1. Kapolofweto Isaya wetesele muzimbu muka ku bakwabo Baisalele?

 KAPOLOFWETO Isaya wendekele ngwendi Yehova wapwa ‘Njambi wa kulongwa.’ Lijwi libananungulula ngwabo ‘kulongwa’ lilumbununa ‘ameni.’ (Isaya 65:16) Lijwi lya ‘ameni’ lilumbununa ngwabo “cifwe bene ngoco,” nambe “mukemwo bene.” Eli lijwi mubanalipangesa mu Mbimbiliya kutalesa kuli Yehova nambe Yesu, limwesa ngwalyo oco cuma cibali na kwendeka ca busunga. Isaya walekele bakwabo Baisalele ngwendi: Byoshe byakendeka Yehova ngwendi bilingiwa kulutwe bikapu bya busunga. Mukemwo bene. Yehova namwesa ngoco omwo nashulisilila byuma byoshe byakulahesele.

2. Bika binapande kutulingisa tukulahele byuma byanatukulahesa kukatulingila Yehova kulutwe, co tusimutwiya ha bihula muka?

² Kuma netu twasa kukulahela ngwetu byuma byanatukulahesa Yehova kulutwe bikalingiwa ndi? Munima ya myaka ya kweta ku 800 kutunda ha simbu yayoyele Isaya, kapositolo Paulu walumbunwine byuma binapande kutulingisa tukulahele ngwetu bikulaheso bya Njambi byoshe kubanga byete ha kulishulisilila. Paulu wendekele ngwendi: “Njambi kasa kwendeka makuli.” (Hebe 6:18) Ngwe omwo kabwelubwelu ka mema kukasa kutuhwisa mema amabwa na mema a mongwa, Yehova uje wapwa Nsina ya  busunga kasa kwendeka makuli. Ngeci, twasa kukulahela mu kushula byuma byoshe byanendeka Yehova, kwambateselela na byuma byoshe byanatukulahesa kulutwe. Muno mu cilongesa, tusimutwiya ha bihula binatako: Yehova natukulahesa kutwana bika kulutwe? Bika byanalingi Yehova mu kumwesa ngwendi eci cikulaheso cikalishulisilila?

3. (a) Cikulaheso muka cimo cibazema manene bangamba ba Njambi? (Kujombolola 21:3, 4) (b) Banu bamo bakalingi bati mutukabaleke byeci cikulaheso?

³ Cikulaheso citusimutwiya cinapu cikulaheso cibazema bangamba ba Njambi mu kaye koshe. (Tandeni Kujombolola 21:3, 4.) Yehova natukulahesa ngwendi kulutwe “kutsa kucikakalako lalo nambe busiwa nambe kulila nambe kuziba kubabala.” Bwingi bwetu tukapangesa awa majwi amabwa ali mu Mbimbiliya mutukambulwila bakwetu, kumwesa mubukafwila buyoye mu Paradaisi. Banu bamo bakalingi bati mutukasimutwiya nabo ha cikulaheso eci? Bamo bakendeka ngwabo ebi byuma byabibwa, oloni kubyasa kulingiwa.

4. (a) Bika byazibukile Yehova ngwendi bilingiwa mu simbu yetu omwo wakulahesele kunena Paradaisi? (b) Bika bikwabo byalingile Yehova munima ya kukulahesa eci cikulaheso?

⁴ Yehova mwahwimininine kapositolo Iwano asoneke mubukafwila buyoye mu Paradaisi, wazibukile ngwendi netu twakulekako bakwetu byeci cikulaheso omwo twambulula muzimbu wa Bumwene. Yehova wazibukile lalo ngwendi banu babangi kukabakaluwila kukulahela eci cikulaheso ca ‘byuma byabiha.’ (Isaya 42:9; 60:2; 2 Kori 4:3, 4) Twasa kukwasa bati bakwetu nabo bakulahele ngwabo bibanendeka ku mukanda wa Kujombolola 21:3, 4 bikalingiwa? Co twasa kukanyamesa bati lilabelelo lyetu mu byuma ebi? Yehova kendekele lika bya bikulaheso ebi byabibwa. Namwesa na byuma binapande kutulingisa tubikulahele. Byuma muka bene obyo?

5. Bika bitulingisa tukale na lilabelelo mu cikulaheso canatukulahesa Njambi ca kunena Paradaisi, co kuli kutwasa kuwana bukaleho?

⁵ Mavesi anatako amwesa byuma binapande kutulingisa tukulahele ngwetu cikulaheso ca Paradaisi canatukulahesa Yehova cikalishulisilila. Ngwawo: “Uje watumamene ha litanda wendekele ngwendi: ‘Tala! Byuma byoshe njibipwisa byabiha.’ Co lalo wendekele ngwendi: ‘Soneka, mwafwa awa majwi anapu a kulongwa, co lalo a busunga.’ Co wanjilekele ngwendi: ‘Awa majwi analishulisilila. Yange Aufa na Omega, mashangumukilo na mamaneselelo.’”—Kujo 21:5, 6a.

6. Mwafwa bika majwi ali ku Kujombolola 21:5, 6 akanyamesa lilabelelo lyetu mu byuma byanatukulahesa Njambi?

⁶ Mwafwa bika awa majwi ali mu Mbimbiliya akanyamesa lilabelelo lyetu mu byuma byanatukulahesa Njambi? Libulu lya Revelation Climax linendeka ha mavesi awa ngwalyo: “Kunapu lika ngwe Yehova ali na kusainila banu ba kulongwa lipapelo lije limwesa bene ngwalyo akashulisilila byuma byanakulahesa.” b Ngeci, mukanda wa Kujombolola 21:3, 4 unamwesa byuma byanakulahesa kukatulingila Njambi. Co ha vesi 5 na 6 hali majwi aje amwesa ngwawo eci cikulaheso ca busunga. Tucisimutwiyeniko ha majwi anapangesa Yehova mu kumwesa ngwendi byuma byanakulahesa bikalingiwa bene.

7. Majwi azimbula byendekele Njambi anapu bati a kulitila, co anapu bati a seho?

⁷ Majwi amwesa ngwawo Njambi akashulisilila byanakulahesa ashangumuka ngwawo: “Uje watumamene ha litanda wendekele ngwendi.” (Kujo 21:5a) Ku mukanda wa Kujombolola, Yehova nendeka lika lutatu mu bimona. Co awa majwi azimbula majwi amo endekele. Ngeci, anapu a kulitila. Eci cikulaheso, keti kangelo  nambe Yesu wacikulahesele munima ya kusanguka. Yehova babenya ikeye wacikulahesele! Co ebi byoshe bimwesa byuma binapande kutulingisa tukulahele majwi anatako aje amwesa byanatukulahesa Yehova mwafwa “kasa kukwisa.” (Tito 1:2) Ngeci, majwi ali ku Kujombolola 21:5, 6 akalishulisilila bene.

8. Bika byendekele Yehova mu kumwesa ngwendi cikulaheso cendi kubanga cilishulisilile? (Isaya 46:10)

⁸ Tusimutwiyeniko ha lijwi lya “Tala!” (Kujo 21:5) Lijwi lya Cigriki libananungulula ngwabo “tala!” banalilukila-ilukila mu mukanda wa Kujombolola. Kuli biñanda bimo byendeka ngwabyo cimweso ca kukasama cili ku lijwi eli “cimwesa ngwaco munu atanda napande kwaka manene mana ku byuma binatako.” Bika binatako kutunda ha cimweso ca kukasama? Majwi a Njambi aje endeka ngwawo: “Byuma byoshe njibipwisa byabiha.” Aha Yehova ali na kwendeka byuma byakatengulula kulutwe. Co nabyendeka ngwe binalingiwa laja, kumwesa ngwendi ebi byuma bikalingiwa bene.—Tandeni Isaya 46:10.

9. (a) Majwi endeka ngwawo “byuma byoshe njibipwisa byabiha” anatalesa ku byuma muka bibali byakalinga Yehova? (b) Bika bikalingiwa ku “lilu” na “lifuti-libu” kulutwe?

⁹ Tucisimutwiyeniko ha majwi anatako ali ku Kujombolola 21:5 aje endeka ngwawo: “Byuma byoshe njibipwisa byabiha.” Mu capita 21 ya mukanda wa Kujombolola, awa majwi alumbununa byuma bibali byanayongola kulinga Yehova: kwingisa na kulingisa byuma bipwe byabibwa. Cakulibanga, bika byakengisa Yehova? Mukanda wa Kujombolola 21:1 ngwawo: “Lilu lya laja na lifuti-libu lya laja bineti.” “Lilu lya laja” limanena bifulumende byali na kutwamenena Satana na badimona bendi. (Mate 4:8, 9; 1 Iwa 5:19) Mu Mbimbiliya, “lifuti-libu” linasa kulumbununa banu baje baliho. (Kusha 11:1; Myaso 96:1) Ngeci, “lifuti-libu lya laja” linatalesa ku banu bababi baje baliko ano matangwa. Co Yehova kakabwahesa lika “lilu” na “lifuti-libu.” Akatundisako lilu na lifuti-libu biliko na kubingisa na lilu lyaliha na lifuti-libu lyaliha, kulumbununa fulumende yaiha na banu ba kulongwa.

10. Bika byakapwisa Yehova byabiha?

¹⁰ Ku Kujombolola 21:5, kuli majwi aje amwesa byuma byanendeka Yehova ngwendi akabipwisa byabiha. Hamo mwananguka ngweni Yehova kendekele ngwendi, “Njilinga byuma byoshe byabiha.” Nendeka ngwendi: “Byuma byoshe njibipwisa byabiha.” Yehova akalingisa lifuti-libu kupwa ngwe lyaliha hamolika na banu omwo akalingisa lifuti-libu kupwa lya kulumbunuka hamolika na banu. Ngwe mwendekelele Isaya, Yehova akalingisa lifuti-libu lyoshe kupwa ngwe citungu cacibwa ngwe mucafwililile citungu ca Edeni. Co lalo akapwisa umo na umo wetu kupwa ngwe wamuha nambe ngwetu kutukangwisa. Biyanga, tupuputwa na tubebebe bakabakangwisa, co batsi nabo bakabasangula.—Isaya 25:8; 35:1-7.   

11. Yehova washikile Iwano ngwendi alinge bika, co mwafwa bika?

¹¹ Bika lalo bimwesa ngwabyo byanakulahesa Njambi bikalingiwa? Yehova walekele Iwano ngwendi: “Soneka, mwafwa awa majwi anapu a kulongwa, co lalo a busunga.” (Kujo 21:5) Yehova kashikile lika Iwano ngwendi ‘asoneke.’ Wendekele na byuma byamulingisile amuleke ngoco. Wendekele ngwendi: “Mwafwa awa majwi anapu a kulongwa, co lalo a busunga.” Kulumbununa ngwabo tunapande kukulahela majwi a Njambi. Iwano wononokele byamushikile Njambi omwo wasonekele byamulekele. Co twasa kutanda bya cikulaheso ca Njambi ca kunena Paradaisi na kusinganyekesesa ha bibezikiso byabibwa bitunabandamena.

12. Mwafwa bika Yehova wendekele ngwendi: “Awa majwi analishulisilila”?

 ¹² Bika bikwabo byendekele Njambi? Wendekele ngwendi: “Awa majwi analishulisilila.” (Kujo 21:6) Aha Yehova ali na kwendeka ngwe byuma byoshe byanendeka kutalesa ku Paradaisi yanakulahesa binalingiwa laja. Asa kwendeka ngoco mwafwa nacimo cahi casa kumwonowesa kushulisilila biyongola byendi. Yehova nendeka byuma bikwabo binapande kutulingisa tukulahele ngwetu byuma byanakulahesa bikalingiwa bene. Bika byanendeka?

13. Bika byalingisile Yehova endeke ngwendi: “Yange Aufa na Omega”?

¹³ Ngwe mutunamwena, Yehova wendekele lutatu mu bimona byamwene Iwano. (Kujo 1:8; 21:5, 6; 22:13) Ha bisimbu byoshe ebi bitatu, Yehova wendekele ngwendi: “Yange Aufa na Omega.” Aufa cikeco cisona cakulibanga ku bisona bya Cigriki. Omega cikeco cisona camamaneselelo. Co mwendekele ngwendi ikeye “Aufa na Omega,” Yehova wamwesele ngwendi nga nashangumuka cuma, kubanga acilinge mwamubwa kweta noho hakacimanesela.

14. (a) Byuma muka byalingile Yehova bije byamwesele ngwe nendeka “Aufa,” co simbu muka yakalinga ngwe endeka “Omega”? (b) Bukaleho muka buli ku mukanda wa Kushangumuka 2:1-3?

¹⁴ Munima ya kutanga Adama na Eva, Yehova wabalekele biyongola byakele nabyo ha banu na lifuti-libu. Mbimbiliya ngwayo: ‘Wababezikisile na kwendeka ngwendi, “Kiteni, ngeci batekulwila beni bakatume hano hasi hoshe.”’ (Kusha 1:28) Ha simbu ei, kwapwile lika ngwe Yehova endeka “Aufa.” Wamwesele mwamubwa biyongola byendi. Co simbu ili na kwija omwo bana na batekulwila ba Adama na Eva ba kwononoka bakapwa ba kulumbunuka na kushulisa lifuti-libu na kulipwisa paradaisi. Ha simbu oyo, kukapwa lika ngwe Yehova akendeka “Omega.” Mwamanesele kutanga ‘melu na lifuti-libu na byoshe bilimo,’ Yehova wendekele  byuma bimo bije byamwesele ngwabyo akashulisilila byoshe byanakulahesa. Bili ku mukanda wa Kushangumuka 2:1-3. (Tandeni.) Yehova wendekele ngwendi litangwa lya bu 7 lyapwile lya kujela. Bika byalumbunwine? Yehova wamwesele ngwendi kubanga ashulisilile biyongola byendi ha banu na lifuti-libu. Akashulisilila biyongola byendi kumamaneselelo a litangwa lya bu 7.

15. Bika byasele kulingisa Satana asinganyeke ngwendi hamo nonowesa Njambi kushulisilila biyongola byendi?

¹⁵ Adama na Eva mubatengulukilile Njambi bapwile baka-bubi, co batambwisile na bana babo bubi na kutsa. (Loma 5:12) Kwasholokele ngwe Satana nonowesa biyongola bya Njambi bya kulingisa banu ba kulumbunuka, co lalo ba kwononoka bashule hano hasi. Kwasholokele ngwe Satana nonowesa Yehova kwendeka “Omega.” Hamo Satana wasinganyekele ngwendi Yehova kasa kushulisilila biyongola byendi. Hamo wasinganyekele ngwendi byuma byasele lika kulinga Yehova byapwile kutsiya Adama na Eva na kutanga lalo munalume weka na munakazi weka ba kulumbunuka baje bashulisilila biyongola byendi ha banu. Oloni ngwe Njambi walingile ngoco, Liyabolo ngwe wamubangeyeye ngwendi wakala na makuli. Mwafwa bika? Mwafwa kwesekesa na majwi ali ku Kushangumuka 1:28, Yehova walekele Adama na Eva ngwendi bana babo bakatuma hasi.

16. Mwafwa bika Satana hamo wasinganyekele ngwendi asa kwana Yehova mulonga wa kwonowa kushulisilila byakulahesele?

¹⁶ Hamo Satana wasinganyekele ngwendi bika lalo byasele kulinga Njambi? Hamo Satana wasinganyekele ngwendi Yehova atabesa Adama na Eva bakite bana baje kubakasa kupwa ba kulumbunuka. (Kwambu 7:20; Loma 3:23) Ngwe mukemwo mubinafwila byuma ngoco, ngwe Liyabolo nendeka ngwendi Yehova nonowa kushulisilila biyongola byendi. Mwafwa bika? Mwafwa ngwe Njambi nonowa kushulisilila biyongola byendi bya kulingisa lifuti-libu lipwe Paradaisi muje mukala bana na batekulwila ba Adama na Eva ba kulumbunuka, co lalo ba kwononoka.

17. Bika byalingile Yehova omwo Satana na banu bakulibanga bamutengulukilile, co bika bikalingiwa kulutwe mwafwa yebi byuma? (Taleni na cikupulo.)

¹⁷ Yehova walingileko bimo mwafwa ya kutengulukila kwa Satana na banu bakulibanga mu ngila ije kasinganyekele Liyabolo. (Myaso 92:5) Co kutubakana kusholoka ngwe muka-makuli, Yehova wamwesele ngwendi wapwa muka-busunga omwo watabesele Adama na Eva kukita bana. Co lalo Yehova wamwesele ngwendi  nga nayongola kulinga cuma cimo, byahi byasa kumwonowesa. Wabwahesele ngila ya kushulisililamo biyongola byendi kupangesa “mbuto” ije yasele kwobola bana na batekulwila ba Adama na Eva ba kwononoka. (Kusha 3:15; 22:18) Hamo Satana walikasamenene omwo Yehova wabwahesele ndando ya kupatula! Mwafwa bika? Mwafwa ndando ya kupatula inemana ha cizemo ca kujeneka kulikwisa. (Mate 20:28; Iwano 3:16) Satana kakele neci cifwa mwafwa walizema lika ikeye babenya. Co bika bikalingiwa kulutwe mwafwa ya ndando ya kupatula? Kumamaneselelo a myaka 1,000 yakayula Kristu, bana na batekulwila ba Adama na Eva ba kulumbunuka, co lalo ba kwononoka bakakala hano hasi haje hakapwa paradaisi ngwe mwayongwelele Yehova hakulibanga. Ha simbu oyo, kukapwa ngwe Yehova akendeka “Omega.”

18. Bukaleho muka butatu bwanatwana Njambi buje bumwesa ngwabwo byuma byanakulahesa bikalingiwa bene? (Taleni cipalo ca “ Byuma Bitatu Bitulingisa Tukulahele Byanatukulahesa Yehova.”)

¹⁸ Kwesekesa na byuma bitunasimutwiya, bukaleho muka butwasa kupangesa mu kukwasa baje bali na kuuwasana ngwabo hamo cikulaheso ca Njambi ca kunena Paradaisi kucikalishulisilila? Cakulibanga, Yehova ikeye nakulahesa ngoco. Mukanda wa Kujombolola ngwawo: “Uje watumamene ha litanda wendekele ngwendi: ‘Tala! Byuma byoshe njibipwisa byabiha.’” Yehova wakala na mana na nzili, co lalo nashungwiya kushulisilila byuma byanakulahesa. Camucibali, Yehova namwesa ngwendi byuma byanakulahesa bikalingiwa bene. Co kuli ikeye, kunapu ngwe binalingiwa laja. Ngwendi: “Awa majwi anapu a kulongwa, co lalo a busunga. . . . analishulisilila.” Camucitatu, nga Yehova nashungumuka kulinga cuma cimo, kubanga acilinge mwamubwa kweta na kushongo ngwe muamwesela majwi endeka ngwawo: “Yange Aufa na Omega.” Yehova akamwesa ngwendi Satana wapwa muka-makuli, co lalo kasa kumwonowesa kushulisilila biyongola byendi.

19. Bika bimwasa kulinga nga kuli bamo bauwasana ngwabo hamo cikulaheso ca Njambi ca kunena Paradaisi kucikalishulisilila?

¹⁹ Anukeni ngweni simbu yoshe imulekako bakweni byuma bimwesa ngwabyo byanakulahesa Njambi bikalingiwa bene, mukanyamesa lilabelelo lyeni mu byuma byanatukulahesa. Mulinga bati nga munima ya kutanda bya cikulaheso cili ku Kujombolola 21:4, munu imuli na kusimutwiya nendi endeka ngwendi ebi byuma byabibwa, oloni kubyasa kulingiwa? Mwasa kutanda vesi 5 na 6 na kumulumbunwina awa mavesi. Mumweseni bukaleho bumwesa ngwabwo Yehova akashulisilila byuma byanakulahesa.—Isaya 65:16.