KUMWESA bakwetu ngozi kukabazembeleka na kubatakamesa. Tukalizibi mwamubwa nga bakwetu batwaka mbunge. Tubaboshe twazema kutumwesa ngozi, co twasa kukala bati neci cifwa cacibwa?

Kuzibila bakwetu ngozi kunambateselela na kubaka mbunge, kubakwasa na kusimutwiya nabo mwamubwa. Nameme tukamwesa ngozi mu bilinga, oloni kuyapandele kupwa ya kulimwesa lika. Kuzema bakwetu na kubazibila mema ku mbunge kukekwo kukatushongangeya tubamwese ngozi. Co ha kupwa baka-Kilisitu, bakatushongangeya ngwabo tukale na ngozi ya cifwa eci, ije yapwa bushuka bwa sipilitu. (Ngala 5:22, 23) Tunapande kukala na ngozi, ngeci tucisimutwiyeni omwo Yehova na Munendi banamweselamo ngozi nomwo mutwasa kubatembwininina.

Yehova akamwesa ngozi na kutetela banu boshe, nameme baje “kubesi kumukandelela na. . . baka-bubi.” (Luka 6:35) Cakumwenako, Yehova “akatuhwisila litangwa lyendi ha banu bababi na hali banu bababwa, co akanyokesa nyonzi hali baka-busunga na hali baka-bubi.” (Mateo 5:45) Ngeci, baje kubesi kusingimika Yehova na kumumona kupwa Ishamatanga, nabo bakalikuwu byuma byakatulingila bije bikatukwasa tuyoye mwamubwa, co bakabwaelela kubimona.

Yehova watwakelele mwanja waubwa mwamwesele Andama na Eva ngozi. Andama na Eva mubanangukile ngwabo banalingi bubi, “batongele maputa a muti wa mukuyu na kuwazala.” Oloni Yehova wazibukile ngwendi bapandele kukala na buzalo buje bubakasa kukala nabwo hanja ya lihya lya Endeni, mwafwa Libu lyaco lyapwile lya kusingiwa, co lyakele na “shaku na mambimbo.” Yehova wabazibilile ngozi, ngeci, ‘wabatongelele buzalo bwa bilambu bya tusitu.’—Kusha 3:7, 17, 18, 21.

Nameme Yehova akazibila ngozi ‘banu bababi na banu bababwa,’ oloni wazema manene kumwesa ngozi ku bangamba bendi ba kulongwa. Cakumwenako, mu simbu yayoyele kapolofweto Zakaliya, kangelo umo walizibile kubihya mwamwene ngwendi banu balikelele kutunga tembele ya mu Yelusalema. Yehova watolilile mwamubwa byendekele kangelo, co “wakumbulwile uje kangelo na majwi a kuzembeleka.” (Zaka 1:12, 13) Yehova watolilile lalo kuli kapolofweto Elinja mwamulekele mwalizibilililemo. Simbu imo, ou kapolofweto wazeyele manene, co walombele Yehova ngwendi amutsiye. Yehova watolililile mwamubwa byoshe byendekele Elinja, co watumine kangelo mangana akamutakamese. Njambi watakamesele lalo Elinja ha kumuleka ngwendi kakele lika lyendi. Awa majwi azibile Elinja na bukwasi bwatambwile, byamukwasele atwaleleleho kulinga cipangi cendi. (1 Vimye 19: 1-18) Ngamba muka natembwinina mwamubwa Yehova mu kumwesa ngozi?

Yesu mwakele hano hasi, banu bamuzibukile kupwa muka-kutetela, co wakele na ngozi. Kapwile wa kukenyuka. Yesu walekele banu ngwendi: “Ijeni kuli yange, yeni boshe munajuka na kwambata bya kulema, co njikamihwimisa. . . . Omwo mandauluwa yange yayasi.” (Mateo 11:28-30) Banu bamukabangeyeye kwoshe kwaile mwafwa wapwile muka-ngozi. Yesu ‘wazibilile banu mema ku mbunge,’ ngeci wabanene bya kulya, wabakangwisile ku mishongo yabo na kubalongesa byuma byabingi hali Ishe.—Mako 6:34; Mateo 14:14; 15:32-38.

Yesu wamwesele banu ngozi ha kukala nabo mwamubwa na kubazibisisa. Watambwile mwamubwa banu baje bamushakezekele mu busunga ha simbu yoshe yoshe. (Luka 9:10, 11) Cakumwenako, uje munakazi wabinjile mushongo wa kwita maninga mwakwatele ku cikobelo ca Yesu mu kushaka ngwendi akanguke, Yesu kamutenukilile nameme ngwavo kwesekesa na cisemwa cabo, uje munakazi wajwalele. (Levi 15:25-28) Yesu wazivilile ngozi uje munakazi wabinjile ha myaka 12, mukemwo wamulekele ngwendi: “Munange, kukulaela kwobe kunakukangwisa. Ya mu kwoloka, co kanguka ku mushongo wobe.” (Mako 5:25-34) Eyi yapwile ngila yaibwa ya kumweselamo ngozi.

Myanja itunasimutwiya inamwesa ngwayo tukamwesa bakwetu ngozi mu bilinga byetu. Mu cisimo ca Kasamaliya, Yesu wamwesele seo ya kukwasa bakwetu. Nameme Bayunda na Basamaliya balizindile, oloni Kasamaliya wa mu cisimo ca Yesu wazibilile ngozi munalume ibapupangele mapwepwe, ibashulwile buzalo bwendi na kumuseza ashaka kutsa. Ngozi ikeyo yalingisile uje Kasamaliya amukwase. Wasakele bimbandu byendi na kumutwala ku njubo ya kutulila bangenzi.—Luka 10:29-37

Nameme tukamwesa manene ngozi mu bilinga, oloni twasa kuimwesa na mu kwendeka majwi amabwa aje atakamesa. Mbimbiliya ngwayo: “Cishota-mbunge capwa citele ca kulema, oloni majwi a ngozi anena kubwaelela.” (Visi 12:25) Nga tuzibila bakwetu ngozi, co twendeka byuma bije bibatakamesa, co oku kubakwasa bapwe ba kubwaelela. * Majwi atwendeka amwesa ngwawo twabaka mbunge. Co lalo kubapwila kwakwasi kuhyana byeseko bije bibaliwana nabyo mwafwa tunabatakamesa na majwi amabwa.—Vithi 16:24.

Tubaboshe twasa kukala na ngozi mwafwa batutanga mu “cifwa ca Njambi.” (Kusha 1:27) Cakumwenako, Njulyasi liswalale wa mu Loma uje wakele na kunyunga Paulu mu kamenga wamumwesele ngozi, co wamutabesele kuya na kumona babusamba bendi ku Sindone mangana bakamwane bije byajenekele. (Vili 27:3) Simbu imo, banu ba ku Melita bamwesele “ngozi” kuli Paulu na bakwabo baje bakele mu bwato buje bwabombelele. Co lalo baka-Melita babwekelele baje banu tuhya mangana bote. (Vili 28:1, 2) Byuma bibalingile aba banu byapwile byabibwa, oloni mu kumwesa ngozi mwalibungila byuma byabingi, keti lika kumwesa ngozi litangwa limo.

Nga tushaka kuzibisa Njambi kubwaha, tunapande kumwesa bakwetu ngozi simbu yoshe. Mukemwo Yehova watuleka ngwendi  tunapande kukala na ngozi. (Kolo 3:12) Kukala na ngozi kukwapile kwakwasi. Mwafwa bika? Hamo tukonowa kumwesa bakwetu ngozi mwafwa ya shwamwa, kujeneka kulikulahela nambe mwafwa ya kutulwisa. Oloni sipilitu ya kujela na kutembwinina Yehova byasa kutukwasa tumwese bakwetu ngozi.—1 Koli 2:12.

Twasa kuzibuka bati bingila bikwabo bya kumweselamo bakwetu ngozi? Tulihuleni ngwetu: ‘Njapwa muka-kutolilila wamubwa ndi? Njikaka mbunge bakwetu baje bali mu bujene ndi? Tangwa lika njamwesele ngozi kuli munu uje keti kabushoko nameme kabusamba wa ha mbunge?’ Twasa kulyakela cilengo ca kuzibuka mwamubwa bakwetu, maneneni baje batukakunguluka nabo. Kulinga ngoco kutukwasa tuzibuke bukalu bubali nabwo na bujene bwabo. Cikwabo lalo, twasa kumwesa bakwetu ngozi ngwe mutushakela ngwetu bakwetu batumweseyo. (Mateo 7:12) Ca mamaneselelo, nga tulomba bukwasi kuli Yehova, co atukwasa tumwese bakwetu ngozi.—Luka 11:13.

Kapositolo Paulu mwasonekele byuma bije byamusholwele kupwa ndongesi ya Njambi, wasonekeleho na “ngozi.” (2 Koli 6:3-6, NWT) Banu bazemene Paulu mwafwa bilinga byendi na majwi endi byamwesele ngwabo wabazemene. (Vili 28:30, 31) Mu ngila imo lika, bilinga byetu byabibwa byasa kulingisa bakwetu balilongese busunga. Nga tumwesa banu boshe ngozi nameme baje batuzinda, co basa kutengulula bisinganyeka byabo. (Loma 12:20) Mu kwita kwa simbu, basa kushangumuka kuzema bilongesa bya mu Mbimbiliya.

Banu babangi baje bakasanguka mu Palandaisi, bakabwaelela manene kubamwesa ngozi, bamo lukapwa lwa kulibanga kubamwesa ngozi. Aba banu nabo lalo bakashaka kumwesa bakwabo ngozi mwafwa tunabanga kubamwesayo. Boshe baje kubakamwesa ngozi ku bakwabo, kubakatwalelelaho kukakala mu Bumwene bwa Njambi. Oloni baje bakamwesa cizemo na ngozi ku bakwabo, bakebo bakatabesa Njambi kuyoya myaka yoshe. (Myaso 37:9-11) Omu mu lifuti mukakala kwoloka. Oloni simbu Bumwene bwa Njambi kanda bwije, kumwesa ngozi kutukwasa bati ha simbu ino?

Mbimbiliya ngwayo: “Muka-ngozi anyunga mwamubwa mwonyo wendi.” (Visi 11:17) Banu bakazeme na kumwesa ngozi munu uje abamwesa ngozi. Yesu wendekele ngwendi: “Seteko ije museteka nayo bakweni, ikeyo lalo ya kamiseteka nayo Njambi.” (Luka 6:38) Ngeci munu wa ngozi akawana babusamba bababwa.

Kapositolo Paulu washongangeyeye baka-Kilisitu ba mu cikungulukilo ca Efeso ngwendi: “Pweni baka-ngozi na baka-mbunge ya lyobwa-obwa kuli umo na mukwabo, co lisambeseni umo na mukwabo.” (Efeso 4:32) Nga banu ba mu cikungulukilo balimwesa ngozi na kulikwasa umo na mukwabo, co cikungulukilo cipwa ca kukanyama. Banu bacifwa eci kubesi kwendeka majwi amavi, kulwisa bakwabo nameme kulinga lyepe lya kutubakanesa. Kubesi kufweya bakwabo, oloni, bakapangesa majwi amabwa mu kukwasa bakwabo. (Visi 12:18) Ngeci, cikungulukilo cabo cikalingi mwamubwa.

Twasa kumwesa ngozi mu majwi a twendeka na mu bilinga. Nga tukala na ngozi, co tumwesa bifwa bije byakala nabyo Yehova Njambi yetu. (Efeso 5:1) Kulinga ngoco kukanyamesa cikungulukilo na kulingisa banu baije mu bulombelo bwa busunga. Tubaboshe tutwaleleleniho kumwesa bakwetu ngozi.