1-2. Kwesekesa na 1 Timateo 6:20, bika byapandele kulinga Timateo?

BISIMBU bimo, tukana bakwetu byuma bya seho mangana batutulikilebyo. Cakumwenako, tukatulikila bimbongo byetu ku banki. Mutukalingi ngoco, tukazibuka ngwetu baka-banki batulika bimbongo byetu mwamubwa, co wahi asa kubizimbalesa nambe kubiba. Ngeci, tuzibuka bikulumbununa kwana munu byuma bije bitwamona kupwa bya seho mangana abinyunge.

² Tandeni 1 Timateo 6:20. Kapositolo Paulu wanukisile Timateo ngwendi watambwile byuma bya seho. Wazibukile byuma byanayongola Njambi kukalingila banu. Bamwanene lalo cipangi ca ‘kwambulula lijwi’ na kulinga “bipangi bya muka-kwambulula biñanda byabibwa.” (2 Tima 4:2, 5) Paulu walekele Timateo ngwendi anyunge mwamubwa byuma bibamwanene. Ngwe mwa Timateo, netu banatwana byuma bya seho. Byuma muka bene obyo? Co mwafwa bika tunapande kunyunga byuma bya seho byanatwana Yehova?

3-4. Mwafwa bika busunga bwa mu Mbimbiliya bwapwa bwa seho?

³ Yehova natukwasa tuzibuke busunga bwa mu Lijwi lyendi, Mbimbiliya. Binangulo bya mu Mbimbiliya byapwa bya seho mwafwa bitukwasa tulikute busamba na Yehova, co lalo bitukwasa kuzibuka byuma bitulingisa tubwahelele. Nga tukulahela binangulo bya mu Mbimbiliya na kubipangesa, co kutungumuka na bilongesa bya makuli. Co lalo tukala na futisi yaibwa.—1 Koli 6:9-11.

⁴ Busunga bwa mu Lijwi lya Njambi bwapwa bwa seho mwafwa Yehova akabusholola lika ku banu ba kulikehesa,  “ba bimbunge byabibwa.” (Vili 13:48) Banu ba kulikehesa bazibuka ngwabo Njambi ali na kupangesa ndungo wa kulongwa na kunyanyama mangana atulongese Mbimbiliya. (Mateo 11:25; 24:45) Kutwasa kuzibisisa Mbimbiliya likalyetu lika, kubanga bakwetu batukwase, co kuizibisisa kwapwa kwa seho manene.—Visi 3:13, 15.

5. Byuma muka bikwabo byanatwana Yehova?

⁵ Yehova natwana lalo cipangi ca kulongesa bakwetu busunga na kubaleka byuma byanayongola kukalinga kulutwe. (Mateo 24:14) Muzimbu utuli na kwambulula wapwa wa seho mwafwa uli na kukwasa banu baije mu naanga ya Yehova na kubakwasa bakawane mwonyo wa myaka yoshe. (1 Tima 4:16) Hamo tukambulula manene nambe kamandondo, oloni tubaboshe tuli na kukwasa mu cipangi ca seho manene cije cili na kulingiwa ha simbu ino. (1 Tima 2:3, 4) Twabezika manene kupangela hamo na Njambi.—1 Koli 3:9.

6. Bika bibalingile banu bamo baje becelele kumona byuma byabanene Yehova kupwa bya seho?

⁶ Baka-Kilistu bamo ba mu simbu yayoyele Timateo, kubakele na kumona seho ya kupangela hamo na Njambi. Cakumwenako, Ndemase wazemene manene byuma bya muno mu kaye, co wecelele kupangela hamo na Paulu. (2 Tima 4:10) Fingelyase na Helemengenese hamo balikelele kwambulula mwafwa batewele kubayandesa ngwe mubayandeselele Paulu. (2 Tima 1:15) Haimenease, Alekizanda na Filetase bapwile baka-kutengulukila, co basezele busunga. (1 Tima 1:19, 20; 2 Tima 2:16-18) Aba banu boshe bapwile ba kukanyama ku sipilitu, oloni becelele kumona byuma byabanene Yehova kupwa bya seho.

7. Satana akalingi bika mangana atushongangeye kulinga byatonda?

⁷ Satana akatulingisa bati twecele kumona byuma byanatwana Yehova kupwa bya seho? Tusimutwiyeniko ha bingila bimo byakapangesa Satana. Akapangesa byuma bya kulizima nabyo buli na biñanda bibakendeka baka-mizimbu mangana atushongangeye kusinganyeka na kulinga byuma bitwecelesa kuzema Yehova. Co akatujujwisa kupangesa babusamba betu nambe kutuyandesa mangana twecele kwambulula. Co lalo, akatushongangeya tutolilile ku ‘byuma bya bulema bije bibatumbula banu ngwabo mana’ bije bibakendeka baka-kutengulukila mangana atutundise mu busunga.—1 Tima 6:20, 21.

8. Bika bimulilongesa ku byuma byaliwanene nabyo ndolome wa lizina lya Daniel?

⁸ Nga kutunyanyama, twasa kutunda mu  busunga kamandondo-kamandondo. Tusimutwiyeni hali ndolome Daniel * uje wazemene manene kweha bweho bwa ha makina. Wendekele ngwendi: “Njashangumukile kweha bweho bwa ha makina te njili na myaka 10. Ha kulibanga, njakele na kweha bweho bwabubwa. Oloni kamandondo-kamandondo, njashangumukile kweha bweho bwa lwozi na buje bumwesa bilinga bya bundemone.” Mu kwita kwa simbu, Daniel wakele na kweha obu bweho ha maola 15 ha litangwa. Daniel ngwendi: “Njazibukile ngwange bweho bunjakele na kweha na simbu injakele na kubiisilaho byakele na kunjangununa kuli Yehova. Oloni njakele na kulikwisa ngwange binangulo bya mu Mbimbiliya kubyasa kunjikwasa.” Nga kutunyanyama, kulizima buli kunasa kutulingisa tutunde mu busunga na kuzimbalesa byuma bya seho byanatwana Yehova.

9. Kwesekesa na 1 Timateo 1:18, 19, Paulu wesekesele Timateo ku bika?

⁹ Tandeni 1 Timateo 1:18, 19. Paulu wesekesele Timateo ku liswalale, co wamulekele ngwendi ‘alwe mwamubwa.’ Paulu kalumbunwine nzita ya kulwa na banu, oloni walumbunwine nzita ya ku sipilitu. Baka-Kilistu banalifu bati na maswalale baje bali na kulwa nzita? Bifwa muka bitunapande kukala nabyo ha kupwa maswalale ba Kilistu? Tusimutwiyeni byuma bitanu bitulilongesa ku cakumwenako ca Paulu, bije bitukwasa tunyunge busunga.

10. Mwafwa bika tunapande kupwa ba kulongwa kuli Njambi?

¹⁰ Pweni ba kulongwa. Liswalale wa kulongwa wapwa wamubwa. Akalu mangana anyungilile banu bazema nambe byuma bimo bije byapwa bya seho kuli ikeye. Paulu washongangeyeye Timateo ngwendi apwe wa kulongwa kuli Yehova. (1 Tima 4:7) Nga tuzema manene Njambi na kupwa ba kulongwa kuli ikeye, co tutwalelelaho kunyunga busunga.—1 Tima 4:8-10; 6:6.

11. Mwafwa bika tunapande kulinangula yetu babenya?

¹¹ Linanguleni yeni babenya. Liswalale napande kupanga na nzili mangana alibwahesele kulwa simbu yoshe. Timateo nendi watwaleleleho kukanyama ku sipilitu mwafwa wakabangeyeye cinangulo ca Paulu. Wamunangwile ngwendi ajenjuke ku mashungu amabi, akale na bifwa byabibwa na kulikwatasana na bandolome na bandokazi bendi. (2 Tima 2:22) Timateo wapandele kupanga na nzili asina ase kulinga ngoco. Tunapande kulinangula yetu babenya asina twase kujenjuka ku mashungu amabi. (Loma 7:21-25) Kutundoho, tunapande kupanga na nzili asina twase kushulula bunu bwa laja na kuzala bunu bwabuha. (Efeso 4:22, 24) Co lalo, nga tunajuka munima ya kupanga litangwa lyoshe, tunapande kulinangula yetu babenya asina twase kuya ku biwano.—Heve 10:24, 25.

12. Bika bitukwasa tupangese mwamubwa Mbimbiliya?

¹² Liswalale napande kulizilisa mwakupangesela bitwa byendi. Co napande kulizilisa kushwa kumo mangana azibuke mwamubwa mwakubipangesela. Mu ngila imo lika, netu tunapande kuzibuka mwakupangesela mwamubwa Lijwi lya Njambi. (2 Tima 2:15) Nga tuli ku biwano, twasa kulolilongesa mwakupangesela Mbimbiliya. Oloni nga tushaka kukwasa bakwetu bakulahele ngwabo binangulo bya mu Mbimbiliya byasa kubakwasa, co tunapande kulilongesa Mbimbiliya simbu yoshe. Tunapande kupangesa Lijwi lya Njambi mangana tukanyamese likulahelo lyetu. Ngeci, tunapande kusinganyekesesa ha byuma bitutanda na kutondesesa mu mabulu etu mangana  tuzibisise mwamubwa Bisoneka na kubipangesa. (1 Tima 4:13-15) Nga tulinga ngoco, co twasa kupangesa Lijwi lya Njambi mu kulongesa bakwetu. Kutwapandele kubatandela lika cisoneka. Oloni tunapande kubakwasa bacizibisise na kucipangesa. Nga tulilongesa Mbimbiliya simbu yoshe, co twasa kupwa balongesi bababwa ba Lijwi lya Njambi.—2 Tima 3:16, 17.

13. Byuma muka bibanendeka ku Vahevelu 5:14, bitunapande kulinga mangana twangunune byabibwa ku byabibi?

¹³ Nangukeni. Liswalale napande kunanguka bukalu na kubujenjuka. Netu tupande kunanguka byuma bije byasa kutukobelesa mu bukalu na kubijenjuka. (Visi 22:3; tandeni Vahevelu 5:14.) Cakumwenako, tunapande kwangula mwamubwa byuma bitulizima nabyo buli. Byuma bibakamwesa ha TV na mu mafilimu bikamwesa banu balinga byuma byabibi. Byuma bya cifwa eci bikalubalesa Njambi, co binasa kutukobelesa mu bukalu. Ngeci, kutwapandele kulizima buli na byuma byabibi mwafwa binasa kutuzeyesa ku sipilitu kamandondo-kamandondo.—Efeso 5:5, 6.

14. Kunanguka kwakwasele bati Daniel?

¹⁴ Daniel itunabanga kwendeka wanangukile ngwendi kweha bweho bwa lwozi na buje bumwesa bilinga bya bundemone kumukobelesa mu bukalu. Watondesesele mu Watchtower Library mangana awane biñanda bimukwasa. Bubwa muka bwatundilemo? Wecelele kweha bweho bwabubi bwa ha makina. Walikelele kuya ha mutamba wa ha intaneti haje hakele bweho bwa cifwa eci, na kwecela kulikwatasana na baje bakele na kweha obu bweho. Daniel ngwendi: “Simbu injakele na kubiisila ku kweha buje bweho oku njalishokelela mu njibo njakele na kuipangesa mu kulinga byuma bimo na bandolome na bandokazi.” Ha simbu ino Daniel napu painiya wa simbu yoshe na mukulunu mu cikungulukilo.

15. Mwafwa bika kutwapandele kutolilila ku biñanda bya makuli?

¹⁵ Ngwe mwa Timateo, tunapande kunanguka biñanda bya makuli bibakendeka baka-kutengulukila. (1 Tima 4:1, 7; 2 Tima 2:16) Cakumwenako, banasa kwendeka biñanda bya makuli hali bandolome betu mangana keti tukulahele munga ya Yehova. Biñanda bya cifwa eci byasa kuzeyesa likulahelo lyetu.  Kutwapandele kubikulahela. Mwafwa bika? Mwafwa banu bakendeka biñanda bya cifwa eci “mana abo kuwesi kupanga, co kubesi na busunga.” Bashaka lika kukatula “bimata.” (1 Tima 6:4, 5) Bashaka ngwabo tukulahele biñanda bya makuli bibendeka na kujeneka kukulahela bandolome betu.

16. Byuma muka bitunapande kujenjuka?

¹⁶ Keti mutabese byuma byeka bimyungumune. Ha kupwa “liswalale wamubwa wa Kilistu Yesu,” Timateo wapandele kwaka mbunge ku cipangi ca kwambulula. Kapandele kwaka mana ku kushakezeka bufuko nambe byuma byeka bya ku mubila. (2 Tima 2:3, 4) Ngwe mwa Timateo, netu kutwapandele kutabesa byuma bya ku mubila bitungumune. ‘Kuzema bufuko’ kunasa kutwonowesa kuzema Yehova na Lijwi lyendi, co lalo kunasa kutwonowesa kwambulwila bakwetu. (Mateo 13:22) Tunapande kwasiwisa buyoye bwetu mangana tupangese nzili na simbu yetu ku ‘kushakezeka Bumwene bwendi.’—Mateo 6:22-25, 33.

17-18. Bika bitunapande kulinga mangana tunyungilile busamba bwetu na Yehova?

¹⁷ Libwaheseleni. Liswalale napande kulibwahesela simbu kanda bukalu bwije. Nga tushaka kunyungilila byuma byanatwana Yehova, co tunapande kulingako bimo bwasi-bwasi omwo tumona bukalu. Bika bitukwasa kulinga ngoco? Tunapande kulibwahesela simbu kanda bukalu bwije.

¹⁸ Cakumwenako, nga banu bali ku cilika, banapande kuzibukila cimweja cikolo cije cili kuyehi nabo simbu kanda cilika cishangumuke. Mwafwa bika? Mangana base kutuhukilako bwasi-bwasi nga kusholoka bukalu. Mu ngila imo lika, netu tunapande kusinganyekela cimweja bitulinga nga tumona bikupulo bya bukwizi, bya lwozi nambe mizimbu ya baka-kutengulukila ha intaneti nambe ha TV. Nga tulibwahesela cimweja, co twasa kulingako bimo bwasi-bwasi mangana tunyungilile busamba bwetu na Yehova na kupwa ba kujela ku mesho endi.—Myaso 101:3; 1 Tima 4:12.

19. Bibezikiso muka bituwana nga tunyungilila byuma bya seho byanatwana Yehova?

¹⁹ Tunapande kunyungilila byuma bya seho byanatwana Yehova. Ebi byuma binapu busunga bwa mu Mbimbiliya na cipangi ca kulongesa bakwetu obu busunga. Nga tulinga ngoco, co tukala na citakutaku ca kujela na kulikuwa kuyoya, co lalo tubwahelela omwo tukwasa bakwetu bazibuke Yehova. Njambi atukwasa tunyungilile byuma byanatwana.—1 Tima 6:12, 19.