1. Banu ba kulongwa basa kutumbula bati Yehova?

NAANGA ya Yehova inambateselela na Yesu uje wapwa “ntwatwa . . . wa byuma byoshe bya kutanga” na maunzi a tungelo. (Kolo 1:15; Myaso 103:20) Yesu mwakele hano hasi wamwesele ngwendi banu ba kulongwa basa kutumbula Yehova ngwabo Ishabo. Omwo wakele na kusimutwiya na bandongesi bendi, Yesu watumbwile Yehova ngwendi “Tate ikeye Ishweni.” (Yowa 20:17) Co lalo, nga tulikundika kuli Yehova na kutumbwitika, co tukala mu naanga ya bandolome na bandokazi baje bakala na cizemo.—Mako 10:29, 30.

2. Tusimutwiya bika muno mu cilongesa?

² Banu bamo kukabakaluwila kumona Yehova kupwa Ishabo. Bamo kunasa kubakaluwila kumwesa cizemo kuli bandolome na bandokazi babo. Muno mu cilongesa, tusimutwiya omwo Yesu natukwasela tumone Yehova kupwa Tate yetu wa cizemo uje itunasa kulikuta nendi busamba. Co lalo tusimutwiya mutwasa kuzemena bandolome na bandokazi betu ngwe mwatuzemena Yehova.

3. Lilombelo lya kutalelako litukwasa bati tushwenye manene kuyehi na Yehova?

³ Yehova wapwa Tate yetu wa cizemo. Yesu washaka ngwendi tumone Yehova ngwe mwakamumwena. Ashaka ngwendi tumumone kupwa cisemi wa ngozi na cizemo uje itunasa kusimutwiya nendi simbu yoshe-yoshe. Kashaka ngwendi tumumone kupwa cisemi wa kuminina mbunge uje washaka lika kushika. Yesu wamwesele ngoco omwo walongesele bandongesi bendi mwakulombelela. Washangumukile lilombelo lya kutalelako na majwi a kwendeka ngwawo: “Tate yetu.” (Mateo 6:9) Yesu wasele kutuleka ngwendi tutumbule Yehova ngwetu “Muka-nzili yoshe,” “Ishamatanga” nambe “Mwene wa myaka yoshe” mwafwa Mbimbiliya  nayo inapangesa awa majwi kutalesa kuli Yehova. (Kusha 49:25; Efeso 3:9;1 Tima 1:17) Oloni watulekele ngwendi tutumbule Yehova ngwetu “Tate.”

4. Tuzibuka bati ngwetu Yehova ashaka ngwendi tupwe babusamba bendi?

⁴ Kuma kukamikaluwila kumona Yehova kupwa Tate yetu wa cizemo ndi? Bamo kukabakaluwila. Kunasa kutukaluwila kukulahela ngwetu Yehova wapwa Tate yetu uje watuzema nga bisemi betu bakele na kutuyandesa. Nga mukemwo mutuli na kulizibila, co kutwapandele kulishoshomwena mwafwa Yehova azibisisa mwamubwa mutuli na kulizibila, co lalo ashaka apwe kabusamba ketu. Mukemwo Mbimbiliya itushongangeya ngwayo: “Shwenyeni kuyehi na Njambi, co na ikeye lalo akashwenya kuyehi neni.” (Yako 4:8) Yehova watuzema manene, co nakulahesa ngwendi apwa Tate yetu wamubwa manene.

5. Kwesekesa na mukanda wa Luka 10:22, Yesu asa kutukwasa bati tulikute busamba na Yehova?

⁵ Yesu asa kutukwasa tulikute busamba na Yehova. Yesu azibuka mwamubwa Yehova, co akatembwinina mwamubwa bifwa byendi. Mukemwo wendekele ngwendi: “Woshe uje nanjimono namono Tate.” (Yowa 14:9) Yesu napu ngwe yayetu uje ali na kutulongesa mwa kusingimikila na kwononokela Tate yetu, mwakulingila byuma bije bimuzibisa kubwaha ku mbunge na mwakujenjukila byuma bije bimulubalesa. Oloni kuzibuka mwayoyelele Yesu mwakele hano hasi, kutukwasa tuzibuke mwamubwa ngozi na cizemo cakala naco Yehova. (Tandeni Luka 10:22.) Tusimutwiyeni ha byakumwenako bimo.

6. Endekeni byakumwenako bije bimwesa ngwabyo Yehova watolilile ku malombelo a Yesu.

⁶ Yehova akatolilila bana bendi. Tucimoneni omwo Yehova watolililile Munendi wa ntwatwa. Yehova watolililile ku malombelo a Munendi amangi omwo wakele hano hasi. (Luka 5:16) Yehova watolililile Yesu omwo walombele amukwase kwangula bya kulinga. Cakumwenako, walombele amukwase kwangula tupositolo ba kupwa 12. (Luka 6:12, 13) Yehova watolililile kuli Yesu lalo omwo walombelele kuli ikeye ha simbu yakele mu bishoti. Simbu kanda Yundasa amwende bungungu, Yesu walombelele manene  kuli Ishe mangana amukwase akolese omwo bamuyandesa na kumutsiya. Yehova watolililile ku lilombelo lya Munendi yazema, co lalo watumine kangelo mangana akumutakamese.—Luka 22:41-44.

7. Kuzibuka ngwetu Yehova akatolilila ku malombelo etu kunapande kutulingisa tulizibe bati?

⁷ Na matangwa ano Yehova akatolilila ku malombelo a bangamba bendi, co lalo akabakumbulula ha simbu inapande na mu ngila yaibwa. (Myaso 116:1, 2) Tusimutwiyeni omwo ndokazi umo wa ku India walimwenenene busunga bwa awa majwi. Wakele na kuliwana na bishoti byabingi, co walekele Yehova mwoshe mwakele na kulizibila. Wendekele ngwendi: “Pulogilamu ya JW Broadcasting^® ya May 2019 ije yendekele bitunapande kulinga nga tuliwana na bishoti yanjikwasele manene. Njalizibile ngwange lilombelo lyange banalikumbulula.”

8. Yehova wamwesele bati ngwendi wazema Yesu?

⁸ Yehova wazemene Yesu mwakele hano hasi, co wamukwasele. Mu ngila imo lika, netu watuzema, co akatukwasa. (Yowa 5:20) Yehova wakwasele Yesu ku sipilitu, wamuzembelekele, co wamukwasele kuwana byuma bya ku mubila byatondele. Yehova walekele Munendi ngwendi wamuzema, co akamuzibisa kubwaha ku mbunge. (Mateo 3:16, 17) Yesu kalizibile bulika mwafwa wazibukile ngwendi Ishe wamuzema, co atwalelelaho kumukwasa.—Yowa 8:16.

9. Bukaleho muka bumwesa ngwabwo Yehova watuzema?

⁹ Tubaboshe Yehova natumwesa cizemo mu bingila bya kuliseza-seza ngwe mwalingile kuli Yesu. Cakumwenako, Yehova natutabesa tulikute nendi busamba, co lalo natwana bandolome na bandokazi baje batuzema, co bakatutakamesa na kutukwasa tupwe ba kubwahelela. (Yowa 6:44) Co lalo Yehova ali na kutwalelelelaho kutwana byakulya bya ku sipilitu bije bili na kutukwasa tutwaleleleho kukanyamesa likulahelo lyetu. Kutundaho akatukwasa kuwana byuma bya ku mubila bitutonda. (Mateo 6:31, 32) Nga tusinganyekesesa ha cizemo cali na kutumwesa Yehova, co tumuzema manene.

10. Twasa kutembwinina bati cizemo ca Yehova?

¹⁰ Yehova wazema bandolome na bandokazi betu. Oloni simbu imo kunasa kutukaluwila kumwesa cizemo ku bandolome na bandokazi betu mwafwa twatunda ku bisemwa bya kuliseza-seza, co tunakolela ku mitambela ya kuliseza-seza. Co lalo tubaboshe tukalingi byuma bije byasa kulubalesa bakwetu. Nameme ngoco kuli cuma cimo casa kutukwasa tutwaleleleho kuzema bandolome na bandokazi betu. Cuma muka? Kutembwinina Tate yetu wa mwilu. (Efeso 5:1, 2; 1 Yowa 4:19) Tumoneni bitwasa kulilongesa kuli Yehova.

11. Yesu watembwininine bati Yehova uje wakala na mema ku mbunge?

¹¹ Yehova “wakala na mema ku mbunge.” (Luka 1:78) Munu muka-mema ku mbunge kesi kuliziba mwamubwa nga amona banu bayanda, co akalingiko bimo mangana abakwase na kubazembeleka. Byalingile Yesu mwakele hano hasi byamwesele ngwabyo Yehova akazibila banu mema ku mbunge. (Yowa 5:19) Simbu imo Yesu mwamwene mbunga ya banu “wabazibilile mema ku mbunge omwo bakele na kuyandangela na [kulishandoka], ngwe bimanga kubesi na kanyungi.” (Mateo 9:36) Yesu kabazibilile lika mema ku mbunge, oloni walingileko bimo mangana abakwase. Wakangwisile baka-kubinja na kukwasa baje ‘bajukile na kwambata bya kulema.’—Mateo 11:28-30; 14:14.

12. Twasa kumwesa bati ngwetu tuli na kuzibila bandolome na bandokazi betu mema ku mbunge?

¹² Nga tusinganyekesesa ha bukalu bubali na kuliwana nabwo bandolome na bandokazi betu, co twasa kubazibila mema ku mbunge. Cakumwenako, hamo kuli ndokazi wabinja mushongo  wakama. Nameme kesi kwendeka ha bukalu bwendi, oloni abwahelela manene nga munu umo amukwasa. Lihuleni ngweni: Ali na kwasa kunyunga baka-naanga yendi ndi? Kuma atonda munu amukwase kuteleka byakulya nambe kumukombelako mu njibo ndi? Hamo kuli ndolome umo uje ibanatundisa bipangi. Tunasa kumwanako kambongo kamo kaje kanasa kupangesa kweta noho hakawanena cipangi ceka, oloni kutumuleke ngwetu kanatundu kuli yetu.

13-14. Twasa kutembwinina bati Yehova uje wapwa muka-kwana?

¹³ Yehova wapwa muka-kwana. (Mateo 5:45) Kutwapandele kubandamena ngwetu kubanga bandolome na bandokazi betu batulombe bukwasi asinoni tubakwase embwe. Twasa kubakwasa nameme kubatulombele ngwe mwakalingi Yehova. Akatutuhwisila litangwa simbu yoshe kwa kujeneka kumulomba. Co lalo litanya likatwila banu boshe nameme baje kubesi kukandelela kuli ikeye. Yehova akatwana byuma bitutonda mwafwa watuzema. Netu twamuzema mwafwa wakala na ngozi, co lalo wapwa muka-kwana.

¹⁴ Bandolome na bandokazi betu babangi bali na kutembwinina Yehova uje wapwa muka-kwana. Cakumwenako, mu 2013, kankumba kakama kabatumbula ngwabo Haiyan kabiisile byuma byabingi mu Philippines. Binjibo na bitenga bya bandolome na bandokazi babangi byabihile. Oloni bandolome na bandokazi babangi mu kaye koshe babakwasele bwasi-bwasi. Bamo balambwile bimbongo, co bakwabo bakwasele mu kubwahesa na kutunga binjibo bije byabihile bya kweta ku 750 mu bingonde lika. Ha simbu ya mushongo wa COVID-19, Bakaleho ba Yehova bapangele na nzili mangana bakwase bandolome na bandokazi babo. Nga tuzambwila kukwasa bandolome na bandokazi betu, co tumwesa ngwetu twabazema.

15-16. Kwesekesa na mukanda wa Luka 6:36, twasa kutembwinina bati Tate yetu wa mwilu?

¹⁵ Yehova wakala na ngozi, co akakonekela. (Tandeni Luka 6:36.) Tate yetu wa mwilu akatumwesa ngozi yendi ha litangwa na litangwa. (Myaso 103:10-14) Bandongesi ba Yesu bakele na kusebuka, oloni Yesu wakele na kubazibila ngozi na kubakonekela. Co lalo watutsililile mangana bubi bwetu babukonekele.  (1 Yowa 2:1, 2) Kuzibuka ngwetu Yehova na Yesu bakatukonekela kutulingisa tushwenye manene kuyehi nabo.

¹⁶ Nga ‘tulisambesa umo na mukwabo’ kutundilila kwisi ya mbunge, co tulizema manene na bandolome na bandokazi betu. (Efeso 4:32) Oloni simbu imo kukonekela bakwetu kunasa kukaluwa, ngeci tunapande kulifwita. Ndokazi umo walizibile ngwendi ñanda yakele mu Kaposhi ka Kukengela ya “Muswalele ka Pilu Kaufela” yamukwasele manene akonekele bakwabo na mbunge yoshe. * Wendekele ngwendi: “Kutanda ije ñanda kwanjikwasele njinanguke bubwa bwa kukonekela bakwetu. Ije ñanda yamwesele ngwayo nga tukonekela bakwetu kukulumbununa ngwabo bubi bubanalingi bwatuzibisa kubwaha. Oloni kukonekela bakwetu kulumbununa kwecela kuliziba kubabala ku mbunge mwafwa ya bubi bubanatulingi, co kulinga ngoco kutukwasa tupwe ba kushubuluka.” Nga tukonekela bandolome na bandokazi betu kutundilila kwisi ya mbunge tumwesa ngwetu twabazema, co lalo tuli na kutembwinina Tate yetu Yehova.

17. Kwesekesa na mukanda wa Mateo 5:16, twasa kwana bati Tate yetu wa mwilu bumpau?

¹⁷ Twabezika manene kukala mu naanga ya bandolome na bandokazi ba mu kaye koshe baje bakala na cizemo. Tushaka ngwetu banu babangi balikwatasane netu mu kulemesa Njambi. Ngeci kutwapandele kulinga byuma bije bishawisa Tate yetu wa mwilu Yehova nambe banu bendi. Tukeseka mwoshe mutwasela kulinga byuma byabibwa mangana banu bashake kulilongesa bya Yehova na kumupangela.—Tandeni Mateo 5:16.

18. Bika byasa kutukwasa twambulule muzimbu waubwa mu kusimpa?

¹⁸ Bisimbu bimo banu banasa kutushendumuna na kutuyandesa mwafwa ya kwononoka Tate yetu wa mwilu. Twasa kulinga bika nga tuziba lyoba kulekako bakwetu byuma bitwakulahela? Twasa kulomba Yehova na Munendi mangana batukwase. Yesu walekele bandongesi bendi ngwendi kubapandele kulishoshomwena bya kwendeka nomwo mubakendekela. Mwafwa bika? Wendekele ngwendi: ‘Omwo ha simbu ije bene bakamileka bati munapande kwendeka.  Omwo majwi amukendeka keti eni embwe, oloni sipilitu ya Ishweni ikeyo ikendeka muli yeni.’—Mateo 10:19, 20.

19. Endekeniko bya munu umo uje wambulwile mu kusimpa.

¹⁹ Tusimutwiyeni hali ndolome Robert. Simbu imo bamutwalele ku nkuta imo ya mu South Africa mangana akalumbunune byakele na kubyanena kukobela buswalale. Ha simbu eyi te acili na kulilongesa Mbimbiliya, co te kanda azibuke byabingi. Oloni wasimpile na kulumbunwina baka-nkuta ngwendi wabyanene kukobela buswalale mwafwa wazema bandolome na bandokazi bendi. Wazemene manene kukala mu naanga ya Yehova. Lyako wamwihwile ngwendi: “Bandolome bobe beya?” Ndolome Robert kasinganyekele ngwendi bamwihula cije cihula, oloni bwasi-bwasi wanukile cisoneka colyo litangwa. Capwile cisoneka ca Mateo 12:50 cije cendeka ngwaco: “Woshe uje alinga cizango ca Tate ali mwilu, ikeye bene napu ndolome yange na ndokazi yange na banana.” Nameme ha simbu eyi Robert te acililongesa Mbimbiliya, oloni sipilitu ya Yehova yamukwasele akumbulule cije cihula na bihula bikwabo bibamwihwile. Ndolome Robert wazibisile Yehova kubwaha ku mbunge. Netu twasa kumuzibisa kubwaha nga tumukulahela na kwambulula mu kusimpa ha bisimbu byabikalu.

20. Tunapande kutwalelelaho kulinga bika? (Yowano 17:11, 15)

²⁰ Twabezika manene kukala mu naanga ya ku sipilitu muje muli banu balizema umo na mukwabo. Tuli na Tate yetu wamubwa manene na bandolome na bandokazi betu baje batuzema. Tunapande kutwalelelaho kumwesa kukandelela ha kukala omu mu naanga. Satana na banu bendi bali na kweseka mubasela mwoshe kutwangununa na kutulingisa tusinganyeke ngwetu Tate yetu wa mwilu katuzemene. Oloni Yesu walombele Ishe atunyunge na kutukwasa tutwaleleleho kulikwatasana. (Tandeni Yowano 17:11, 15.) Yehova ali na kukumbulula eli lilombelo. Ngwe mwa Yesu, tutwaleleleniho kukulahela ngwetu Tate yetu wa mwilu watuzema, co atukwasa. Tutwaleleleniho kulizema manene na kulikwatasana na bandolome na bandokazi betu.