1. Yesu walanyele baka-kujebela bisi bawana mangana balinge bika, co balingile bati?

PETULU, Anduleo, Yakomba na Yowano, baje bapwile bandongesi ba Yesu, bakele na kutsiya bisi ba kulandesa. Hamo bakomokele omwo Yesu wabalekele ngwendi: “Njikabeni, co njikamipwisa baka-kujebela banu.” * Balingile bati? Mbimbiliya ngwayo: “Bwasi-bwasi basezele manimbwa abo, bakabele Yesu.” (Mateo 4:18-22) Cuma cibangwile kulinga catengulwile buyoye bwabo. Becelele cipangi ca kujebela bisi na kushangumuka ‘kujebela banu.’ (Luka 5:10) Ano matangwa, Yesu ali na kulanya banu baje bazema busunga mangana balinge eci cipangi. (Mateo 28:19, 20) Mwatambula eci cipangi canatwana Yesu ca kujebela banu ndi?

2. Tunapande kumona bati cipangi ca kwambulula, co bika bitukwasa tulyangwile kupwa muka-kwambulula?

² Hamo munashu laja kulilongesa Mbimbiliya, co munatengulula futisi yeni. Ngeci, munapande kupwa muka-kwambulula muzimbu waubwa. Nga kumuzibuka mwamubwa indi munapande kutambula cilanyo ca Yesu, keti muzeye. Kujeneka kuzambwila kulinga ngoco kumwesa ngwabo mwamona cipangi ca kwambulula kupwa ca seho. Mbimbiliya imwesa ngwayo Petulu na bakwabo basezele manimbwa abo “bwasi-bwasi.” Nameme ngoco, basinganyekesesele tahi asina bawaseze. Bingonde 6 simbu  kanda Yesu abalanye, te banazibuka ngwabo Yesu ikeye Mesiya. (Yowa 1:35-42) Neni hamo munalilongesa byabingi hali Yehova na Yesu, co mushaka kutwalelelaho kukola ku sipilitu. Oloni simbu kanda mulyangwile kupwa muka-kwambulula, munapande kusinganyekesesa mwamubwa. Bika byakwasele Petulu, Anduleo na bakwabo bangule mwamubwa bya kulinga?

3. Bifwa muka bimikwasa kutambula bwasi cilanyo ca Yesu?

³ Bandongesi ba Yesu ba kulibanga bakele na lishungu lya kupanga, bazibukile cipangi mwamubwa, basimpile, co lalo bakele mbunge ku cipangi. Ebi bifwa byabakwasele bapange mwamubwa cipangi ca kujebela banu. Muno mu cilongesa, tusimutwiya mumwasa kupwila nebi bifwa mangana mupange mwamubwa cipangi ca kwambulula na kulongesa banu muzimbu waubwa.

4. Mwafwa bika Petulu wapwile muka-kujebela bisi?

⁴ Petulu wakele na kutsiya bisi mangana akwase naanga yendi. Oloni kakele na kulingila lika kushuka naanga yendi, wazemene kujebela bisi. (Yowa 21:3, 9-15) Petulu walilongesele lalo kujebela banu, co wazemene eci cipangi. Ngeci Yehova wamukwasele kulinga mwamubwa eci cipangi.—Vili 2:14, 41.

5. Byuma muka bibanendeka ku Luka 5:8-11 bije byalingisile Petulu azibe lyoba, co bika bitukwasa nga tuliziba ngwe mwalizibilile?

⁵ Kuzema Yehova cikeco cuma cakama cikatushongangeya kwambulula. Kuzema Yehova kutulingisa twambulule muzimbu nameme tuliziba ngwe kutwesi na cashu ca kulinga ngoco. Omwo Yesu walanyele Petulu ngwendi apwe muka-kujebela banu, wamulekele ngwendi: “Kesi uzibe lyoba.” (Tandeni Luka 5:8-11.) Petulu kashotele mbunge ha byuma  byasa kulingiwa omwo apwa ndongesi. Oloni wakomokele manene omwo Yesu walingile cikomokeso ca kubakwasa batsiye bisi babangi. Co Petulu walizibile ngwe kafwila kupanga na Yesu. Neni omwo munazibuka byalibungila mu kupwa ndongesi ya Kilistu, mwasa kusinganyeka ngweni kumwasa kupwa ndongesi yendi. Nga muli na kuliziba ngoco, co munapande kuzema manene Yehova na Yesu na banu bamunapande kwambulwila. Oku kumilingisa mutambule cipangi canatwana Yesu ca kujebela banu.—Mateo 22:37, 39; Yowa 14:15.

6. Byuma muka bikwabo bikatushongangeya kwambulula?

⁶ Tusimutwiyeni byuma bikwabo bije bikatushongangeya twambulule. Twashaka kwononoka lishiko lya Yesu. Washikile ngwendi: ‘Yeni na kupwisa bandongesi.’ (Mateo 28:19, 20) Co lalo tukambulula mwafwa banu bali na ‘kuyanda’ ku sipilitu, co bashaka kulilongesa bya Bumwene. (Mateo 9:36) Yehova ashaka ngwendi banu boshe boboke na kuzibuka busunga.—1 Tima 2:4.

7. Mukanda wa Loma 10:13-15 umwesa bati seho ya cipangi ca kwambulula?

⁷ Kusinganyekesesa omwo cipangi ca kwambulula casa kwobwelamo banu, kutushongangeya tulinge eci cipangi. Baka-kujebela bisi bakatsiyi bisi ba kulya nambe ba kulandesa, oloni yetu ‘tukajebela’ banu mangana tubobole.—Tandeni Loma 10:13-15; 1 Tima 4:16.

8-9. Byuma muka byanapande kuzibuka muka-kutsiya bisi, co mwafwa bika?

⁸ Mu simbu yayoyele Yesu, Kaisalele muka-kutsiya bisi wapandele kuzibuka cifwa ca bisi bapandele kutsiya. (Levi 11:9-12) Wapandele lalo kuzibuka kubawaniwa obo bisi. Bisi bakakala mu mitambela ya kuliseza-seza ya ndonga, kuje kuli cifwa ca mema abalitombola nawo na byakulya byabingi. Muka-kutsiya bisi napande lalo kuzibuka simbu yaibwa ya kuya na kutsiya bisi. Kamishinali umo uje wakala ha likanda lya Pacific, walilongesele ngwendi kuli simbu yaibwa ya kuya na kutsiya bisi. Ndolome umo wa haje ha likanda wamulanyele ngwendi baye hamo mu kutsiya bisi. Owo kamishinali walekele ndolome ngwendi: “Njakumiwana imene ha simbu ya 9 kiloko ya mutondo.” Ndolome wakumbulwile ngwendi: “Kwahi ndolome. Cacibwa kuya ha simbu ije itwasa kukawana bisi babangi, keti kuya ha simbu itumona yetu ngwetu ikeyo yaibwa.”

⁹ Mu ngila imo lika, bandongesi ba Yesu baje bapwile baka-kujebela banu, bakele na kwambulwila ku myela kuje kwakele na kuwaniwa banu na ha simbu ibakele na kuwaniwako. Cakumwenako, bakele na kwambulwila mu tembele, mu sinangonge, ku njubo na njubo na ku maketi. (Vili 5:42; 17:17; 18:4) Netu tunapande kuzibuka simbu itunasa kuwana banu mu citingitingi cetu mangana twase kubambulwila. Tunapande kutengulula-tengulula cinoneko cetu mangana twase kwendela banu ha simbu inapande na ku myela kutwasa kubawana.—1 Koli 9:19-23.

10. Munga ya Yehova yatwana bikwata muka?

¹⁰ Muka-kutsiya bisi napande kukala na bikwata byabibwa bya kupangesa na kuzibuka mwa kubipangesela. Netu tunapande kukala na bikwata binapande bya kupangesa mu kwambulula. Co tunapande kuzibuka mwakubipangesela. Yesu walongesele bandongesi bendi mwakwambulwila. Wabalekele byuma bibapandele kwambata, myela kwakwambulwila na byuma bibapandele kwendeka. (Mateo 10:5-7; Luka 10:1-11) Ano matangwa, munga ya Yehova inatubwahesela cikasha ca bikwata byakupangesa mu kulongesa bije bili na kutukwasa. *  Co bali na kutulongesa mwakupangesela ebi bikwata. Byuma bituli na kulilongesa bili na kutukwasa tusimpe na kwambulula mwamubwa.—2 Tima 2:15.

11. Mwafwa bika baka-kujebela banu banapande kupwa ba kusimpa?

¹¹ Baka-kutsiya bisi banapande kupwa ba kusimpa. Simbu imo bakaliwana na bukalu mu Ndonga. Kakangi bakapanga butsiki, co simbu imo kukakala mankimba a kutewesa. Baka-kujebela banu nabo banapande kupwa ba kusimpa. Nga tushangumuka cipangi ca kwambulula na kuleka bakwetu ngwetu tu Bakaleho ba Yehova, baka-naanga yetu basa kutulwisa, babusamba basa kutushendumuna, co banu bamo basa kubyana kubambulwila. Oloni kutwapandele kukomoka. Yesu wendekele ngwendi bandongesi bendi bakambulula ku banu bamo baje bakabalwisa.—Mateo 10:16.

12. Kwesekesa na Yoshwa 1:7-9, bika bitukwasa tupwe ba kusimpa?

¹² Mwasa kupwa bati ba kusimpa? Ca kulibanga, kulaheleni ngweni Yesu ali na kutwamenena cipangi ca kwambulula. (Yowa 16:33; Kujo 14:14-16) Ca mu cibali, kulaheleni ngweni Yehova amyana byuma byoshe bya ku mubila bimutonda. (Mateo 6:32-34) Nga mukanyamesa likulahelo lyeni, co mupwa ba kusimpa. Petulu na bakwabo bamwesele ngwabo bakele na likulahelo lya kukanyama mu basezele cipangi ca kujebela bisi na kukabangeya Yesu. Neni mwamwesele ngweni muli na  likulahelo lya kukanyama mumwalekele baka-naanga yeni na babusamba beni ngweni muli na kulilongesa Mbimbiliya na Bakaleho ba Yehova na kukunguluka. Munamwesa ngweni muli na likulahelo, co lalo mu ba kusimpa omwo munatengulula buyoye bweni na kuyoya mu kulitombola na mashiko a Yehova. Ngeci, omwo mutwalelelaho kupwa ba kusimpa, kulaheleni ngweni ‘Yehova Njambi yeni ali hamo neni kwoshe kumuya.’—Tandeni Yoshwa 1:7-9.

13. Kulombela na kusinganyekesesa kumikwasa bati mupwe ba kusimpa?

¹³ Bika bikwabo bimikwasa mupwe ba kusimpa? Lombeni Yehova amikwase kupwa ba kusimpa. (Vili 4:29, 31) Yehova akumbulula malombelo eni, co kamyumbila kuti. Atwalelelaho kumikwasa. Co lalo singanyekeseseni ha banu bamo ba kunima bobwele Yehova. Singanyekeni lalo mwanamikwasela muhyane byeseko bimunaliwana nabyo na kutengulula futisi yeni. Wakwasele banu bendi bete ha Kalunga-ndonga wa Kubenga, co neni amikwasa mupwe ndongesi ya Kilistu. (Kutu 14:13) Kulaheleni Yehova ngwe mwalingile muka-kwimba umo uje wendekele ngwendi: “Shukulu Kalunga ali hamo nange, kunjizibi lyoba, munu asa kunjilinga bikajo?”—Myaso 118:6.

14. Bika bimulilongesa kuli Masae na Tomoyo?

¹⁴ Cuma cikwabo casa kumikwasa kupwa ba kusimpa cinapu kuzibuka omwo Yehova wakwaselelemo banu baje bakele na lyoba mangana bapwe ba kusimpa. Tucisimutwiyeni hali ndokazi Masae. Wakele na lyoba, co wasinganyekele ngwendi kasa kwambulula. Walizibile ngwe kwendeka na banu baje kazibuka kwakukalu manene. Kuli ikeye kwafwile lika ngwe kulonda ha cibumbe cacilaha cije kucasiwa kulondaho. Ngeci, walingileko byuma bimo bije byamukwasele azeme manene Njambi na banu. Wasinganyekesesele ha bundende bwa simbu inasalako, co walombelele kuli Njambi mangana amukwase kukala na lishungu lya kwambulula. Ngeci wasimpile, co hano ali na kulinga bupainiya bwa simbu yoshe. Yehova asa kukwasa baka-kwambulula babaha bapwe ba “kusimpa.” Tusimutwiyeniko lalo hali ndokazi Tomoyo. Washangumukile cipangi ca kwambulwila ku njubo na njubo. Mwaketele ha njubo ya kulibanga, babenya njubo watenukile, co wendekele ngwendi: “Kunjishaka kusimutwiya na Bakaleho ba Yehova,” co washokele lipito. Tomoyo walekele ndokazi yakele na kupanga nendi ngwendi: “Munazibi byanendeka ndi? Nameme byahi binjinendeka, oloni nazibuka ngwendi nji Mukaleho wa Yehova. Njabwahelela manene.” Tomoyo napu oni painiya wa simbu yoshe.

15. Kwaka mbunge ku cipangi kunambatesela kulinga bika, co mwafwa bika baka-Kilistu banapande kulinga ngoco?

¹⁵ Baka-kutsiya bisi, bakaka mbunge ku cipangi cabo asina bawane bisi babangi. Kwaka mbunge ku cipangi kunambateselela na kuwa mbunge mangana munu amanese bipangi byoshe bije binapande kulingiwa. Baka-kutsiya bisi bakaka mbunge ku cipangi mukemwo bakameneka mutondo-tondo na kutwalelelaho kutsiya bisi kwetela noho ha bamanesela nameme kwija lihunzi na mankimba. Netu tunapande kwaka mbunge ku cipangi asina twase kukolesa kweta noho hatukamanesela cipangi.—Mateo 10:22.

16. Bika byasa kutukwasa kwaka mbunge ku bipangi?

¹⁶ Kutwasemukile na cashu ca kwaka mbunge ku bipangi. Kakangi tukashaka lika kulinga byuma mu ngila yayasi. Kwaka mbunge ku bipangi kwatonda kulifwita. Ngeci, tunapande kulomba bukwasi nga tuliziba ngwetu kutwasa  kulinga bipangi bimo. Yehova atukwasa kupangesa sipilitu yendi ya kujela.—Ngala 5:22, 23.

17. Bika byapandele kulinga Paulu mangana ake mbunge ku bipangi, bije byendekele ku 1 Kolinte 9:25-27?

¹⁷ Kapositolo Paulu wakele mbunge ku bipangi. Oloni wendekele ngwendi wapandele kulintula mubila wendi mangana alinge byabibwa. (Tandeni 1 Kolinte 9:25-27.) Walekele bakwabo ngwendi bake mbunge ku bipangi na kulinga byuma byoshe ‘mwamubwa na muje mubinapande.’ (1 Koli 14:40) Tunapande kwaka mbunge ku bipangi asina twase kutwalelelaho kulinga byuma bya ku sipilitu bije binambateselela cipangi ca kwambulula na kulongesa banu muzimbu waubwa.—Vili 2:46.

18. Byuma muka byasa kulingisa Yehova atumone ngwendi tuli na kulinga mwamubwa cipangi?

¹⁸ Muka-kutsiya bisi akalizibi ngwendi nalingi mwamubwa cipangi cendi nga natsii bisi babangi. Oloni yetu kutwesi kuliziba ngwetu tunalingi mwamubwa kwesekesa na banu ba tunakwasa kwija mu cikungulukilo. (Luka 8:11-15) Nga tukolesa na kutwalelelaho kwambulula muzimbu waubwa na kulongesa bakwetu, co Yehova amona ngwendi tuli na kulinga mwamubwa cipangi. Mwafwa bika? Mwafwa nga tulinga ngoco, co twononoka kuli ikeye na kuli Munendi.—Mako 13:10; Vili 5:28, 29.

19-20. Mwafwa bika tunapande kupanga na nzili cipangi ca kwambulula?

¹⁹ Mu mafuti amo bakashoko cipangi ca kutsiya bisi ha bingonde bimo. Mu mafuti a cifwa eci, muka-kutsiya bisi napande kupanga na nzili omwo simbu ya kushoka cipangi ca kutsiya bisi ili muyehi. Ha kupwa baka-kujebela banu tunapande kupanga na nzili cipangi ca kwambulula mwafwa kukotoka kwa kaye kuli muyehi manene. Simbu yasalako ya kulinga eci cipangi yaindondo manene. Keti mukwate-kwate ku masinde nambe kubandamena ngweni byuma bicikale mwamubwa asina mulinga eci cipangi ca seho.—Kwambu 11:4.

²⁰ Lingeniko bimo hano bene mangana mukale na lishungu lya kupanga, mulilongese byabingi mu Mbimbiliya, mupwe ba kusimpa na kwaka mbunge ku cipangi. Pangeleni hamo na baka-kujebela banu ba kutubakana 8 milyoni, co mubwahelela mwafwa ya Yehova. (Nehe 8:10) Twaleleleniho kupanga na nzili eci cipangi kweta noho hacikahwila. Mu cilongesa cinatako, tusimutwiya byuma bitatu bije byasa kutukwasa tutwaleleleho kwambulula bya Bumwene ha kupwa baka-kujebela banu.