VAKA-KULILONGETHA Mbimbiliya vafwa ngwe vaka-kushakethzeka ngolinde. Ava vaka-kulilongetha Mbimbiliya vanapande kupanga na ndthzili na kutwalelelaho kutondethetha mu Vithoneka mangana vawane mana aje kutwatha kulanda. Ha kupwa vaka-kulilongetha Mbimbiliya, twatha kulilongetha vika omwo tuthimutwiya vingila vitatu vyakuwanenamo ngolinde?

Thinganyekeni ngweni muli na kwenda kuyehi na ndonga mutanya, cho mumona kalimanya kakandondo kavyakuma. Mwimana na kutalethetha, cho muvwahelela ha kuwana kalimanya ka ngolinde. Twapwa twatupulululu kutuvakana mutwe wa kachiti ka mangisi, cho kutwethi kuliwaniwila lika ngwe ndayimoni. Mukengethetha mangana mumone indi hali tukwavo lalo.

Mu ngila imo lika, mpamo litangwa limo, kwakele vangamba va Yehova vethzile kuli yeni na kuthimutwiya neni viyakulahetha Mbimbiliya. Hamo muchikanuka thimbu ije imwathzivile vuthunga lwa kulivanga. Mpamo lukelwo lwapwile lwa kulivanga kumona lithzina lya Njambi mu Mbimbiliya lije tutumbula ngwetu Yehova. (Myatho. 83:18, NWT ) Hamo lalo mwalilongethele ngweni mwatha kupwa kavuthamba ka Njambi. (Yako. 2:23) Oho vene mwalithzivile ngweni mwawana chuma cha theho kutuvakana ngolinde. Cho mwashakele kuthzivuka vyuma vyavingi vya ku sipilitu vije vilifwa na kalimanya ka ngolinde.

Tumbathzuvwila twa ngolinde, thimbu imo tukawaniwa mu vindonga. Otu tumbathzuvwila vakatutumbula ngwavo alluvial gold. Thimbu imo, vaje vakapanga na ndthzili mu kushakethzeka ngolinde, vakawana ngolinde yaingi, ije ivatha kulandetha na vimbongo vyavingi.

Omwo mwashangumukile kulilongetha Mbimbiliya na Vakaleho va Yehova, mpamo mwalithzivile ngwe muka-kutondethetha ngolinde uje ali na kwinda mangana awane ya ndando ya helu. Omwo mwashangumukile kuthzivuka vithoneka vyavingi, mana eni alivwethzelelele, cho mwashangumukile kukola ku sipilitu. Ovu vuthunga vwa mu Mbimbiliya, vwamikwathele mulikute vuthamba na Yehova na kukala mu chithzemo chendi na kukala na lilavelelo lya kukayoya myaka yoshe.—Yako. 4:8; Yunda 20, 21.

 Neni munatha kufwitangana mu kushakathzeka vufuko vwa ku sipilitu ngwe muje akalingi muka-kushakathzeka ngolinde ya ndando ya helu. Omwo mwathzivukile vilongetha vya Mbimbiliya vya maputukilo, mpamo mwayongwele vya kulikundika mangana vamimbwitike.—Mateo 28:19, 20.

Muka-kushakethzeka ngolinde, thimbu imo natha kuwana tumbathzuvwila twayo mu mamanya. Ha mitambela imo ya mamanya hakakala ngolinde yaingi, oloni kuiwana kuvanga kwindila kumo na mamanya, cho kuthsena mamanya na kwambatamo ngolinde. Nga kumutalethetha mwamuvwa ha mamanya, kumwatha kumona ngolinde. Mwafwa vika? Mwafwa mamanya a ngocho akapu amangi kutuvakana ngolinde. Oloni muka-kushakethzeka ngolinde akapanga na ndthzili kweta noho naiwana.

Munu uje nathzivuka “vilongetha vya kushangumuka lijwi lya vuka-Yesu,” nendi napande kupanga na ndthzili. (Heve. 6:1, 2) Kuvanga mupange na ndthzili athina muthzivuka vithimpi vyavingi vya mu Mbimbiliya vije vimwatha kupangetha mu kuyoya. Vika vimwatha kulinga mangana mulilongethe vyavingi mu chilongetha cheni cha ha kapandi, nameme mwalilongetha Mbimbiliya ha myaka yaingi?

Shakeni kulilongetha. Akeni mbunge ku vilongetha vya kulova. Twaleleniho kupanga na ndthzili mangana muthzivuke mwamuvwa Vithoneka, cho vimitwamenene mu kuyoya kweni. (Loma 11:33) Cho lalo kupangetha mavulu etu aje atukapangetha mu kutondethetha vithimpi vyakama kutukwatha tuvwethzelele ku mana etu a Vithoneka. Nga kanda muwane vikumbululo ku vihula vyeni vya kukundama ku Mbimbiliya, kethi muthzeye. Ihuleni vakweni vamileke vithoneka nambe ñanda imo ya mu mavulu etu ije yavakwathele na kuvatakametha. Lekeniko vakweni vimunalilongetha mu Lijwi lya Njambi.

Yeni kumulingila lika kukala na mana embwe. Kapositolo Paulu wathonekele ngwendi, “mana akalingitha munu ngechi alyalethe.” (1 Koli. 8:1) Ngechi pangeni na ndthzili mangana mupwe va kulikehetha na kukala na likulahelo lya kukanyama. Kukala na chilongetha cha nanga na chilongetha cha ha kapandi thimbu yoshe, kumikwatha muyoye mwaya chithzango cha Yehova na kumishongangeya mukwathe vakweni. Cho lalo mulithziva manene kuvwaha mwafwa mwawana chuma cha theho kutuvakana ngolinde.—Vithi. 3:13, 14.