1. Yehova wamona bati banu ba kulikehesa?

YEHOVA wazema banu ba kulikehesa. Banu ba kulikehesa bakebo lika basa kulikuta busamba na Yehova. Oloni banu ‘ba kulyalesa abazibukila lika kulako.’ (Myaso 138:6) Tubaboshe tushaka kuzibisa Yehova kubwaha, co tushaka ngwetu atuzeme. Ngeci, tushaka kupwa ba kulikehesa.

2. Bika bitusimutwiya muno mu cilongesa?

² Muno mu cilongesa tukumbulula bihula bitatu: (1) Kulikehesa kwapwa kuka? (2) Bika bitunapande kulikehesela? (3) Bika byasa kutulingisa kutupwile kwakukalu kulikehesa? Ngwe mutumwena, kulikehesa kuzibisa Yehova kubwaha, co lalo kuli bubwa butuwana.​—Visi 27:11; Isaya 48:17.

3. Kulikehesa kwapwa kuka?

³ Kulikehesa kwapwa kujeneka kulyalesa nambe kulijundula. Mbimbiliya imwesa ngwayo munu wa kulikehesa azibuka ngwendi Yehova wapwa wakama kutubakana ikeye. Munu wa kulikehesa wamona bakwabo kupwa ba seho, co azibuka ngwendi bakwabo banamutubakana mu byuma bimo.​—Fili 2:3, 4.

4-5. Bika bitwendekela ngwetu cifwa ca munu keti cikeco cimwesa ngwaco wa kulikehesa?

⁴ Banu bamo bakasholoka ngwe ba kulikehesa oloni embwe. Hamo bapwa lika ba kwoloka, bakala lika na shwamwa, nambe bakala lika na kasingimiko mwafwa ya cisemwa  cabo nomu mubanabalelelamo. Co mu kwita kwa simbu, bamwesa bifwa byabo byabibi.​—Luka 6:45.

⁵ Beka bakasholoka ngwe balikulahela babenya nambe baka-kwendeka na kubatula, oloni oku kukumwesa ngwabo ba kulyalesa. (Yowa 1:46, 47) Banu ba cifwa eci banapande kunyanyama mangana keti bakulahele cashu cabo. Nga twakala na shwamwa nambe kutwakele nayo, tubaboshe tunapande kulikehesa.

6. Kwesekesa na 1 Kolinte 15:10, bika bitulilongesa kuli kapositolo Paulu?

⁶ Tusimutwiyeni hali kapositolo Paulu. Yehova wamupangesele mu kushimbika bikungulukilo mu binganda byabingi. Hamo wambulwile manene kutubakana tupositolo boshe ba Yesu Kilistu. Nameme ngoco, kalimwene kupwa wakama kutubakana bakwabo. Ngeci wendekele ngwendi: ‘Yange wamundondo ku tupositolo boshe, kunjapandelemo kunjitumbula kapositolo, omwo njayandesele cikungulukilo ca Njambi.’ (1 Koli 15:9) Paulu wazibukile ngwendi busamba bwendi na Yehova bwemanene ha kumutetela kuli Yehova, keti ha kupanga bipangi byabingi. (Tandeni 1 Kolinte 15:10.) Paulu walikehesele mwasonekelele baka-Kolinte mukanda. Muje mu mukanda kendekelemo majwi a kulijundula nameme bamo mu cikungulukilo balimwene kupwa bakama kutubakana ikeye.​—2 Koli 10:10.

7. Bika bimwesa ngwabyo ndolome Klein walikehesele?

⁷ Muzimbu wa mu kuyoya wa ndolome Karl F. Klein unashongangeya bangamba ba Yehova babangi. Ou ndolome wakele mu Cibunga ca Kutwamenena. Mu muzimbu wendi wendekelemo buzeye bwendi  na bukalu buje bwapindile nabwo ha myaka yaingi. Cakumwenako, ndolome Klein mwashangumukile kwambulula ku njubo na njubo mu 1922, kwamukaluwilile manene. Ngeci, walikelele kwambulula ha myaka ibali. Co mwakele na kupangela ha Mbetele ndolome umo wamunangwile, oloni ikeye wamuzindile. Kukapwa muje balizemene lalo. Ndolome Klein wabinjile lalo mushongo wa kwombwa, oloni mu kwita kwa simbu wakangukile. Nameme waliwanene nobu bukalu, wapangele bipangi byabingi mu munga ya Njambi. Ndolome Klein wendekele buzeye bwendi, nameme watsimanene. Oku kumwesa ngwabo wapwile wa kulikehesa. Bandolome na bandokazi babangi bacili na kwanuka ndolome Klein na muzimbu wendi wa mu kuyoya. *

8. Mukanda wa 1 Petulu 5:6, umwesa bati ngwawo Yehova wazema munu wa kulikehesa?

⁸ Tushaka kupwa ba kulikehesa mwafwa Yehova akazibi kubwaha nga tulikehesa. Kapositolo Petulu wendekele mwamubwa byei ñanda. (Tandeni 1 Petulu 5:6.) Libulu lya “Come Be My Follower” linendeka ha majwi endekele Petulu. Eli libulu ngwalyo: “Kulyalesa kwapwa ngwe bushungu. Mu kulyalesa mukatundu byuma byabibi manene. Munu wa kulyalesa nameme ali na cashu asa kupwa wangoco kuli Njambi. Oloni munu wa kulikehesa nameme kesi na cashu, Yehova asa kumupangesa manene. Yehova amibezikisa nga mulikehesa.” * Kuma kuli cuma cacibwa kutubakana kuzibisa Yehova kubwaha ndi?​—Visi 23:15.

9. Bika byasa kulingisa banu balikute busamba netu?

⁹ Nga tulikehesa, kutuzibisa lika Yehova kubwaha, oloni tuwana bubwa bukwabo lalo. Kulikehesa kulingisa bakwetu balikute busamba netu. Mwafwa bika? Mwafwa bitushaka, bikebyo bibashaka na bakebo. (Mateo 7:12) Kutwesi kubwahelela kukala na munu uje kesi kutolilila ku biyongola bya bakwabo, oloni washaka lika bakwabo balinge byatonda ikeye. Tukazibi kubwaha nga tuli na bakwetu baka-Kilistu mwafwa bakatuzibila mema ku mbunge, batuzema ha kupwa bandolome babo, co lalo bapwa ba kulikehesa. (1 Petu 3:8) Nga twashaka banu ba kulikehesa, co netu tulikeheseni mangana nabo batushake.

10. Kulikehesa kutukwasa bati tuyoye mwamubwa?

 ¹⁰ Kulikehesa kutukwasa tuyoye mwamubwa. Oloni bisimbu bimo, twasa kuliwana na byuma bije bitumona ngwetu kubyesi bwino. Cakumwenako, mwene Solomoni wendekele ngwendi: “Njamwene bindungo benda ha tubalu, oloni baka-kufuka benda hasi ngwe bindungo.” (Kwambu 10:7) Baje bali na cashu kubesi kubashangazala simbu yoshe. Oloni baje kubesi na cashu bisimbu bimo bakabashangazala manene. Mukemwo Solomoni wendekele ngwendi kutwapandele kulubala nga byuma kubitwendela mwamubwa, oloni tunapande kumona ngwetu mukemwo mubinafu byuma. (Kwambu 6:9) Nga tulikehesa tubwahelela nameme byuma bitenguluka, co kutusinganyeka ngwetu byuma byende mututondela.

11. Tunapande kulinga bati nga batunangula?

¹¹ Ha litangwa na litangwa, kuli bingila byabingi bitunasa kumweselamo kulikehesa kwetu. Tusimutwiyeniko bingila bimo. Nga batunangula. Nga munu atunangula, co twanukeni ngwetu tunasebuka. Kakangi tukashaka kuzambwila kubyana kutunangula. Tunasa kusinganyeka ngwetu kubapandele kutunangula, nambe ngwetu kubatunangwile mwamubwa. Oloni nga tu ba kulikehesa, tutaba kutunangula.

12. Kwesekesa na Visimo 27:5, 6, mwafwa bika tunapande kukandelela kuli munu uje natunangula? Endekeni cakumwenako.

¹² Munu wa kulikehesa akakandelela nga bamunangula. Cakumwenako, lingeni ngwe muli ku biwano. Co munima ya kusimutwiya na bandolome babangi, umo amisanena kumukulo na kumileka ngwendi byakulya byamisata ha mayo. Mwasa kuziba shwamwa. Oloni mukandelela kuli uje namileke, indi bati? Mwasa kusinganyeka ngweni ngwe nalibangele kunjileka simbu kanda njisimutwiye na banu babangi. Mu ngila imo lika, tunapande kukandelela kuli mukwetu muka-Kilistu uje atunangula. Ngeci, tumumoneni ngwetu napu kabusamba ketu, keti citozi cetu.​—Tandeni Visimo 27:5, 6; Ngala 4:16.

13. Twasa kulikehesa bati nga bakwetu babana bipangi mu cikungulukilo?

¹³ Nga bakwetu babana bipangi. Mukulunu wa cikungulukilo wa lizina lya Jason wendekele ngwendi: “Munjikamono bakwetu babana bipangi, njikalihula ngwange yange bali na kunjisezela bika?” Neni mukalizibi  ngoco ndi? Kukwabihile kushungwiya kupanga bipangi byabingi mu munga ya Njambi. (1 Tima 3:1) Oloni tunapande kunyanyama na byuma bitusinganyeka. Nga kutunyanyama, twasa kushangumuka kulyalesa. Cakumwenako, ndolome asa kusinganyeka ngwendi ikeye asa kupanga manene bipangi bimo mu cikungulukilo. Co lalo ndokazi nasa kwendeka ngwendi, ‘Munalume wange ikeye asa kupanga mwamubwa ebi bipangi kutubakana ndolome ngandi.’ Oloni nga tu ba kulikehesa, kutwasa kusinganyeka ngoco.

14. Bika bitulilongesa kuli Mosesa omwo bakwabo babanene bipangi?

¹⁴ Twasa kulilongesako bimo ku byuma byalingile Mosesa omwo bakwabo babanene bipangi. Mosesa wazemene cipangi cendi ca kutwamenena Baisalele. Nameme ngoco, Yehova wanene cashu ku banalume bamo mangana nabo bapange cipangi capangele Mosesa. Mosesa kabazibilile cipululu. (Kula 11:24-29) Oloni walikehesele, co watabele ngwendi bakwabo bamukwase mu cipangi ca kusompa banu. (Kutu 18:13-24) Ngeci, biñanda bya Baisalele kubyakele na kwishwala kubitala, mwafwa kwakele banalume babangi baka-kutala biñanda. Oku kumwesa ngwabo Mosesa wakele mbunge ku byuma bije bikwasa banu keti ku kulilundikila bipangi. Ou unapu mwanja waubwa kuli yetu. Nga tushaka ngwetu Yehova atupangese, co tunapande kupwa ba kulikehesa keti kukulahela cashu cetu. Anukeni ngweni “nameme Yehova wapwa wahakamwa, akamono munu wa kulikehesa.”​—Myaso 138:6, NWT.

15. Buyoye bwa bandolome na bandokazi bamo bunatenguluka bati kushwa mu 2014?

¹⁵ Nga byuma bitenguluka. Bandolome na bandokazi babangi baje banapangela Yehova ha myaka yaingi banabana bipangi byeka. Cakumwenako, tunyungi ba mbongi na banakazi babo babanene bipangi byeka  mwafwa cipangi cabo cahwile mu 2014. Kushwa mu mwaka ou bene, tunyungi ba kuzenguluka babalekele ngwabo cipangi cabo cihwa nga beta ha myaka 70. Co bandolome baje bali na myaka 80 nambe kutubakana, kubapu lalo baka-kukwatasanesa cibunga ca bakulunu. Co lalo bwingi bwa baje banapangela ha Mbetele banabatumu mu cipangi ca bupainiya. Bakwaboco banecela cipangi ca simbu yoshe mwafwa ya kubinja, kukwasa naanga, nambe byuma byeka.

16. Bandolome na bandokazi banalikehesa bati omwo banabana bipangi byeka?

¹⁶ Aba bandolome na bandokazi kwabakaluwilile kwizilila buyoye bwabuha. Bwingi bwabo bazemene bipangi bije bibapangele ha myaka yaingi. Bamo balizibile busiwa mubabanene bipangi byeka. Oloni mu kwita kwa simbu, banezilila buyoye bwabuha. Bika binabakwasa? Kuzema manene Yehova kukekwo kunabakwasa. Bazibuka ngwabo balikundikile kuli Njambi keti ku cipangi embwe. (Kolo 3:23) Ngeci banabwahelela kupanga cipangi coshe coshe. Bali na ‘kwaka bukalu bwabo hali ikeye,’ mwafwa bazibuka ngwabo wabaka mbunge.​—1 Petu 5:6, 7.

17. Bika twendekela ngwetu twabezika kukala na Lijwi lya Njambi lije litushongangeya tupwe ba kulikehesa?

¹⁷ Twabezika kukala na Lijwi lya Njambi lije lili na kutushongangeya tulikehese. Nga tulikehesa, bakwetu bashubuluka kukala netu, co netu tushubuluka kukala nabo. Kutukwasa lalo tukolese nga tuli na bukalu. Maneneni kutukwasa tulikute busamba na Tate yetu wa mwilu. Twabwahelela kuzibuka ngwetu nameme Njambi wapwa ‘Wahakamwa ya Byoshe,’ oloni wazema bangamba bendi ba kulikehesa, co wabamona kupwa ba seho.​—Isaya 57:15.