1. Bika tutabela ngwetu tuli na kuyoya mu “matangwa a kukotoka”?

NGA mwasemukile munima ya 1914, co munayoyo buyoye bweni bwoshe mu simbu ya “matangwa a kukotoka” kwa byuma bya muno mu kaye. (2 Tima 3:1) Tubaboshe twazibi mubili na kulishulisilila byuma byendekele Yesu. Ebi byuma binapu binzita, njala yakama, mandunduma, mishongo ya kulitambwisa, kutuma kwa bubi na kuyandesa banu ba Yehova. (Mateo 24:3, 7-9, 12; Luka 21:10-12) Twalimwena lalo futisi ya banu ngwe ije yendekele kapositolo Paulu. (Taleni cipalo ca “ Cifwa ca Banu ba Ano Matangwa.”) Ha kupwa Bakaleho ba Yehova, twataba ngwetu cili bene tuli kumamaneselelo a “matangwa a kukotoka.”

2. Bihula muka bitunapande kukumbulula?

² Kuneti simbu yakama kutunda mu 1914, oku kumwesa ngwabo tuli kumamaneselelo a “matangwa a kukotoka.” Omwo kukotoka kuli muyehi, tunapande kuwana bikumbululo ku bihula bino: Bika bikalingiwa kumamaneselelo a “matangwa a kukotoka”? Co Yehova atonda ngwendi tulinge bika omwo twabandamena kukamona obyo byuma?

3. Mutambi muka ubakatambeka baka-kuyula uje uli ku 1 Tesalonika 5:1-3?

³ Tandeni 1 Tesalonika 5:1-3. Paulu natumbula ‘litangwa lya Yehova.’ Kwesekesa na awa mavesi, eli litangwa likashangumuka ha simbu ibakanyongesa “Mbambilone Wakama”  uje napu bulombelo bwa makuli bwa mu kaye koshe na kweta ha nzita ya Alamagidoni. (Kujo 16:14, 16; 17:5) Baka-kuyula mubakatambeka ngwabo, “byuma byoshe bili mwamubwa kunoloka kulu.” Co hakeho halikezila litangwa lya Yehova. Bisimbu bimo, baka-kuyula bali na kupangesa awa majwi nga bendeka bya likwatasano lya mafuti. * Oloni mutambi wa kwendeka ngwawo, “byuma byoshe bili mwamubwa kunoloka kulu” ubanendeka mu Mbimbiliya, ukewo ukapwa wa kulitila. Mwafwa bika? Mwafwa banu bakasinganyeka ngwabo baka-kuyula banabwahesa mwamubwa byuma na kunena kwoloka mu kaye koshe. Oloni hakeho haikezila “ñababa yakama” na ‘kubanyongesa bwasi bwasi.’​—Mateo 24:21.

4. (a) Bika kutuzibuka ha mutambi wa, “byuma byoshe bili mwamubwa kunoloka kulu”? (b) Oloni bika bituzibuka?

⁴ Twazibukako byuma bimo ha mutambi wa, “byuma byoshe bili mwamubwa kunoloka kulu.” Oloni kuli byuma bije kutuzibuka. Kutuzibuka bikalingisa baka-kuyula bakatambeke ou mutambi na ngila ibakautambekelamo. Kutuzibuka indi bakelukila-ilukila kuutambeka indi ikapwa lumo lika. Nameme kutuzibuka byoshe, oloni tuzibuka ngwetu baka-kuyula kubasa kunena kwoloka mu kaye. Co lalo Mbimbilya inatuleke ngwayo tubandamene ou mutambi. Ukewo ukamwesa ngwawo ‘litangwa lya Yehova’ lili hayehi na kushangumuka.

5. Bika bitunapande kulinga bibanatuleke ku 1 Tesalonika 5:4-6, mangana tulibwahesele ‘litangwa lya Yehova’?

⁵ Tandeni 1 Tesalonika 5:4-6. Paulu natuleke byuma bitunapande kulinga mangana tulibwahesele ‘litangwa lya Yehova.’ ‘Kutwapandele kulala tulo ngwe mubali na kulinga banu babangi.’ Oloni “tunapande kutona.” Tunapande kunyanyama mangana tujeneke kulikobelesa mu biñanda bya bupolitiki. Nga tulikobelesamo, co tupwa tu baka-kaye. (Yowa 15:19) Tuzibuka ngwetu Bumwene bwa Njambi bukebwo lika bukanena kwoloka mu kaye koshe.

6. Tushaka kukwasa banu balinge bika, co mwafwa bika?

⁶ Co lalo tunapande kukwasa bakwetu mangana balilongese byuma bije bija kulutwe biinapolofweta Mbimbiliya. Tubakwaseni hano bene, mwafwa kukukakala lalo simbu yakubalongesa bya Yehova nga ñababa yakama inete. Ngeci kunapu kwa seho manene kwambulula. *

7. Bika byatonda Yehova ngwendi tulinge?

⁷ Yehova atonda ngwendi tupangese eyi simbu yaindondo inasalako mu kwambulula na nzili, simbu kanda litangwa lyendi lyete. ‘Simbu yoshe tupangeni na nzili mu  bipangi byetu kuli Mwene.’ (1 Koli 15:58) Yesu wendekele byuma bitunapande kulinga. Omwo wendekele byuma byoshe bikalingiwa mu matangwa a kukotoka, wendekele lalo ngwendi: “Oloni omwo simbu kanda yete, biñanda byabibwa bakabyambulula kuli banu boshe.” (Mako 13:4, 8, 10; Mateo 24:14) Ngeci, omwo mwambulula muli na kushulisilila obu bupolofweto bwa mu Mbimbiliya.

8. Tuzibuka bati ngwetu cipangi ca kwambulula cili na kulibwezelela?

⁸ Cipangi ca kwambulula cili na kulibwezelela bati? Eci cipangi cili na kulibwezelela ha mwaka na mwaka. Tusimutwiyeni muinalibwezelela nambala ya baka-kwambulula bya bumwene mu kaye koshe mu matangwa a kukotoka. Mu 1914, kwakele baka-kwambulula ba kupwa 5,155 mu mafuti a kupwa 43. Ha simbu ino, kuli baka-kwambulula bakweta ku 8.5 milyoni mu mafuti a kupwa 240. Oloni cipangi cetu anga cicili na kuya lutwe. Tutwaleleleniho kuleka banu ngwetu Bumwene bwa Njambi bukebwo bukamanesa bukalu bwoshe bwa banu.​—Myaso 145:11-13.

9. Bika bitunapande kutwalelelaho kwambulwila bya Bumwene?

⁹ Twambulula bya Bumwene kweta noho hakatulekela Yehova ngwendi kunahu. Kunasala simbu ya kupwa hali mangana banu bazibuke Yehova Njambi na Yesu Kilistu? (Yowa 17:3) Kutuzibuka. Oloni tuzibuka ngwetu simbu kanda ñababa yakama ije, “baje ba bimbunge byabibwa bya kushaka kuyoya myaka yoshe,” basa kutambula busunga. (Vili 13:48, NWT) Twasa kubakwasa bati mu simbu yaindondo inasalako?

10. Yehova ali na kutukwasa bati ngeci twase kulongesa banu busunga?

¹⁰ Kwitila mu munga yendi, Yehova ali na kutwana byakupangesa mangana tulongese banu busunga. Ku ciwano ca mukati ka calumingo, bali na kutulongesa mwakwambulwila. Eci ciwano cili na kutukwasa tuzibuke bya kwendeka ha bungenzi bwa kulibanga, bwa kwilukila, nomu mwakutwamenena bilongesa bya Mbimbiliya. Munga ya Yehova inatwana lalo Cikasha ca Bikwata Bya Kupangesa mu Kulongesa. Ebi bikwata bitukwasa . . .

•   tushangumuke kusimutwiya na banu,

• twindule lishungu lya banu,

• tukwase banu bashake kulilongesa byabingi,

• tulongese banu busunga na

• kubaleka baye ha webusaiti yetu na ku Binjubo byetu bya Bumwene.

Ebi bikwata tunapande kubipangesa keti kukala lika nabyo. * Cakumwenako, hamo munasimutwiya na munu uje namwesele kubwahelela, co munamwana tilakiti nambe magazini, asa kuitanda kweta noho hamukelukilako. Munu na munu napande kwambulula na nzili ngonde na ngonde.

11. Mutamba wa Online Bible Study Lessons bawakelele bika?

¹¹ Mutamba wa Online Bible Study Lessons uli ha jw.org^®, unapu ngila ikwabo yali na kupangesa Yehova mu kulongesa banu busunga. Ou mutamba bawakelele bika? Mu kaye koshe banu babangi bali na kulilongesela Mbimbiliya ha Intaneti ngonde na ngonde. Bilongesa bili ha webusaiti yetu byasa kukwasa banu balilongese Mbimbiliya. Banu bamo banasa kulisindiya kulilongesa neni Mbimbiliya. Co bamweseni ou mutamba ha webusaiti yetu nambe batumineni linki ibatwala aha ha mutamba. *

12. Bika byalilongesa munu ha Online Bible Study Lessons?

¹² Ha mutamba wetu wa Online Bible Study Lessons hali na biñanda bino: “The Bible and Its Author,” “The Bible’s Main Characters,” na “The Bible’s Message of Hope.” Omwo munu atanda ebi biñanda, alilongesa:

• Mbimbiliya muyasakukwasela munu

• Yehova na Yesu na tungelo bapwa beya

• Njambi watangelele bika banu

• Mwafwa bika kuli tuyando na bubi

Ebi biñanda bimwesa lalo Yehova . . .

• mwakamanesela kuyanda na kutsa,

• mwakasangwila batsi, nomu

• mwakanyongesela bifulumende bya banu na kunena Bumwene bwendi.

13. Mutamba wakulilongesela Mbimbiliya ha Intaneti, unengi cilongesa ca Mbimbiliya ca ha njubo ndi? Lumbununeni.

¹³ Ou mutamba wakulilongesela Mbimbiliya ha Intaneti kuwengile cilongesa ca Mbimbiliya ca ha njubo. Yesu natwana cipangi ca kupwisa banu bandongesi. Ou mutamba banaubwahesela baka-bimbunge byabibwa mangana bakale na lishungu lya kulilongesa. Mukwita kwa simbu, hamo bataba kulilongesa Mbimbiliya. Kumamaneselelo a cilongesa na cilongesa banaleke uje atanda ngwabo alombe munu wakumulongesa Mbimbiliya. Ha litangwa na litangwa, banu ba kutubakana 230 mu kaye koshe, bali na kulomba kulilongesa Mbimbiliya kupangesa webusaiti yetu. Nga munu awana wakumulongesa Mbimbiliya, awana bukwasi bwakama manene.

14. Kwesekesa na lishiko lya Yesu lili ku Mateo 28:19, 20, bika bitunapande kulinga, co mwafwa bika?

¹⁴ Tandeni Mateo 28:19, 20. Omwo tutwamenena bilongesa, tunapande ‘kupwisa banu bandongesi . . . , na kubalongesa kwononoka byuma byoshe byashikile [Yesu].’ Tukwaseni banu bamone seho ya kupangela Yehova na kwimanena Bumwene bwendi. Tubashongangeyeni bapangese  bibalilongesa, balikundike kuli Yehova na kubambwitika. Nga balinga ngoco, co bakoboka litangwa lya Yehova.​—1 Petu 3:21.

15. Kutwesi na simbu ya kulinga bika, co mwafwa bika?

¹⁵ Ngwe mutunendeka kumaputukilo, kuhwa kwa kano kaye kuli hayehi manene. Ngeci, kutwesi na simbu ya kulilongesa na baje kubashaka kutenguluka na kupwa bandongesi ba Kilistu. (1 Koli 9:26) Cipangi cetu cinapu ca bwasi bwasi. Musimbu yaindondo inasalako, kucili banu babangi bashaka kuziba muzimbu wa Bumwene.

16. Ku Kujombolola 18:2, 4, 5, 8, banatuleke ngwabo tulinge bika? (Taleni majwi a kwinikila.)

¹⁶ Tandeni Kujombolola 18:2, 4, 5, 8. Awa mavesi amwesa byuma bikwabo byatonda Yehova kuli bangamba bendi. Baka-Kilistu ba busunga kubapandele kulikwatasana na Mbambilone Wakama mu ngila yoshe yoshe. Munu uje acililongesa Mbimbiliya hamo wakele mu bulombelo bwa makuli simbu kanda alilongese busunga. Hamo wakele na kulinga bilika byoshe bya mu bulombelo bwa makuli. Indi hamo wakele na kulambula bimbongo oku ku bulombelo. Ngeci, simbu kanda apwe muka-kwambulula wa kujeneka kumbwitika, napande kwecela byuma byoshe bya bulombelo bwa makuli. Napande kusoneka mukanda ku ceci kwanakele, nambe ku cibunga cije calikwatasana na Mbambilone Wakama *, kubaleka ngwendi natunduko.

17. Bipangi muka byanapande kubyana muka-Kilistu, co mwafwa bika?

¹⁷ Muka-Kilistu woshe napande kumona ngwendi ku cipangi cendi, kukwesi cuma cinalikwatasana na bulombelo bwa makuli. (2 Koli 6:14-17) Cakumwenako, kapandele kukobela cipangi ku ceci. Co lalo muka-Kilistu uje wapanga kasa kupanga bipangi byakama bije bikundwiya bulombelo bwa makuli. Oloni nga cipangi cendi babenya, co kasa kutambula cipangi coshe coshe ca ku Mbambilone Wakama. Bika twendekela ngoco? Mwafwa kutushaka kulikwatasana na bulombelo bwa makuli mu bipangi bije binapu bya mazilo ku mesho a Njambi.​—Isaya 52:11. *

18. Ndolome umo wakabangeyeye bati binangulo bya mu Mbimbiliya?

 ¹⁸ Ha simbu imo, mukulunu wa mu cikungulukilo bamulekele kuli mukulunu umo wa cipangi ngwendi ashongeko byuma bimo bya ku ceci ya mu mbongi yakele uje ndolome. Bisimbu byabingi, ndolome wakele na kuleka uje mukulunu wa cipangi ngwendi kasa kupanga bipangi bya kupandama ku biceci. Co ha simbu eyi, uje mukulunu wa cipangi kawanene weka wakupanga cije cipangi. Oloni ndolome wakabangeyeye binangulo bya mu Mbimbiliya, co wabyanene cije cipangi. Calumingo cateleko, ha lipapelelo lya mizimbu hakele cikupulo ca muka-kushonga weka ali na kwaka cilindakano haje ha ceci. Ndolome yetu ngwe watambwile cije cipangi, ngwe ikeye wakele haje ha cikupulo. Lizina lyendi ngwe lyabihile kuli bakwabo baka-Kilistu, co lalo ngwe wabatanwisile. Yehova nendi ngwe wazibile kubabala ku mbunge.

19-20. (a) Bika bitunalilongesa? (b) Bika bitwakulilongesa?

¹⁹ Mbimbiliya inendeka ngwayo bupolofweto bwakama buje buli hayehi na kulishulisilila, bunapu mutambi ubakatambeka baka-kuyula ngwabo, “byuma byoshe bili mwamubwa kunoloka kulu.” Tukandelela kuli Yehova uje natuleke ngwendi baka-kuyula kubasa kunena kwoloka. Bika bitunapande kulinga simbu kanda batambeke ou mutambi na kunyonga kwabo kwije? Yehova atonda ngwendi twambulule na nzili na kupwisa banu babangi bandongesi. Co lalo tunapande kutunda ku bulombelo bwoshe bwa makuli. Oku kunambateselela kujeneka kulikwatasana na cibunga coshe coshe ca bulombelo na kubyana bipangi bije byapandama ku Mbambilone Wakama.

²⁰ Kuli byuma bikwabo lalo bikalingiwa kumamaneselelo a “matangwa a kukotoka.” Kuli byeka lalo byatonda Yehova ngwendi tulinge. Byuma muka bene obyo, co twasa kulibwahesela bati byuma byoshe bije bili hayehi na kwija? Tulilongesabyo mu cilongesa cinatako.