CILONGESA 44
MWASO 33 Umbila Citele Cobe Hali Yehova
Mwasa Kukolesa Bati nga Bali na Kumilinga Mwamubi?
“Keti mutabese bubi bumihyane, oloni twaleleleniho kuhyana bubi ha kulinga byabibwa.”—LOMA 12:21.
BILI MUNO MU CILONGESA
Muno mu cilongesa tusimutwiya bitukwasa tukolese nga bakwetu banatulingi mwamubi na byuma bitunapande kulinga mangana keti tubwezelele ku bukalu.
1-2. Tukalizibi bati mubakatulingi mwamubi?
YESU wendekele cakumwenako ca fwile uje walombele lyako mangana amwakwile mwamubwa ñanda yendi. Bandongesi ba Yesu nabo bazibisisile mwamubwa mwalizibilile uje fwile, mwafwa banu babangi ha simbu ije bakele na kubalinga mwamubi. (Luka 18:1-5) Twasa kuzibisisa mwamubwa mwalizibililile uje fwile mwafwa netu bisimbu bimo bakatulingi mwamubi.
2 Banu babangi ano matangwa bakala na kangu na nuna. Kubesi kuzibila bakwabo ngozi, ngeci kutukomoka mu bakatulingi mwamubi. (Ekele 5:8) Oloni tunasa kuzeya manene nga mukwetu muka-Kristu ikeye natulingi mwamubi. Nameme ngoco bandolome na bandokazi kubesi kushaka kutulinga mwamubi. Bakatubiisila mwafwa ya kujeneka kulumbunuka. Twasa kulilongesako bimo ku byuma byalingile Yesu baka-kutengulukila mubamulingile mwamubi. Tukakwata mbunge baka-kutulwisa mu bakatulingi mwamubi, ngeci kukwapandele kutukaluwila kukwata mbunge nga ndolome nambe ndokazi natulingi mwamubi. Yehova akalizibi bati nga mukwetu muka-Kristu nambe munu weka natulingi mwamubi? Kuma akakako mbunge ndi?
3. Tuzibuka bati ngwetu Yehova aka lizibi kubihya nga banu bendi babalinga mwamubi?
3 Yehova akazibi kubihya ku mbunge banu mubakatulingi mwamubi. Yehova “wazema kwakula mu kusungama.” (Samu 37:28) Yesu natukulahesa ngwendi Yehova ‘akakula bwasi-bwasi mu kusungama’ simbu muiketa. (Luka 18:7, 8) Ololo atundisako tuyando twoshe, co banu kubakatulingi lalo mwamubi.—Samu 72:1, 2.
4. Yehova akatukwasa bati nga bakwetu banatulingi mwamubi?
4 Yehova nanoneka laja simbu yakamanesa bukalu boshe butuli na kuliwana nabo. Oloni nakulahesa kutukwasa nga bakwetu batulinga mwamubi ha simbu ino. (2 Pita 3:13) Cakumwenako, akatukwasa twangule mwamubwa byakulinga nga bakwetu banatulingi mwamubi. Napangesa mwanja wa Yesu mu kutukwasa tuzibuke bitunapande kulinga nga bakwetu banatulingi mwamubi. Natwana binangulo bya mu Mbimbiliya bije bitukwasa twangule mwamubwa byakulinga nga banatulingi mwamubi.
NYANYAMENI HA BYUMA BIMULINGA NGA BANAMILINGI MWAMUBI
5. Mwafwa bika tunapande kunyanyama ha byuma bitulinga nga banatulingi mwamubi?
5 Tukazibi kubabala ku mbunge na kuzeya manene nga banatulingi mwamubi. (Ekele 7:7) Mukemwo mubalizibililile na bangamba ba Yehova ba kulongwa ba kufwa ngwe Yombi na Hambakuke. (Yombi 6:2, 3; Haba 1:1-3) Kukwabihile kuliziba kubabala ku mbunge nga bakwetu batulinga mwamubi. Oloni tunapande kunyanyama ha byuma bitulinga nga banatulingi mwamubi mangana keti tulinge byuma bije kubyapandele.
6. Mwanja wa Abisalome utulongesa bika? (Taleni na cikupulo.)
6 Nga munu umo natulingi mwamubi tukashaka kwilwisila bubi. Oloni kulinga ngoco kunasa kubwezelela lika ku bukalu. Tucisimutwiyeni ha mwanja wa Abisalome. Abisalome walubalele manene ndokazi yendi Tamala mubamupikile kuli Aminone. Kwesekesa na lishiko lya Mosesa Aminone bapandele kumutsiya. (Levi 20:17) Abisalome wapandele kulubala, oloni kapandele kutsiya Aminone.—2 Samwe 13:20-23, 28, 29.
Tamala mubamupikile ndolome yendi Abisalome kakwatele mbunge (Taleni paragirafu 6)
7. Muka-kwimbwa walizibile bati mu bamulingile mwamubi?
7 Nga tumona baje bali na kulinga bakwabo mwamubi kubatambula kashitiko, tunasa kusinganyeka ngwetu na seho ya kulinga byuma byabibwa yahi. Tusimutwiyeni hali muka-kwimba uje wamwene banu bababi balikuwa kuyoya oku banu bababwa bali na kuyanda. Wendekele ngwendi: “Aba bakebo banu bababi babikendela mwamubwa byuma byoshe.” (Samu 73:12) Walubalele manene mwafwa ya banu baje bakele na kulinga bakwabo mwamubi, co wamwene ngwe na seho ya kupangela Yehova yahi. Wendekele ngwendi: “Munjakele na kusinganyekesesa ha ñanda ei, Njazibile kubabala ku mbunge.” (Samu 73:14, 16) Watwalelele kwendeka ngwedi: “Ngeci mwangeni, mendi ange ashakele kupyasuka. Bilyato byange hahandende lika ngwe byasenutukile.” (Samu 73:2) Ebi bikebyo byalingiwile na kuli ndolome Alberto.
8. Bika byalingile ndolome Alberto mubamulingile mwamubi?
8 Ndolome Alberto bamubangeyeye ngwabo webile bimbongo bya cikungulukilo. Bamutundisile ha bukulunu, co lalo bandolome na bandokazi baje bazibukile ei ñanda balikelele kumusingimika. Ou ndolome wendekele ngwendi: “Njalubalele na kuzeya manene.” Ndolome Alberto wecelele eci ceseko cizeyese busamba bwendi na Yehova, ngeci wazeyele kusipilitu ha myaka itanu. Byaliwanene nabyo ou ndolome bimwesa byuma binasa kulingiwa nga kutukwata mbunge mubatulinga mwamubi.
TEMBWININENI BYALINGILE YESU MU BAMULINGILE MWAMUBI
9. Byuma muka byaliwanene nabyo Yesu? (Taleni na cikupulo.)
9 Yesu natwakela mwanja waubwa wa bitunapande kulinga nga batulinga mwamubi. Acisinganyekeni mu bamulingililile mwamubi babushoko bwendi na banu beka. Babushoko bwendi bamwendekele ngwabo azaluka. Bakulunu ba bulombeloco, bendekele ngwabo badimona bakebo bakele na kwana Yesu nzili ya kulinga bikomokeso. Co maswalale ba baLoma ba mushawile na kumuyandesa na kumutsiya. (Maki 3:21, 22; 14:55; 15:16-20, 35-37) Nameme ngoco, Yesu wakolesele mu mapakeso oshe, co lalo kalingile shambandinga. Bika bitulilongesa kuli ikeye?
Yesu natwakela mwanja waubwa wa byuma bitunapande kulinga nga banatulingi mwamubi (Taleni paragirafu 9-10)
10. Bika byalingile Yesu mu bamulingile mwamubi? (1 Pita 2:21-23)
10 Tandeni 1 Pita 2:21-23. a Yesu natwakela mwanja waubwa utunapande kukabangeya nga banu batulinga mwamubi. Wazibukile mwamubwa simbu ya kwendeka na ya kwoloka. (Mate 26:62-64) Bisimbu bimo mubakele na kumubangeya biñanda bya makuli, Yesu kakele na kubakumbulula. (Mate 11:19) Co lalo kashawile nambe kutewesa baka-kumulwisa. Yesu wakwatele mbunge mwafwa “walyakele mu maboko a Uje akasompo mu busunga.” Wazibukile ngwendi cuma ca seho manene cinapu kumona byuma mwakabimwena Yehova. Wakulahelele ngwendi Yehova akamanesa bubi bwoshe ha simbu inapande.
11. Mu bingila muka mutunapande kwangula mwamubwa bya kwendeka? (Taleni na bikupulo.)
11 Nga banatulingi mwamubi tunapande kutembwinina Yesu ha kwangula mwamubwa bya kwendeka. Bisimbu bimo twasa kwoloka na kujeneka kulingako bimo nga kubatubisilile manene. Kulinga ngoco kutukwasa mangana keti twendeke byuma bije binasa kubwezelela ku bukalu. (Ekele 3:7; Jems 1:19, 20) Oloni bisimbu bimo tunapande kwendeka nga tumona mukwetu bali na kumulinga mwamubi nambe nga batwihula bya likulahelo lyetu. (Bili 6:1, 2) Co lalo tunapande kwendeka mukuwa mbunge na mukasingimiko.—1 Pita 3:15. b
Nga banatulingi mwamubi tunapande kutembwinina Yesu ha kwangula mwamubwa bya kwendeka na kulinga ngoco ha simbu inapande (Taleni paragirafu 11-12)
12. Twasa kukulahela bati Yehova “uje akasompo mu busunga”?
12 Netu twasa kutembwinina Yesu nga tukulahela Yehova “uje akasompo mu busunga.” Nga banu banatulingi mwamubi tunapande kukulahela ngwetu Yehova namono byoshe binalingiwa. Kulinga ngoco kutulingisa tukulahele ngwetu Yehova alingako bimo na kutukwasa mu bukalu bwetu. Kwaka byuma byoshe mu maboko a Yehova kutulingisa tujeneke kutwalelelaho kulubala na kuzinda bakwetu. Nga tutwalelelaho kulubala, co tulinga byuma byabibi na kumanesa busamba bwetu na Yehova. Co lalo kwasa kutulingisa tujeneke kupwa ba kubwahelela.—Samu 37:8.
13. Bika bitukwasa tutwaleleleho kukolesa nga banatulingi mwamubi?
13 Kutwasa kukabangeya mwanja wa Yesu mukulumbunuka. Simbu imo tunasa kwendeka nambe kulinga byuma bimo bije kubyapandele. (Jems 3:2) Simbu imo tunasa kuliwana na bukalu buje butulifwita nabwo mu kuyoya kwetu kwoshe mwafwa ya kutulinga mwamubi. Nga neni mwaliwana na bukalu mwafwa ya kumilinga mwamubi anukeni ngweni Jehova azibuka bukalu bweni. Jesu azibuka mumuli na kulizibila mwafwa nendi bamulingile mwamubi. (Hebe 4:15, 16) Yehova natwana lalo binangulo bije bitukwasa kuzibuka bitunapande kulinga nga banatulingi mwamubi. Tucisimutwiyeniko ha mavesi abali ku mukanda wa loma aje asa kutukwasa.
“ECELENI NJAMBI AMWESE BUTENU BWENDI”
14. Bika bikulumbununa ‘kwecelela Njambi amwese butenu bwendi’? (Loma 12:19)
14 Tandeni Loma 12:19. Kapositolo Paulu wa shongangeyeye baka-Kristu ‘becelele Njambi amwese butenu bwendi.’ Twasa kwecelela Yehova amwese butenu bwendi nga tubandamena simbu ya nanoneka na ngila yanabwahesa kukamanesa bubi. Ndolome John bamulingile mwamubi. Co wendekele ngwendi: “Njakwatele mbunge mangana keti njilinge byuma byabi. Oloni kulinga ngoco kukwapwile kwakwasi. Mukanda wa Loma 12:19 wanjikwasele njikale na mbunge ya kubandamena na kukulahela Yehova.”
15. Mwafwa bika kwapwa kwa seho kubandamena Yehova amanese bukalu bwetu?
15 Tubezika nga tubandamena Yehova abwahese byuma ha simbu inapande. Nga tulinga ngoco, co kutulikobelesa mu bishoti mwafwa ya kushaka kumanesa bukalu bwetu mu nzili yetu. Yehova na libwahesela kutukwasa. Natuleke ngwendi tubandamene kuli ikeye na kukulahela ngwetu amanesa bukalu bwetu. Nga twakulahela ngwetu Yehova akasompa baje bakalingi bakwabo mwamubi, co kutwapandele kutwalelelaho kulubala mwafwa twakulahela ngwetu akalinga byuma binapande. Ebi bikebyo bya kwasele ndolome John itunabanga kusimutwiya. Wendekele ngwendi: “Njinapande kubandamena Yehova amanese bukalu bwange mwafwa ikeye asa kulinga ngoco mungila yaibwa kutubakana yange babenya.”
“TWALELELENIHO KUHYANA BUBI HA KULINGA BYABIBWA”
16-17. Lilombelo litukwasa bati ‘tutwaleleleho kuhyana bubi ha kulinga byabibwa’? (Loma 12:21)
16 Tandeni Loma 12:21. Kapositolo Paulu washongangeyeye baka-Kristu ‘batwaleleleniho kuhyana bubi ha kulinga byabibwa.’ Mu ñanda yendi ya ha munkinda Yesu wendekele ngwendi: “Twaleleniho kuzema bitozi beni na kulombelela baje bali na kumiyandesa.” (Mate 5:44) Ebi bikebyo byalingile Yesu. Acisinganyekeni mwakoleselele Yesu maswalale ba baLoma mu bamupameyeye ha citi ca kuyandesela. Yesu bamuyandesele manene na kumushaula, co bamuzibisile kubabala.
17 Yesu watwaleleleleho kupwa wa kulongwa kuli Yehova nameme bamuyandesele manene. Kutubakana kulomba Yehova ane kashitiko baje maswalale bakele na kumuyandesa, Yesu walombelele ngwendi: “Tate bakonekele, mwafwa kubazibuka bibali na kulinga.” (Luka 23:34) Nga tulomba Yehova akwase baje bali na kutulinga mwamubi, co tuwa mbunge na kujeneka kutwalelelaho kulubala. Kulinga ngoco kutukwasa mangana keti tumone baka-kutulwisa mu ngila yaibi.
18. Lilombelo lyakwasele bati ndolome Alberto na John bakolese mu babalingile mwamubi?
18 Lilombelo lyakwasele bandolome babali batunasimutwiya muno mu cilongesa bakolese mu babalingile mwamubi. Ndolome Alberto wendekele ngwendi: “Njalombelelele bandolome baje banjilingile mwamubi. Co lalo njalombele Yehova anjikwase kujeneka kutulika nkulundundu.” Hanoni ndolome Alberto ali na kupangela Yehova mu kubwahelela. Ndolome John wendekele ngwendi: “Ha bisimbu byabingi njakele na kulomba Yehova akwase ndolome uje wanjilingile mwamubi na kumulomba anjikwase njimukonekele. Yehova wanjikwasele njecele kulubalela ndolome yange na kujeneka kumusompa. Kulinga ngoco kwanjikwasele njikale mukwoloka kwa mubisinganyeka.”
19. Bika bitunapande kulinga simbu tucibandamena kaye kakaha? (1 Pita 3:8, 9)
19 Tuli na kuyoya mu kaye kakabi, ngeci banu basa kutulinga mwamubi. Nameme bali na kutulinga mwamubi kutwapandele kulikela kulomba Yehova bukwasi. Tutwaleleniho kutembwinina Yesu na kukabangeya binangulo bya mu Mbimbiliya bije bitukwasa twangule mwamubwa bya kulinga nga banatulingi mwamubi. Nga tulinga ngoco, co Yehova atubezikisa manene.—Tandeni 1 Pita 3:8, 9.
MWASO 38 Amyana Nzili Mukolese
a Ku mukanda wa 1 Pita capita 2 na 3 kapositolo Pita wendekele ha bukalu bubaliwanene nabwo baka-Kristu bakulibanga. Babalingile mwamubi kuli bimyata bababi na kubayandesa kuli banalume babo baje kubakulahelele.—1 Pita 2:18-20; 3:1-6, 8, 9.
b Kengeni vidio ya mutwe wa Kumwesa Cizemo Kutulingisa Tukale mu Kwoloka ha jw.org.
