1-2. Mwafwa bika baka-Kilistu ano matangwa banapande kukala na lishungu lya kulilongesa mukanda wa Valevi?

KAPOSITOLO PAULU walekele kabusamba kendi Timateo ngwendi, “Bisoneka byoshe Njambi wahwimininemo ngeci bili na seho.” (2 Tima 3:16) Ebi Bisoneka byambateselela na mukanda wa Valevi. Yeni mwamona bati mukanda wa Valevi? Bamo bakaumono ngwabo wapwa lika mukanda uje washula na mashiko, co kuwesi na seho matangwa ano. Oloni yetu baka-Kilistu ba busunga kutwesi kuumona ngoco.

² Kuneti myaka ya kweta ku 3,500 kutunda habasonekelele mukanda wa Valevi. Oloni Yehova naunyungilila mangana ‘utulongese.’ (Loma 15:4) Ou mukanda utukwasa tuzibuke mwali na kumwenamo byuma Yehova, ngeci tunapande kukala na lishungu lya kulilongesawo. Kuli byuma byabingi bitulilongesa ku mukanda ou wa kuhwiminina. Tusimutwiyeniko biwana.

3. Bika bibakele na kwanena biñombelo ha mwaka na mwaka ha Litangwa lya Kufwika Bubi?

³ Cilongesa ca kulibanga: Nga tuzibisa Yehova kubwaha, co atambula biñombelo byetu. Mwaka na mwaka ha Litangwa lya Kufwika Bubi, Baisalele balikungulwile na kwana biñombelo bya tusitu. Bije biñombelo byanukisile Baisalele ngwabo bapandele kubajelesa ku bubi. Oloni simbu kanda kapilistu wakama atwale ñombelo ya maninga ku Mwela wa Kujela Manene, wapandele kulinga cuma cakama manene cije catubakanene kukonekela bubi bwa banu.

4. Kwesekesa na Valevi 16:12, 13, bika byalinga kapilistu wakama mwakobela lwa kulibanga ku Mwela wa Kujela Manene, ha Litangwa lya Kufwika Bubi? (Taleni cikupulo ca ha liputa lya kulibanga.)

 ⁴ Tandeni Valevi 16:12, 13. Lingeni ngwe mumona bili na kulingiwa ha Litangwa lya Kufwika Bubi. Kapilistu wakama akobela mu mbalaka. Olu lukelwo lwa kulibanga kukobela ku Mwela wa Kujela Manene, co napandele kukobelako lalo lubali ha litangwa olyo bene. Ku liboko limo nambata ndeho ya insense ya lwengo lwalubwa, co ku liboko likwabo nambata manungu a tuhya. Omwo eta ha nanga ije inafwiki ku cikolo ca ku Mwela wa Kujela Manene, emana kamandondo. Co akobela ku Mwela wa Kujela Manene mu kasingimiko kakama na kwimana ku cikasa ca cikumiiyo. Mu cifwisa, nalingi ngwe uje nemana kulutwe lwa Yehova Njambi. Kutundaho, etila mwamubwa insense ya kujela ha manungu a tuhya, co mu mulili mwoshe munika lika lwengo lwalubwa. * Hanima yebi, akobela lalo ku Mwela wa Kujela Manene na maninga a ñombelo ya bubi. Keti mwibale ngweni, nenyeka insense simbu kanda ane maninga a ñombelo ya bubi.

5. Mubapangeselelemo insense ha Litangwa lya Kufwika Bubi kutulongesa bika?

⁵ Mubapangeselelemo insense ha Litangwa lya Kufwika Bubi kutulongesa bika? Mbimbiliya imwesa ngwayo malombelo a bangamba ba Yehova ba kulongwa, anapu ngwe insense. (Myaso 141:2; Kujo 5:8) Anukeni ngweni kapilistu wakama watwalele insense kuli Yehova mu kasingimiko kakama. Mu ngila imo lika, nga tulombela kuli Yehova tupande kulinga ngoco mu kasingimiko kakama. Twabezika manene, mwafwa Ishamatanga wa mwilu na hasi natutabesa kumushwenya, ngwe mwakashwene mwana kuli ishe. (Yako 4:8) Natupwisa babusamba bendi. (Myaso 25:14) Twabezika manene, co kutushaka kulinga byuma bije bimulubalesa.

6. Kapilistu wakama mwenyekele insense simbu kanda ane biñombelo kutulongesa bika?

⁶ Anukeni ngweni kapilistu wakama wenyekele insense simbu kanda ane biñombelo. Walingile ngoco mangana abange tahi kuzibisa Njambi kubwaha asina ana biñombelo. Bika bitulilongesako? Yesu mwakele hano hasi, simbu kanda ane mwonyo wendi kupwa ñombelo, walingile cuma ca seho cije catubakanene kwobola banu. Cuma muka? Mu buyoye bwendi bwoshe wapwile wa kulongwa na kwononoka, mangana Yehova atambule ñombelo yendi. Yesu mwalingile ngoco, wamwesele ngwendi kulinga byuma mu ngila yatonda Yehova, kwakubwa manene. Wamwesele lalo ngwendi ciyulo ca Ishe cikeco cacibwa manene.

7. Bika twendekela ngwetu mu buyoye bwendi bwoshe bwa hano hasi, Yesu wazibisile Ishe kubwaha?

⁷ Mu buyoye bwendi bwoshe bwa hano hasi, Yesu wononokele Yehova. Walyangwilile kwimanena ciyulo ca Ishe nameme wazibukile ngwendi aliwana na byeseko na tuyando, co lalo bamutsiya mu ngila yaibi manene. (Fili 2:8) Mwaliwanene na byeseko, Yesu walombelele mu “kutambeka na lijwi lyakama na misozi.” (Heve 5:7) Malombelo endi a kutundilila kwisi ya mbunge, amwesele ngwawo walongwele, co oku kwamulingisile atwaleleleho kwononoka Yehova. Kuli Yehova, malombelo a Yesu apwile ngwe  insense ya lwengo lwalubwa. Mu buyoye bwendi bwoshe, Yesu wazibisile Ishe kubwaha, co lalo wemanenene ciyulo ca Ishe.

8. Twasa kutembwinina bati Yesu?

⁸ Twasa kutembwinina Yesu nga tulinga mwoshe mutwasela kupwa ba kulongwa na kwononoka mashiko a Yehova. Omwo tuliwana na byeseko, tunapande kulomba Yehova kushwa kumo mangana atukwase, mwafwa tushaka kumuzibisa kubwaha. Nga tulinga ngoco, co tumwesa ngwetu tuli na kukundwiya ciyulo ca Yehova. Oloni nga tulinga byuma bije byazinda Yehova, co katambula malombelo etu. Nga tulinga byuma bije byazema, co tukulahela ngwetu malombelo etu apwa ngwe insense ya lwengo lwalubwa kuli Yehova. Tukulahela lalo ngwetu kulongwa kwetu na kwononoka kwetu kuzibisa Tate yetu wa mwilu kubwaha.​—Visi 27:11.

9. Bika bibakele na kwanena biñombelo bya kulitombola?

⁹ Cilongesa ca mu cibali: Tuli na kupangela Yehova mwafwa tumwesa kukandelela. Tucisimutwiyeni ha ñombelo ya kulitombola ije yapwile ya seho mu kulemesa kwa busunga mu simbu ya Baisalele mangana tuzibisise bwino eyi simpi. * Ku mukanda wa Valevi, banamwesako ngwabo Kaisalele wanene ñombelo ya kulitombola “kupwa mulambu wa cikandelela.” (Levi 7:11-13, 16-18) Wanene uje mulambu mwafwa washakele kwana, keti kulingila lika lishiko. Ou wapwile mulambu walyanukilile munu ikeye babenya mwafwa ya kuzema Yehova Njambi. Uje wanene mulambu na naanga  yendi hamo lika na tupilistu, balile ije situ ya kasitu ibalingile ñombelo. Oloni mazi na bilyo bimo bya kasitu ibalingile ñombelo babyanene lika kuli Yehova. Bilyo muka?

10. Biñombelo bya kulitombola bili ku Valevi 3:6, 12, 14-16, binalifu bati nomu mwalingililemo Yesu cizango ca Ishe?

¹⁰ Cilongesa ca mu citatu: Twana Yehova byuma byabibwa, mwafwa twamuzema. Yehova wamwene mazi a kasitu kupwa amabwa. Wendekele lalo ngwendi bilyo bimo bya kasitu kwambateselela na binso byapwa byabibwa manene. (Tandeni Valevi 3:6, 12, 14-16.) Ngeci, Yehova wazibile manene kubwaha omwo Kaisalele wamwanene mazi na bilyo byabibwa manene. Kaisalele uje walambwile ebi bilyo, wamwesele ngwendi washakele kwana Njambi byuma byabibwa. Mu ngila imo lika, Yesu nendi wanene Yehova byuma byabibwa omwo wamupangelele na mbunge yendi yoshe, mwafwa ya cizemo cakele naco kuli Ishe. (Yowa 14:31) Yesu wabwahelele kulinga cizango ca Njambi, mwafwa wazemene manene mashiko a Njambi. (Myaso 40:8) Yehova wabwahelelele manene kumona Yesu amupangela na mbunge yendi yoshe.

11. Cipangi ceni kuli Yehova cinalifu bati na biñombelo bya kulitombola, co kuzibuka ngoco kumitakamesa bati?

¹¹ Biñombelo bya kulitombola, binalifu na cipangi cetu kuli Yehova, mwafwa capwa ca kulyana. Tuli na kwana Yehova byuma byabibwa, mwafwa twamuzema manene. Yehova ali na kuziba kubwaha kumona banu babangi bamulemesa, mwafwa yakumuzema na kuzema mashiko endi. Kuzibuka ngwetu Yehova ali na kumona bituli na kulinga nebi bili na kutushongangeya tubilinge, kututakamesa manene. Cakumwenako, nga mutukulukazi co kumwasa kupanga ngwe mumutondela, anukeni ngweni Yehova azibuka bukalu bweni. Hamo muliziba ngweni kumwasa kwana Yehova byuma byakama, anukeni lalo ngweni Yehova amona ngwendi cizemo ceni cikeco cili na kumishongangeya mulinge bije bimwasa. Yehova nabwahelela kutambula byuma byabibwa bije bimwasa kumwana.

12. Yehova mwamwenenenemo biñombelo bya kulitombola kututakamesa bati?

¹² Bika bitulilongesa ku biñombelo bya kulitombola? Tuhya mutwakele na kwenyeka mazi na bilyo byabibwa bya kasitu, bwisi bwakele na kuya mwilu, co Yehova wabwahelele. Ngeci, neni kulaheleni ngweni Yehova aziba kubwaha omwo amimona mumupangela na mbunge yeni yoshe. (Kolo 3:23) Yehova ali na kuziba kubwaha hali yeni. Atondako manene cizemo ceni kuli ikeye, co cikeco cakanuka ku myaka yoshe, keti bukama nambe bundondo bwa cipangi ceni.​—Mateo 6:20; Heve 6:10.

13. Kwesekesa na Valevi 9:23, 24, Yehova wamwesele bati ngwendi wabwahelelele hali baje tupilistu babangwile?

¹³ Cilongesa ca mu ciwana: Yehova ali na kubezikisa mutamba wa hasi wa munga yendi. Tusimutwiyeni byalingiwile mu 1512 B.C.E. omwo batungile Mbalaka ku Munkinda wa Sinai. (Kutu 40:17) Mosesa watwamenene cilika ca kwangula Alone na bana bendi kupwa tupilistu. Co Baisalele bakungulukile kwakumona tupilistu bana biñombelo byabo bya tusitu lwa kulibanga. (Levi 9:1-5) Yehova wamwesele bati ngwendi wabwahelelele hali baje tupilistu babangwile? Omwo Alone na Mosesa babezikisile banu, Yehova watumine tuhya kwa  kwenyeka biñombelo bije byasalele ha mutula.​—Tandeni Valevi 9:23, 24.

14. Kubwahelela kwazibile Yehova ha kwangula Alone na bana bendi kupwa tupilistu kutulongesa bika?

¹⁴ Tuje tuhya twatundile mwilu mubangwile tupilistu bakama twamwesele bika? Yehova wamwesele ngwendi natabesa Alone na bana bendi bapwe tupilistu, co lalo abakwasa. Baisalele mubamwene bukaleho buje bwamwesele ngwabo Yehova akwasa tupilistu, bapandele kukundwiya manene cipangi ca tupilistu. Kuma kuli bimo bitulilongesako ndi? Eyo. Cipangi ca tupilistu ca mu simbu ya Baisalele cemaneneneko lika cipangi ca kapilistu wakama. Kilistu ikeye Kapilistu Wakama, co ali na tupilistu ba kulongwa ba kupwa 144,000, baje bakapangela hamo nendi mwilu.​—Heve 4:14; 8:3-5; 10:1.

15-16. Yehova namwesa bati ngwendi nabwahelela hali “ndungo wa kulongwa na kunyanyama”?

¹⁵ Mu 1919, Yesu wangwile kacibunga ka bandolome bakubwabesa kupwa “ndungo wa kulongwa na kunyanyama.” Uje ndungo ali na kutwamenena cipangi ca kwambulula na kwana baka-kukabangeya Kilistu “byakulya ha simbu inapande.” (Mateo 24:45, NWT.) Kuma netu tuli na kulimwena bukaleho buje bumwesa ngwabo Njambi nabwahelela ha kwangula ndungo wa kulongwa na kunyanyama ndi?

¹⁶ Satana na kaye kendi baneseka manene kwonowesa cipangi ca ndungo wa kulongwa. Ngwe Njambi kakwasele ou ndungo, eci cipangi ngwe kacasele kucipanga. Kunakala binzita bya mu kaye koshe bibali, kukeha kwa bimbongo na kuyandesa banu ba Njambi, oloni ndungo wa kulongwa na  kunyanyama natwalelelaho kwana byakulya bya ku sipilitu kuli baka-kukabangeya Kilistu hano hasi. Acisinganyekeni bwingi bwa byakulya bya ku sipilitu bitulinabyo. Bali na kutwanabyo bwana, oloni bili mu bindaka bya kutubakana 900. Obu bunapu bukaleho bumwesa ngwabwo Njambi ali na kukwasa ndungo wa kulongwa. Cipangi ca kwambulula naco cili na kumwesa ngwaco Yehova ali na kubezikisa munga yendi. Muzimbu waubwa bali na kuwambulula “mu kaye mwoshe.” (Mateo 24:14) Twalimwena ngwetu cili bene Yehova ikeye ali na kutwamenena na kukwasa munga yendi matangwa ano.

17. Tumwesa bati ngwetu tuli na kukundwiya munga ya Yehova?

¹⁷ Ngeci, tulihuleni ngwetu, ‘Njili na kumona ngwange njabezika kukala mu mutamba wa hasi wa munga ya Yehova ndi?’ Tunapande kumwesa kukandelela kuli Yehova, mwafwa natwana bukaleho bwa kushula ngwe mwalingilile kunima omwo watumine tuhya, ha simbu yayoyele Mosesa na Alone. (1 Tesa 5:18, 19) Tumwesa bati ngwetu tuli na kukundwiya munga ya Yehova? Tumwesa ngoco nga tupangesa bitulilongesa mu Mbimbiliya, mu mabulu etu, ku biwano bya cikungulukilo, bya citingitingi, nebi bya mutambela. Kutundaho lalo, tuikundwiya nga tupanga na nzili mu cipangi ca kwambulula na kulongesa.​—1 Koli 15:58.

18. Mwalyangwila kulinga bika?

¹⁸ Tulyangwileni kupangesa bitunalilongesa ku mukanda wa Valevi. Tuzibiseni Yehova kubwaha mangana atambule biñombelo byetu. Tupangeleni Yehova mwafwa ya cizemo cetu kuli ikeye. Tutwaleleleniho kwana Yehova byuma byabibwa, mwafwa ya cizemo cetu cakama kuli ikeye. Co lalo, tukundwiyeni manene munga yali na kupangesa matangwa ano. Nga tulinga ngoco, co tumwesa ngwetu twakandelela kuli Yehova ha kupwa Bakaleho bendi.