1. Mu vingila muka mutwatha kupangela hamo na Yehova?

NJAMBI wayongwele ngwendi vanu vakulumbunuka vapange nendi mu kushulithilila viyongola vyendi. Nameme ha thimbu ino vanu kuvalumbunukile, oloni vaje vanapu va kulongwa vatha kupangela hamo nendi ha litangwa na litangwa. Chakumwenako, ‘tupangela hamo na Njambi,’ nga twambulula muthzimbu wauvwa wa Vumwene na kupwitha vanu kupwa vandongethi. (1 Koli 3:5-9) Achithinganyekeni kuvethzika chituli nacho cha kupangela hamo na Ishamatanga yetu uje wapwa Muka-ndthzili yoshe wa mwilu na hathi, mu chipangi chije cha theho kuli ikeye. Oloni kwambulula na kupwitha vanu kupwa vandongethi, kethi ikeyo lika ngila itukapangela hamo na Yehova. Muno mu chilongetha, tuthimutwiya vingila vyeka mutwatha kupangela hamo na Njambi. Evi vingila vinapu, kukwatha vaka-nanga yetu na vakwetu vaka-Kilisitu na kutambula vangendthzi na kulyana mu vipangi vya Njambi na kuvwethzelela ku chipangi chetu cha kujela.—Kolo 3:23.

2. Mwafwa vika kutwapandele kwetheketha vipangi vyetu nevi vya vakwetu kuli Yehova?

² Omwo tulilongetha chino chilongetha, kethi mwethekethe  vipangi vyeni nevi vya vakweni kuli Yehova. Anukeni ngweni vanu valithethzathethza ku myaka na vukangule na vuyoye na kulyathela kwavo. Kapositolo Paulu muvamuhwimininine, wathonekele ngwendi: “Umo na umo athompe futithi yendi vavenya. Nga ikeyo inapu yaivwa, athinoni alyalethe ha vije vyanalingi, kujeneka kuvitheteka na vije vyanalingi munu weka.”—Ngala 6:4.

3. Vika twendekela ngwetu munu uje anyunga vaka-nanga yendi ali na kupangela hamo na Njambi?

³ Yehova washaka ngwendi vangamba vendi vanyunge vaka-nanga yavo. Chakumwenako, mwatha kutonda vimbongo mangana mulelethe nanga yeni. Vanakathzi vavangi vakakala ha vinjuvo mu kunyunga vana vavo. Hamo vithemi veni kuvatha kulipangela vakevo vavenya, munapande kuvanyunga. Evi vinapu vipangi vya theho manene. Lijwi lya Njambi ngwalyo: “Nga umo katha kunyunga vavushoko vwendi, maneneni kuli vanu vaka-nanga yendi, navyana kukulahela, navihya kutuvakana uje kethi muka-kakukulahela.” (1 Tima 5:8) Nga chikecho chipangi chimuli nacho, cho kumwatha kuwana thimbu yaingi ya kupanga chipangi cha Njambi. Oloni kethi muthzeye. Yehova akavwahelela nga mukwatha nanga yeni ku muvila.—1 Koli 10:31.

4. Vithemi vatha kutwameka vati vipangi vya Njambi kulutwe, cho vika vyatha kutundamo?

⁴ Vithemi vaka-Kilisitu vapangela hamo na Njambi nga vakela vana vavo vilengo vya ku sipilitu. Vwingi vwa vaje vanalingi ngocho, vanalimwena vana vavo muvanalyangwila chipangi cha thimbu yoshe. Vamo vanapu vamishinali vakwavo vali na kulinga vupainiya kuje kuli vujene vwa vaka-kwambulula, veka vali na kupangela ha Mbetele. Nga vana vanakapangela kulako, vithemi kuvatha kuthimutwiya navo kushwakumo. Nameme ngocho, vithemi vaka-kulyana vakashongangeya vana vavo valikolethe mu vipangi vyavo. Vika vakalingila ngocho? Mwafwa vakapu va kujolela na kushuvuluka muvakamono vana vavo vali na kutwameka vya Vumwene kulutwe. (3 Yowa 4) Hamo ava vithemi vakalithzivi ngwe Hana uje wendekele hali munendi Samwele ngwendi: “Njili na kumukundika” kuli Yehova. Vakamono ngwavo oku kunapu kuvethzika kwakama. —1 Samwe 1:28.

5. Mwatha kukwatha vati vandolome na vandokathzi veni mu chikungulukilo? (Kengeni chikupulo ha liputa 23.)

⁵ Nga kumwethi na nanga ije inamikutu manene, cho mwatha kukwatha vakweni vaka-Kilisitu vaje vali na chipangi chakama cha kulela vaka-kuvinja na tukulukathzi nambe vaje vali mu vujene. Tondethetheni mu chikungulukilo cheni mangana mumone vaje vali mu vujene vamwatha kukwatha. Hamo mwatha kuya kuli ndokathzi uje ali na vithemi vanakuluvala na kukathikama navo, mangana ikeye ataleko vipangi vyeka. Nambe mwatha kukwatha vaje vatonda munu wa kuvatwala ku viwano nambe kuya navo mu kulanda vyuma ku mavenda nambe kukavalandelako vyuma vimo nambe kuvatwala ku chipatela mu kukamona muka-kuvinja. Nga mulinga ngocho, cho mupangela hamo na Yehova mukukumbulula lilombelo lyavo.—Tandeni 1 Kolinte 10:24.

6. Vika vyalivungila mu kutambula vangendthzi?

⁶ Vaka-kupangela hamo na Njambi vapwa vaka-kutambula vangendthzi. Mu Vithoneka vya Chingiliki vya vaka-Kilisitu, lijwi livanalumbununa ngwavo “kutambula vangendthzi” lilumbununa kuthzivila vangendthzi ngothzi. (Heve 13:2) Mu Lijwi lya Njambi, muli myanja yaingi ije itulongetha mutwatha kutambwila  vangendthzi. (Kusha 18:1-5) Thimbu yoshe, tunapande kutonda vingila vya kukwathelamo vakwetu, vapwe “vaje vanakundama ku nanga yetu mu kukulahela” nambe embwe.—Ngala 6:10.

7. Vuvwa muka vumuwana nga mutambula vangamba va Njambi vaje vali mu chipangi cha thimbu yoshe?

⁷ Mwatha kupanga na Njambi mu kutambula vangendthzi vaje vali mu chipangi cha thimbu yoshe ndi? (Tandeni 3 Yowano 5, 8.) Thimbu itukakala nava vangendthzi, ‘tukalitakametha’ umo na mukwavo. (Loma 1:11, 12) Tuchithimutwiyeni hali Olaf. Achanuka vyalingiwile myaka ya kunima te achili mwanike, mu chikungulukilo chavo naumo wahi watambwile ntwama wa kuthzenguluka uje wapwile muthzike. Olaf walombele vithemi vendi vaje kuvapwile Vakaleho ngwendi ntwama wa kuthzenguluka akukale ku njuvo yavo. Vatavele, cho vendekele ngwavo Olaf alale mu chitwamo cha sofa. Olaf kayayavalele, walingile muvamulekele. Olaf ngwendi: “Twalikuwile chije chalumingo. Nange na ntwama wa kuthzenguluka twakele na kwinduka mutondo, cho ha thimbu ya kulyaula twakele na kuthimutwiya viñanda vyavivwa. Majwi endi akunjitakametha anjishongangeyeye njikovele mu chipangi cha thimbu yoshe.” Mu kwita kwa thimbu, Olaf wakupwile kamishinali uje wapangelelele mu mafuti amangi ha myaka ya kutuvakana 40.

8. Mwafwa vika tunapande kumwetha ngothzi nameme vanu kuvamwetha kukandelela lwa kulivanga? Lumbununeni.

⁸ Mwatha kumwetha chithzemo ku vangendthzi mu vingila vya kulithethzathethza, nameme lwa kulivanga kuvamwetha kukandendelela. Chakumwenako, ndokathzi wa ku Spain wakele na kulilongetha Mbimbiliya na Yesica uje watundile ku Ecuador. Cho muvakele na kulilongetha wamwene Yesica alila. Ndokathzi wamwihwile vyakele na kulila. Yesica wakumbulwile ngwendi mwakele ku Ecuador wahutuwile manene. Litangwa limo kakele na vyakulya vya kwana munendi kuvanga mema lika. Yesica walangekele munendi oku alomba vukwathi kuli Njambi. Mu thimbu yaindondo lika, Vakaleho vavali vethzile ha njuvo yendi, cho vamwanene mangazini, oloni wamwethele likamba kuli vaje vandokathzi vavali na kutavula ije mangazini ivamwanene. Wavehwile ngwendi, “vikevyo vyakulya vimutonda ngweni njane munange evi ndi?” Vandokathzi vethekele kumuthzembeleka, oloni kavatolililile. Kutundoho, vakumuthethzele mutonga wa vyakulya ku chikolo chendi. Ngechi, muvakele na kulilongetha wathzivile kuvavala ku mbunge mwanukile ngothzi ivamumwethele, oloni kamwethele kukandelela omwo Njambi wakumbulwile lilombelo lyendi. Ha thimbu ino Yesica nalyangwila kupangela Yehova. Mu kwana mukatundu vyuma vyavivwa.—Kwambu 11:1, 6.

9, 10. (a) Mu vipangi muka muje mu vapandele kulyana Vaisalele va kuthañulu? (b) Vipangi muka vili mu chikungulukilo vije vitonda vandolome?

⁹ Kuthañulu, kwakele vipangi vimo vivapandele kupanga Vaisalele mu kulyana. (Kutu 36:2; 1 Mithzi 29:5; Nehe 11:2) Matangwa ano, kuli vingila vyavingi vimwatha kupangethelamo thimbu na vufuko na ndthzili yeni mu kukwatha vandolome na vandokathzi. Nga mulyana yeni vavenya, cho muwana vivethzikitho na kujolela kwakama.

¹⁰ Lijwi lya Njambi lili na kushongangeya vandolome vapange hamo na Yehova mangana vavane vipangi na kutwamenena mu munga ya Njambi. (1 Tima 3:1, 8, 9; 1 Petu 5:2, 3) Vaje vakalingi ngocho vakakwatha vakwavo ku muvila na ku sipilitu. (Vili 6:1-4) Vakulunu vamilombaho laja ngwavo mutale vya kunyunga nambe kukwatha ku mavulu nambe kutala vya  chitingitingi cha kwambulwila nambe kutala vya kujeletha nambe vyuma vyeka ndi? Nga mwihula vaje vali na kupanga evi vipangi, vamileka ngwavo vali na kulikuwa kupangela vakwavo.

11. Ndokathzi umo nawana vuvwa mu kulikwatathana na vaje vakele na kupanga navo mu vipangi vya Njambi?

¹¹ Vaje vakalyana mu chipangi cha Njambi vakawana vavuthamba vavaha. Chakumwenako, Ndokathzi Margie wakele mu chipangi cha kutunga Vinjuvo vya Vuvwene ha myaka 18. Ha myaka yaingi nalongetha vandokathzi va vambanda vavangi. Napu wa kuvwahelela manene mwafwa ya kukwatha vakwavo ku sipilitu. (Loma 1:12) Mu vithimbu vyakakala mu vukalu, vakamutakametha vakwavo vaje vakele na kukwatha te ali mu vipangi vya kutunga. Mwalyanaho laja mu chipangi cha kutunga ndi? Kuma mwatha kulyana nameme muthzivuka kutunga nambe embwe ndi?

12. Mwatha kukwatha vati nga kunasholoka vukalu?

¹² Nga kunasholoka vukalu vanu va Njambi vakapanga na Njambi mu kukwatha vandolome vavo ku muvila. Vamo vakana vimbongo vya kukwatha vaje vali mu vukalu. (Yowa 13:34, 35; Vili 11:27-30) Ngila ikwavo inapu ya kujeletha na kutungulula mitungo. Chakumwenako, Gabriela ndokathzi wa ku Poland, wavwahelelele manene muvakumukwathele vandolome vaje vatundile mu vikungulukilo vya hayehi omwo njuvo yendi ya thiukile na livathzi. Wendekele ngwendi: “kunjishaka kwendeka ha vyuma vyange vije vinanyongo, mwafwa vije vinapu lika vyuma vya ku muvila. Oloni njishaka kumileka vyuma vinjinawana. Mu vukalu vunjinakala navwo njalimwena ngwange kukala mu chikungulukilo cha vaka-Kilisitu kunapu kuvethzika na kujolela kwakama manene.” Vanu vavangi vavanakwatha vanalimwena vuthunga vwa majwi endekele ou ndokathzi. Cho lalo na vaje vali na kupanga na Yehova mu kukwatha vakwavo vali na kulikuwa kujolela kwakama.—Tandeni Vilinga 20:35; 2 Kolinte 9:6, 7.

13. Kulyana kwatha kutakametha vati vuthamba vwetu na Yehova? Endekeni chakumwenako.

¹³ Stephanie na vakwavo valikuwile kupangela hamo na Njambi mu kukwatha Vakaleho vaje  vatewelele ku United States mwafwa ya ndthzita. Vakwathele mu kuvatondela vinjuvo na kuvivwahetha mwamuvwa. Stephanie ngwendi: “Twavwahelelele manene mutwavamwene vajolela na kukandelela ku chithzemo cha vandolome va mu kaye koshe. Vamwene ngwavo yetu twavakwathele, oloni vakevo vatukwathele manene. Chithzemo na likwatathano na kukulahela manene Yehova vitunalimwena vinakanyametha chithzemo chetu kuli Yehova, cho vinatukwatha lalo kukandelela manene ku vyuma vituli na kuwana mu munga yendi.”

14, 15. (a) Sipilitu muka yakele nayo kapolofweto Isaya? (b) Vaka-kwambulula vya Vumwene vatha kutembwinina vati sipilitu ya Isaya?

¹⁴ Mushaka ngweni mupange manene na Yehova ndi? Kuma mwatha kutengululako vuyoye vweni mangana mupangele Njambi kwoshe kuli vujene mu munga yendi ndi? Kulyana kweni kukwemanene lika ha kuya kulako. Oloni vuyoye vwa vandolome na vandokathzi vamo vwatha kuvatavetha kukapangela kulako. Vali na sipilitu yakele nayo kapolofweto Isaya. Yehova mwehwile ngwendi: “Iyajo injikatuma. Iyajo akapwa muluwa wetu.” Isaya wakumbulwile ngwendi: “Yange unoye. Njitumeni.” (Isaya 6:8) Neni muli na lishungu na yoyethi ya kulyana mu vipangi vya Njambi ndi? Mwatha kukwatha mu vipangi muka?

¹⁵ Kutaletha ku chipangi cha kwambulula na kupwitha vanu kupwa vandongethi, Yesu wendekele ngwendi: “Vimbuto vinatumu, oloni vaka-kuteja vavandondo. Ngechi vene, lombeni kuli vavenya vimbuto ngechi atume vaka-kuteja vimbuto vyendi.” (Mateo 9:37, 38) Mwatha kupwa painiya na kupangela kuje kuli vujene ndi? Nambe kukwatha uje atha kulinga ngocho ndi? Vandolome na vandokathzi vavangi vanamono ngwavo ngila yaivwa ya kumwethelamo chithzemo chetu kuli Njambi na vanu, inapu kulinga vupainiya kuje kuli vujene vwakama vwa vaka-kwambulula. Mu vingila muka vikwavo mumwatha kuvwethzelela ku chipangi cheni? Muvwahelela manene nga mulinga ngocho.

16, 17. Mu vingila muka mumwatha kuvwethzelela ku chipangi cheni kuli Yehova?

¹⁶ Kuma mwatha kulyana kupangela ha Mbetele nambe kukwatha mu chipangi cha kutunga nambe mu thimbu yaindondo nambe mutundatunda ku njuvo yeni ndi? Munga ya Yehova thimbu yoshe ili na kutonda vaje valyana kupanga chipangi choshe chivavana, cho vatha kupangela kwoshe kuje kuli vujene nameme vali na lyethzi mu vyuma vyeka. Yehova akavwahelela manene mwakamono vanu vaje vakalyana na vimbunge vyavo vyoshe.—Myatho 110:3.

¹⁷ Mushaka kumilongetha mangana mupange mwamuvwa mu chipangi cheni cha kujela ndi? Nga mukemwo, cho mwatha kushulithilila fomu ya Sikola ya Vaka-Kwambulula vya Vumwene. Eyi sikola ikalongetha vandolome na vandokathzi vakuhya ku sipilitu, vaje vali laja mu chipangi cha thimbu yoshe mangana vapange vyavingi mu munga ya Njambi. Vaje vashaka kukovela eyi sikola vanapande kulyana kuya kwoshe kuvavatuma munima ya kumanetha sikola yavo. Neni mwatha kupanga na ndthzili mangana muvwethzelele ku chipangi cheni mu ngila eyi ndi?—1 Koli 9:23.

18. Vuvwa muka vumuwana nga mupangela hamo na Njambi?

¹⁸ Ha kupwa vangamba va Njambi, twapwa vaka-kwana na kukala na vuvwa na ngothzi na chithzemo, cho tukaka vakwetu mbunge. Nga tulinga ngocho, cho tujolela na kukala mukwoloka na kupwa va kuvwahelela. (Ngala 5:22, 23) Nameme vuyoye vunafu vati, oloni mwatha kuwana kujolela nga mutembwinina Yehova uje wapwa muka-kwana omwo muli na kupangela hamo nendi.—Vithi 3:9, 10.