesu wakele na bipangi byakama, co lalo wazezamene, oloni wawile mbunge. Mu simbu ya Yesu, banu babangi bakele na kuliwana na bukalu bwabungi, ngeci batondele munu wakubahwimisa. Babwahelelele omwo Yesu wabalekele ngwendi: “Ijeni kuli yange, . . . omwo yange [nji wa kuwa mbunge] na kulikehesa mu mbunge.”—Mateo 11:28, 29.

Twasa kutembwinina bati Yesu uje wawile mbunge? Twasa kumutembwinina nga tutanda Mbimbiliya mangana tumone mwayoyelele na banu, nebi byalingile mwaliwanene na bukalu. Oku kutukwasa tuzibuke bya kulinga nga tuliwana na bukalu buje bushaka kutwonowesa kupwa ba kuwa mbunge. (1 Petu 2:21) Tusimutwiyeni byuma bitatu bije byakwasele Yesu apwe wa kuwa mbunge.

Yesu wapwile wa kulikehesa mu mbunge. Yesu wendekele ngwendi: “Yange [nji wa kuwa mbunge] na kulikehesa mu mbunge.” (Mateo 11:29) Mbimbiliya inatumbula lijwi lya kuwa mbunge neli lya kulikehesa ha simbu imo lika, mwafwa munu wa kulikehesa ashaka kulifwa na munu wa kuwa mbunge.—Efeso 4:1-3.

Kulikehesa kutukwasa tujeneke kulimona kupwa ba seho kutubakana bakwetu. Yesu walingile bati mubamubangeyeye ngwabo “watsa ha kulya na ha kunwa binyu”? Watwaleleleho kulinga byuma byabibwa mangana amwese ngwendi byuma bibamubangeyeye byapwile bya makuli. Co lalo wendekele mu kuwa mbunge ngwendi: ‘Mana asholoka kupwa a busunga ha bilinga byawo.’—Mateo 11:19.

Banu bamo basa kumyendeka mwamubi, mwafwa ya cikanda ceni nambe mwafwa mu banalume nambe mu banakazi, indi mwafwa ya cisemwa ceni. Oloni weni mbunge mangana mwendeke nabo mwamubwa. Mukulunu wa lizina lya Peter, wa ku South Africa wendekele ngwendi: “Nga munu nanjendeka mwamubi, njikalihula ngwange, ‘Ngwe Yesu ibanendeka mwamubi, ngwe nalingi bati?’” Wendekele lalo ngwendi: “Njalilongesa ngwange kunjapandele kulimona kupwa wa seho kutubakana bakwetu.”

Yesu wazibukile ngwendi banu kubalumbunukile. Bandongesi ba Yesu bashakele kulinga byuma byabibwa simbu yoshe, oloni bisimbu bimo bakele na kwonowa kulinga ngoco, mwafwa ya kujeneka kulumbunuka. Cakumwenako, butsiki bwa kwinduka litangwa libamutsiile, Yesu walekele Petulu, Yakomba na Yowano ngwendi batwaleleleho kutona nendi, oloni bakebo balalele. Yesu wazibukile ngwendi “mbunge ishaka bene, oloni mubila unazeye.” (Mateo 26:40, 41) Yesu kalubalelele tupositolo bendi, mwafwa wazibukile ngwendi kubalumbunukile.

Ndokazi Mandy wakele na kalingo-lingo ka kutala lika ha tupenga twa bakwabo, oloni ha simbu ino ali na kulinga mwoshe mwasela mangana atembwininine Yesu uje wapwa wa kuwa mbunge. Wendekele ngwendi: “Njizibuka ngwange banu boshe kubalumbunukile, ngeci njikaka mana ku bifwa byabo byabibwa ngwe mwakalingi Yehova.” Mwasa kuyoya mwamubwa na bakweni nga mutembwinina Yesu uje kakele na kwaka mbunge ku tupenga twa banu.

Yesu wasezele byuma byoshe mu maboko a Njambi. Yesu wakolesele omwo banu bakele na kumulinga mwamubi. Bamukutiiye biñanda bya makuli, bamushawile, co lalo bamuyandesele. Oloni watwaleleleho kuwa mbunge, mwafwa ‘wakulahelele Njambi Uje wapwa lyaako wa busunga.’ (1 Petu 2:23) Yesu wazibukile ngwendi Ishe wa mwilu amunyunga, co lalo wazibukile ngwendi Njambi akana kashitiko ha simbu inapande kuli baje bakele na kumuyandesa.

Nga munu natulingi mwamubi, kutwapandele kulubala, mwafwa tubwezelela lika ku bukalu. Mbimbiliya ngwayo: ‘Bukalu bwa munu kubwasa kunena busunga bwa Njambi.’ (Yako 1:20) Byuma bimo binasa kutulubalesa, oloni nga tulubala, twasa kulinga byuma byabibi, mwafwa kutwalumbunukile.

Ndokazi Cathy wa ku Germany wakele na kusinganyeka ngwendi, ‘Nga kuulimanena, co wahi a kwimanena.’ Oloni mwashangumukile kukulahela Yehova, watengulwile bisinganyeka byendi. Wendekele ngwendi: “Ano matangwa, kunjesi kulimanena. Njikau mbunge, mwafwa njizibuka ngwange Yehova akabwahesa byuma byoshe kulutwe.” Ngeci,  nga banu bamilinga mwamubi, co tembwinineni Yesu uje wakele byuma byoshe mu maboko a Njambi. Kulinga ngoco kumikwasa muwe mbunge.

Yesu wamwesele ngwendi kuwa mbunge, kutukwasa tupwe ba kubwahelela. Wendekele ngwendi: “Banabwahelela baje banawu bimbunge.” (Mateo 5:5, NWT) Kuwa mbunge kutukwasa bati?

Kuwa mbunge kutukwasa tutepulule ku bukalu bwa mu bulo. Ndolome Robert wa ku Australia wendekele ngwendi: “Bisimbu bimo, njakele na kwendeka majwi amabi kuli munakazi wange aje kunjashakele kwendeka. Oloni munu nga nendeka majwi amabi, co nendeka bene. Njakele na kuziba kubihya ku mbunge munjakele na kumona ngwange majwi a njakele na kumwendeka amuzibisile kubabala ku mbunge.”

“Bisimbu byabingi tukabiisa” mu kwendeka, oloni kwendeka kwa kujeneka kusinganyekesesa kwasa kubiisa bulo. (Yako 3:2) Kuwa mbunge kutukwasa tukwate ndaka yetu.—Visi 17:27.

Robert walingile mwoshe mwaselele mangana apwe wa kuwa mbunge, co lalo ase kukwata mbunge. Co bika binatundumo? Wendekele ngwendi: “Ano matangwa mutukakala na bukalu mu bulo bwetu, njikeseka mwoshe munjasela kutolilila mwamubwa byendeka mwebwange, co njikendeka nendi mwamubwa oku kunjalubalele. Hano bulo bwetu bunakanyamoni.”

Kuwa mbunge kutukwasa tuyoye mwamubwa na bakwetu. Baka-kulubala bwasi kubesi kukala na babusamba babangi. Oloni kuwa mbunge kutukwasa ‘tunyunge kwoloka kuje kunatukutiiya hamolika.’ (Efeso 4:2, 3) Cathy itunabanga kwendeka wendekele ngwendi: “Kuwa mbunge kukanjikwasa njilikwatasane mwamubwa na bakwetu, nameme bamo babakalu kulikwatasana nabo.”

Kuwa mbunge kutukwasa tuyoye mu kwoloka. Mbimbiliya inamwesa kulitombola kuli mukati ka “mana a kutunda mwilu” na kuwa mbunge na kwoloka. (Yako 3:13, 17) Munu wa kuwa mbunge wakala na “mbunge ya kwoloka.” (Visi 14:30) Martin uje walingile mwoshe mwaselele mangana apwe munu wa kuwa mbunge, wendekele ngwendi: “Ano matangwa, kunjesi kusindiya bakwetu balinge byuma munai mbunge yange. Ngeci, njili na kuyoya mu kwoloka, co lalo njinapu wa kubwahelela.”

Keti kwakwasi kuwa mbunge. Ndolome umo wendekele ngwendi: “Kwendeka lika busunga, nameme ano matangwa anga njikalubala ha bisimbu bimo.” Oloni Yehova uje ashaka ngwendi tuwe bimbunge, atukwasa. (Isaya 41:10; 1 Tima 6:11) Atulongesa kweta na kushongo, co ‘akatwana nzili.’ (1 Petu 5:10) Mu kwita kwa simbu, twasa kutembwinina Kilistu uje wawile mbunge, co lalo wakele na ngozi.—2 Koli 10:1, NWT.