1. Yehova asa kulinga bika mangana ashulisilile biyongola byendi?

YEHOVA asa kupwa mwoshe mwashaka mangana ashulisilile biyongola byendi. Cakumwenako, Yehova napu mulongesi, muka-kuzembeleka na muka-kwambulula muzimbu waubwa. Tunendekako lika byuma byabindondo. (Isaya 48:17; 2 Koli 7:6; Ngala 3:8) Oloni ali na kupangesa banu mu kushulisilila biyongola byendi. (Mateo 24:14; 28:19, 20; 2 Koli 1:3, 4) Yehova asa kutwana mana na nzili mangana tushulisilile cizango cendi. Oku kunalitombola nebi bililumbununa lizina lyendi, ngwe mubanendekela baka-kulilongesa bamo.

2. (a) Mwafwa bika twasa kuliziba ngwetu Yehova kasa kutupangesa? (b) Bika bitusimutwiya muno mu cilongesa?

² Tubaboshe tushaka ngwetu Yehova atupangese, oloni bamo basa kusinganyeka ngwabo Yehova kasa kubapangesa. Mwafwa bika? Bali na kuliziba ngwabo kubasa mwafwa ya bukulukazi, kutenguluka kwa byuma nambe kujeneka cashu. Bamo ngwabo bibali na kupanga binapumo, ngeci kubamono seho ya kubana bipangi bikwabo. Muno mu cilongesa, tusimutwiya omwo Yehova asa kutwanena bitutonda mangana tushulisilile biyongola byendi. Tusimutwiya lalo ha banu ba mu Mbimbiliya tumone omwo Yehova wanene bangamba bendi ba banalume na ba banakazi cizango na nzili ya kupanga. Co tusimutwiya mutwasa kutabesela Yehova atupangese.

3. Kwesekesa na Filipu 2:13, Yehova asa kutwana bati cizango ca kupanga?

³ Tandeni Filipu 2:13. * Yehova asa kutwana cizango ca kupanga. Asa kutwanaco bati? Cakumwenako, hamo twazibi ngwabo kuli bujene bumo mu cikungulukilo cetu. Indi hamo bakulunu batanda mukanda wa kutunda ku munango wa kutuleka ngwawo ku mutambela umo kuli bujene. Oku kwasa kutulingisa tulihule ngwetu, ‘Bika binjinapande kulinga mangana njikwase?’ Indi hamo banatwana cipangi cacikalu, oloni kutuzibuka ngwetu twasa kucipanga mwamubwa. Hamo tunatanda mavesi amo mu Mbimbiliya, oloni kutuzibuka mutwasa kuwapangesela mangana tukwase bakwetu.’ Yehova kasa kutusindiya kulinga byuma. Oloni nga amona ngwendi tutonda kulinga byuma bimo, co atwana cizango ca kulinga obyo byuma.

4. Yehova asa kutwana bati nzili ya kupanga?

⁴ Yehova asa kutwana lalo nzili ya kupanga. (Isaya 40:29) Asa kutwana sipilitu yendi ya Kujela mangana endule cashu cetu. (Kutu 35:30-35) Yehova asa kupangesa munga yendi mangana atulongese mwakupangela bipangi bimo. Nga kumuzibuka mwakupangela cipangi, co lombeni bukwasi. Lombeni lalo kuli Tate yetu wa mwilu amyane nzili ije itubakana ya bunu. (2 Koli 4:7; Luka 11:13) Mu Mbimbiliya muli banalume na banakazi babangi baje Yehova wabanene cizango na nzili ya kupanga. Omwo tusimutwiya hali aba banu, singanyekeni mwasa kumipangesela Yehova neni mupange bipangi bibapangele.

5. Bika bitulilongesa kuli Yehova ku simbu yapangesele Mosesa, nomu mwamupangeselelemo ha kupatula banu bendi?

⁵ Yehova wakwasele Mosesa apatule Baisalele. Oloni simbu muka ibamupangesele kuli Yehova? Kuma yapwile hanima ya ‘kumulongesa mana oshe a baka-Ingito’ ndi? (Vili 7:22-25) Embwe. Yehova wamupangesele hanima ya kumukwasa kupwa wa kulikehesa na kuwa mbunge. (Vili 7:30, 34-36) Yehova wakwasele Mosesa apwe wa kusimpa ngeci endeke na mwene wa nzili wa mu Ingito. (Kutu 9:13-19) Bika bitulilongesa kuli Yehova ku simbu yapangesele Mosesa, nomu mwamupangeselelemo? Yehova wapangesele baje bamwesele bifwa byendi na kukulahela nzili yendi.​—Fili 4:13.

6. Bika bitulilongesa kuli Yehova mwapangeselelemo Mbazilai mu kukwasa Mwene Ndabiti?

⁶ Kutundaho lalo, Yehova wapangesele Mbazilai mu kukwasa Mwene Ndabiti. Ndabiti na banu bendi ‘bajukile, bakele na njala na lihwila,’ ha simbu ibakele na kutewa Abisalome, muna Ndabiti. Mbazilai na baje bendele nabo bakele buyoye bwabo mu bushonde ngeci bakwase Ndabiti na banu bendi. Mbazilai kasinganyekele ngwendi wapwile kakulukazi, co Yehova kasa kumupangesa embwe. Oloni wapangesele byuma byakele nabyo mu kukwasa banu ba Njambi baje bakele mu bukalu. (2 Samwe 17:27-29) Bika bitulilongesako? Nameme tuli na myaka ya kupwa hali, Yehova asa kutupangesa mangana tukwase bakwetu baje bali mu bukalu ipwe ba mu lifuti lyetu nambe mu lifuti lyeka. (Visi 3:27, 28; 19:17) Nga mwahi mwakubanena bukwasi, co twasa kwana mulambu wa mu kaye koshe, mangana ukwase  bandolome na bandokazi betu baje bali mu bujene.​—2 Koli 8:14, 15; 9:11.

7. Yehova wapangesele bati Simyoni, co kuzibuka ngoco kututakamesa bati?

⁷ Yehova wakulahesele Simyoni munalume wa kulongwa, ngwendi katsi kubanga namono Mesiya. Cije cikulaheso catakamesele manene Simyoni, mwafwa wabandamenene Mesiya ha myaka yaingi. Yehova wamubezikisile mwafwa ya likulahelo na kukolesa kwendi. Litangwa limo, “ha kumutwamenena kuli munzinzime wa kujela,” Simyoni wakobelele mu Tembele. Ngeci wamwene Yesu te napu mbututu, co Yehova wamupangesele kupolofweta hali Yesu uje akapwa Mesiya. (Luka 2:25-35) Hamo Simyoni watsile Yesu te kanda ashangumuke cipangi cendi ca hano hasi, oloni Simyoni wabezikile kumupangesa kuli Yehova. Co akamona byuma byabibwa kulutwe. Ou munalume wa kulongwa akamona bubwa bwa ciyulo ca Yesu mucikakwaselamo banu mu kaye kakaha. (Kusha 22:18) Netu twabezika kutupangesa kuli Yehova.

8. Yehova asa kutupangesa bati ngwe mwapangesele Mbanambase?

⁸ Mu cita ca myaka ca kulibanga, munalume wa ngozi wa lizina lya Yosefa walyanene kumupangesa kuli Yehova. (Vili 4:36, 37) Hamo Yosefa wakele manene na cashu ca kuzembeleka, mukemwo tupositolo bamulukile ngwabo Mbanambase, kulumbununa “muka-kuzembeleka.” Cakumwenako, Saulu omwo wapwile muka-Kilistu, bandolome babangi bamushondolokele mwafwa ya kuyandesa baje bakulahelele kuli Yesu. Oloni Mbanambase wazembelekele Saulu na kumukwasa, co Saulu wakandelele manene. (Vili 9:21, 26-28) Mu kwita kwa simbu, bakulunu ba mu Yelusalema, banangukile ngwabo kutondeka kutakamesa bandolome ba mu Antyoke ku Silya. Iya ibatumine? Batumine Mbanambase. Bangwile mwamubwa. Mbimbiliya ngwayo Mbanambase ‘washangumukile kubatakamesa boshe ngeci bapwe ba kulongwa na baka-busunga kuli Mwene na bimbunge byabo byoshe.’ (Vili 11:22-24) Mu ngila imo lika, Yehova asa kutupangesa mangana tuzembeleke mukwetu muka-Kilistu. Cakumwenako, asa kutupangesa mu kuzembeleka baje banatsisa. Indi hamo kutushongangeya tutume foni nambe kumenekela uje abinja nambe nombwa mangana tumuleke majwi akumutakamesa. Mutabesa Yehova amipangese ngwe mwapangesele Mbanambase ndi?​—1 Tesa 5:14.

9. Bika bitulilongesa kuli Yehova mwakwaselelemo Vasily kupwa kanyungi wamubwa?

⁹ Yehova wakwasele ndolome wa lizina lya Vasily kupwa kanyungi wamubwa. Bamwangwile kupwa mukulunu te ali na myaka 26. Vasily wazibile lyoba ngwendi kasa kukwasa bandolome na bandokazi ku sipilitu, maneneni baje bakele na bukalu bwakama. Oloni wawanene bukwasi mubamulongesele bakulunu ba kuhya ku sipilitu, nomu mwakele na kuya ku Sikola ya Cipangi ca Bumwene. Vasily wapangele na nzili. Cakumwenako, walyakelele tubilengo tumo. Mwakele na kushulisilila kamo na kamo, lyoba lyendi lyakele na kuhwa kamandondo kamandondo. Wendekele ngwendi: “Bije binjakele na kutewa hano bili na kunjikwasa njibwahelele. Njikabwahelela manene, Yehova mwakanjikwasa kuwana Cisoneka cije cikwasa ndolome nambe ndokazi.” Bandolome, nga mutembwinina Vasily ha kulyana kumipangesa kuli Yehova, co amyana cashu ca kupanga bipangi mu cikungulukilo.

10. Bika byalingile Abingaile, co bika bitulilongesa kuli ikeye?

¹⁰ Ndabiti na banu bendi batondele bukwasi ha simbu ibakele na kutewa Mwene Saulu. Banu ba Ndabiti balombele bya kulya ku munalume wa kufuka wa lizina lya Nabale. Basinganyekele ngwabo akabana bya kulya mwafwa bakele na kunyunga tusitu bendi mu mambo. Oloni Nabale wabominine. Ndabiti walubalele manene, ngeci wayongwele kunyongesa Nabale na banalume boshe ba mu naanga yendi. (1 Samwe 25:3-13, 22) Oloni munakazi wa Nabale, Abingaile wakele na mbunge yaibwa. Wasimpile, co wawililile ku mendi a Ndabiti na kumulambelela ngwendi keti akale na mulonga wa maninga ha kulinga shambandinga. Wanangwile Ndabiti mu kasingimiko ngwendi aseze byuma mu mabako a Yehova. Kulikehesa na mana a Abingaile kwatengulwile biyongola bya Ndabiti. Wanangukile ngwendi Yehova ikeye watumine Abingaile. (1 Samwe 25:23-28, 32-34) Yehova wapangesele Abingaile mwafwa ya bifwa byabibwa byakele nabyo. Mu ngila imo lika, bandokazi baje bali na mana na kasingimiko, Yehova asa kubapangesa mu kutakamesa binaanga byabo na bakwabo mu cikungulukilo.​—Visi 24:3; Tito 2:3-5.

11. Bika bibalingile bana ba Shalume ba banakazi, co beya bali na kubatembwinina?

¹¹ Mu kwita kwa simbu, Yehova wapangesele bana ba Shalume ba banakazi mu kutungulula bibumbe bya Yelusalema. (Nehe 2:20; 3:12) Baje bambanda bapangele cipangi cacikalu, cije lalo cakele myonyo yabo mu bushonde nameme ishe yabo Shalume, wapwile munu wa bulemu. (Nehe 4:15-18) Balisezele na banalume ba kutsimana ba ku Tekowa baje “babyanene kupanga bipangi bije bibabanene.” (Nehe 3:5) Bana ba Shalume babwahelelele manene omwo cipangi cahwile mu matangwa 52. (Nehe 6:15) Matangwa ano, bandokazi ba kulyana, banabwahelela kupangela Njambi mu cipangi ca kulitila ca kutunga na kutungulula mitungo ije ibanakundika kuli Yehova. Cashu cabo na nzanzu yabo binapu bya seho mwafwa bikwasa cipangi cende mwamubwa.

12. Yehova asa kumipangesa bati ngwe mwapangesele Tambita?

¹² Yehova wapangesele Tambita uje ‘wakele na kulinga byabibwa na kwana bwana bwa kutetela,’ mu kukwasa bifwile. (Vili 9:36) Mwatsile banu babangi bamulilile manene mwafwa ya kwana kwendi na ngozi yendi. Oloni babwahelelele manene omwo kapositolo Petulu wamusangwile. (Vili 9:39-41) Bika bimulilongesa kuli Tambita? Ipwe mu bakulunu nambe mu banike, mu banalume nambe mu banakazi munapande kulingako bimo mu kukwasa bandolome na bandokazi betu.​—Heve 13:16.

13. Ndokazi wa lizina lya Ruth uje wakele na shwamwa, Yehova wamupangesele bati, co wendekele bika?

¹³ Ndokazi wa lizina lya Ruth wakele na shwamwa, co washakele kupwa kamishinali. Wakele na kupangezela banu matilakiti ha njubo na njubo te acili mwanike. Ruth wendekele ngwendi: “Njalikuwile eci cipangi.” Oloni kusimutwiya na banu bya Bumwene bwa Njambi ha njubo na njubo kwamukaluwilile. Nameme wakele na shwamwa, oloni wapwile painiya wa simbu yoshe mwakele na myaka 18. Mu 1946 waile ku Sikola ya Ngiliyandi ya Kulilongesa Mbimbiliya, co wakapangelele ku Hawaii na ku Japan. Yehova wamupangesele mu kwambulula manene muzimbu waubwa muje mu mafuti.  Hanima ya kwambulula ha myaka ya kweta ku 80, Ruth wendekele ngwendi: “Yehova nanjikwasa manene. Nanjikwasa njitundise shwamwa injakele nayo. Njakulahela ngwange Yehova asa kupangesa woshe uje amukulahela.”

14. Kwesekesa na Kolose 1:29, bika bitunapande kulinga nga tutonda ngwetu Yehova atupangese?

¹⁴ Kushwa kusañulu, Yehova napangesa bangamba bendi mu bingila bya kulisezaseza. Yeni amipangesa bati? Cinai ku kulyana kweni na kupanga na nzili yeni babenya. (Tandeni Kolose 1:29.) Nga mulyana ngweni Yehova amipangese, co asa kumikwasa kupwa muka-kwambulula na nzili, mulongesi wamubwa, muka-kuzembeleka bwino, kupwa citongwe mu bipangi, kabusamba wamubwa nambe kumikwasa mu ngila yeka yatonda ngwendi mulinge cizango cendi.

15. Kwesekesa na 1 Timateo 4:12, 15, bandolome ba bakwenje banapande kulomba Yehova abakwase kulinga bika?

¹⁵ Batico yeni bandolome ba bakwenje? Tuli na bujene bwakama bwa baka-kupangela mu bikungulukilo. Mu bikungulukilo byabingi, bakulunu banapu babangi kutubakana baka-kupangela. Eni bandolome ba bakwenje mwasa kulyana mangana mupange bipange mu cikungulukilo ndi? Bandolome bamo bakendeka ngwabo, “Yange njishaka lika kupwa muka-kwambulula kunahu.” Nga cikeco cifwa ceni, co lombeni Yehova amikwase kukala na cizango ca kupwa muka-kupangela, co lalo amyane cashu ca kupanga bipangi byamyana. (Kwambu 12:1) Tutonda bukwasi bweni.​—Tandeni 1 Timateo 4:12, 15.

16. Bika bitunapande kulomba kuli Yehova, co mwafwa bika?

¹⁶ Yehova asa kumipangesa mangana ashulisilile biyongola byendi. Ngeci mulombeni amyane cizango ca kushaka kupanga cipangi cendi. Mulombeni lalo amyane nzili ya kucipanga. Ipwe mu banike nambe mu bakulunu, pangeseni simbu yeni na nzili yeni na byuma bimuli nabyo mu kusingimika Yehova. (Kwambu 9:10) Nga bamyana cipangi kuli Yehova, keti muzambwile kucibyana, mwafwa ya kusinganyeka ngweni kumwasa kucipanga. Twabezika manene ha bipangi byoshe bituli na kupanga bije bili na kwana kasingimiko kuli Tate yetu wa cizemo.