1. Bika bibanapande kutwalelelaho kulinga baka-Kilistu ba kumbwitika?

BANAMIMBWITIKA ndi? Nga mukemwo, co munamwesa ku mbunga ngweni mwakulahela Yehova, co mushaka kukala mu munga * yendi na kumupangela. Oloni munapande kutwalelelaho kukanyamesa likulahelo lyeni kuli Yehova. Co lalo, munapande kutwalelelaho kukulahela ngweni Yehova ali na kutwamenena munga yendi.

2-3. Yehova ali na kutwamenena bati munga yendi ano matangwa? Endekeni byakumwenako.

² Ano matangwa, Yehova ali na kutwamenena munga yendi mu ngila ije imwesa bifwa byendi, biyongola byendi na mashiko a tunapande kukabangeya. Tusimutwiyeniko ha bifwa bya Yehova bitatu bituli na kulimwena mu munga yendi.

³ Ca kulibanga, “Njambi kesi na kaangu.” (Vili 10:34) Cizemo calingisile Yehova ane Munendi kupwa “ndando ya kupatula banu boshe.” (1 Tima 2:6; Yowa 3:16) Yehova ali na kupangesa banu bendi mu kwambulula muzimbu waubwa ku banu ba bimbunge byabibwa mangana ndando ya kupatula ikwase banu babangi. Ca mu cibali, Yehova washaka kulinga byuma muje mubinapande na mu kwaloka. (1 Koli 14:33, 40) Ngeci, bangamba bendi banapande kumupangela mu ngila inapande na mu kwoloka. Ca mu citatu, Yehova wapwa ‘Mulongesi’ Wakama Manene. (Isaya 30:20, 21) Ngeci, munga yendi ikalongesa lika biñanda bya mu Lijwi lyendi mu bikungulukilo na mu lihya. Baka-Kilistu ba kulibanga batembwininine bati ebi bifwa bya Yehova bitatu?  Banu ba Yehova bali na kutembwinina bati ebi bifwa ano matangwa? Co sipilitu ya kujela yasa kumikwasa bati omwo mupangela hamo na munga yendi?

4. Kwesekesa na Vilinga 1:8, Yesu washikile baka-kumukabangeya balinge bika, co bika byabakwasele?

⁴ Mu simbu ya baka-Kilistu ba kulibanga. Yesu wambulwile muzimbu uje unakwasa banu bakale na lilabelelo. (Luka 4:43) Washikile baka-kumukabangeya ngwendi balinge cipangi cashangumukile ca kwambulula kweta na “ku mamaneselelo a hasi.” (Tandeni Vilinga 1:8.) Oloni kubalingile eci cipangi mu nzili yabo. “Mukwasi” nambe ngwetu sipilitu ya kujela ije yabakulahesele Yesu, yabakwasele.—Yowa 14:26; Zaka 4:6.

5-6. Sipilitu ya kujela yakwasele bati bandongesi ba Yesu?

⁵ Baka-kukabangeya Yesu batambwile sipilitu ya kujela ha Pentekosita mu mwaka wa 33 C.E. Eyi sipilitu ya kujela yabakwasele bashangumuke kwambulula, co mu simbu yaindondo lika, banu babangi batambwile muzimbu waubwa. (Vili 2:41; 4:4) Bandongesi ba Yesu kubazibile lyoba omwo banu babalwisile, oloni balombele bukwasi kuli Njambi. Balombele ngwabo: “Twane kusimpa yetu bangamba bobe ngeci twambulule lijwi lyobe.” Bashulile na sipilitu ya kujela, co batwaleleleho ‘kwambulula lijwi lya Njambi mu kusimpa.’—Vili 4:18-20, 29, 31.

⁶ Bandongesi ba Yesu baliwanene na bukalu bukwabo. Cakumwenako, mabulu a Bisoneka bya kujela apwile amandondo. Kubakele na byuma bya kubakwasa kulilongesa Mbimbiliya ngwe bituli nabyo ano matangwa. Co lalo bambulwile ku banu baje bakele na kwendeka bindaka byabingi bya kuliseza-seza. Nameme baliwanene nobu bukalu, oloni bapangele cipangi ca kwambulula mu ngila ya kukomokesa. Mu simbu yaindondo lika ‘bambulwile kuli munu na munu mu kaye mwoshe.’—Kolo 1:6, 23.

7. Bangamba ba Yehova baje bayoyele myaka ya kutubakana 100 kunima bazibukile bati cizango ca Njambi, co balingile bika?

⁷ Ano matangwa. Yehova ali na kutwalelelaho kutwamenena na kwana banu bendi nzili. Ali na kubatwamenena kupangesa Mbimbiliya ije yahwimininine na sipilitu yendi. Mu Mbimbiliya mukemwo muli biñanda bya Yesu na lishiko lyanene ku bandongesi bendi ngwendi batwaleleleho kulinga cipangi cashangumukile. (Mateo 28:19, 20) Kaposhi ka Kukengela ka Ingilishi ka July 1881 kendekele ngwako: “Yehova katwangwile mangana tushakazeke lutsimo nambe bufuko, oloni natwangula mangana tupange na nzili na kulyana mu cipangi ca kwambulula muzimbu waubwa.” Kalibulu ka To Whom the Work Is Entrusted kaje kabasonekele mu 1919 kendekele ngwako: “Cipangi cimoneka ngwe cakama manene, oloni capwa ca Mwene, co atwana nzili ya kucipanga.” Ngwe mubalingile baka-Kilistu ba kulibanga, aba bandolome basimpile, co bapangele na nzili eci cipangi oku banakulahela ngwabo sipilitu ya kujela ibakwasa bambulwile banu boshe. Netu twakulahela ngwetu sipilitu ya kujela itukwasa.

8-9. Munga ya Yehova inapangesa bingila muka mu kwambulula?

⁸ Munga ya Yehova inapangesa bikwata byabibwa manene mu kwambulula muzimbu waubwa. Ebi bikwata binambateselela na mabulu a banapulinta, bweho bwa “Photo Drama of Creation,” mafonongilafu, minyau ya kukutiiya masipika helu, bisanzi, makina na intaneti. Co lalo, Munga ya Njambi ili na kunungulula mabulu mu bindaka byabingi manene. Mwafwa bika? Mangana banu boshe batambule muzimbu waubwa mu bindaka byabo. Yehova kesi na kaangu mukemwo wapolofwetele ngwendi muzimbu waubwa bakawambulwila ku “mafuti oshe, ku miyati yoshe na ku bindaka byoshe na ku banu boshe.” (Kujo 14:6, 7) Ashaka ngwendi banu boshe bazibe muzimbu waubwa wa Bumwene.

 ⁹ Batico baje bali ku mitambela kuje kutwasa kwambulwila? Cakumwenako, hamo bakala mu binjubo muje kutwasa kukobela. Munga ya Yehova yashangumukile kupangesa bingila byabingi bya kwambulwila ku mbunga mangana yambulwile aba banu. Cakumwenako, mu 2001, Cibunga ca Kutwamenena catabesele bandolome na bandokazi betu mu France na mu mafuti eka bashangumuke kwambulula kupangesa tutambo na bimesa. Byuma byatundilemo byapwile byabibwa manene. Mu 2011, bandolome na bandokazi ku America bashangumukile kwambulula kupangesa eyi ngila yaiha ku mitambela ya mu nganda ya New York kuje kukawaniwa manene banu babangi. Mu mwaka wa kulibanga, banene mabulu a kupwa 102,129 na magazini a kupwa 68,911. Co banu ba kupwa 4,701 balombele kulilongesa Mbimbiliya. Ngeci, Cibunga ca Kutwamenena catabesele bandolome na bandokazi mu kaye koshe bapangese tutambo na bimesa. Co twalimwena ngwetu sipilitu ya kujela ikeyo ili na kutukwasa tupange eci cipangi.

10. Tunapande kulinga bika mangana tubwezelele ku butongwe bwetu bwa kwambulula?

¹⁰ Bimwasa kulinga. Pangeseni byuma byakamilongesa Yehova ku biwano. Co yeni mu lihya simbu yoshe hamo na cibunga ceni ca baka-kwambulula. Bandolome na bandokazi ba mu cibunga ceni banasa kumikwasa mubwezelele ku butongwe bweni bwa kulongesa. Co lalo, myanja yabo yasa kumishongangeya. Twaleleleniho kwambulula nameme muliwana na bukalu. Ngwe muunamwesa mukanda hacinemana cino cilongesa, kutwesi na kulinga cizango ca Njambi mu nzili yetu lika, oloni sipilitu ya kujela ikeyo ili na kutukwasa. (Zaka 4:6) Twakulahela ngwetu Njambi atukwasa mwafwa tuli na kulinga cipangi cendi.

11. Cibunga ca kutwamenena ca mu simbu ya baka-Kilistu ba kulibanga cakwasele bati banu ba Njambi balikwatasane?

¹¹ Mu simbu ya baka-Kilistu ba kulibanga. Cibunga ca kutwamenena ca mu Yelusalema capangele na nzili mangana cikwase banu ba Njambi kulinga byuma mwamubwa na mu kwoloka.  (Vili 2:42) Cakumwenako, mu mwaka wa 49 C.E., baka-Kilistu bakele na biyongola byakuliseza-seza ha ñanda ya kutuhuka. Ngeci, cibunga ca kutwamenena catalelele ije ñanda, co sipilitu ya kujela yabakwasele. Ngwe bandolome na bandokazi balyangunwine mwafwa ya ije ñanda, ngwe cipangi ca kwambulula kucendele mwamubwa. Nameme bapwile Bayunda, tupositolo na bakulunu kubakele na biyongola byakulifwa na bije bibakele nabyo bakwabo Bayunda. Oloni bakabangeyeye Lijwi lya Njambi na kulomba sipilitu ya kujela ibakwase kwangula mwamubwa bya kulinga. (Vili 15:1, 2, 5-20, 28) Bika byatundilemo? Yehova wabakwasele bangule mwamubwa bya kulinga, batwaleleleho kulikwatasana na kukala mu kwoloka, co cipangi ca kwambulula catwaleleleleho.—Vili 15:30, 31; 16:4, 5.

12. Byuma muka bimwesa ngwabyo byuma bili na kwenda mwamubwa na mu kwoloka mu munga ya Yehova?

¹² Ano matangwa. Munga ya Yehova ili na kukwasa banu bendi balinge mwamubwa byuma na kukala mu kwoloka. Magazini ya Zion’s Watch Tower and Herald of Christ’s Presence ya November 15, 1895 yakele na cilongesa ca mutwe wa ‘Mwamubwa na muje mu Binapande,’ cije cemanene ha mukanda wa 1 Kolinte 14:40. Eci cilongesa cendekele ngwaco: “Tupositolo basonekelele cikungulukilo ca kulibanga biñanda byabingi bya kukundama ku kulinga byuma mubinapande . . . Kunapu kwa seho manene kukabangeya mwamubwa ‘byuma byoshe bije bibasonekele mu Bisoneka mangana batulongese.’” (Loma 15:4) Ano matangwa, munga ya Yehova ili na kulifwita mangana byuma byende mwamubwa na mu kwoloka mu cikungulukilo ngwe mubalingile mu simbu ya baka-Kilistu ba kulibanga. Cakumwenako, nga muya ku cikungulukilo ceka ca mu lifuti lyeni nambe mu lifuti lyeka na kukalilongeselako Kaposhi ka Kukengela, muzibuka cilongesa cimukalilongesa nomwo mucikendela. Kumwasa kuliziba kuzimbala. Sipilitu ya Njambi ikeyo lika yasa kulingisa banu balikwatasane mu ngila eyi.—Zefa 3:9.

13. Kwesekesa na Yakomba 3:17, bihula muka bitunapande kulihula?

¹³ Bimwasa kulinga. Yehova ashaka ngwendi banu bendi ‘banyunge mwamubwa kulitombola kwa mbunga kwa kutunda ku sipilitu na  kwoloka cije cinabakutila hamolika.’ (Efeso 4:1-3) Ngeci, lihuleni ngweni: ‘Njikanene kwoloka na likwatasano mu cikungulukilo ndi? Njikononoka baje bali na kutwamenena ndi? Bakwetu basa kunjikulahela, maneneni nga njili na bipangi mu cikungulukilo ndi? Kuma njikalibanga simbu yoshe, kukwasa bakwetu na kushaka kubapangela ndi?’ (Tandeni Yakomba 3:17.) Nga mumona ngweni kuli hamo hamunapande kupangela, co lombeni Yehova amyane sipilitu ya kujela. Nga muitabesa imikwase kukala na bifwa byabibwa na kulinga byuma byabibwa, co bandolome na bandokazi beni bamizema manene na kumisingimika.

14. Kwesekesa na mukanda wa Kolose 1:9, 10, Yehova walongesele bati baka-Kilistu ba kulibanga?

¹⁴ Mu simbu ya baka-Kilistu ba kulibanga. Yehova washaka kulongesa banu bendi. (Myaso 32:8) Ashaka ngwendi bamuzibuke na kumuzema, co bakayoye myaka yoshe ha kupwa bana bendi bazema. Kubasa kulinga ebi bitunendeka helu nga kabalongesa. (Yowa 17:3) Yehova wapangesele cikungulukilo ca mu simbu ya baka-Kilistu ba kulibanga mu kulongesa banu bendi. (Tandeni Kolose 1:9, 10.) “Mukwasi” nambe ngwetu sipilitu ya kujela ije yakulahesele Yesu yakwasele bandongesi bendi. (Yowa 14:16) Yabakwasele bazibisise byuma bya mu Lijwi lya Njambi na kubanukisa byuma byendekele Yesu na bije byalingile, bije bibasonekele mu mikanda ya Biñanda byabibwa. Byuma bibalilongesele byakanyamesele likulahelo lyabo na kubalingisa bazeme Njambi na Munendi na kulizema umo na mukwabo.

15. Byuma muka byakulahesele Yehova ku Isaya 2:2, 3 bije bili na kulishulisilila?

¹⁵ Ano matangwa. Yehova wapolofwetele ngwendi “ku matangwa a kulutwe,” banu ba mu mafuti a kuliseza-seza, bakakanduka ha lilundu lyendi mangana abalongese bije byashaka. (Tandeni Isaya 2:2, 3.) Tuli na kulimwena mu buli na kulishulisilila obu bupolofweto. Bulombelo bwa busunga bwalisezela kulako na bulombelo  bwa makuli. Yehova ali na kwana banu bendi byakulya byabingi bya ku sipilitu. (Isaya 25:6) Ali na kupangesa ‘ndungo wa kulongwa na kunyanyama’ mu kutwana byakulya byabingi bya kuliseza-seza byakufwa ngwe biñanda bya kutanda, bya kutolilila na mavidio. (Mateo 24:45) Tukalizibi ngwe mwalizibile kabusamba ka Yombi, Elihu uje wendekele ngwendi: “[Njambi] ikeye mulongesi wakama.”—Yombi 36:22.

16. Bika bimunapande kulinga mangana mukole ku sipilitu?

¹⁶ Bimwasa kulinga. Sipilitu ya Njambi imikwasa mupangese byuma bimuli na kulilongesa mu Lijwi lyendi. Lombeleni ngwe mwalingile muka-kwimba uje walombelele ngwendi: “Yehova, njilongese ngila yobe. Njikenda mu busunga bwobe. Njikwase njikale na mbunge imolika mangana njizibile lyoba lizina lyobe.” (Myaso 86:11, NWT) Ngeci, twaleleleniho kulya byakulya bya ku sipilitu bije byali na kutwana Yehova kwitila mu Lijwi lyendi na mu munga yendi. Kumulingila lika kuzibuka byabingi, oloni mushaka kuzibisisa na kukulahela byuma bimulilongesa na kubipangesa mu kuyoya kweni. Sipilitu ya Yehova yasa kumikwasa mulinge ngoco. Co lalo, munapande kushongangeya bandolome na bandokazi beni. (Heve 10:24, 25) Mwafwa bika? Mwafwa bali mu naanga yeni ya ku sipilitu. Lombeni sipilitu ya kujela imikwase kukumbulula kutundilila kwisi ya mbunge yeni nga muli ku biwano na kwendeka mwamubwa biñanda. Nga mulinga ngoco, co Yehova na Munendi bamona ngwabo mwazema “bimanga” babo.—Yowa 21:15-17.

17. Mwasa kumwesa bati ngweni munalikwatasana na munga ya Yehova?

¹⁷ Hano ha kaye, ololo hakala lika munga imo ije ibali na kutwamenena na spilitu ya Njambi. Ngeci, likwatasaneni na munga ya Yehova. Tembwinineni Njambi uje kakele na kaangu ha kwambulwila banu boshe. Mutembwinineni lalo ha kulinga byuma mu ngila inapande na kupanga mu kwoloka na bandolome na bandokazi mu cikungulukilo. Tolilileni kuli Mulongesi Wakama Manene ha kupangesa byuma byanatwana mu kulilongesa. Co kaye ka Satana mu kakahwa, kumukazibi lyoba. Oloni mukasimpa na kulikwatasana na baje bali na kupangela hamo na munga ya Yehova mu kulongwa.