ACISINGANYEKENI ngweni kuli munu uje akalikwasesa likina lije limwesa mulili na kuhuhwilamo lihunzi. Ananguka ngwendi kuli lihunzi lyakama lili na kwija ha mutambela umo haje hali banu babangi. Anangula banu simbu kanda lihunzi licije, mwafwa nabaka mbunge.

Mu ngila imo lika, Yehova ali na kunangula banu simbu kanda bukalu bwendi bwije. Ali na kulinga bati ngoco? Co twasa kuzibuka bati ngwetu nana banu simbu yailaha mangana balingeho cimo? Tucisimutwiyeni omwo Yehova wanangwilile banu kusañulu mangana tuwane bikumbululo.

Kusañulu, Yehova wanangwile banu ngwendi akasompa baje kubononoka mashiko endi. (Visi 10:25; Njele 30:23) Simbu kanda acisompe banu, wakele na kunangula baje kubakele na kwononoka mashiko endi, co wabalekele bibanapandele kulinga mangana bamwononoke. (2 Vimye 17:12-15; Nehe 9:29, 30) Njambi walikwasesele bangamba bendi ba kulongwa mu kunangula banu mangana batenguluke ku bubi bwabo.​—Amo 3:7.

Nowa bamupangesele kuli Njambi mangana anangule banu. Ha myaka yaingi, wanangwile banu ba bilinga byabibi na baka-bukenya, bya libazi lije lyakele na kwija. (Kusha 6:9-13, 17) Wabalekele lalo bibanapandele kulinga mangana boboke. Ngeci bamutumbwile ngwabo muka-kwambulula busunga.​—2 Petu 2:5.

Nowa wabanangwile, oloni kubatolililile ku muzimbu uje watundile kuli Njambi. Bamwesele ngwabo kubakele na likulahelo. Ngeci Libazi ‘lyakubanyongesele boshe.’ (Mateo 24:39; Heve 11:7) Mulyetele libazi kubasele kwendeka lalo ngwabo Njambi kabanangwile.

Kuli simbu ikwabo lalo ije Yehova wanangwile banu simbu kanda abasompe. Wabanene simbu ya kutenguluka. Cakumwenako, Yehova wanenele bihiso 10 hali baka-Ingito. Watumine Mosesa na Alone ngwendi bakanangule Falo na banu bendi ngwendi anena cihiso ca bu 7 ca nyonzi ya mamanya. Nyonzi yapandele kunyoka litangwa lyateleko, kuma oho wabanene simbu ya kutonda binjubo mwakubanda nyonzi ya mamanya ndi? Mbimbiliya ngwayo: “Baje bamyata ba mwene bakele na lyoba ha bije byendekele Shukulu Kalunga, bakobelesele bindungo babo na bimuna babo mu binjubo. Oloni baje kubombileko mbunge ku kunangula kwa Shukulu Kalunga, basezele bindungo babo na bimuna babo mu shandangala ya ngoco.” (Kutu 9:18-21) Yehova wanene baje bononokele simbu ya kulibwahesela bwasi bwasi mangana keti bamone bukalu bwezilile baje kubononokele.

Falo na bangamba bendi babangele kubanangula simbu kanda kwije cihiso ca bu 10. Oloni babyanene kubanangula. (Kutu 4:22, 23) Ngeci bana babo ba bantwatwa batsile. Oku kwapwile kubindama kwakama. (Kutu 11:4-10; 12:29) Kuma bakele na simbu ya kutenguluka ndi? Eyo. Mosesa wanangwile Baisalele bwasi bwasi, co wabalekele mubapandele kwobokelamo na binaanga byabo. (Kutu 12:21-28) Bangahi batolilile ku byuma byabanangwile Mosesa? Baka-kutosendesesa banawana  ngwabo banu ba kupwa 3 milyoni kwambatesela na Baisalele na “munga yakama” ya baje kubapwile Baisalele na baka-Ingito batundile mu Ingito. Co bobokele bukalu bwa Njambi.—Kutu 12:38.

Bitunasimutwiya bimwesa ngwabyo Yehova ali na kwana banu simbu yaingi mangana batambule kunangula kwendi. (Kwitu 32:4) Mwafwa bika Njambi wanangwile banu oku kucili simbu? Kapositolo Petulu wendekele ngwendi, Yehova “kashaka umo akanyonge, oloni ashaka ngeci boshe batenguluke kutunda ku bubi bwabo.” (2 Petu 3:9) Njambi wakele banu mbunge. Washakele ngwendi batenguluke na kutambula kunangula kwendi simbu kanda anene bukalu bwendi.​—Isaya 48:17, 18; Loma 2:4.

Banu boshe banapande kutolilila ku kunangula kuje kubali na kwambulula mu kaye koshe. Mwakele hano hasi Yesu wanangwile banu ngwendi futisi ya kano kaye bakaimanesa ha ñababa yakama. (Mateo 24:21) Wapolofwetele byuma bije bikakwasa bandongesi bendi bazibuke ngwabo oyo simbu ili hayehi. Yesu wendekele byuma byakama bije bili na kulingiwa mu kaye matangwa ano.​—Mateo 24:3-12; Luka 21:10-13.

Ngeci Yehova ali na kushongangeya banu bamwononoke na kumupangela. Atonda ngwendi baje bamwononoka bayoye mwamubwa simbu ino, co lalo bakayoye mwamubwa mu kaye kakaha. (2 Petu 3:13) Atonda lalo ngwendi bakulahele byuma byanakulahesa. Co ali na kulinga ngoco kwitila mu kwambulula “biñanda byabibwa bya Bumwene” bije byendekele Yesu ngwendi “bakabyambulula mu kaye mwoshe ngwe kupwa bukaleho ku miyati yoshe.” (Mateo 24:14) Njambi nakongweya baka-kumulemesa mu busunga ngeci bambulule muzimbu wendi mu mafuti a kweta ku 240. Yehova ashaka ngwendi banu babangi batolilile ku kunangula kwendi mangana bakoboke butenu bwendi buje buli na kwija kulutwe.​—Zefa 1:14, 15; 2:2, 3.

Ngeci kutwasa kwendeka ngwetu Yehova kesi kwana banu simbu ya kutolilila ku kunangula kwendi. Bukaleho bumwesa ngwabo ali na kubana simbu. Oloni cihula eci: Kuma banu batolilila ku kunangula kwa Njambi simbu kanda bukalu bwendi bwete ndi? Ha kupwa bangamba ba Njambi, tuyeni tukwase banu babangi mangana bakwoboke mubakunyongesa kano kaye kakabi.