KUSAÑULU, ngamba wanyungile byuma bya ha njubo nambe bufuko bwa munu weka. Lijwi lya Cihebelu neli lya Cingiliki libananungulula ngwabo ngamba, bisimbu bimo bakalitalesa kuli uje atwamenena cipangi nambe uje anyunga byuma bya ha njubo.

Yosefa muna Yakomba mwapwile ndungo mu Ingito, wakapwile ngamba wa kunyunga byuma bya ku njubo ya shukulu yendi. Shukulu yendi wa Kaingito, ‘wakele byuma byendi byoshe mu maboko a Yosefa ngeci abinyunge.’ (Kusha 39:2-6) Mu kwita kwa simbu, Yosefa mwapwile mwene wa nzili mu Ingito, wangwile ngamba wa kunyunga njubo yendi.​—Kusha 44:4.

Mu simbu yayoyele Yesu, keti kakangi kuwana babenya libu natungu haje hakele na kulimina, oloni watungile kweka. Ngeci babenya libu wangwile ngamba mangana atale bipangi byoshe, nomu mubapangela banu mu lihya lyendi.

Munu wa kufwa bati ibangwile kupwa ngamba? Columella, Kaloma wa mu cita ca myaka ca kulibanga wendekele ha munu ibangwile kutwamenena cipangi nambe ngamba. Wendekele ngwendi napande kupwa munu “uje nalilongesa kupanga mwamubwa cipangi na kumona ngwendi banu bapanga bwino bipangi, oloni keti muka-cikela.” Wendekele lalo ngwendi, “ngamba kapandele kuliziba ngwendi azibuka byuma byoshe, oloni napande kukala na mbunge ya kushaka kulilongesa byuma byabiha.

Mbimbiliya inesekesa ngamba na cipangi cendi ku bipangi bya mu cikungulukilo. Cakumwenako, kapositolo Petulu washongangeyeye baka-Kilistu ngwendi bapangese cashu canabana Njambi, mukupangela bakwabo ha kupwa bangamba bababwa baje banasholwela Njambi cizemo.​—1 Petu 4:10.

Ku Luka 16:1-8, Yesu wapangesele cakumwenako ca ngamba mu cisimo cendi. Kutundaho lalo, Yesu wakulahesele bandongesi bendi ngwendi mwakapwa Mwene, akangula “ndungo wa kulongwa na kunyanyama” nambe “ngamba wa kulongwa.” Cipangi cakama ca ngamba cinapu kwana bandongesi ba Kilistu byakulya bya ku sipilitu mu simbu ya kukotoka. (Mateo 24:45-47; Luka 12:42) Twabezika manene kutambula mabulu aje ali na kutunda kuli ngamba wa kulongwa.