CILONGESA 37
‘Twaleleleniho Kupanga’
“Kuna mbuto yobe mutondo, co twalaho na kupanga noho cingwezi.”—KWAMBU 11:6.
MWASO 68 Kucala Peu ya Mubuso
BILI MUNO MU CILONGESA *
1-2. Mukanda wa Muka-kwambulula 11:6 wendeka bika ha cipangi ca kwambulula?
MU MAFUTI amo, banu bakatolilila mwamubwa ku muzimbu waubwa. Bali na lishungu lya kutolilila. Oloni mu mafuti akwabo, banu kubashaka kuziba bya Njambi nambe biñanda bya mu Mbimbiliya. Banu bakatolilila ku muzimbu waubwa ku mutambela kumwakala ndi? Nameme banu batolilila indi kubatolilila, Yehova ashaka ngwendi tutwaleleleho kwambulula kweta na ha simbu yakendeka ngwendi cipangi ca kwambulula cinahu.
2 Yehova ikeye azibuka simbu icikahwa cipangi ca kwambulula, co “kukotoka kwa kaye kukaija.” (Mateo 24:14, 36) Oloni simbu kanda cipangi ca kwambulula cihwe, tunapande kulinga bika mangana ‘tutwaleleleho kupanga’? *—Tandeni Muka-kwambulula 11:6.
3. Bika bitusimutwiya muno mu cilongesa?
3 Mu cilongesa cinahu, tunasimutwiiye ha byuma biwana bije bitukwasa kulinga mwamubwa cipangi ca “kujebela banu.” (Mateo 4:19) Muno mu cilongesa tusimutwiya byuma bitatu bije bitukwasa tutwaleleleho kwambulula nameme tuliwana na bukalu. Tulilongesa bikwapwila kwa seho (1) kwaka mbunge ku cipangi ca kwambulula, (2) kukala na mbunge ya kubandamena na (3) kukanyamesa likulahelo lyetu.
AKENI MBUNGE KU CIPANGI CA KWAMBULULA
4. Mwafwa bika tunapande kwaka mbunge ku cipangi canatwana Yehova?
4 Yesu walekele bandongesi bendi bifwa bibakakala nabyo banu na byuma bikalingiwa mu matangwa a kukotoka. Yesu wazibukile ngwendi ebi byuma byasa kwonowesa bandongesi bendi kwaka mbunge ku cipangi ca kwambulula, mukemwo wabalekele ngwendi ‘banyanyame.’ (Mateo 24:42) Ano matangwa, tuli na kuliwana na byuma bya kulifwa na bije bibakele na kuliwana nabyo banu ba mu simbu ya Nowa, bije byabonowesele kutolilila ku muzimbu wakele na kwambulula. (Mateo 24:37-39; 2 Petu 2:5) Ngeci tushaka kwaka mbunge ku cipangi canatwana Yehova.
5. Mukanda wa Vilinga 1:6-8, umwesa bati bukama bwa cipangi ca kwambulula?
5 Tunapande kwaka mbunge ku cipangi ca kwambulula muzimbu waubwa wa Bumwene. Yesu wapolofwetele ngwendi bandongesi bendi bakalinga byabingi mu cipangi ca kwambulula kutubakana ikeye. (Yowa 14:12) Yesu mwatsile, bandongesi bendi bamo belukile ku cipangi cabo ca kutsiya bisi. Yesu mwasangukile walingile cikomokeso ca kubakwasa kutsiya bisi babangi. Mwamanesele kulinga cikomokeso, walekele bandongesi bendi ngwendi cipangi ca kwambulula na kupwisa banu bandongesi cikeco cipangi ca seho manene. (Yowa 21:15-17) Simbu kanda aye mwilu, Yesu walekele bandongesi bendi ngwendi cipangi ca kwambulula bakacilinga mu kaye koshe, keti mu Isalele lika embwe. (Tandeni Vilinga 1:6-8.) Mukwetile myaka yaingi, Yesu wamwesele kapositolo Yowano byuma bikalingiwa mu “litangwa lya Mwene.” * Yowano wamwene tungelo oku batwamenena cipangi ca kwambulula “biñanda byabibwa” ku “mafuti oshe na ku miyati yoshe na kubindaka byoshe na ku banu boshe.” (Kujo 1:10; 14:6) Yehova ashaka ngwendi tulinge cipangi ca kwambulula cije cili na kulingiwa mu kaye koshe kweta noho hacikahwila.
6. Bika bitukwasa twake mbunge ku cipangi ca kwambulula?
6 Kusinganyekesesa mwali na kutukwasela Yehova, kutulingisa twake mbunge ku cipangi ca kwambulula. Cakumwenako, ali na kutwana byakulya byabingi bya ku sipilitu, byakufwa ngwe mabulu a kupulinta na aje ali ha makina, biñanda bya kutolilila, mavidio na JW Broadcasting. Kutundaho, ha webusaiti yetu hali mabulu na byuma bikwabo mu bindaka bya kutubakana 1,000. (Mateo 24:45-47) Banu ba muno mu kaye banalyangununa mwafwa bali na kukundwiya bibunga bya bupolitiki bya kuliseza-seza, bakai ku bulombelo bwa kuliseza-seza, co lalo bamo banafuku bamoco tuhutu. Oloni bangamba ba Njambi ba kutubakana 8 milyoni bakebo banalikwatasana. Cakumwenako, lya mu citanu, April 19, 2019, Bakaleho mu kaye koshe balikwatasanene omwo bakengele vidio ya cisoneka ca litangwa. Co mangwezi, banu bakweta ku 20,919,041 banalikungulwile na kulinga cilika ca kwanuka kutsa kwa Yesu. Nga tusinganyekesesa ha byuma byabibwa bili na kulingiwa mu munga ya Yehova, co twaka mbunge ku cipangi ca kwambulula.
Yesu kecelelele byuma byeka bimwonowese kwambulula muzimbu waubwa (Taleni palagilafu 7)
7. Mwanja wa Yesu utukwasa bati twake mbunge ku cipangi ca kwambulula?
7 Cuma cikwabo citukwasa twake mbunge ku cipangi ca kwambulula, cinapu kukabangeya mwanja wa Yesu. Katabesele cuma coshe-coshe cimwonowese kwambulula muzimbu. (Yowa 18:37) Yesu kongumukile omwo Satana wamumwesele ‘bumwene bwoshe bwa hano ha kaye na bumpau bwoshe.’ Co lalo banu mubashakele kumupwisa mwene, Yesu wabyanene. (Mateo 4:8, 9; Yowa 6:15) Kashungwiyiye kukala na bufuko, co lalo kazeyele banu mubamulwisile. (Luka 9:58; Yowa 8:59) Cinangulo ca kapositolo Paulu citukwasa twake mbunge ku cipangi ca kwambulula nameme tuliwana na byeseko. Washongangeyeye Baka-Kilistu ngwendi bakabangeye mwanja wa Yesu mangana ‘keti bajuke nambe kwenukwa.’—Heve 12:3.
KALENI NA MBUNGE YA KUBANDAMENA
8. Bika bibakalingi banu baje bali na bimbunge bya kubandamena, co bika kwapwila kwa seho kulinga ngoco ha simbu ino?
8 Banu baje bali na bimbunge bya kubandamena, bakabandamena kweta noho habikatengulukila byuma oku banawu mbunge. Nga tukala na mbunge ya kubandamena, co twasa kukulahela ngwetu byuma byabibi bihwa nambe byuma byabibwa bilingiwa. Kapolofweto Hambakuke washakele ngwendi bilinga byabibi bya banu bamo ba mu nganda ya Yunda bihwe. (Hamba 1:2) Bandongesi ba Yesu basinganyekele ngwabo Bumwene bwa Njambi “busholoka” oho bene mangana bapatuke ku ciyulo ca Baloma. (Luka 19:11) Tushaka ngwetu Bumwene bwa Njambi butundiseko bubi bwoshe na kunena kaye kakaha muje mukakala banu bababwa. (2 Petu 3:13) Oloni tunapande kubandamena Yehova ashulisilile byanakulahesa ha simbu inapande. Tusimutwiyeni bingila bimo mwali na kutukwasela tukale na bimbunge bya kubandamena.
9. Byuma muka bimwesa ngwabyo Yehova wakala na mbunge ya kubandamena?
9 Yehova natumwesa mwanja waubwa wa kukala na mbunge ya kubandamena. Wanene Nowa simbu ya kupwamo ya kushonga bwato na ‘kwambulula busunga.’ (2 Petu 2:5; 1 Petu 3:20) Watolililile omwo Abilahama wamwihwile bihula byabingi mwashakele kukanyongesa banu bababi ba mu nganda ya Sondoma na Ngomola. (Kusha 18:20-33) Ha myaka yaingi, Yehova wakwatele mbunge omwo Baisalele bakele na kulinga byuma byabibi. (Nehe 9:30, 31) Ano matangwa, Yehova ali na kumwesa ngwendi ali na mbunge ya kubandamena omwo natabesa banu boshe baje bashaka kupwa babusamba bendi ‘batenguluke kutunda ku bubi bwabo.’ (2 Petu 3:9; Yowa 6:44; 1 Tima 2:3, 4) Mwanja wa Yehova utukwasa tukale na mbunge ya kubandamena omwo twambulula na kulongesa bakwetu. Kuli lalo cakumwenako ca mu Mbimbiliya cije casa kutukwasa kukala na mbunge ya kubandamena.
Tukabandamena kumona bubwa butunda mu byuma bitunapanga ngwe mwakalingila ndimi (Taleni palagilafu 10-11)
10. Kwesekesa na mukanda wa Yakomba 5:7, 8, tulilongesa bika ku cakumwenako ca ndimi?
10 Tandeni Yakomba 5:7, 8. Cakumwenako ca ndimi citukwasa tukale na mbunge ya kubandamena. Tuzibuka ngwetu bimbuto bimo bikakolo bwasi. Oloni bimbuto byabingi maneneni bije bikemi binona, bikambata simbu kweta noho habikahila. Mu Isalele bimbuto byakele na kwambata bingonde 6 asinoni bihye. Ndimi wakele na kukuna bimbuto byendi ku maputukilo a ndombo na kubiteja ha simbu ya cisika. (Mako 4:28) Netu tunapande kutembwinina ndimi ha kukala na mbunge ya kubandamena. Oloni kulinga ngoco keti kwakwasi.
11. Kukala na mbunge ya kubandamena kutukwasa bati omwo twambulula?
11 Kakangi banu bakashaka kumona bwasi bubwa butunda mu byuma bibanapanga. Oloni nga tushaka ngwetu bimbuto byetu bikole na kubiteja, co tunapande kwakako mbunge. Tunapande kusheba, kukuna, kushakwila na kushangelela. Cipangi ca kupwisa banu bandongesi naco, catonda kwakako mbunge. Kunasa kwambata simbu kukwasa banu batukalilongesa nabo Mbimbiliya becele kukala na kaangu na kushangumuka kuzema bakwabo. Nga tuli na mbunge ya kubandamena, co kutuzeye nga banu kubatolilila ku muzimbu waubwa. Nameme banu batutolilila, oloni tunapande kukala na mbunge ya kubandamena mwafwa kutwasa kusindiya banu batukalilongesa nabo bakulahele byuma bituli na kulilongesa. Bisimbu bimo bandongesi ba Yesu nabo kubazibisisile byuma byabalongesele. (Yowa 14:9) Tunapande kwanuka ngwetu yetu tukakunu na kushangelela, oloni muka-kukolesa wapwa Yehova.—1 Koli 3:6.
12. Tunapande kulinga bika omwo twambulwila babushoko bwetu?
12 Kunasa kutukaluwila kukala na mbunge ya kubandamena omwo twambulwila babushoko bwetu baje keti Bakaleho. Cinangulo cili ku mukanda wa Muka-kwambulula 3:1, 7 casa kutukwasa. Mukanda ngwawo: “Kuli simbu ya kwoloka kuluu na simbu ya kusimutwiya.” Bilinga byetu byabibwa binasa kulingisa babushoko bwetu batolilile ku muzimbu waubwa, co lalo tunapande kunanguka simbu yaibwa ya kusimutwiya nabo bya Yehova. (1 Petu 3:1, 2) Tunapande kukala na mbunge ya kubandamena omwo twambulula na kulongesa bakwetu kwambateselela na babushoko bwetu.
13-14. Beya batunasa kutembwinina baje bakele na bimbunge bya kubandamena?
13 Twasa kulilongesa mwakukela na mbunge ya kubandamena ku banu ba kulongwa babanendeka mu Mbimbiliya na aba ba matangwa ano. Hambakuke washakele ngwendi byuma byabibi bihwe, oloni wendekele ngwendi: “Njikalonda ha kaposhi kange na kubandamena.” (Hamba 2:1) Kapositolo Paulu washakele “kumanesa” cipangi cendi ca kwambulula. Oloni watwaleleleho “kwambulula biñanda byabibwa.”—Vili 20:24.
14 Tusimutwiyeni hali ndolome na munakazi wendi baje bamanesele sikola ya Ngilyande. Babatumine kukapangela ku lifuti kuje kuli baka-kwambulula babandondo, co banu babangi bakalako keti baka-Kilistu. Banu babangi kuje ku lifuti kubashakele kulilongesa Mbimbiliya. Bakwabo mubakobelelele sikola ya Ngilyande baje baile na kupangela ku mafuti eka, bakele na kubaleka ngwabo bakele na kulilongesa na banu babangi Mbimbiliya na kukwasako bamo kupwa Bakaleho. Nameme banu kubakele na kutolilila ku muzimbu waubwa, ou ndolome na munakazi wendi batwaleleleho kwambulula. Munima ya kwambulula ha myaka ya kweta ku 8, babwahelelele omwo munu umo ibakele na kulilongesa nendi Mbimbiliya bamumbwitikile. Bika bitulilongesa ku banu ba kusañulu na ba matangwa ano batunasimutwiya? Aba banu ba kulongwa boshe kubazeyele, co Yehova wababezikisile mwafwa ya kukala na mbunge ya kubandamena. Netu tunapande kutembwinina ‘baka-kukulahela, baje bakele na mbunge ya kubandamena, baje bakatambula byanabakulahesa Njambi.’—Heve 6:10-12.
TWALELELENIHO KUKANYAMESA LIKULAHELO LYENI
15. Likulahelo litukwasa bati tutwaleleleho kwambulula?
15 Twakuhela muzimbu waubwa utukambulula, ngeci tukashaka kuwambulwila banu babangi. Twakulahela lalo byanatukulahesa Njambi mu Lijwi lyendi. (Myaso 119:42; Isaya 40:8) Tuli na kulimwena bupolofweto bwa mu Mbimbiliya mubuli na kulishulisilila. Tuli na kulimwena lalo banu batengulula buyoye bwabo omwo bashangumuka kupangesa binangulo bya mu Mbimbiliya. Obu bukaleho bwoshe bwatulingisa tukulahele ngwetu banu boshe banapande kuziba muzimbu waubwa wa Bumwene bwa Njambi.
16. Kwesekesa na Myaso 46:1-3 kukulahela Yehova na Yesu kutukwasa bati tutwaleleleho kwambulula?
16 Twakulahela Yehova uje wapwa babenya muzimbu waubwa utukambulula. Co twakulahela Yesu uje yanangula kupwa Mwene wa Bumwene bwendi. (Yowa 14:1) Nameme tuliwana na bukalu, Yehova atwalelelaho kutunyungilila na kutwana nzili. (Tandeni Myaso 46:1-3.) Co lalo twakulahela ngwetu Yesu ikeye ali na kutwamenena cipangi ca kwambulula oku ali mwilu mwafwa Yehova namwana nzili na moko.—Mateo 28:18-20.
17. Endekeni cakumwenako cije cimwesa ngwaco tunapande kutwalelelaho kwambulula.
17 Likulahelo litukwasa tukulahele ngwetu Yehova abezikisa bipangi byetu, co bisimbu bimo akalingi ngoco mu bingila bije kutwasinganyekele. (Kwambu 11:6) Cakumwenako, banu babangi bakamono bimesa na tutambo twetu twa mabulu. Kuma eyi inapu ngila yaibwa ya kwambulwilamo ndi? Eyo. Chipangi Chetu Cha Vumwene ca November 2014 cendekele hali muna sikola umo wa ha Yuniveziti uje washakele kusoneka ñanda imo ya kukundama ku Bakaleho ba Yehova. Wonowele kuwana Njubo ya Bumwene, oloni wawanene katambo ka mabulu ha Yuniveziti, co wawanene lalo na biñanda byatondele. Mu kwita kwa simbu wapwile Mukaleho wa Yehova, co ha simbu ino napu painiya wa simbu yoshe. Mizimbu ya cifwa eci, ikatushongangeya tutwaleleho kwambulula mwafwa imwesa ngwayo kucili banu bashaka kuziba muzimbu waubwa wa Bumwene bwa Njambi.
TWALELELENIHO KUPANGA
18. Bika bitulingisa tukulahele ngwetu cipangi ca kwambulula bya Bumwene cikahwa ha simbu yananoneka Yehova?
18 Tuzibuka ngwetu cipangi ca kwambulula cikahwa ha simbu inapande. Tusimutwiyeni byalingiwile mu simbu yayoyele Nowa. Yehova wamwesele ngwendi akalingi byuma ha simbu inapande. Myaka ya kweta ku 120 simbu kanda libazi lishangumuke, Yehova wanonekele simbu ilikashangumuka. Mukwetile myaka yaingi, Yehova walekele Nowa ashonge bwato. Nowa watwaleleleho kupanga na nzili ha myaka ya kweta ku 40 nambe 50 simbu kanda libazi lishangumuke. Nameme banu kubakele na kumutolilila, Nowa watwaleleleho kwambulula muzimbu wa kunyongesa kweta na ha simbu yamulekele Yehova ngwendi akobelese tusitu mu bwato. Co simbu muyetele, Yehova “washokele lipito lya bwato.”—Kusha 6:3; 7:1, 2, 16.
19. Bibezikiso muka bituwana nga tutwalelelaho kupanga?
19 Yehova ololo atuleka ngwendi cipangi ca kwambulula cinahu, co akanyongesa kaye ka Satana na kunena kaye kakaha muje mukakala banu bababwa. Ha simbu ino, tutwaleleniho kupanga ngwe mwalingile Nowa, Hambakuke na bakwabo. Tutwaleleleniho kwaka mbunge ku cipangi, kukala na mbunge ya kubandamena na kukulahela Yehova na bikulaheso byendi.
MWASO 75 “Ki na yo! Haku Nilume!”
^ par. 5 Cilongesa cinahu, cinashongangeyeye baje bacili na kulilongesa Mbimbiliya batambule cilanyo ca Yesu ca kupwa baka-kujebela banu. Muno mu cilongesa, tusimutwiya byuma bitatu bibanapande kulinga baka-kwambulula boshe, babaha na baje balaja mangana batwaleleleho kwambulula kweta na simbu yakendekaYehova ngwendi cipangi cinahu.
^ par. 2 MAJWI ABANALUMBUNUNA: Muno mu cilongesa, majwi akwendeka ngwawo ‘twaleleleniho kupanga’ amwesa ngwawo tunapande kutwalelelaho kulinga cipangi ca kwambulula kweta na ha simbu yakendeka Yehova ngwendi cipangi cinahu.
^ par. 5 “Litangwa lya Mwene” lyashangumukile mu 1914 omwo Yesu wapwile Mwene, co likahwa ku mamaneselelo a Ciyulo ca Myaka 1,000.
