1-2. (a) Baka-mafuti ololo batambeka mutambi muka? (b) Bihula muka bitukumbulula?

BAKA-MAFUTI mubakatambeka ngwabo: “Byuma byoshe bili mwamubwa kunoloka kulu,” hamo bakalishasha ngwabo kaye koshe kali mu kwoloka. Bakatonda tukasinganyeke ngwetu bali na nzili ya kumanesa bukalu bwoshe bwa banu. Oloni kubakakala na nzili ya kukemika byuma bikalingiwa. Mwafwa bika? Mwafwa Mbimbiliya ngwayo: “Asinoni bwasi bwasi kunyonga kukabawana, . . . co kubakasa kuputumuka.”​—1 Tesa 5:3.

² Tushaka kuwana bikumbululo ku bihula bya seho ebi: Bika bikalingiwa ha ñababa yakama? Yehova akatonda ngwendi tukalinge bika? Co twasa kulibwahesela bati ha simbu ino mangana tukapwe ba kulongwa ha ñababa yakama?—Mateo 24:21.

3. Kwesekesa na Kujombolola 17:5, 15-18, Njambi akanyongesa bati “Mbambilone Wakama”?

³ Tandeni Kujombolola 17:5, 15-18. “Mbambilone Wakama” bakamunyongesa. Ngwe mutunabanga kwendeka, baka-mafuti kubakakala na nzili ya kwimika byuma bikalingiwa. Mwafwa bika? Mwafwa ‘Njambi akaka mu bimbunge  byabo cizango ca kulinga butumbe bwendi.’ Butumbe muka? Bwakunyongesa bulombelo bwa makuli bwa mu kaye koshe. Njambi akaka butumbe bwendi mu bimbunge bya “bimbinga likumi” bya “cikashama wa kubenga.” Bimbinga likumi bimanena biyulo bya bupolitiki bije bili na kukundwiya “cikashama wa kubenga” uje emanena munga ya United Nations. (Kujo 17:3, 11-13; 18:8) Biyulo bya bupolitiki mubikalwisa bulombelo bwa makuli, oku kukamwesa ngwabo ñababa yakama yashangumuka. Bukapwa bukalu bwakama manene.

4. (a) Bukaleho muka bubanasa kukendeka baka-mafuti buje bumwesa bibakanyongesela bulombelo bwa makuli? (b) Baje bakele mu bulombelo bwa makuli hamo bakalinga bika?

⁴ Kutuzibuka bukaleho bubanasa kukendeka baka-mafuti buje bumwesa bibakanyongesela Mbambilone Wakama. Hamo bakendeka ngwabo baka-bulombelo bakebo bali na kwonowesa ngwabo mu kaye mujeneke kukala kwoloka, co lalo bali na kulikobelesa mu bupolitiki. Nambe hamo bakendeka ngwabo baka-bulombelo banalilundikila bufuko bwoshe. (Kujo 18:3, 7) Baka-mafuti mubakanyongesa bulombelo bwa makuli, hamo kubakanyongesa banu boshe ba mu bulombelo bwa makuli. Oloni bulombelo bukebwo bubakamanesako. Nga bulombelo bunahu, baje banakelemo bakananguka ngwabo bakulunu babo banonowa kubalingila byuma bibanabakulahesele, co kubakaka mbunge lalo kuje bulombelo.

5. Bika byanakulahesa Yehova, co mwafwa bika?

⁵ Mbimbiliya kuyamwesele simbu ibakambata mu kunyongesa Mbambilone Wakama. Oloni tuzibuka ngwetu kuikambata simbu yakama manene. (Kujo 18:10, 21) Yehova nakulahesa ngwendi ‘akakehesa ku matangwa’ a ñababa mangana baje ‘baangwile’ bakoboke, co lalo bulombelo bwa busunga bukoboke. (Mako 13:19, 20) Yehova atonda ngwendi tukalinge bika  muikashangumuka ñababa yakama kweta na ha nzita ya Alamagidoni?

6. Mwafwa bika kukwapwilemo kutunda lika ku bulombelo bwa makuli?

⁶ Ngwe mutunamwene mu cilongesa cinahu, Yehova atonda ngwendi tutunde kuli Mbambilone Wakama. Nameme ngoco, kutunda lika ku Mbambilone Wakama kukwapwilemo. Tunapande kulyangwila kupangela Yehova. Tusimutwiyeni bingila bibali tumone mutwasa kulingila ngoco.

7. (a) Twasa kutwalelelaho bati kupangesa mashiko anatwana Yehova? (b) Ku Vahevelu 10:24, 25, banamwesa bati seho ya kukunguluka, maneneni ano matangwa?

⁷ Ca kulibanga, tunapande kutwalelelaho kupangesa mashiko anatwana Yehova. Kutwapandele kukabangeya futisi ya baka-kaye. Cakumwenako, kutwapandele kutaba bilinga bya bukwizi bije binambateselela kulyambata kwa banu ba bushwamwa bumo na bilinga bya bundei. (Mateo 19:4, 5; Loma 1:26, 27) Ca mu cibali, tunapande kutwalelelaho kukunguluka na bakwetu Baka-Kilistu. Tunapande kukunguluka ipwe ku Binjubo bya Bumwene, ku binjubo bya bandolome, nambe kweka kuje kunalishweke. Nameme byuma bifwe bati kutulikele kukunguluka. Simbu ino ikeyo itunapande kukunguluka manene, mwafwa “litangwa lya Mwene lili muyehi.”​—Tandeni Vahevelu 10:24, 25.

8. Muzimbu utuli na kwambulula hamo ukalisezako bati nou wa kulutwe?

⁸ Casholoka ngwe muzimbu utukambulula ha ñababa yakama ukalisezako nou utuli na kwambulula hano. Ha simbu ino, tuli na kwambulula muzimbu waubwa wa Bumwene na kupwisa banu bandongesi. Oloni ha simbu oyo, muzimbu utukambulula ukapwa wa kutewesa ngwe nyonzi ya mamanya. (Kujo 16:21) Hamo tukambulula ngwetu kaye ka Satana kali hayehi na kunyonga. Omwo matangwa aya na kushwenya, tukazibuka bwino muzimbu utukambulula, nomu mutukawambulwila. Kuma bingila bituli na kupangesa mu kwambulula bikebyo bitukapangesa kulutwe ndi? Indi tukapangesa byeka? Kutuzibuka. Nameme tukapengese ngila muka, oloni twabezika kukambulula kusompa kwa Yehova mu kusimpa.​—Ezeki 2:3-5.

9. Bika bibakalinga baka-mafuti ha muzimbu wetu, oloni bika bitunakulahela?

⁹ Cisholoka ngwe muzimbu wetu ukalingisa baka-mafuti batwecelese kwambulula. Ha simbu ino, Yehova ali na kutukwasa mu cipangi cetu, co kulutwe lalo akatukwasa. Ngeci, twakulahela ngwetu Njambi atwana nzili ya kulinga cizango cendi.—Mika 3:8.

10. Kwesekesa na Luka 21:25-28, bika bibakalinga banu ha ñababa yakama?

¹⁰ Tandeni Luka 21:25-28. Ha ñababa yakama, banu bakatsa kabelabela mubakamona byuma bibanamwene ngwabo bikala bwino bishangumuka kubihya. Bakalishoshomwena, kutewa ngwabo banyonga ha bukalu bwakama buje kanda bucikaleko. (Zefa 1:14, 15) Ha simbu oyo, nameme banu ba Yehova bakakala mu bukalu. Omwo kutwapwile baka-kaye, twasa kukaliwana na bukalu. Hamo kutukakala na byuma byakuliyoyesa nabyo.

11. (a) Mwafwa bika baka-mafuti bakatala manene hali yetu? (b) Mwafwa bika kutwapandele kulijujukila bya ñababa yakama?

 ¹¹ Banu ba mu bulombelo bubakanyongesa, bakalubala mubakamona bulombelo bwa Bakaleho ba Yehova bucitwalelelaho. Bakamwesa kulubala kwabo, maneneni ha intaneti. Baka-mafuti na mwene yabo Satana, bakatuzinda mwafwa bulombelo bwetu lika bukebwo bukalitulako. Bakonowa kulinga cizango cabo ca kumanesa bulombelo bwoshe bwa hano ha kaye. Ngeci, bakatala manene hali yetu. Baka-mafuti bakapanga cipangi ca Ngonge wa Mangonge. * Bakalikwatasana na kulwisa banu ba Yehova. (Ezeki 38:2, 14-16) Twasa kushangumuka kulijujukila, maneneni omwo kutuzibuka mu kushula byuma bikalingiwa. Oloni kutwapandele kulijujukila bya ñababa yakama. Yehova akatuleka bya kulinga bije bikatwobola. (Myaso 34:19) ‘Tukakatuka na kwandula mitwe yetu mwilu,’ mwafwa ‘kwoboka kwetu kuli muyehi.’ *

12. Ndungo wa kulongwa na kunyanyama ali na kutukwasa bati mangana tulibwahesele bili na kwija kulutwe?

¹² “Ndungo wa kulongwa na kunyanyama” ali na kutukwasa tutwaleleleho kupwa ba kulongwa kweta na ha ñababa yakama. (Mateo 24:45, NWT) Ali na kutukwasa mu bingila byabingi. Oloni twendekeniko lika ha biwano byetu bya mutambela bya mu 2016 kutwala mu 2018. Oku ku biwano banatulekele bifwa bitunapande kukala nabyo omwo litangwa lya Yehova lili muyehi. Tusimutwiyeni obyo bifwa mu bwihi.

13. Twasa kutwalelelaho bati kupwa ba kulongwa, co bika bitunapande kulingila ngoco hano bene?

¹³ Kulongwa: Mutwe wa ciwano ca mutambela ca mu 2016 ngwawo: “Pweni ba Kulongwa Kuli Yehova.” Ha ciwano eci, batulongesele ngwabo nga busamba bwetu na Yehova bukanyama, co tulongwa kuli ikeye. Batwanukukisile ngwabo tushwenya kuli Yehova kwitila mu kulomba na kulilongesa manene Mbimbiliya. Kulinga ngoco kutwana nzili ya kuhyana byeseko byakama. Omwo kaye ka Satana kali muyehi na kunyonga, twabandamena byuma bije byasa kutwonowesa kulongwa kuli Yehova na kwononoka kuyula kwendi. Co banu batwalelelaho kutushendumuna. (2 Petu 3:3, 4) Batushendumuna maneneni, omwo kutwesi kulikobelesa mu biñanda bya bupolitiki. Tunapande kulongwa ha simbu ino mangana tukalongwe ha ñababa yakama.

14. (a) Kutenguluka muka kukakalako kuli bandolome baje bali na kutwamenena hano hasi? (b) Bika bitunapande kukapwila ba kwononoka ha simbu oyo?

¹⁴ Ha ñababa yakama, kukakala kutenguluka kuli bandolome baje bali na kutwamenena ha simbu ino. Ha simbu oyo bakubwabesa boshe baje bacili hano hasi bakabakungulwila mwilu mangana nabo bakalwe ha nzita ya Alamagidoni. (Mateo 24:31; Kujo 2:26, 27) Kulumbununa ngwabo baje bali mu Cibunga ca Kutwamenena kutukakala nabo lalo hano hasi. Nameme ngoco, ba mu mbunga yakama bakatwalelelaho kulikwatasana. Bandolome  ba kutunda mu bimanga beka baje banapwisamo bya mu Bisoneka, bakebo bakatwamenena banu ba Njambi. Tunapande kukononoka mashiko abakatwana aje akabana Njambi. Nga tukalinga ngoco, co tukoboka.

15. Twasa kutwalelelaho bati kukolesa, co bika bikunapwila kwa seho kukolesa ha simbu ino?

¹⁵ Kukolesa: Ciwano ca mutambela ca 2017 cinakele na mutwe wa kwendeka ngwawo “Keti Muzeye.” Cije ciwano cinatukwasele kukala na nzili ya kukolesa mu byeseko. Twalilongesele ngwetu kukolesa kwetu kwemana ha kukulahela Yehova keti ha byuma bimo embwe. Twasa kutwalelelaho kukolesa nga tukulahela Yehova. (Loma 12:12) Keti twibale majwi endekele Yesu. Wendekele ngwendi: “Woshe uje akakateya [kweta] na kushongo akoboka.” (Mateo 24:13) Awa majwi amwesa ngwawo tunapande kulongwa nameme tuliwana na byeseko. Nga tukolesa mu ceseko na ceseko, co na ha ñababa yakama tukakolesa.

16. Bika bitukwasa tupwe ba kusimpa, co twasa kushangumuka bati kupwa ba kusimpa?

¹⁶ Kusimpa: Ciwano ca mutambela ca 2018 cakele na mutwe umwesa ngwawo, ‘Pweni ba Kusimpa.’ Ha ciwano eci batulekele ngwabo kusimpa kukwemanene ha cashu cetu embwe. Oloni kukolesa na kusimpa kwemana ha kukulahela Yehova. Twasa kukulahela bati Yehova? Kutanda Lijwi lyendi ha litangwa na litangwa na kumona omwo Yehova wobwelelemo banu bendi kusañulu. (Myaso 68:20; 2 Petu 2:9) Mubakatulwisa baka-mafuti ha ñababa yakama, tunapande kukapwa ba kusimpa na kukulahela manene Yehova. (Myaso 112:7, 8; Heve 13:6) Nga tukulahela Yehova simbu ino, co tukasimpa omwo Ngonge akatulwisa. *

17. Bika kutwapandele kutewela Alamagidoni? (Taleni cikupulo ca ha liputa lya kulibanga.)

¹⁷ Cilongesa cinahu cinamwesele ngwaco, bwingi bwetu tunayoyo mu simbu yoshe ya matangwa a kukotoka. Ngeci twakulahela lalo ngwetu tukoboka ha ñababa yakama.  Nzita ya Alamagidoni ikeyo ikanyongeselela futisi yoshe ya byuma bya muno mu kaye. Oloni keti tukale na lyoba. Mwafwa bika? Mwafwa eyi nzita ikapwa ya Njambi keti yetu embwe. (Visi 1:33; Ezeki 38:18-20; Zaka 14:3) Simbu ya Yehova muiketa, Yesu Kilistu akatwamenena maswalale ba Njambi mu nzita. Co akakala na bakubwabesa baje banasanguka ku batsi na maunzi a tungelo. Boshe bakalwisa Satana na bandemone bendi na maswalale babo ba hano hasi.​—Ndanye 12:1; Kujo 6:2; 17:14.

18. (a) Bika byanakulahesa Yehova? (b) Mukanda wa Kujombolola 7:9, 13-17, umikwasa bati mukulahele ngweni mukoboka?

¹⁸ Yehova nakulahesa ngwendi: “Kukwesi citwa cikasa kukubulumuna.” (Isaya 54:17) “Mbunga yakama” ya banu ba Yehova, ‘bakatunda mu ñababa yakama.’ Co bakatwalelelaho kumupangela. (Tandeni Kujombolola 7:9, 13-17.) Mbimbiliya ili na kutuleka ngwayo tukoboka. Tuzibuka ngwetu “[Yehova] anyunga baka-kulongwa.” (Myaso 31:23) Boshe baje bazema Yehova na kumushangazala, bakabwahelela mubakamumona mwakajelesa lizina lyendi.​—Ezeki 38:23.

19. Lilabelelo muka lyalibwa lituli nalyo?

¹⁹ Singanyekeni kubwaha kumukaziba nga mukanda wa 2 Timateo 3:2-5, ukendeka bya banu ba mu kaye kakaha muje kumwesi Satana. (Taleni cipalo ca “ Mubakafwila Banu mu Kaye Kakaha.”) Ndolome George Gangas * uje wakele mu Cibunga ca Kutwamenena, wendekele ngwendi: “Kaye kakabwaha manene, mwafwa boshe bakakalamo bakapwa lika bandolome na bandokazi. Kubezika kweni kuli hayehi, ololo muyoya mu kaye kakaha. Omwo Yehova ali na kuyoya, neni mukayoya. Tukayoya myaka yoshe.” Twabezika manene kukala neli lilabelelo.