1. Bika bitunapande kupangela Yehova na mbunge yetu yoshe?

TUNAPANDE kupangela Yehova na mbunge yetu yoshe, mwafwa ikeye watutangele na kutwana mwonyo. (Kujo 4:11) Oloni kuli byuma byeka byasa kutungumuna. Nameme twazema Yehova na kumusingimika, twasa kumona byuma byeka kupwa bya seho na kwonowa kumupangela na mbunge yetu yoshe. Oku kwasa kulingiwa bati? Ca kulibanga, tusimutwiyeni bikulumbununa kupangela Yehova na mbunge yetu yoshe.

2. Kwesekesa na Kutuuka 34:14, bika bitunapande kulinga mangana tupangele Yehova na mbunge yetu yoshe?

² Mbimbiliya imwesa ngwayo kupangela Yehova na mbunge yetu yoshe, kunapu kumuzema manene. Nga tupangela Yehova na mbunge yetu yoshe, co tulemesa ikeye lika. Kututabesa cuma coshe coshe cipwe ca seho kuli yetu.​—Tandeni Kutuuka 34:14.

3. Bika bitunapande kuzemena Yehova?

³ Bika bitunapande kuzemena Yehova? Mwafwa twalilongesa byuma byabingi hali ikeye. Twazema bifwa byendi byabibwa. Tuzibuka byuma byazema nebi byazinda, co tuli na kumutembwinina. Tuzibuka byuma byanayongola kulingila banu, co tuli na kubikundwiya. Twabezika kupwa babusamba bendi. (Myaso 25:14) Byuma byoshe bitulilongesa bitukwasa tulikute busamba na Ishamatanga yetu.​—Yako 4:8.

4. (a) Liyabolo ali na kupangesa bika mangana atwonowese kuzema Yehova? (b) Bika bitusimutwiya muno mu cilongesa?

 ⁴ Liyabolo ikeye ali na kuyula kano kaye. Ali na kukapangesa mangana tumone byuma bya ku mubila kupwa bya seho, co lalo kutupwile kwakukalu kubyana byuma byabibi. (Efeso 2:1-3; 1 Yowa 5:19) Ashaka ngwendi tuzeme byuma byeka mangana tujeneke kuzema lika Yehova. Tusimutwiya byuma bibali mangana tumone mwasa kulingila ngoco Liyabolo. Ca kulibanga, atonda ngwendi tuzeme bimbongo. Ca mu cibali, atonda ngwendi twangule mwamubi byuma bya kulizima nabyo buli.

5. Mwafwa bika kutwapandele kushangumuka kuzema bimbongo?

⁵ Tubaboshe twashaka kukala na byakulya, buzalo bwabubwa na kuyoya mwamubwa. Oloni kutwapandele kuzema bimbongo. Ano Matangwa, banu babangi ‘banazeme bimbongo’ na bufuko. (2 Tima 3:2) Yesu wazibukile ngwendi bandongesi bendi banasa kushangumuka kuzema bimbongo. Ngeci wendekele ngwendi: “Munu naumo wahi asa kupangela bashukulu babali, kubanga azindeho umo na kuzemaho mukwabo, nambe apwa wa kulongwa kuli umo na kushaula mukwabo. Co kuwasa kupangela Njambi na kupangela lalo bimbongo.” (Mateo 6:24) Munu uje apangela Yehova oku abihisila simbu yaingi mu kushakezeka bufuko, napu ngwe apangela bashukulu babali. Co kasa kupangela Yehova na mbunge yendi yoshe.

6. Bika bitulilongesa ku majwi endekele Yesu ku cikungulukilo ca Laondisiya?

⁶ Baka-Kilistu ba ku cikungulukilo ca Laondisiya balishashele ngwabo: “Yange nji muka-kufuka, njinapwisamo, byoshe njishaka njili na nabyo.” Oloni Yehova na Yesu bamwene baje baka-Kilistu ngwabo bapwile,  ‘baka-kuyanda, tuhutu, bakele mushelengwa, co lalo bapwile tupuputwa.’ Bufuko bwabo keti bukebwo bwalingisile Yesu abanangule, oloni wabanangwile mwafwa bazemene bimbongo, co busamba bwabo na Yehova bwakele na kutsa. (Kujo 3:14-17) Nga tunanguka ngwetu twashangumuka kuzema bimbongo, co bwasi bwasi tunapande kubyana obyo bisinganyeka. (1 Tima 6:7, 8) Nga kutulingi ngoco, co tushangumuka kuzema byuma byeka, co Yehova katambula malombelo etu. Yehova atonda ngwendi tupangele ikeye lika. (Kwitu 4:24) Bimbongo byasa kupwa bati bya seho manene mu buyoye bwetu?

7-9. Bika bimulilongesa ku byuma byanaliwana nabyo mukulunu wa cikungulukilo wa lizina lya David?

⁷ Tusimutwiyeni hali David, mukulunu wa mu cikungulukilo ku lifuti lya America. Wendekele ngwendi wakele na kupanga na nzili ha kampani. Bamwanene cipangi ca helu, co wakele na kutambula bimbongo byabingi. Bamusingimikile manene mwafwa ya cashu cendi ca kuzibuka mwamubwa cipangi. David wendekele ngwendi: “Njasinganyekele ngwange bimbongo binjakele na kutambula byapwile bibezikiso bya kutunda kuli Njambi.” Kuma cili bene byatundile kuli Njambi ndi?

⁸ Mukwita kwa simbu, David wanangukile ngwendi cipangi cendi cakele na kutsiya busamba bwendi na Yehova. Wendekele ngwendi: “Nga njili ku biwano nambe mu lihya, njakele na kusinganyeka lika ha bukalu bwa ku bipangi. Njakele na kutambula bimbongo byabingi, oloni njakele mu bishoti, co lalo mu bulo bwange kumwakele lizibasano.”

⁹ David wapandele kwangula byuma bya  seho. Wendekele ngwendi: “Njatengulwileko byuma bimo.” David watengulwile kupangesi yendi, co wakalekele mukulunu wa bipangi bisinganyeka byendi. Bika byatundilemo? David bamutundisile bipangi. Walingile bati? Wendekele ngwendi: “Lya mukwabo njashulisilile fomu ya bupainiya bwa kukwasa.” David na munakazi wendi bawanene cipangi ca kujelesa ku mitungo yakama mangana bawane bimbongo bya kulikwasa nabyo. Mu kwita kwa simbu, washangumukile bupainiya bwa simbu yoshe, co munakazi wendi nendi napu painiya. David na munakazi wendi banangula kupanga cipangi ca kwisi manene. Cipangi cabo keti cikeco ca seho mu buyoye bwabo. Bimbongo bibali na kutambula binapu byabindondo, oloni bili na kubakwasa mu buyoye bwabo. Bashaka kwaka Yehova mu mutamba wa kulibanga, co bamono ngwabo Njambi akanyungu baje batwameka bya Bumwene.​—Mateo 6:31-33.

10. Twasa kunyunga bati mbunge yetu?

¹⁰ Munapande kunyunga mbunge yeni, nambe muli na bimbongo byabingi nambe byabindondo. Mwasa kuinyunga bati? Keti muzeme bufuko. Co lalo keti mumone cipangi ceni ca ku mubila kupwa ca seho kutubakana kupangela Yehova. Mwasa kuzibuka bati ngweni cipangi ceni ca ku mubila cikeco cinapu ca seho? Lihuleni ngweni: ‘Njikasinganyeka lika bya cipangi cange ca ku mubila nga njili ku biwano nambe mu lihya ndi? Njili na kulishoshomwena ngwange kulutwe kunjikakala na bimbongo bya kulikwasesa ndi? Yange na muka-limbo lyange kutwesi na kulizibasana, mwafwa ya bimbongo ndi? Njasa kupanga cipangi cije cibamona banu ngwabo keti ca seho nga cinjana simbu ya kupangela Yehova ndi?’ (1 Tima 6:9-12) Omwo musinganyekesesa hali ebi bihula anukeni ngweni Yehova wazema banu bendi, co lalo ali na kukulahesa bangamba bendi ba kulongwa ngwendi: “Kunjikamiseze na lumo lwahi nambe kumibyana.” Mukemwo kapositolo Paulu wasonekele ngwendi: “Keti mukakateye mu cizemo ca bimbongo.”​—Heve 13:5, 6.

11. Bika byasa kulingiwa ku munu ha byuma byanangula kulizima nabyo buli?

¹¹ Yehova atonda ngwendi tulikuwe kuyoya, co kulizima buli inapu ngila imo itukwasa tulikuwe kuyoya. Lijwi lya Njambi  ngwalyo: “Kukwesi cuma cacibwa ku munu cije cinatubakana kulya, na kunwa, na kukala mwamubwa mu bipangi byendi.” (Kwambu 2:24) Oloni bwingi bwa byuma bili muno mu kaye bya kulizima nabyo buli, byasa kutungumuna. Byasa kulingisa banu bazeme byuma biinabindika Mbimbiliya.

12. Kwesekesa na 1 Kolinte 10:21, 22, bika bitunapande kwangwila mwamubwa byuma bya kulizima nabyo buli?

¹² Tushaka kupangela Yehova na mbunge yetu yoshe, ngeci kutwapandele ‘kulya ku mesa ya Yehova na kulya lalo ku mesa ya bandemone.’ (Tandeni 1 Kolinte 10:21, 22.) Kulya hamo na munu kumwesa ngwabo mubabusamba. Nga byuma bitulizima nabyo buli bimwesa lwozi, bundemone, bilinga byabibi na byuma byeka bya mazilo, co tuli na kulya hamo na bitozi ba Njambi. Ngeci tulikobelesa mu bukalu, co lalo tutsiya busamba bwetu na Yehova.

13-14. Kwesekesa na Yakomba 1:14, 15, bika bitunapande kwangwila mwamubwa bitulizima nabyo buli? Endekeni cakumwenako.

¹³ Twesekeseni byakulya ku kulizima buli. Nga tulya, twasa kwaka byakulya mu kanwa, co lalo twasa kwangula seteko itulya. Oloni nga twabilehula, co kutwasa kwendesa mubinapande kupangela mu mubila wetu. Byakulya byabibwa bitwana bukangule, oloni byabibi, bitubinjisa. Cipangi ca byakulya hamo kucasa kusholoka mu litangwa limo, oloni cikalosholoka mu kwita kwa matangwa.

¹⁴ Mu ngila imo lika, nga tushaka kulizima buli, twasa kwangula bitushaka kuyongola. Byuma bitunayongola bikebyo bili na nzili ya kwendesa bisinganyeka byetu na mbunge yetu. Nga binapu byabibwa, co bitushubulwisa, oloni nga byabibi bitukobelesa mu bukalu. (Tandeni Yakomba 1:14, 15.) Byuma bitunda mu kwangula byuma byabibi bya kulizima buli hamo kubisholoka oho bene, oloni mukwita kwa simbu bisholoka. Mukemwo Mbimbiliya yatunangula ngwayo: ‘Keti mulikwise yeni babenya, naumo wahi wakwisa Njambi, mwafwa byakuna munu bikebyo byateja. Uje akunina ku mubila wendi akateja kutsa.’ (Ngala 6:7, 8) Ngeci kunapu kwa seho kubyana byuma bya kulizima nabyo buli bije byazinda Yehova.​—Myaso 97:10.

15. Bwana muka bwanatwana Yehova ngwendi tulikuwe?

¹⁵ Banu ba Yehova babangi bali na kulikuwa kuyongola JW Broadcasting^®. Ndokazi wa lizina lya Marilyn ngwendi: “JW Broadcasting inanjikwasa njipwe wa kubwahelela, co njasa kuyongola byoshe biliho mwafwa byoshe byabibwa. Munjikalizibi kuzeya nambe kuziba buli, njikatolilila ku ñanda imo nambe ku pulogilamu ya Mutondo ya Kulilongesa Mbimbiliya. Oku kunanjilingisa njilizibe ngwange njili hamo na Yehova na munga yendi. JW Broadcasting inatengulula buyoye bwange.” Neni muli na kulikuwa obu bwana bwa kutunda kuli Yehova ndi? Kutundaho lalo, JW Broadcasting ya ngonde na ngonde ikakala na majwi a kutolilila na mavidio na myaso yaibwa ije imwasa kutala nambe kutolilila ha simbu imushaka.

16-17. Bika bitunapande kwangwila mwamubwa simbu itwambata mu kulizima buli, co twasa kulinga bati ngoco?

¹⁶ Tunapande kwangula mwamubwa byuma bitulizima nabyo buli, tunapande lalo kwangula na simbu itwambata mu kulizima buli. Nga kutulingi ngoco, co twambata simbu yaingi ya kulizima buli na kuwana simbu yaindondo ya kupangela Yehova. Banu babangi kuli na kubakaluwila kukehesa ku simbu ibakalizimi buli. Ndokazi Abigail uje ali na  myaka 18 ngwendi: “Nga njinajuka, njikalizibi hehu nga njitala TV. Oloni nga kunjanyanyamene njasa kubiisila simbu yaingi kutala lika TV.” Ndolome Samuel uje ali na myaka 21 ngwendi: “Bisimbu bimo njikayongola mavidio amehi amangi ha Intaneti. Njikashangumuka kuyongola imo, oloni njikalinge hei maola atatu nambe awana anahu.”

¹⁷ Mwasa kukehesa bati ku simbu imukalizimi buli? Ca kulibanga, zibukeni simbu imuli na kwambata mu kulizima buli. Mwasa kusoneka maola anahwila mu kulizima buli mu calumingo. Sonekeni simbu imunambata ha kutala TV, kutala byuma bya ha Intaneti nei ya kweha bweho bwa ha foni yeni. Nga munamono ngweni mukambata simbu yaingi manene, co kaleni na cinoneko. Nonekeni tahi simbu ya kulinga byuma bya seho, asina munoneka simbu ya kulizima buli. Co lombeni Yehova amikwase kukabangeya cinoneko ceni. Nga mulinga ngoco, co muwana simbu na nzili ya kulinga cilongesa ca Mbimbiliya ca likalyeni, kulemesa kwa naanga, kukunguluka, kwambulula na kulongesa. Co lalo mulizima buli mu ngila yaibwa, mwafwa munatwameka Yehova.

18-19. Twasa kumwesa bati ngwetu tupangela Yehova na mbunge yetu yoshe?

¹⁸ Hanima ya kusoneka mukakahwila kaye ka Satana, kapositolo Petulu wasonekele lalo ngwendi: “Basamba bange, omwo muli na kubandamena litangwa lije, esekeni na nzili yeni yoshe kupwa baka-kujela na baka-kujeneka mulonga ku mesho a Njambi na kukala mu kwoloka hamo nendi.” (2 Petu 3:14) Nga tupangesa ebi bibanatunangula na kutwalelelaho kuyoya mu ngila yatonda Yehova, co tumupangela na mbunge yetu yoshe.

¹⁹ Satana na kaye kendi batwalelelaho kutweseka mangana twake byuma byeka kulutwe kutubakana kwaka Yehova. (Luka 4:13) Oloni byuma nameme bikaluwe bati, kututabesa munu weka nambe cuma ceka cipwe ca seho kuli yetu kutubakana Yehova. Twalyangwila kupangela lika Yehova na mbunge yetu yoshe.