HA LIÑANDA lyalindondo lili ku Sangir Besar mu Indonesia, hakala bandokazi betu batatu. Myaka imo kunima, bakele na kupangela hamo ku ngenge ya ndonga. Banu babangi baha ha liñanda babazibuka mwamubwa mwafwa ya cipangi cabo ca kwambulula na kukwasa banu kuzibisisa Mbimbiliya. Oloni litangwa limo, bakele na kulinga cipangi ceka.

Bakele na kwambata mamanya akama a kulema mu ndonga na kuwanena ha ngenge ya ndonga. Amo awa mamanya apwile akama ngwe bola. Kutundaho, batumamene ha tubitwamo twa kushonga na kushangumuka kutenda awa mamanya mu tumbazubwila twatundondo kutubakana mayaki a kasumbi kupangesa bisando. Munima, bakele otu tumamanya twatundondo mu bingongolo bya pulastiki, co bakandukile nawo ku binjibo byabo. Bakele na kwaka awa mamanya mu binjeke byakama mangana bawapangese mu kulinga bitapalo.

Umo waba bandokazi ikeye Hulda. Wawanene simbu yaingi ya kulinga eci cipangi kutubakana bakwabo. Bimbongo byakele na kuwana wakele na kubipangesa mu kulandela naanga yendi byakulikwasesa. Oloni ha simbu ei, washangumukile kutulikako bimo byebi bimbongo mwafwa kwakele byuma bikwabo byashakele kulanda. Washakele kulanda foni yakama mangana aye-aye ha JW Laibrali. Hulda wazibukile ngwendi mavidio na byuma bikwabo biliho bibwezelela ku cashu cendi ca kwambulula na kuzibisisa mwamubwa Mbimbiliya.

Ha ngonde imo na hafu, Hulda wakele na kupanga ha maola abali mutondo na mutondo kutenda mamanya amangi aje asele kushulisa traki yaindondo. Mu kwita kwa simbu, wapwisilemo bimbongo bya kulanda foni yakama.

Hulda ngwendi, “Nameme njakele na kujuka na kukala na bimbandu mwafwa ya kutenda mamanya, njebalele bwasi kubabala na kayando kanjakele na kumona munjashangumukile kupangesa ei foni yakama yaiha kulibwahesela biwano na kubwezelela ku cashu cange ca kwambulula.” Wendekele lalo ngwendi foni yakama yamukwasele manene kukungulukila ha makina na kwambulula muwashangumukile mushongo wa COVID-19. Tuli na kubwahelela na ndokazi Hulda mwafwa nashulisilila cilengo cendi.