MITHZIMBU YETU YA THEHO YA KUNIMA
“Njili na Kuteja Vushuka Vuje Vushangathzala Yehova”
“VINDTHZITA vili mu Europe matangwa ano, vili na kusholoka kupwa vyakama manene kutuvakana vya kunima.” Mukemwo kendekele Kaposhi ka Kukengela ka Vundele ka September 1, 1915, ha ndthzita ya kaye ya kulivanga ije yalingiwile mu mafuti a kweta ku 30. Omwo mu Kaposhi ka Kukengela vendekelemo lalo ngwavo: “Chipangi cha [Vumwene] vachishokele maneneni mu Germany na mu France,” mwafwa ya ndthzita.
Vaka-Kulilongetha Mbimbiliya kuvathzivithithile mwamuvwa vikwalumbunwine kulyangununa ku kaye mwafwa ya kulwitha kwakama. Oloni vakakateyeye mu chipangi cha kwambulula muthzimbu wauvwa. Wilhelm Hildebrandt washakele kupanga manene chipangi cha Vumwene, mukemwo wakele na kulomba livulu lya The Bible Students Monthly mu chiFrench. Kaile mu France kukalinga vupainiya, oloni wapwile lishwalale lya vaka-German. Owo lishwalale wapandele kupwa chitothzi, oloni wakele na kwambulula muthzimbu wauvwa kuli vaFrench va kwombwa vaje vakele na kwita mu ngila oku nathzala vuthzalo vwa mashwalale.
Mikanda ivakele na kuthoneka mu Kaposhi ka Kukengela yamwethele ngwavo Vaka-Kulilongetha Mbimbiliya vavangi va mu German, valithzivile ngwavo vanapande kwambulula muthzimbu wauvwa wa Vumwene nameme vanapu mashwalale. Ndolome Lemke uje wapwile lishwalale ngwendi mukati ka mashwalale vakele na kupanga navo, wawanenemo vatanu vaje vamwethele kuvwahelela. Wathonekele ngwendi: “Nameme njili omu mu vwato vwa mavaya, oloni hanga njili na kuteja vushuka vuje vushangathzala Yehova.”
Georg Kayser waile ku ndthzita ha kupwa lishwalale, oloni omwo welukile kwimbo, wapwile ngamba ya Njambi. Vika vyalingiwile? Vakamwanene livulu lya Vaka-Kulilongetha Mbimbiliya, cho wathzivukile vuthunga na kulikela vushwalale. Washangumukile chipangi cheka chachivwa. Munima ya ndthzita, wapwile painiya wa kukanyama ha myaka yaingi.
Nameme Vaka-Kulilongetha Mbimbiliya kuvathzivukile vyavingi ha ñanda ya kulyangununa ku kaye, oloni vilinga na vithinganyeka vyavo vyalithethzele na vya vanu vaje vashakele manene ndthzita. Vaka-vupolitiki na vantwama va mu vulombelo vakele na kukundwiya vindthzita, oloni Vaka-Kulilongetha Mbimbiliya vakevo vakulahelele “Mwene wa Kwoloka.” (Isaya 9:6) Nameme vene vamo kuvalyangunwine mu kushula, oloni vakele na vithinganyeka ngwe vya Muka-Kulilongetha Mbimbiliya Konrad Mörtter uje wendekele ngwendi: “Njalilongethele mu Lijwi lya Njambi ngwange muka-Kilisitu kapandele kuthsiya.”—Kutu. 20:13. *
Hans Hölterhoff ali na kuthindumuna likalu mu kumwetha vanu mangazini ya The Golden Age
Mu Germany vathindiyiye vanu voshe kukovela vushwalale, mwafwa lishiko kulyatavethele munu kulyangwila vya kulinga, oloni Vaka-Kulilongetha Mbimbiliya va kutuvakana 20 vavyanene kukovela vushwalale. Vamo vavamwene ngwavo hamo va kuthzaluka. Chakumwenako, Gustav Kujath vamwakele mu chipatela cha vithzaluke. Hans Hölterhoff wavyanene kulilongetha vushwalale, cho vamutwalele mu kamenga, oloni wakavyanene kupanga vipangi vya kukundama ku ndthzita. Tunyungi vakamuthzengelele mu vinanga na kumukuta mikole noho wathzimbile. Omwo vamwene ngwavo anga nakakateya likulahelo lyendi, vashangumukile kumulenya. Oloni wakanyamene noho ndthzita inahu.
Vandolome vakwavo vaje vavalongethele kulwa, vavyanene kukwata vitwa, cho valilombelele kulinga vipangi vyeka. * Johannes Rauthe wavyanene kulwa, cho vamutwalele kukapangela ku vikumboyo. Konrad Mörtter ikeye vamwanene chipangi cha kukwatha ku chipatela, Reinhold Weber wapwile nesi. August Krafzig nendi wavwahelelele manene ngwendi chipangi chivamwanene kuchamutavethele kuya ku ndthzita. Ava Vaka-Kulilongetha Mbimbiliya na vakwavo vakakateyeye kupangela Yehova mwafwa ya chithzemo na kulongwa kwavo.
Vaka-fulumende vathompethele manene Vaka-Kulilongetha Mbimbiliya mwafwa ya vyuma vivalingile mu thimbu ya ndthzita. Mu myaka yakaveleho, Vaka-Kulilongetha Mbimbiliya va mu Germany vavatwalele mu vinkuta vyavingi mwafwa ya chipangi chavo cha kwambulula. Cho ofisi ya munango ya mu Germany yatungile ndipatimende itala vya mashiko ha Mbetele mu Magdeburg.
Vakaleho va Yehova vetele ha kuthzivithitha mwamuvwa ñanda ya kulyangununa ku kaye. Omwo Ndthzita ya kaye ya mu chivali yashangumukile, vavyanene kukovela vushwalale nambe chipangi choshe choshe chije chakundwiyiye ndthzita. Fulumende ya vaka-German yamwene ngwe vapwile vitothzi vakama, ngechi vavayandethele manene. Oloni viñanda vya kulutwe vya “Mithzimbu Yetu ya Theho ya Kunima” vikendeka viñanda vyakulithethza nevi.”—Mithzimbu yetu ya theho ya kunima ya mu Central Europe.
^ par. 7 Kengeni vivalingile Vaka-Kulilongetha Mbimbiliya va ku Britain mu Ndthzita ya Kaye ya kulivanga mu ñanda ya “Ze zwa Mwa Sifalana Sa Luna—Ne ba Itiisize Mwa ‘Hora ya Tiko’” mu Kaposhi ka Kukengela ka May 15, 2013.
^ par. 9 Vyuma vivalingile ava vandolome vavyendekele mu livulu lya Millennial Dawn (1904), Volume VI na mu Zion’s Watch Tower ya chiGerman ya August 1906. Kaposhi ka Kukengela ka Vundele ka September 1915 kalumbunwine mwamuvwa eyi ñanda, cho kamwethele ngwavo Vaka-Kulilongetha Mbimbiliya kuvapandele kukovela vushwalale. Oloni eyi ñanda kuyatuhukile mu chiGerman.
