Kuma mushaka kulilongesa byabingi ha simbu ya cilongesa ca munu endilika ndi? Nga mukemwo, co ebi bisimpi binatako bimikwasa mwake manene mbunge ku byuma bimulilongesa ha cilongesa ca munu endilika:

• Anguleni mwela unapande. Tondeni mwela wakujela, co lalo uli na ceke cije cimikwasa kutanda mwamubwa. Mwasa kulinga cilongesa ca munu endilika oku mwatumama ha citwamo mu njibo nambe hanja.

• Kaleni kwa likalyeni. Yesu wangwile kulombela “cimene-mene muje bwi” ku “mutambela kuje kukwakele banu.” (Maki 1:35) Nga kumwawanene mutambela kuje kumwasa kukala likalyeni, co lekeni naanga yeni nambe bamwakala nabo mu njibo bya simbu imukalilongesa mangana keti bamitanganese.

• Jenjukeni byuma bije byasa kumitanganesa. Nga mukapangesa makina akufwa ngwe foni mu kulilongesa, co tepululeni ku cilumo. Nga kumwesi na kupangesa foni, co izimeni mangana keti imitanganese. Nga ha simbu ya kulilongesa mwanuka ngweni kuli bimo bimunapande kulinga, co bisonekeni ha lipapelo mangana keti mwibale kubilinga nga mwamanesa kulilongesa. Nga muliziba ngweni kumwesi na kwaka mbunge ku byuma bimuli na kulilongesa, co imaneniko kamandondo nambe kwendanganako.