Ou mukanda ngwawo: “Nga umona tuhutu babayandesa mu lifuti lyeni na kubabindika busunga na moko yabo, co kesi ukomoke ha byuma bya ngacije, omwo mwata wamundondo bamunyunga kuli mwata wakama, co hakamwa yabo kubali beka lalo bakama babanyunga.”—Kwambu 5:8.

Nga kutumono byuma ngwe mwali na kubimwena Yehova, twasa kusinganyeka ngwetu eyi vesi yendeka lika bya baka-kuyula ba hano hasi. Oloni nga tusinganyekesesaho mwamubwa, tuwana ngwetu eyi vesi ili na kwendeka byuma bimo hali Yehova bije binapande kutuzembeleka na kututakamesa.

Mukanda wa Muka-kwambulula 5:8, unendeka bya muka-kuyula uje ayandesa tuhutu na kubalinga mwamubi. Unamwesa lalo ngwawo owo muka-kuyula napande kuzibuka ngwendi bakwabo baje bali na moko yakama kumutubakana bali na kumona byali na kulinga. Co kunasa kukala bakwabo baje banabatubakana. Tuzibuka ngwetu aba baka-kuyula boshe banasa kulinga byuma mu ngila ya kuhenga, co banu banasa kuyanda.

Nameme kusholoka ngwe byuma kubyasa kutenguluka, oloni kuzibuka ngwetu Yehova ali na kumona bibali na kulinga baka-kuyula, kutuzembeleka. Twasa kulomba Njambi atukwase na kukundika tuyando twetu kuli ikeye. (Myaso 55:22; Fili 4:6, 7) Tuzibuka ngwetu “Shukulu Kalunga [ali na kumona] kaye koshe, ngeci amwese nzili baje banakulahela kuli ikeye na bimbunge byabo byoshe.”—2 Mizi 16:9.

Ngeci mukanda wa Muka-kwambulula 5:8 utukwasa kumona byuma bili na kulingiwa muno mu kaye. Umwesa ngwawo kuli banu bali na moko kutubakana bakwabo. Ou mukanda utukwasa lalo tuzibuke ngwetu Yehova ikeye ali na moko kutubakana banu boshe. Ali na kuyula kwitila muli Munendi, Yesu Kilistu uje napu Mwene wa Bumwene bwendi. Co Yehova Muka-nzili Yoshe na Munendi bakalingi byuma mu ngila yaibwa.