MANKIMBA a mu Atlantic muwakele na kungwanjangetha mbapolo ije yakele na kuya ku Europe, umo wa vaje valondelemo George Young, wakele na kuthinganyeka ha chipangi cha Vumwene chije chafwitanganene mu Brazil. * Oloni muvakele na kuya mu vungendthzi vwavo, Ndolome Young washangumukile kuthinganyeka manene vya kuje kwakele na kuya, ku Spain na Portugal, kuje tai vuthunga kanda vucheteko. Wayongwele ngwendi mwaketa kuje, akavwahetha vya kwija kwa Ndolome J. F. Rutherford mangana akwendeke viñanda vya Mbimbiliya na kukana vanu matilakiti a kupwa 300,000.

Ndolome Young mwaketele ku Lisbon mu 1925, wakawanene mu lifuti muli mbundunwina. Vanu vatundithile chiyulo cha vimyene mu 1910, cho oku kwalingithile vaka-Katolika vajeneke kukala na ndthzili. Muje mu lifuti vanu vamwene ngwavo vanathokoka, oloni vanu hanga vakele na kulilwitha.

Ndolome Young mwakele na kuvwahetha vya ñanda ya Ndolome Rutherford, fulumende yanene moko maswalale mangana vamone ngwavo vanu kuvatengulukila fulumende. Muka-kuthoneka wa vaka-British and Foreign Bible Society walekele Ndolome Young ngwendi vamulwitha nga alinga ngocho. Nameme ngocho, Ndolome Young walombele mulili wakama uje wakala ha sikola ya Sekondali ya Camões, muje muvakehela vweho vwa kutakametha mivila, cho vamutavethele.

Litangwa lya 13 May, lije livavwahethele ngwavo Ndolome Rutherford akwendeke ñanda, lyetele. Vanu vavandamenene kutolilila vyavingi. Twalanyele vanu ku ñanda ya mutwe wa “How to Live on the Earth Forever” (Mwakuyoyela Myaka Yoshe Hano Hathi). Twapangethele mapapelo atwalamathzekele ha vivumbe na mapapelo a mithzimbu. Vwathi vwathi, vaka-kulwitha va mu vulombelo vathonekele ñanda mu lipapelo lyavo lya mithzimbu, ngwavo “kuli na kwija tupolofweto va makuli.” Vaje vaka-kulwitha vethzile ha chikolo cha uje mulili wa kwehela, cho vashangumukile kwana vanu mambuloshuwa amangi aje akele na kulwitha ñanda ya Ndolome Rutherford.

Nameme ngocho, kwakungulukile vanu va kupwa 2,000, cho vanu va kweta ku 2,000 lalo kuvakovelele mukati, mwafwa mulili wapwile waundondo. Vaka-vimbunge vyavivwa vamo valondele ha manela ya mikole ije yakele muje mu mulili. Vakwavo vatumbamene ha vikuvo.

Kethi vanu voshe vakele na kutolilila. Vaka-kulwitha vakele na kulinga miyoyo na kupokothzola vitwamo. Oloni Ndolome Rutherford wathimpile, cho walondele helu lya metha mangana vanu voshe vamuthzive mwamuvwa. Mukati ka vuthsiki mwamanethele kwendeka, vanu va vimbunge vyavivwa va kutuvakana 1,200 vathonekethele mathzina avo na vikeyala vyavo mangana vavatumine mavulu a kukundama ku Mbimbiliya. Lya mukwavo, mu lipapelo lya  mithzimbu lya O Século, vathonekelemo vya ñanda yendekele Ndolome Rutherford.

Mu September 1925, Kaposhi ka Kukengela vashangumukile kukathoneka mu Chiputukesi mu lifuti lya Portugal. (Ha thimbu eyi, mu Brazil te vanashangumuka laja kukathoneka mu Chiputukesi.) Ha thimbu ije vene, Ndolome Virgílio Ferguson washangumukile kuyongola vya kujalukila ku Portugal mangana akakwathe mu chipangi cha Vumwene. Wavangele kupanga na Ndolome Young ha kamunango kakando ka mu Brazil ka Vaka-Kulilongetha Mbimbiliya. Munima ya thimbu yaindondo, Virgílio na mwevwendi Lizzie vakapangelele hamo na Ndolome Young ku Portugal. Ndolome Ferguson wethzile ha thimbu yaivwa, mwafwa Ndolome Young wakele hayehi na kukapangela kweka kwambatethelela na ku Soviet Union.

Maswalale vaje vatengulukilile fulumende muvashangumukile kuyula lifuti lya Portugal, vanu valwithile manene chipangi chetu. Ndolome Ferguson wakolethele, cho wanyungililile ka chivunga ka Vaka-Kulilongetha Mbimbiliya mangana katwaleleleho na chipangi cha kwambulula. Walombele lithetha ngwendi viwano vavilingile mu njuvo yendi thimbu yoshe, cho mu October 1927, vamutavethele.

Mwaka wa kulivanga uvayulile maswalale, vanu va mu Portugal va kweta ku 450 valithonekethele kutambula mangazini ya Kaposhi ka Kukengela. Cho lalo, mwafwa ya matilakiti na tumavulu, vuthunga vwetele mu mafuti muje muvayulile vaputukesi, a kufwa ngwe Angola na Azores na Cape Verde na East Timor na Goa na Madeira na Mozambique.

Mu 1929, muka-kulima wa kahutu wa kaputukesi Manuel da Silva Jordão waile ku Lisbon. Ha thimbu yakele ku Brazil, watolililile ku ñanda yendekele Ndolome Young. Wamwene ngwendi vyuma vyathzivile vyapwile vya vuthunga, cho washakele manene kukwatha Ndolome Ferguson, mu chipangi cha kwambulula. Manuel washangumukile chipangi cha vupainiya. Chipangi cha kupulinta Mbimbiliya na mavulu chalingithile chikungulukilo cha mu Lisbon chikole.

Mu 1934, Ndolome na Ndokathzi Ferguson velukile ku Brazil. Oloni tai vanakunu laja mbuto ya vuthunga. Vyuma muvyatengulukile mu Europe ha thimbu ya ndthzita ya mu Spain na Ndthzita ya Kaye ya mu Chivali, vandolome na vandokathzi va kulongwa va mu Portugal vovokele ku sipilitu. Ha thimbu ije, vapwile ngwe manungu aje ashaka kuthzima, oloni mu 1947, vashangumukile kupanga na ntwima omwo kamishinali wa kulivanga, John Cooke wethzile. Kutunda lika ha thimbu ije, vaka-kwambulula vya Vumwene vanatwalelelaho kulivwethzelela. Nameme fulumende yashokele chipangi cha Vakaleho va Yehova mu 1962, nambala ya livwethzelelele. Vakaleho va Yehova muvalithonekethele kuli vaka-mashiko mu December 1974 tai kuli vaka-kwambulula va kupwa 13,000 mu lifuti.

Ano matangwa, mu Portugal na mu makanda muje muvakendeka chiputukesi kwambatethelela na Azores na Madeira, muli vaka-kwambulula muthzimbu wauvwa wa Vumwene va kupwa 50,000. Hali ava vaka-kwambulula, hali na vatekulwila va vaje vatolilile ku ñanda ya Ndolome Rutherford ije kuvakevala vanu, yendekele mu 1925.

Tukandelela kuli Yehova na kuthimpa kwa vaje vandolome na vandokathzi vaje vatutwamenenene mu chipangi cha kwambulula ha kupwa ‘vangamba va Kilisitu Yesu cha kupangela vaka-mafuti.’—Loma 15:15, 16.—Mithzimbu Yetu Ya Kunima ya mu Portugal.