CILONGESA 48
Kengeni Kulutwe
“Mesho obe akenge kulutwe lwobe, kesi ukenge noku-noku.”—VISI 4:25.
MWASO 77 Ceke mu Kaye ka Lisusulungu
BILI MUNO MU CILONGESA *
1-2. Twasa kupangesa bati cinangulo cili ku mukanda wa Visimo 4:25? Endekeni cakumwenako.
TUSIMUTWIYENI ha byakumwenako bitatu. Ndokazi wa kakulukazi ali na kusinganyekesesa ha byuma byabibwa byakele na kulikuwa kunima. Nameme ali na kuliwana na bukalu bwa kuliseza-seza ha simbu ino, oloni ali na kulinga mwoshe mwasela kupangela Yehova. (1 Koli 15:58) Ha litangwa na litangwa, ali na kulimona ngwe ali na babushoko bwendi na babusamba bendi mu kaye kakaha. Ndokazi mukwabo, ali na kwanuka munu umo mu cikungulukilo uje wamulingile mwamubi. Oloni kesi na kusinganyeka manene hali obu bukalu. (Kolo 3:13) Ndolome umo, ali na kwanuka bubi bwalingile kunima, oloni ashaka kupwa wa kulongwa kuli Yehova.—Myaso 51:10.
2 Aba baka-Kilistu batatu banalifu bati? Boshe bali na kwanuka byuma byalingiwile kunima, oloni keti bikebyo bibali na kusinganyeka manene. ‘Mesho abo anakenge kulutwe.’—Tandeni Visimo 4:25.
3. Mwafwa bika tunapande ‘kukenga kulutwe’?
3 Bika kwapwila kwa seho ‘kukenga kulutwe’? Munu kasa kutwalelelaho kwenda mu ngila nga enda oku natala kunima. Mu ngila imo lika, netu kutwasa kutwalelelaho kupangela Yehova mwamubwa nga tutwalelelaho kusinganyeka byuma byalingiwile kunima.—Luka 9:62.
4. Bika bitusimutwiya muno mu cilongesa?
4 Muno mu cilongesa, tusimutwiya ha byuma bitatu bije byasa kutulingisa tusinganyeke manene ha byuma byalingiwile kunima: (1) kushaka tuyoye ngwe mutwakele na kuyoyela kunima, (2) kukala na likitikiti ku mbunge na (3) kuliziba manene kukala na mulonga. Co tusimutwiya omwo binangulo bya mu Mbimbiliya bitukwasela tujeneke kusinganyeka manene ha ‘byuma bya kunima,’ oloni tusinganyeke manene ha byuma “bili kulutwe.”—Fili 3:13.
BUKALU BWA KUSHAKA TUYOYE LIKA NGWE MUTWAKELE NA KUYOYELA
Byuma muka byasa kutwonowesa kukenga kulutwe? (Taleni palagilafu 5, 9, 13) *
5. Kwesekesa na mukanda wa Muka-kwambulula 7:10, byuma muka bitunapande kujenjuka?
5 Tandeni Muka-kwambulula 7:10. Nangukeni ngweni ou mukanda kuwatubindikile kwihula ngwetu: “Mwafwa bika byuma byapwile byabibwa kunima?” Cashu ca kwanuka capwa bwana bwa kutunda kuli Yehova. Oloni unendeka ngwawo: “Kesi wihule ngwobe, ‘Omwo bikajo byuma byabwahele manene ha matangwa a kunima?’” Ngeci, kutwapandele kwesekesa byuma byalingiwile kunima nebi bili na kulingiwa ano matangwa na kumona ngwe ha simbu ino byuma binai mweka.
Bubi muka bubalingile Baisalele mubatundile mu Ingito? (Taleni palagilafu 6)
6. Mwafwa bika kutwapandele kutwalelelaho kusinganyeka ngwetu byuma byakele mwamubwa manene kunima? Endekeni cakumwenako.
6 Mwafwa bika kutwapandele kutwalelelaho kusinganyeka ngwetu buyoye bwetu bwapwile bwabubwa manene kunima? Mwafwa kulinga ngoco kunasa kutulingisa tusinganyeke ngwe kunima byuma byakele lika mwamubwa na kumona ngwe kukwesi bukalu butwaliwanene nabwo. Tusimutwiyeni hali Baisalele. Mubatundile mu Ingito, bebalele bwasi-bwasi tuyando tubaliwanene natwo. Oloni basinganyekele lika byakulya byabibwa bibakele na kulikuwa. Bendekele ngwabo: “Tunanuka bisi twakele na kulya ngoco mu Ingito ba kujeneka kulanda, na binende bya ngulu, na malasiya, na sapola ya mabundungulu, na sapola yeka na yeka ya kunika mwamubwa.” (Kula 11:5) Kuma bije byakulya byapwile bya bwana bene ndi? Embwe. Baisalele bakele na kubiyandela mwafwa babapangesele mwamubi mubapwile bindungo mu Ingito. (Kutu 1:13, 14; 3:6-9) Oloni bebalele kaje kayando koshe, co bashungwiiye bya kunima. Bakele mana ku byuma byabibwa byalingiwile kunima kutubakana kusinganyeka byuma byabibwa byabalingilile Yehova. Co Yehova kabwahelelele.—Kula 11:10.
7. Bika byakwasele ndokazi umo ajeneke kusinganyeka manene ha byuma byalingiwile kunima?
7 Twasa kujenjuka bati kusinganyeka ngwetu buyoye bwetu bwa kunima bwapwile bwabubwa manene? Tusimutwiyeni hali ndokazi uje washangumukile kupangela ha Mbetele ya ku Brooklyn mu 1945. Mu kwita kwa simbu walyambatele na ndolome wa ha Mbetele, co bapangelele hamo ha myaka yaingi. Oloni mu mwaka wa 1976, munalume wendi wabinjile. Ou ndokazi wendekele ngwendi munalume wendi mwamwene ngwendi ali muyehi na kutsa wamutakamesele mangana atwaleleleho kukolesa omwo asala lika lyendi. Uje ndolome wendekele ngwendi: “Tunalikuwu kuyoya mu kubwahelela mu bulo bwetu. Banu babangi kubapwile ba kubwahelela.” Co wamulekele lalo ngwendi: “Utwalelelaho kwanuka byuma bitunalikuwu, oloni keti ubisinganyeke manene. Mu kwita kwa simbu, busiwa bwobe bukatepuluka. Keti uzeye nambe kulubala mwafwa ya byuma binalingiwa. Bwahelela mwafwa tunalikuwu kupangela Yehova hamo lika. . . . Cashu ca kwanuka capwa bwana bwa kutunda kuli Njambi.” Awa apwile majwi amabwa.
8. Ndokazi yetu wawanene bukwasi muka omwo wapangesele cinangulo camwanene munalume wendi?
8 Ndokazi yetu wakabangeyeye awa majwi. Co watwaleleleho kupangela Yehova kweta na ha simbu yatsile oku ali na myaka 92. Simbu kanda atse wendekele ngwendi: “Munjanuka byuma binalingiwa mu myaka 63 injinakala mu cipangi ca simbu yoshe, njalimwena ngwange buyoye bwange bunapu bwabubwa manene.” Mwafwa bika? Wendekele lalo ngwendi: “Tuli na kulikuwa kuyoya mwafwa tuli mu naanga yaibwa manene ya ku sipilitu, co lalo tuli na lilabelelo lya kukayoya hamo na bandolome na bandokazi betu mu paradaisi hano hasi, co tukapangela Ishamatanga na Njambi yetu wa busunga Yehova myaka yoshe.” * Twasa kulilongesa byuma byabingi kuli ou ndokazi mwafwa wakengele kulutwe.
BUKALU BWA KUKALA NA LIKITIKITI KU MBUNGE
9. Kwesekesa na mukanda wa Valevi 19:18, byuma muka binasa kulingisa kutupwile kwakukalu kukonekela munu natubiisila?
9 Tandeni Valevi 19:18. Bisimbu bimo kukatukaluwila kukonekela nga munu natulingi mwamubi napu mukwetu muka-Kilistu, kabushoko nambe kabusamba ketu. Cakumwenako, ndokazi umo bamubangeyeye kuli mukwabo muka-kukulahela ngwendi wamwibilile bimbongo. Uje ndokazi wabangeyeye mukwabo walombele likonekelo, oloni uje yabangeyeye walizibile ngwe kasa kumukonekela. Mwalizibaho laja ngoco ndi? Nameme hamo kutwaliwanene na bukalu bwaliwanene nabwo ou ndokazi, oloni bwingi bwetu hamo kuli munu umo watulubalesele, co twalizibile ngwetu kutwasa kumukonekela.
10. Bika byasa kutukwasa nga tuliziba ngwetu kutwasa kukonekela mukwetu?
10 Bika byasa kutukwasa nga tuliziba ngwetu kutwasa kukonekela mukwetu? Tunapande kwanuka ngwetu Yehova ali na kumona byuma byoshe. Azibuka byuma byoshe bituli na kuliwana nabyo kwambateselela na bubi bubali na kutulinga bakwetu. (Heve 4:13) Akazibi kubihya ku mbunge mwakatumono tuyanda. (Isaya 63:9) Co nakulahesa kukamanesa bukalu butuli na kuliwana nabwo mwafwa ya kutulinga mwamubi.—Kujo 21:3, 4.
11. Bubwa muka butundamo nga tukonekela bakwetu?
11 Tunapande lalo kwanuka ngwetu kukonekela bakwetu kutukwasa. Bikebyo byanangukile uje ndokazi itunendeka ibabangeyeye. Mu kwita kwa simbu, wakonekelele uje ndokazi wamubangeyeye, co kakele na likitikiti. Wanukile ngwendi, nga tukonekela bakwetu, co Yehova nendi atukonekela. (Mateo 6:14) Wazibukile ngwendi byalingile uje ndokazi byapwile byabibi, oloni wamukonekelele. Co wapwile wa kubwahelela na kutwalelelaho kupangela Yehova.
BUKALU BWA KULIZIBA MANENE KUKALA NA MULONGA
12. Mukanda wa 1 Yowano 3:19, 20 utulongesa bika?
12 Tandeni 1 Yowano 3:19, 20. Bisimbu bimo, tubaboshe tukalizibi kukala na mulonga. Cakumwenako, bamo bakalyana mulonga mwafwa ya byuma bibalingile simbu kanda balilongese busunga. Bamo bakalyana mulonga mwafwa ya byuma byabibi bibalingile munima ya kubamwitika. (Loma 3:23) Tubaboshe tukashaka kulinga byuma byabibwa. Oloni “bisimbu byabingi tukabiisa.” (Yako 3:2; Loma 7:21-23) Nameme kutwesi kuliziba mwamubwa mutukanuka byuma byabibi bitwalingile kunima, oloni kulinga ngoco kutukwasa. Mwafwa bika? Mwafwa kwanuka bubi butwalingile kunima kutulingisa tutengulule futisi yetu na kulyangwila kujeneka kwilukila kulinga buje bubi.—Heve 12:12, 13.
13. Mwafwa bika kutwapandele kuliziba manene kukala na mulonga?
13 Oloni bisimbu bimo tunasa kuliziba manene kukala na mulonga. Oku kunapu kutwalelelaho kuliziba kukala na mulonga nameme tunatenguluka, co lalo Yehova namwesa laja ngwendi natukonekela. Kuliziba kukala na mulonga mu ngila eyi keti kwakubwa. (Myaso 31:10; 38:3, 4) Mwafwa bika? Tusimutwiyeni hali ndokazi uje watwaleleleho kuliziba kukala na mulonga mwafwa ya bubi bwalingile kunima. Wendekele ngwendi: “Njakele na kuliziba ngwange kukwesi seho ya kupangela Yehova na nzili mwafwa kunjikoboka.” Bwingi bwetu hamo tukalizibi ngoco. Kutwapandele kutwalelelaho kuliziba manene kukala na mulonga. Mwafwa bika? Mwafwa Satana abwahelela nga tulikela kupangela Yehova okuni ikeye natukonekela.—Esekeseni 2 Kolinte 2:5-7, 11.
14. Twasa kuzibuka bati ngwetu Yehova asa kutukonekela?
14 Oloni tunasa kulihula ngwetu, ‘Njasa kuzibuka bati ngwange Yehova asa kunjikonekela?’ Kulihula eci cihula kumwesa ngwabo Yehova asa kumikonekela. Myaka yaingi kunima, Kaposhi ka Kukengela kendekele ngwako: “Hamo munasa kutwalelelaho na kalingolingo keni kakabi mwafwa hamo mwakele na aka kalingolingo simbu kanda mushangumuke kupangela Njambi, co kumwasele kukahyana. . . . Keti muzeye. Keti musinganyeke ngweni Yehova kasa kumikonekela. Satana ikeye ashaka ngwendi musinganyeke ngoco. Mumukalizibi kubihya ku mbunge mwafwa ya kalingolingo keni, mukamwesa ngweni keti mu banu bababi embwe, co Yehova asa kumikonekela. Likeheseni, co twaleleleniho kulomba Njambi amikonekele na kumikwasa kukala na citakutaku ca kujela. Mwanike akatwalelelaho kulomba baishe bamukwase nameme ha bukalu bwa kulifwa, neni twaleleleniho kulomba Yehova amikwase, co amikwasa mwafwa wakala manene na ngozi.” *
15-16. Banu bamo banalizibi bati mubanananguka ngwabo Yehova asa kubakonekela?
15 Bwingi bwa banu ba Yehova banawana bukwasi ha kunanguka ngwabo asa kubakonekela. Cakumwenako, ñanda imo ya mu Kaposhi ka Kukengela ka Ingilishi ha mutamba wa “Mbimbiliya Ikatengulula Kuyoya Kwa Banu,” yakwasele manene ndolome umo. Omu mu ñanda bendekelemo bya ndokazi umo uje wendekele ngwendi kakulahelele ngwendi Yehova asa kumuzema mwafwa ya byuma byabibi byaliwanene nabyo kunima. Watwaleleleho kuliziba ngoco ha myaka yaingi nameme munima ya kumumbwitika. Oloni omwo wasinganyekesesele ha ndando ya kupatula, washangumukile kukulahela ngwendi Yehova wamuzema. *
16 Eci cakumwenako cakwasele bati uje ndolome? Wendekele ngwendi: “Munjapwile mwanike, njakele na kukenga bikupulo bya bukwizi, co kwanjikaluwilile kwecela kulinga ngoco. Njatwaleleleho kulinga ngoco nameme oku njinakolo. Njinalombo bukwasi ku bakulunu, co njili na kweseka munjasela mwoshe kuhyana obu bukalu. Bakulunu bananjikwasa njikulahele ngwange Njambi wanjizema, co ashaka kunjikonekela. Nameme ngoco, anga njikalizibi ngwe njiwangoco. Njikalizibi ngwe Yehova kasa kunjizema. Kutanda muzimbu wou ndokazi kunanjikwasa manene. Njananguka ngwange kusinganyeka ngwange Njambi kasa kunjikonekela, kunapu lika ngwe njimona ngwange ñombelo ya Munendi kuyasa kulingisa bubi bwange babukonekele. Njatukwile mapapelo habasonekele eyi ñanda, co njikaitanda na kusinganyekesesaho simbu yoshe munjikalizibi ngwe njiwangoco.”
17. Paulu wajenjukile bati bisinganyeka bya kuliziba manene kukala na mulonga?
17 Byakumwenako bya cifwa eci bitwanukisa kapositolo Paulu. Simbu kanda apwe muka-Kilistu, Paulu walingile byuma byabibi. Nameme wakele na kwanuka byuma byalingile, oloni kabisinganyekele manene. (1 Tima 1:12-15) Wamwene ndando ya kupatula kupwa bwana bwamwanene Njambi. (Ngala 2:20) Ngeci, Paulu kalizibile manene kukala na mulonga, oloni wakele mana ku kupangela Yehova.
AKENI MBUNGE KU BYUMA BYA KULUTWE
Tutwaleleniho kukenga kulutwe (Taleni palagilafu 18-19) *
18. Bika bitunasimutwiya muno mu cilongesa?
18 Bika bitunalilongesa omwo tunasimutwiya ha byuma bije byasa kutulingisa tusinganyeke manene ha byuma bya kunima? Twalilongesa ngwetu, (1) Cashu ca kwanuka capwa bwana bwa kutunda kuli Yehova. Oloni nameme buyoye bwetu bwa kunima bunapwile bwabubwa, kubwasa kutubakana buyoye butukayoya mu kaye kakaha. (2) Bakwetu banasa kutulinga mwamubi, oloni nga tubakonekela, co twasa kupangela mwamubwa Yehova. (3) Kuliziba manene kukala na mulonga kunasa kutwonowesa kupwa ba kubwahelela omwo tupangela Yehova. Ngeci, tunapande kukulahela ngwetu Yehova natukonekela ngwe mwalingile Paulu.
19. Tuzibuka bati ngwetu kulutwe kutukanuka byuma bije bikatuzibisa kubihya ku mbunge?
19 Tuli na lilabelelo lya kukayoya myaka yoshe. Co mu kaye kakaha, kutukanuka byuma bije bikatuzibisa kubihya ku mbunge. Mbimbiliya ngwayo: “Byuma bya laja bikahwa, co bakabibala.” (Isaya 65:17) Acisinganyekeni mubukafwila buyoye. Bamo banakulubalela mu cipangi ca Yehova, oloni mu kaye kakaha bakapwa bakwenje. (Yombi 33:25) Ngeci, tubaboshe tutwaleleleniho kukenga kulutwe. Keti tusinganyeke manene ha byuma bya kunima, oloni tulingeni mwoshe mutwasela kusinganyeka bya kulutwe.
MWASO 142 Tutwalelelaho Kukala na Lilabelelo
^ par. 5 Kwanuka byuma bya kunima kukwabihile. Oloni nga tusinganyeka manene ha byuma byalingiwile kunima, twasa kuzeya ku sipilitu nambe kwecela kusinganyeka ha byuma byabibwa byanakulahesa kukatulingila Yehova kulutwe. Muno mu cilongesa, tusimutwiya ha byuma bitatu bije byasa kutulingisa tusinganyeke manene ha byuma byalingiwile kunima. Tusimutwiya lalo ha binangulo bya mu Mbimbiliya na myanja ya banu ba matangwa ano mangana tumone mutwasa kujenjukila ebi byuma.
^ par. 8 Taleni Kaposhi ka Kukengela, ka Silozi ka July 1, 2004, lipu. 23-29.
^ par. 14 Taleni Kaposhi ka Kukengela ka Ingilishi ka February 15, 1954, lipu. 123.
^ par. 15 Taleni Kaposhi ka Kukengela ka Ingilishi ka August 1, 2011, lipu. 20-21.
^ par. 58 KULUMBUNUNA CIKUPULO: Kushaka tuyoye ngwe mutunakele na kuyoyela kunima, kukala na likitikiti ku mbunge na kuliziba manene kukala na mulonga kunapu lika ngwe tuli na kukokangeya citele cimo, co cili na kutwonowesa kutwalelelaho kwenda mu ngila iya ku mwonyo.
^ par. 65 KULUMBUNUNA CIKUPULO: Nga tutula ebi bitele, tuliziba kuzituka, tubwahelela na kukala na nzili. Co lalo, twasa kukenga kulutwe.
