CILONGESA 38
“Ijeni Kuli Yange, . . .Co Njikamihwimisa”
“Ijeni kuli yange, yeni boshe munajuka na kwambata bya kulema, co njikamihwimisa.”—MATEO 11:28.
MWASO 17 “Nalata”
BILI MUNO MU CILONGESA *
1. Cikulaheso muka cakulahesele Yesu cije cili ku Mateo 11:28-30?
YESU wakulahesele cuma cacibwa ku mbunga ije yamutolililile. Wabalekele ngwendi “Ijeni kuli yange, co njikamihwimisa.” (Tandeni Mateo 11:28-30.) Awa majwi anapu a busunga. Anukeni byalingile Yesu kuli munakazi uje wabinjile mushongo wakama.
2. Bika byalingile Yesu kuli uje munakazi wa kubinja?
2 Uje munakazi wabinjile mushongo wakama, co watondele manene bukwasi. Waile ku bimbanda babangi ngwendi hamo basa kumukangwisa. Wabinjile ha myaka 12, oloni naumo wahi wamukangwisile. Kwesekesa na mashiko a Mosesa, uje munakazi kapwile wa kujela. (Levi 15:25) Wazibile ngwabo Yesu ali na kukangwisa baka-kubinja, ngeci waileko. Mwakawanene Yesu, wakakwatele ku mukundwilo wa cikobelo cendi, co haje bene wakangukile. Yesu kakangwisile lika uje munakazi, oloni wamusingimikile. Cakumwenako, mwakele na kusimutwiya nendi, wamutumbwile ngwendi “munange.” Ngeci, uje munakazi wakanyamene, co washubulukile.—Luka 8:43-48.
3. Bihula muka bitukumbulula?
3 Nangukeni ngweni, uje munakazi ikeye wakatukile na kwija kuli Yesu. Ano matangwa, netu tunapande ‘kwija kuli’ Yesu. Baje baija kuli Yesu kesi na kubakangwisa mu kukomokesa. Oloni acili na kulanya banu ngwendi: “Ijeni kuli yange, . . . co njikamihwimisa.” Muno mu cilongesa tukumbulula bino bihula bitanu: Twasa kwija bati kuli Yesu? Bika byalumbunwine Yesu mwendekele ngwendi: “Lilemekeni [njoko] yange”? Bika bitulilongesa kuli Yesu? Bika bitwendekela ngwetu cipangi canatwana cituhwimisa? Co twasa kutwalelelaho bati kuhwima omwo twambata njoko ya Yesu?
“IJENI KULI YANGE”
4-5. Mu bingila muka mutwasa kwizila kuli Yesu?
4 Ngila imo itwasa kwizilamo kuli Yesu inapu kulilongesa byabingi ku byuma byendekele nebi byalingile. (Luka 1:1-4) Co yetu babenya tunapande kulilongesabyo. Twasa kwija lalo kuli Yesu nga tulyangwila kutumbwitika na kupwa ndongesi ya Kilistu.
5 Ngila ikwabo ya kwizilamo kuli Yesu inapu kuya ku bakulunu nga tutonda bukwasi. Yesu ali na kupangesa bakulunu baje banapu “bwana kuli banu” mu kunyunga bimanga bendi. (Efeso 4:7, 8, 11; Yowa 21:16; 1 Petu 5:1-3) Tunapande kubashwenya na kubalomba mangana batukwase. Keti tumone ngwetu bakulunu bazibuka bituli na kusinganyeka nebi bitutonda. Cakumwenako, ndolome wa lizina lya Julian wendekele ngwendi: “Njatundile ha Mbetele mwafa ya kubinja. Co kabusamba kange umo wanjilekele ngwendi njileke bakulunu bakunjitakamese. Ha kulibanga, kunjamwene seho ya kubaleka. Oloni mu kwita kwa simbu njabalekele, co bezile na kunjikwasa.” Bakulunu basa kutukwasa tuzibuke “biyongola bya Kilistu,” ngwe mubalingilile baje bakatakamesele Julian. Kuzibuka biyongola bya Kilistu kunapu kuzibisisa bisinganyeka byendi na kutembwinina bilinga byendi. (1 Koli 2:16; 1 Petu 2:21) Bukwasi bwa bakulunu bunapu bwana bwabubwa manene.
“LILEMEKENI [NJOKO] YANGE”
6. Bika byalumbunwine Yesu mwendekele ngwendi “lilemekeni [njoko] yange”?
6 Yesu mwendekele ngwendi “lilemekeni [njoko] yange,” hamo walumbunwine ngwendi twononoke kutwamenena kwendi. Hamo walumbunwine lalo ngwendi tulilemeke njoko hamo lika nendi, co tubaboshe tupangele Yehova. Yoshe yoshe ngila yalumbunwine, lijwi lya njoko lilumbununa kupanga.
7. Cipangi muka cibanatwana cije cili ku Mateo 28:18-20, co bika bitunakulahela?
7 Nga tulikundika kuli Yehova na kutumbwitika, co tutambula cilanyo ca Yesu. Eci cilanyo cinaija ku banu boshe, co Yesu kasa kubyana munu uje ashaka kupangela Njambi. (Yowa 6:37, 38) Bandongesi ba Kilistu boshe banabana cipangi cije canene Yehova kuli Yesu. Twakulahela ngwetu Yesu atukwasa kupanga eci cipangi mwamubwa.—Tandeni Mateo 28:18-20.
“LILONGESENI KULI YANGE”
Hwimiseni bakweni ngwe mwalingile Yesu (Taleni palagilafu 8-11) *
8-9. Mwafwa bika banu ba kulikehesa bezile kuli Yesu, co bihula muka bitunapande kulihula?
8 Banu ba kulikehesa bezile kuli Yesu. (Mateo 19:13, 14; Luka 7:37, 38) Mwafwa bika? Tusimutwiyeni kuliseza kwakele mukati ka Yesu na Bafaliseo. Bafaliseo kubakele na cizemo, co lalo bapwile ba kulyalesa. (Mateo 12:9-14) Oloni Yesu wakele na cizemo, co lalo walikehesele. Bafaliseo bazemene manene bitwamo na lutsimo. Yesu walekele bandongesi bendi ngwendi keti balyalese, oloni balikehese na kupangela bakwabo. (Mateo 23:2, 6-11) Bafaliseo bakele na kulyatelela banu na kubajujwisa. (Yowa 9:13, 22) Yesu washubulwisile banu mwafwa wabalingilile byuma byabibwa na kwendeka nabo mwamubwa.
9 Munalilongesako bimo kuli Yesu ndi? Lihuleni ngweni: ‘Bakwetu banjizibuka ngwabo njawa mbunge, co njiwakulikehesa ndi? Njashaka kupangela bakwetu ndi? Njikazibila bakwetu ngozi ndi?’
10. Yesu wayoyele bati na bandongesi bendi?
10 Yesu wayoyele mwamubwa na bandongesi bendi, co lalo wabalongesele bipangi. (Luka 10:1, 19-21) Wabashongangeyeye behule bihula na kwendeka biyongola byabo. (Mateo 16:13-16) Bandongesi ba Yesu bayoyele mwamubwa ngwe bintemo bije bibananyungu mwamubwa. Bakele mbunge ku byuma byabalongesele Yesu, ngeci bapangele mwamubwa bipangi byabo.
Kaleni na nzanzu na bakweni
Ambululeni na ntwimla
Likeheseni, co pangeni na nzili *
11. Bihula muka bitunapande kulihula?
11 Muli na kutwamenena bakweni ndi? Nga mukemwo, co lihuleni ngweni: ‘Njili na kuyoya bati na bakwetu banjapanga nabo nambe baka-naanga yange? Njili na kulikwatasana nabo ndi? Njili na kushongangeya bakwetu behule bihula ndi? Njili na kutolilila ku biyongola byabo ndi?’ Bafaliseo bakele na kulubala nga banu babehula bihula, co lalo bayandesele baje bakele na biyongola bya kuliseza nebi byabo. Co kutushaka kubatembwinina.—Mako 3:1-6; Yowa 9:29-34.
“MUKAWANA KUHWIMA”
12-14. Bika bitwendekela ngwetu cipangi canatwana Yesu cituhwimisa?
12 Bika bitwendekela ngwetu kupanga cipangi canatwana Yesu kutuhwimisa? Kuli byuma byabingi, oloni tusimutwiyako lika byabindondo.
13 Tuli na baka-kututwamenena bababwa. Yehova wapwa Wahakamwa Manene, oloni ali na kukandelela ku bipangi bituli na kumupangela. (Heve 6:10) Yehova atwana nzili mangana tupange cipangi canatwana. (2 Koli 4:7; Ngala 6:5) Mwene yetu Yesu natumwesa mwanja waubwa wa mwakuyoyela na bakwetu. (Yowa 13:15) Ngeci, bakulunu baje bali na kutunyunga bali na kutembwinina Yesu uje wapwa “Kanyungi Wakama.” (Heve 13:20; 1 Petu 5:2) Bali na kutuzibila ngozi na kutushongangeya, co lalo banapu ba kusimpa omwo batulongesa na kutunyungilila.
14 Tuli na babusamba bababwa. Bahi bali na babusamba bababwa nambe cipangi cacibwa ngwe yetu. Tuli na kupanga na banu baje bali na bilinga byabibwa, oloni kubesi kulimona ngwabo bapwa ba seho kutubakana bakwabo. Bazibuka kupanga mwamubwa byuma, oloni bamona ngwabo bakwabo banabatubakana. Kubesi kutumona ngwabo tu baka-kupanga lika nabo, oloni batumona ngwabo tu babusamba babo. Co batuzema manene ngeci basa kulyana kututsila.
15. Tunapande kuliziba bati ha cipangi cetu?
15 Tuli na cipangi cacibwa. Tuli na kulongesa banu bya Yehova, co lalo tuli na kujombolola makuli a Liyabolo. (Yowa 8:44) Satana ali na kukwisa banu mukemwo bali na kuliziba ngwabo banapu bangoco. Cakumwenako, ashaka tumone ngwetu Yehova kasa kutukonekela, co lalo katwakele mbunge. Awa makuli ali na kuzeyesa manene banu. Nga ‘twija kuli’ Kilistu, co bubi bwetu babusambesa. Tubaboshe Yehova watuzema manene. (Loma 8:32, 38, 39) Twabwahelela omwo tuli na kukwasa banu balilongese bya Yehova na kupangesa bibalilongesa.
TWALELELENIHO KUBWAHELELA OMWO MWAMBATA NJOKO YA YESU
16. Citele canatwana Yesu ngwendi twambate cinaliseze bati na bitele byeka bitunasa kwambata?
16 Citele canatwana Yesu ngwendi twambate cinaliseze na bitele byeka bitunasa kwambata. Cakumwenako, banu babangi bali na kulembuka ku bipangi byabo bya ku mubila oku banajuka, co lalo kubesi kupwa ba kubwahelela. Oloni yetu tukapu ba kubwahelela mutukalembuka mu cipangi canatwana Yehova na Kilistu. Bisimbu bimo tukajuka manene, oloni tukeseka mwoshe mutwasela kwija ku biwano. Co munima ya biwano tukalizibi kukanyama na kupwa ba kubwahelela. Mukemwo lalo mutukalizibi nga tunalembuka mu cipangi ca kwambulula na munima ya kulinga cilongesa ca likalyetu.
17. Bika bitunapande kuzibukila hayalenga nzili yetu, co bika bitunapande kwangwila mwamubwa byakulinga?
17 Tunapande kuzibuka ngwetu munu na munu wakala naha hayalenga nzili yendi. Ngeci tunapande kwangula mwamubwa byakulinga. Cakumwenako, tunasa kubiisila simbu yetu ku kushakezeka bufuko. Nangukeni byendekele Yesu kuli muka-kufuka uje wamwihwile ngwendi: “Bika njinapande kulinga ngeci njitambule mwonyo wa myaka yoshe?” Uje muka-kufuka wononokele Mashiko a Mosesa. Hamo wapwile munu wamubwa, mwafwa mukanda wa Mako umwesa ngwawo Yesu ‘wamuzemene.’ Yesu walekele uje muka-kufuka ngwendi: ‘Ya ukalandese byoshe uli nabyo, asinoni wije unjikabe.’ Uje munalume washakele kukabangeya Yesu, oloni kashakele kuseza bufuko bwendi. (Mako 10:17-22) Ngeci, wabyanene njoko ya Yesu, co watwaleleleleho kupangela “bimbongo.” (Mateo 6:24) Ngwe yeni ngwe mwangwile kulinga bika?
18. Bika bitunapande kulinga simbu na simbu, co mwafwa bika?
18 Tunapande kwilula-ilula byuma bitunatwameka kulutwe mu kuyoya kwetu. Mwafwa bika? Mwafwa tushaka tupangese mwamubwa nzili yetu. Cakumwenako, mukwenje wa lizina lya Mark wendekele ngwendi: “Ha myaka yaingi njamwene ngwange njinasiwisa buyoye bwange. Njakele na kulinga bupainiya, oloni njakele na kubiisila simbu na nzili yange ku kushakezeka bimbongo mangana njiyoye mwamubwa. Njalihwile ngwange bika bili na kunjonowesa kupwa wa kubwahelela? Njanangukile ngwange njakele na kubiisila simbu yaingi ku byuma bya ku mubila, co njakele na simbu yaindondo ya kupangela Yehova.” Mark watengulwile buyoye bwendi mangana awane simbu yaingi ya kupangela Yehova. Mark ngwendi: “Bisimbu bimo njikalishoshomwena ha bimbongo. Oloni Yehova na Yesu bananjikwasa njimanese bishoti byange.”
19. Bika bikwapwila kwa seho kupanga bipangi ngwe mwatondela Yehova?
19 Nga tulinga ebi byuma bitatu, co tubwahelela omwo twambata njoko ya Yesu. Ca kulibanga, tupangeni ngwe mwatondela Yehova. Tuli na kupanga cipangi ca Yehova, ngeci tunapande kucipanga mu ngila yatonda babenya. Yetu tu bangamba, co Yehova ikeye Mwene yetu. (Luka 17:10) Nga tupanga byuma mwatondela Yehova, co twasa kupanga bipangi bije bitumona ngwetu byabikalu, twasa lalo kuhyana bukalu buje butumona ngwetu kutwasa kubuhyana. Oloni nga tupanga cipangi canatwana mututondela, co tulyaka mu bukalu yetu babenya. Cakumwenako, ngombe asa kulibulumuna nga apindangana ku njoko na kujeneka kwononoka shukulu yendi. Anukeni ngweni wahi munu asa kubindika Yehova kulinga byatonda.—Loma 8:31; 1 Yowa 4:4.
20. Biyongola muka bitunapande kukala nabyo omwo twambata njoko ya Yesu?
20 Ca mu cibali, tukaleni na biyongola byabibwa ha cipangi citupanga. Tushaka kwana kasingimiko kuli Tate yetu Yehova. Mu cita ca myaka ca kulibanga, banu baje bakele na nuna na kushaka lika kuwana byuma bibatondele, kubabwahelelele, co babyanene njoko ya Yesu. (Yowa 6:25-27, 51, 60, 66; Fili 3:18, 19) Oloni baje bazemene Njambi na kuzema bakwabo, babwahelelele mu kuyoya kwabo kwoshe omwo bambatele njoko, co bakele na lilabelelo lya kukayula na Kilistu mwilu. Nga netu tukala na biyongola byabibwa, co tubwahelela omwo twambata njoko ya Yesu.
21. Kwesekesa na Mateo 6:31-33, bika byatulingila Yehova?
21 Ca mu citatu, tukulaheleni Yehova nameme tuliwana na bukalu. Cipangi cetu cinapu ca kulyana, co citonda kucipanga na nzili. Yesu wendekele ngwendi bakatuyandesa. Oloni twakulahela ngwetu Yehova atwana nzili ya kukolesa mu byeseko. Nga tukolesa mu byeseko, co tupwa ba kukanyama. (Yako 1:2-4) Twakulahela ngwetu Yehova atwana bitutonda, co Yesu atunyungilila, co lalo bandolome na bandokazi betu batutakamesa. (Tandeni Mateo 6:31-33; Yowa 10:14; 1 Tesa 5:11) Tuli na byuma byoshe bije bitukwasa tukolese mu bukalu.
22. Bika bitunapande kukandelela?
22 Uje munakazi yakangwisile Yesu wahwimine, nameme kushubuluka ha litangwa lije bene. Oloni nga washakele ngwendi ashubuluke myaka yoshe, co wapandele kulingako bimo mangana apwe ndongesi ya Kilistu. Yeni musinganyeka ngweni bika byalingile uje munakazi? Nga wangwile kupwa ndongesi ya Yesu, co wabezikile manene kukayula hamo na Yesu mwilu. Byuma byoshe byasezele byapwile byabindondo mu kubyesekesa na bibezikiso bili mu kukabangeya Kilistu. Nga tuli na lilabelelo lya kukayoya mwilu nambe hano hasi, co tukandeleleni manene ha kutulanya kwija kuli Yesu.
MWASO 13 Kreste ki Mutala Waluna
^ par. 5 Yesu ali na kutulanya kwija kuli ikeye. Bika bitunapande kulinga mangana tutambule cilanyo cendi? Eci cihula tucikumbulula muno mu cilongesa. Tumona lalo omwo kupangela hamo na Kilistu kwasa kutuhwimisilamo.
