1. Mukanda wa 2 Kolinte 3:1-3 utukwasa bati tumone seho ya kukwasa banu batukalilongesa nabo babambwitike? (Taleni cikupulo cili ha liputa lya kulibanga)

MUKALIZIBI bati mumukamono munu wa mu cikungulukilo ceni uje acililongesa Mbimbiliya bamumbwitika? Mukabwahelela. (Mateo 28:19) Co nga yeni muli na kulilongesa nendi Mbimbiliya, mubwahelela manene mumumumona oku bamumbwitika. (1 Tesa 2:19, 20) Bandongesi babanambwitika banapu “mikanda ya bukaleho” kuli baje banalilongesa nabo na cikungulukilo coshe.—Tandeni 2 Kolinte 3:1-3.

2. (a) Cihula muka ca seho citunapande kulihula, co mwafwa bika? (b) Cilongesa ca Mbimbiliya capwa cika? (Taleni majwi a kwinikila)

² Mu myaka iwana inahu, tunakele na kutwamenena bilongesa bya Mbimbiliya * bya kweta ku 10,000,000 ha ngonde na ngonde mu kaye koshe. Co mu myaka eyi bene, banu ba kutubakana 280,000 banakele na kubambwitika ha mwaka na mwaka, co banapu bandongesi ba Yesu Kilistu nambe ngwetu Bakaleho ba Yehova. Twasa kukwasa bati banu babangi-bangi baje bacili na kulilongesa Mbimbiliya babambwitike? Yehova acili na kushaka ngwendi banu bapwe bandongesi ba Kilistu, ngeci tushaka kulinga mwoshe mutwasela kubakwasa mangana bakole ku sipilitu na kweta ha kubambwitika. Simbu ili na kuhwa.—1 Koli 7:29a; 1 Petu 4:7.

3. Bika bitusimutwiya muno mu cilongesa ha kutwamenena Bilongesa bya Mbimbiliya?

 ³ Cipangi ca kupwisa banu bandongesi capwa ca seho. Ngeci bandolome ba mu Cibunga ca Kutwamenena behwile minango mangana bazibuke bitunapande kulinga bije bitulingisa tukwase banu babangi batukalilongesa nabo Mbimbiliya babambwitike. Muno mu cilongesa na cilongesa cinatako, tusimutwiya ha byuma bitwasa kulilongesa ku bapainiya, bamishinali na tunyungi ba kuzenguluka baje banapangela Yehova ha simbu yailaha. * (Visi 11:14; 15:22) Aba bandolome na bandokazi bendekele byuma bibanapande kulinga balongesi ba Mbimbiliya na banu babakalongesa mangana uje alilongesa awane bukwasi. Muno mu cilongesa tusimutwiya byuma bitanu byanapande kulinga uje alilongesa Mbimbiliya mangana akole ku sipilitu na kweta ha kumumbwitika.

4. Mwafwa bika kulilongesa na munu ha simbu yaindondo kukumulingisa akole ku sipilitu na kumumbwitika?

⁴ Bandolome na bandokazi betu babangi bakasimutwiya na banu biñanda bya mu Mbimbiliya ha simbu yaindondo. Co bakasimutwiya byuma byabindondo lika. Kulinga ngoco kukabakwasa bendule lishungu lya banu lya kushaka kulilongesa Mbimbiliya. Nameme ngoco, kakangi kubesi kulilongesa calumingo na calumingo. Bamo bakalombo nambala ya foni ya babenya njibo mangana bamusikile nambe kumutumina kamuzimbu na kusimutwiya ha ñanda imo ya mu Mbimbiliya simbu kanda belukileko lalo. Co bamo bakatwalelelaho kulinga ngoco ha bingonde byabingi, oloni kubashangumuka cilongesa ca Mbimbiliya. Kulilongesa mu ngila eyi kukukwasa munu akole ku sipilitu na kumumbwitika, mwafwa kesi na kuwana simbu yaingi ya kulilongesa Lijwi lya Njambi.

5. Kwesekesa na Luka 14:27-33, byuma muka byendekele Yesu bije byasa kutukwasa mu cipangi ca kupwisa banu bandongesi?

⁵ Simbu imo, Yesu wendekele cakumwenako mangana alongese banu bibanapande kulinga omwo bapwa bandongesi bendi. Wendekele bya munu uje ashaka kutunga kaposhi na mwene uje ashaka kukalwa nzita. Yesu wendekele ngwendi uje ashaka kutunga, “ha kulibanga atumbama na kulaba bingahi akafweta” mangana amone indi ali na bimbongo bya kumanesa kutunga kaposhi, co uje mwene nendi ‘napande kutumbama hasi mangana ayongole’ indi maswalale bendi basa kukalwa nzita. (Tandeni Luka 14:27-33.) Yesu wazibukile ngwendi munu uje ashaka kupwa ndongesi yendi nendi napande kusinganyekesesa mwamubwa ha byuma byalibungila mu kupwa ndongesi  yendi. Ngeci, tunapande kushongangeya banu batukalilongesa nabo ngwetu tulilongese nabo calumingo na calumingo mangana tubakwase kuzibuka byuma byendekele Yesu. Twasa kulinga bati ngoco?

6. Bika bitwasa kulinga mangana tukwase banu batukalilongesa nabo Mbimbiliya bakole ku sipilitu?

⁶ Shangumukeni kubwezelela ku simbu imukalilongesa na munu. Hamo munasa kushangumuka kusimutwiya-simutwiya ha Bisoneka bibali simbu na simbu imwilukilako. Nga babenya njibo ashaka kulilongesa simbu yailaha, mwihuleni indi kuli mutamba kumwasa kutumbama na kutwalelelaho kusimutwiya. Cikumbululo cendi cimwesa indi ashaka kulilongesa Mbimbiliya indi embwe. Co mukwita kwa simbu, mwasa kumwihula indi ashaka kulilongesa-longesa lubali mu calumingo mangana akole bwasi ku sipilitu. Oloni kuli byuma bikwabo bimunapande kulinga keti kulilongesa lika lumo nambe lubali mu calumingo.

7. Mwasa kulibwahesela bati mwamubwa cilongesa na cilongesa ca Mbimbiliya cimushaka kukatwamenena?

⁷ Ha kupwa mulongesi, munapande kulibwahesela mwamubwa cilongesa na cilongesa ca Mbimbiliya cimushaka kukatwamenena. Mwasa kushangumuka kutanda cilongesa coshe hamo lika na bisoneka bibanamwesa. Zibisiseni mwamubwa bisimpi byakama. Singanyekeseseni ha mutwe wa cilongesa, tumitwe twatundondo, bihula, mikanda ibanamwesa ngwabo “tandeni,” bikupulo na mavidio aje asa kumikwasa kulumbununa mwamubwa cilongesa. Co singanyekeseseni mumwasa kukalumbunwina mu ngila yayasi mangana mukakwase munu imukalilongesa nendi azibisise mwamubwa na kupangesa byuma bimukamulongesa.—Nehe 8:8; Visi 15:28a.

8. Majwi a kapositolo Paulu aje ali ku Kolose 1:9, 10, atulongesa bika ha kulombelela banu batukalilongesa nabo Mbimbiliya?

⁸ Omwo mulibwahesela, lombeleni kuli Yehova na kumuleka buzeye bwa munu imukalilongesa nendi Mbimbiliya. Mulombeni lalo amikwase kupangesa Mbimbiliya omwo mulongesa, mangana mwete munu imukalilongesa nendi ku mbunge. (Tandeni Kolose 1:9, 10.) Singanyekeleni cimweja byuma bimo bije binasa kukamukaluwila kuzibisisa nambe bije kasa kukulahela. Anukeni ngweni cilengo ceni cinapu ca kukwasa munu imukalilongesa nendi akole ku sipilitu na kumumbwitika.

9. Mwasa kukwasa bati munu imukalilongesa nendi kulibwahesela cilongesa? Lumbununeni.

⁹ Twakulahela ngwetu nga simu yoshe mulilongesa Mbimbiliya na munu imukalongesa,  co amwesa kukandelela ku byuma byanalingi Yehova na Yesu na kushaka kulilongesa byabingi. (Mateo 5:3, 6) Muka-kulilongesa napande kwaka mana ku byuma byali na kulilongesa asina byase kumukwasa. Ngeci, mukwaseni amone seho ya kulibwahesela cilongesa na cilongesa simbu kanda mulilongese. Napande kutanda cilongesa na kusinganyekesesa mubimukwasela byuma byali na kutanda. Mwasa kumukwasa bati alibwahesele? Libwaheseleni hamo nendi cilongesa mangana mumumwese mwakulibwahesela. * Mumweseni mwakuwanena bikumbululo, co lalo mumweseni omwo kufundika majwi nambe mikana haje hali bisimpi kumukwasela anuke cikumbululo. Mulombeni ngweni akumbulule mu majwi endi. Omwo akumbulula, co muzibuka indi nazibisisa mwamubwa byuma bimunalilongesa. Kuli byuma bikwabo lalo bimunapande kushongangeya munu imukalilongesa nendi ngweni alinge.

10. Kutanda Mbimbiliya ha litangwa na litangwa kutukwasa bati, co bika bitunapande kulinga mangana byuma bitutanda bitukwase?

¹⁰ Muka-kulilongesa awana bukwasi nga alilongesa na mulongesi wendi calumingo na calumingo, oloni awana bukwasi lalo nga alingako byuma bimo ha litangwa na litangwa. Napande kusimutwiya na Yehova. Mu ngila muka? Napande kutolilila na kwendeka na Yehova. Asa kutolilila kuli Njambi nga atanda Mbimbiliya ha litangwa na litangwa. (Yosh 1:8; Myaso 1:1-3) Mumweseni mwakupangesela “Cinoneko ca Kutanda Mbimbiliya” canasa kupulinta cije cili ha jw.org. * Co lalo, nga mushaka ngweni byuma byali na kutanda bimukwase, mushongangeyeni ngweni omwo atanda Mbimbiliya napande kusinganyekesesa byalilongesa hali Yehova nomwo mwanasa kupangesela byali na kutanda mu kuyoya kwendi.—Vili 17:11; Yako 1:25.

11. Muka-kulilongesa asa kuzibuka bati kulombela mwamubwa, co kulombela simbu yoshe kumukwasa bati?

¹¹ Shongangeyeni munu imukalongesa alombele kuli Yehova ha litangwa na litangwa. Kulinga ngoco kukekwo kwendeka na Njambi. Lombeleni kuli Yehova kutundilila kwisi ya mbunge yeni omwo mushangumuka na kumanesa kulilongesa, co kundikeni munu imukalongesa mu lilombelo lyeni. Omwo atolilila ku malombelo eni, alilongesa ngwendi napande kulombela-lombela kutundilila kwisi ya mbunge, co lalo napande kulombela kuli Yehova mu lizina lya Yesu Kilistu. (Mateo 6:9; Yowa 15:16) Kutanda Mbimbiliya ha litangwa na litangwa na kulombela kuli Yehova, kukwasa munu  imukalilongesa nendi ashwenye manene kuyehi na Njambi. (Yako 4:8) Nga alinga ngoco, co akola ku sipilitu, co lalo kumukwasa alikundike kuli Yehova na kumumbwitika.

12. Mwasa kukwasa bati munu imukalilongesa nendi alikute busamba na Yehova?

¹² Muka-kulilongesa Mbimbiliya napande kuzibisisa byuma byalilongesa, co lalo binapande kumweta ku mbunge. Mwafwa bika? Mwafwa nga bimweta ku mbunge, abipangesa mu kuyoya kwendi. Banu bazemene kutolilila ku byuma byakele na kubalongesa Yesu. Co bamukabele mwafwa byuma byabalongesele byabetele ku bimbunge. (Luka 24:15, 27, 32) Munu imukalilongesa nendi napande kuzibuka ngwendi Yehova wapwa munu hendi, co asa kupwa kabusamba kendi. Napande kuzibuka lalo ngwendi Yehova wapwa Ishe na Njambi yendi. (Myaso 25:4, 5) Omwo mulilongesa, simutwiyeni manene ha bifwa bya Njambi. (Kutu 34:5, 6; 1 Petu 5:6, 7) Lingeni ngoco ha cilongesa na cilongesa. Kwaseni munu imukalilongesa nendi azibuke bifwa bya Yehova byabibwa bya kufwa ngwe cizemo, ngozi na mema ku mbunge. Yesu wendekele ngwendi: “Lishiko lyakama lya kulibanga” linapu ‘kuzema Yehova Njambi yetu.’ (Mateo 22:37, 38) Kwaseni munu imukalilongesa nendi azeme manene Yehova.

13. Endekeni cakumwenako cije cimwesa mutwasa kukwasela munu itukalilongesa nendi azibuke bifwa bya Yehova.

¹³ Omwo mulilongesa na munu, mulumbunwineni bimwazemena Yehova. Kulinga ngoco kumukwasa amone ngwendi napande kuzema Yehova na kulikuta nendi busamba. (Myaso 73:28) Cakumwenako, hamo kuli mukana unamikwata ku mbunge umunamono mu libulu limuli na kulilongesa nambe mu Mbimbiliya uje unendeka ha bifwa bya Yehova byakufwa ngwe, cizemo, mana, busunga na nzili. Nga mukemwo, co lekeniko munu imukalilongesa nendi mangana azibuke ngwendi ebi bikebyo byamilingisa muzeme Tate yetu wa mwilu. Kuli byuma bikwabo byanapande kulinga uje ali na kulilongesa Mbimbiliya mangana akole ku sipilitu na kweta ha kumumbwitika.

14. Mukanda wa Vahevelu 10:24, 25 unendeka ngwawo biwano byasa kukwasa bati uje ali na kulilongesa Mbimbiliya akole ku sipilitu?

¹⁴ Tubaboshe tushaka ngwetu banu batukalilongesa nabo babambwitike. Ngila imo itunasa kubakwaselamo inapu kubashongangeya baye ku biwano bya cikungulukilo. Bandolome na bandokazi baje banazibuka mwamubwa cipangi ca kulongesa bakendeka ngwabo banu baje bakai ku biwano omwo bashangumuka lika kulilongesa,  bakakolo bwasi ku sipilitu. (Myaso 111:1) Baka-kwambulula bamo bakaleke babakalilongesa nabo Mbimbiliya ngwabo nga baya ku biwano, co bakalilongesa byabingi bije kubesi kulilongesa ha simbu ya cilongesa ca Mbimbiliya. Tandeni mukanda wa Vahevelu 10:24, 25 na munu imukalilongesa nendi, co mulekeni bubwa bwa kuya ku biwano. Mumweseni vidio ya Bika Bikalingiwa ku Njubo ya Bumwene? * Kwaseni munu imukalilongesa nendi aye ku biwano calumingo na calumingo.

15. Twasa kushongangeya bati munu itukalilongesa nendi aye ku biwano?

¹⁵ Mwasa kulinga bika nga munu imukalilongesa nendi kanda ayeho ku biwano nambe kesi kuyako simbu yoshe? Mulekeniko byuma bimunalilongesele ku biwano calumingo cinahu. Nga azibuka bubwa bumukawana ku biwano, co nendi asa kuyako. Mwaneni Kaposhi ka Kukengela nambe Mukanda wa Biwano wa Buyoye na Cipangi Cetu umuli na kupangesa ku biwano ha simbu oyo. Mumweseni byuma bimukalilongesa calumingo cijaho na kumwihula cilongesa canashake manene. Byuma byakamona na kuziba nga aya ku biwano byetu lwa kulibanga, bitubakana byakazibi nambe kumona ku bulombelo bweka. (1 Koli 14:24, 25) Akawanako banu bali na bifwa byabibwa byanasa kutembwinina, baje bamukwasa akole ku sipilitu na kumumbwitika.

16. Bika bitunapande kulinga mangana tukwase batukalilongesa nabo babambwitike, co bika bitusimutwiya mu cilongesa cinatako?

¹⁶ Twasa kukwasa bati batukalilongesa nabo Mbimbiliya babambwitike? Tunapande kushongangeya munu na munu itukalongesa ngwetu tulilongese nendi calumingo na calumingo, co alibwahesele cilongesa na cilongesa. Tunapande kumushongangeya lalo ngwetu asimutwiye na Yehova ha litangwa na litangwa na kulikuta busamba nendi. Co tunapande kumushongangeya ngwetu aye ku biwano bya cikungulukilo. (Taleni cipalo ca “ Byanapande Kulinga Muka-kulilongesa Mbimbiliya Mangana Bamumbwitike” ha liputa 12.) Mu cilongesa cinatako tukasimutwiya ha byuma bikwabo bitanu bibanapande kulinga baka-kwambulula mangana bakwase banu babakalilongesa nabo Mbimbiliya babambwitike.