CILONGESA 49
Kuma Yehova Akumbulula Malombelo Ange Ndi?
“Mukatambeka kuli yange. Co mukaija na kulomba kuli yange, njikamikumbulula.”—NJELE 29:12, MBB.
MWASO 41 Ziba Lilombelo Lyange
BILI MUNO MU CILONGESA a
1-2. Byuma muka byasa kutulingisa tulizibe ngwetu Yehova kesi na kukumbulula malombelo etu?
‘BWAHELELA muli Yehova, co akakwana biushaka.’ (Myaso 37:4) Eci cinapu cikulaheso cacibwa manene. Oloni kuma tunapande kubandamena ngwetu Yehova atwana byuma bitushaka oho bene ndi? Mwafwa bika tunapande kulihula eci cihula? Tucisimutwiyeni tahi ha byakumwenako binatako. Ndokazi wa muzike alombela kuli Yehova mangana amukwase kukakobela Sikola ya Baka-kwambulula bya Bumwene. Oloni kwita myaka yaingi kubamulanya oku ku sikola. Ndolome wa mukwenje alombela kuli Yehova mangana amukwase kukanguka ku mushongo wendi wakama mangana ase kulinga byabingi mu cikungulukilo. Oloni anga atwalelelaho kubinja. Bisemi bashaka ngwabo munabo atwaleleleho kupangela Yehova. Oloni calubinda munabo kalingi ngoco.
2 Hamo neni munalombo Yehova byuma bimo, oloni na simbu ino kanda mucibitambule. Ngeci, mwasa kusinganyeka ngweni Yehova akakumbulula lika malombelo amo, co kesi na kukumbulula eni. Nambe hamo mwasa kusinganyeka ngweni kuli byuma bimo kumwalingile mwamubwa. Ndokazi Janice b walizibile ngoco. Ikeye na muka-limbo lyendi bashakele manene kukapangela ha Betheu. Ngeci, balombele Yehova mangana akumbulule lilombelo lyabo. Ndokazi Janice ngwendi: “Njakulahelele ngwange kukwiti simbu yailaha, batulanya kukapangela ha Betheu.” Oloni byuma kubyapwile ngoco. Babandamenene ha simbu yailaha, oloni kubabalanyele. Ndokazi Janice ngwendi: “Njalizibile manene kuzeya, co njombwele manene. Njalihwile indi njalingileko byuma bimo bije kubyazibisile Yehova kubwaha. Njashakele manene kuya ha Betheu, co njalombele Yehova ngwange anjikwase. Njakomokele manene omwo Yehova kakumbulwile malombelo ange.”
3. Bika bitusimutwiya muno mu cilongesa?
3 Simbu imo tunasa kulihula indi Yehova ali na kukumbulula malombelo etu. Bangamba ba Yehova ba kulongwa kusañulu nabo balihwileho ngoco. (Yombi 30:20; Myaso 22:2; Hamba 1:2) Byuma muka bikamilingisa mukulahele ngweni Yehova akakumbulula malombelo eni? (Myaso 65:2) Tucisimutwiyeni tahi ha bihula binatako bije bitukwasa kukumbulula eci cihula. (1) Yehova natukulahesa bika? (2) Yehova ashaka ngwendi tulinge bika? (3) Mwafwa bika simbu imo tunapande kutengululako bitunalombo Yehova?
YEHOVA NATUKULAHESA BIKA?
4. Kwesekesa na mukanda wa Njelemiya 29:12, Yehova nakulahesa kutulingila bika?
4 Yehova nakulahesa kutolilila ku malombelo etu. (Tandeni Njelemiya 29:12.) Njambi yetu watuzema manene mwafwa tuli na kumupangela mu kulongwa. Ngeci, kasa kujeneka kutolilila ku malombelo etu. (Myaso 10:17; 37:28) Oloni eci kucilumbununa ngwabo atwana byuma byoshe bitumulomba. Byuma bimo bitulomba Yehova kutwasa kubitambula ha simbu ino kubanga mu kaye kakaha.
5. Yehova akatala ha byuma muka simbu kanda akumbulule malombelo etu? Lumbununeni.
5 Yehova akatala malombelo etu muanakundamena cizango cendi. (Isaya 55:8, 9) Ashaka ngwendi banu ba kulongwa baje bamwononoka bakale hano ha lifuti-libu oku bali na kumupangela mu kubwahelela. Eci cinapu cimo ca byuma byanayongola kulinga. Oloni Satana ashaka tukulahele ngwendi tupwa ba kubwahelela nga tuliyula yetu babenya. (Kusha 3:1-5) Mu kushaka kumwesa ngwendi Liyabolo muka-makuli, Yehova natabesa banu kuliyula bakebo babenya. Oloni bifulumende bya banu binanenela lika banu tuyando twatwingi tutuli na kuliwana natwo ha simbu ino. (Kwambu 8:9) Tuzibuka ngwetu Yehova kamanesa bukalu bwoshe butuli na kuliwana nabwo ano matangwa. Nga amanesa bukalu bwetu bwoshe, co bamo banasa kumona ngwe bifulumende bya banu byasa kumanesa bukalu bwabo bwoshe na kujeneka kukulahela Yehova.
6. Mwafwa bika tunapande kwanuka ngwetu Yehova wakala na cizemo, co simbu yoshe akalingi byuma byabibwa?
6 Yehova asa kukumbulula lilombelo lya kulifwa mu bingila bya kuliseza-seza. Cakumwenako, Mwene Hezekiya mwakele na kubinja manene, walombele Yehova ngwendi amukangwise. Yehova wakumbulwile lilombelo lyendi, co wakangukile. (2 Vimye 20:1-6) Oloni kapositolo Paulu mwalambelelele Yehova ngwendi amufumise “mungonga mu situ,” uje hamo wapwile mushongo umo wakele na kubinja, Yehova kaufumisile. (2 Kori 12:7-9) Tucisimutwiyeniko lalo ha cakumwenako ca kapositolo Jemusi na kapositolo Pita. Boshe Mwene Heloda washakele kubatsiya. Cikungulukilo cakele na kubalombelela boshe. Oloni Jemusi bamutsiile, Pita co kangelo wamwobwele. (Bili 12:1-11) Twasa kulihula ngwetu, ‘Mwafwa bika Yehova kobwele aba tupositolo boshe, oloni wobwele lika Pita?’ Mbimbiliya byahi biinendekaho. c Nameme ngoco, tuzibuka ngwetu Yehova akalingi byuma mu kusungama simbu yoshe. (Kwitu 32:4) Co lalo tuzibuka ngwetu Yehova wazemene Pita na Jemusi. (Kujo 21:14) Simbu imo Yehova kasa kukumbulula malombelo etu kwesekesa nomu mututondela. Oloni ha kuwana ngwe tuzibuka, co lalo twakulahela ngwetu Yehova akalingi byuma byoshe mu kusungama na mu cizemo, kutubandamena ngwetu akumbulula malombelo etu kwesekesa nomu mututondela.—Yombi 33:13.
7. Byuma muka bitunapande kujenjuka, co mwafwa bika?
7 Kutwapandele kubandamena ngwetu Yehova akumbulula malombelo etu ngwe mwanakumbulwila a bakwetu. Cakumwenako, tunasa kulomba ngwetu Yehova atwane byuma bimo, oloni katwanabyo. Co munima tuziba ngwetu bakwetu nabo banalombele byuma bya kulifwa kuli Yehova, co bakebo nabakumbulula. Ebi bikebyo byalingiwile kuli ndokazi Anna. Walombele ngwendi Yehova akangwise munalume wendi Matthew uje wakele na kubinja kansa, co ha simbu ya kulifwa, kwakele tukulukazi babali baje bakele na kubinja kansa. Ou ndokazi wakele na kulomba Yehova ngwendi akangwise munalume wendi hamolika nobo tukulukazi babali. Kansa yobo bandokazi babali ba tukulukazi yahwile, oloni calubinda, munalume wendi watokele. Simbu imo Anna wakele na kulihula indi Yehova ikeye wakwasele obo bandokazi bakanguke. Co wakele na kulihula mukunezila ngwabo bakanguke, oloni munalume wendi ikeye atse, nameme wakele na kulombela kuli Yehova ngwendi abakwase boshe. Kutuzibuka byuma byoshe byalingisile obo bandokazi bakanguke. Oloni tuzibuka ngwetu Yehova ololo amanesa byuma byoshe bije bili na kutuyandesa, co ali na kushungwiya kusangula babusamba bendi boshe baje banatsi.—Yombi 14:15.
8. (a) Kwesekesa na mukanda wa Isaya 43:2, Yehova atukwasa bati? (b) Kulombela kutukwasa bati nga tuli na kuliwana na byeseko? (Taleni vidio ya Kulombela Kutukwasa Nga Tuli mu Bukalu.)
8 Yehova akatukwasa simbu yoshe. Ha kupwa cisemi uje ali na cizemo, Yehova kesi kushaka kutumona oku tuyanda. (Isaya 63:9) Oloni kesi kutunyungilila ku bukalu bwoshe buje butwasa kwesekesa ku ndonga nambe milangi ya tuhya. (Tandeni Isaya 43:2.) Nameme ngoco, nakulahesa ngwendi atukwasa nga ‘twitamo.’ Co nameme tuliwane na tuyando twa kufwa bati, atukwasa tumupangele mwamubwa na kukanyamesa busamba bwetu nendi. Kutundaho, Yehova akatwana sipilitu yendi ije ikatukwasa tukolese. (Luka 11:13; Filp 4:13) Ngeci, tuli na byuma byoshe bije bitukwasa tukolese na kupwa ba kulongwa kuli Yehova. d
YEHOVA ASHAKA NGWENDI TULINGE BIKA?
9. Kwesekesa na mukanda wa Jemusi 1:6, 7, mwafwa bika tunapande kukulahela ngwetu Yehova atukwasa?
9 Yehova ashaka ngwendi tumukulahele. (Hebe 11:6) Simbu imo twasa kuliziba ngwetu bukalu bwetu bwakama manene. Co tunasa kuliziba ngwe Yehova kashaka kutukwasa. Oloni Mbimbiliya imwesa ngwayo Njambi asa kutwana nzili ije yasa kutukwasa ‘kufungulula bimpaka.’ (Myaso 18:29) Ngeci, kutwapandele kuuwasana na kuzeya. Tunapande kukala na likulahelo, co tunapande lalo kukulahela ngwetu Yehova akumbulula malombelo etu.—Tandeni Jemusi 1:6, 7.
10. Lumbununeni byuma bitunapande kulinga mangana tumwese ngwetu tuli na kulinga byuma bije bilitombola na malombelo etu?
10 Yehova ashaka ngwendi tulinge byuma bije bilitombola na malombelo etu. Cakumwenako, ndolome asa kulomba lisesa ku bipangi mangana akawaniwe ku ciwano ca mutambela. Yehova asa kukumbulula bati eli lilombelo? Asa kwana ou ndolome nzili mangana akendeke na mukulunu wa bipangi. Oloni ou ndolome napande kuya kuli mukulunu wa bipangi mangana akalombe lisesa. Simbu imo napande kulinga ngoco lwalwingi, keti lumolika. Asa kulomba lalo mukwabo yakapanga nendi mangana amupangeleko ha simbu yendi, ikeyeco a kupanga ha simbu yeka.
11. Mwafwa bika tunapande kutwalelelaho kulomba Yehova byuma bitutonda?
11 Yehova ashaka ngwendi tumulombe kushwa kumo ha bukalu bwetu. (1 Tesa 5:17) Yesu wendekele ngwendi byuma bimo bitulomba kutwasa kubitambula oho bene. (Luka 11:9) Keti muzeye! Lombeni kutundilila kwisi ya mbunge kushwa kumo. (Luka 18:1-7) Nga tuleka Yehova byuma bitutonda kushwa kumo mu lilombelo tumwesa Yehova ngwetu tushaka atwane byuma bitulomba, co tubitonda manene. Tumwesa lalo ngwetu twakulahela ngwetu Yehova atukwasa.
SIMBU IMO TUNAPANDE KUTENGULULAKO BYUMA BITUNALOMBO YEHOVA
12. (a) Cihula muka citunapande kulihula nga tulomba byuma kuli Yehova, co mwafwa bika? (b) Twasa kumwesa bati ngwetu tuli na kusingimika Yehova mu malombelo etu? (Taleni cipalo ca “ Kuma Byuma Binjikalombo Bimwesa Ngwabyo Njili na Kusingimika Yehova Ndi?”)
12 Nga kutwatambwile byuma bitunalombo Yehova, twasa kulihula bihula bitatu binatako. Cakulibanga, ‘Kuma njili na kulomba byuma binapande ndi?’ Kakangi tukalizibi ngwetu tuzibuka byuma bitutonda. Oloni byuma bimo bitukalombo kubyasa kutukwasa. Nga tuli na kulomba ngwetu Yehova amanese bukalu bwetu, hamo byuma bituli na kulomba keti bikebyo byasa kumanesa obwo bukalu. Co simbu imo byuma bitukalombo kubyesi kulitombola na cizango ca Yehova. (Iwano 5:14) Cakumwenako, tucisimutwiyeni lalo ha bisemi batunabanga kusimutwiya, baje balombele ngwabo Yehova akwase munabo atwaleleleho kukala mu busunga. Byuma bibanalombele aba bisemi byabibwa. Oloni Yehova kesi kutusindiya kumupangela. Ashaka ngwendi yetu hamolika na bana betu tulyangwile kumupangela. (Kwitu 10:12, 13; 30:19, 20) Nameme ngoco, bisemi banapande kulomba Yehova abakwase kweta munabo ku mbunge mangana ase kulyangwila ikeye babenya kumupangela na kupwa kabusamba kendi.—Visi 22:6; Efeso 6:4.
13. Kwesekesa na mukanda wa Bahebelu 4:16, Yehova atukwasa bati? Lumbununeni.
13 Cihula camucibali eci, ‘Kuma ino ikeyo simbu inapande kuli Yehova kunjana byuma binjitonda ndi?’ Simbu imo tukatondo ngwetu Yehova akumbulule malombelo etu oho bene. Oloni Yehova ikeye azibuka simbu yaibwa ya kukumbulula malombelo etu. (Tandeni Bahebelu 4:16.) Nga kututambula byuma bitunalombo Yehova oho bene, tunasa kusinganyeka ngwetu Yehova kakumbulula lilombelo lyetu.’ Oloni hamo keti ikeyo simbu yanamono Yehova ngwendi inapande. Tucisimutwiyeni lalo hali ndolome uje nalombele Yehova ngwendi amukangwise ku mushongo wendi. Nga Yehova alinga cikomokeso ca kukangwisa uje ndolome, co Satana asa kwendeka ngwendi uje ndolome ashaka lika kupangela Yehova nga ali na bukangule bwabubwa. (Yombi 1:9-11; 2:4) Kutundaho, Yehova nabwahesa laja simbu yakamanesa mishongo yoshe. (Isaya 33:24; Kujombolola 21:3, 4) Ha simbu ino kutwapandele kubandamena ngwetu Yehova atukangwisa mu bikomokeso. Ngeci, ou ndolome napande kulomba Yehova mangana amwane nzili na kumukwasa kukala mu kwoloka mangana ase kukolesa na kupangela Njambi mu kulongwa.—Myaso 29:11.
14. Bika bitulilongesa ku byuma byaliwanene nabyo Janice?
14 Tusimutwiyeni lalo hali ndokazi Janice uje washakele kukapangela ha Betheu. Kwetile myaka itanu asina amone Yehova mwakumbulwilile malombelo endi mu ngila ije kanangukile ikeye. Wendekele ngwendi: “Yehova wapangesele ije simbu mu kunjilongesa na kunjikwasa njipwe muka-Kristu wamubwa. Njapandele kumukulahela. Njapandele kulilongesa mwamubwa Mbimbiliya. Njanangukile ngwange kupwa wa kubwahelela kukwemanene ha cipangi cinjilinga mu munga.” Mu kwita kwa simbu, ou ndokazi na muka-limbo lyendi babalanyele mu cipangi ca kuzenguluka. Co ngwendi: “Hano njamono ngwange cili bene Yehova wakumbulwile malombelo ange mu ngila ije kunjanangukile bwasi. Kwanjambatelele simbu kumona ngwange Yehova wakumbulwile lilombelo lyange mu ngila yaibwa, oloni njakandelela mwafwa njalimwena cizemo na ngozi yendi.”
Nga muliziba ngweni Yehova kakumbulwile malombelo eni, lombeni byuma byeka. (Taleni paragirafu 15) f
15. Mwafwa bika simbu imo kutwapandele kwendeka bene byuma mpundu bitushaka ngwetu Yehova atulingile? (Taleni na bikupulo.)
15 Cihula camucitatu, ‘Njasa kulomba byuma byeka ndi?’ Kwakubwa kutumbula byuma bitushaka ngwetu Yehova atwane. Oloni simbu imo twasa kujeneka kubitumbula mangana tumone mwakumbulwila malombelo etu. Tucisimutwiyeni hali ndokazi uje nakala na kutonda kukobela Sikola ya Baka-kwambulula bya Bumwene. Washakele kukobela ei sikola mangana akapangele ku mutambela kuje kwakele bujene bwa baka-kwambulula bya Bumwene. Omwo alomba Yehova mangana amukwase kukakobela ei sikola, asa kumulomba lalo amukwase kunanguka bingila byasa kubwezelelamo cashu cendi ca kwambulula bya Bumwene. (Bili 16:9, 10) Co asa kulinga byuma bije bilitombola na malombelo endi ha kwihula kanyungi wa kuzenguluka nga kuli cikungulukilo kuje kutondeka manene bapainiya. Nambe, asa kusonekela ku munango mangana bamuleke mutambela kuli manene bujene bwa baka-kwambulula. e
16. Bika bitunapande kukulahela?
16 Tunamono ngwetu Yehova akumbulula malombelo etu mu ngila inapande ije imwesa cizemo cendi. (Myaso 4:3; Isaya 30:18) Simbu imo kutwasa kutambula cikumbululo citutonda. Oloni tunapande kwanuka ngwetu Yehova kayengula malombelo etu. Watuzema manene, co kakatuseze. (Myaso 9:10) Ngeci, twaleleleniho kumulomba kutundilila kwisi ya mbunge na ‘kumukulahela simbu yoshe.’—Myaso 62:8.
MWASO 43 Lilombelo lya Kukandelela Njambi
a Cino cilongesa citukwasa kukulahela ngwetu Yehova simbu yoshe akumbulula malombelo etu mu ngila yaibwa ije inapande.
b Mazina amo banawatengulula
c Taleni cilongesa ca mutwe wa “Kuma Mwakulahela Ngweni Byoshe Byakalingi Yehova Byapwa Byabibwa Ndi?” mu Kaposhi ka Kukengela ka February 2022 para 3-6.
d Taleni vidio ya Kulombela Kutukwasa Nga Tuli mu Bukalu ha jw.org/mck mangana mumone mwakatukwasela Yehova nga tuli mu bukalu.
e Nga mushaka kuzibuka byuma bimunapande kulinga mangana mukakwase mu cipangi ca kwambulula mu mutambela wa munango weka, taleni capita 10 mu libulu lya Moluswalisanezi Kueza Tato ya Jehova, para 6-9.
f KULUMBUNUNA CIKUPULO: Bandokazi babali bali na kulombela simbu kanda bashulisilile fomu ya kuya ku Sikola ya Baka-kwambulula bya Bumwene. Kutundaho, batambulaho lika umo. Kutubakana kuliziba kuzeya, uje ndokazi kubatambwile alombela kuli Yehova mangana amukwase kuwana bingila bikwabo mwasa kubwezelela ku butongwe bwendi mu lihya. Co asonekela ku munango na kulyana kupangela ku mutambela kuje kuli bujene bwa baka-kwambulula.
