1, 2. (a) Chithzemo na likulahelo vinalikwatathana vati? (b) Tuthimutwiya ha vihula muka?

TWATHZEMA YEHOVA ‘omwo ikeye watuthzemene ha kulivanga.’ (1 Yowa 4:19) Yehova nasholola chithzemo chendi ku vangamba vendi va kulongwa mu kuvavethzikitha. Chithzemo chetu kuli Njambi chikakanyametha likulahelo lyetu na kuthzivuka ngwetu chili vene kwali, cho kethi kwonwa kuvethzikitha vanu vendi.—Tandeni Vahevelu 11:6.

² Kuvethzikitha vanu, inapu ngila imo imwetha mwafwilamo Yehova nevi vyakalingi. Tumwetha ngwetu tuli na likulahelo lya kukola nga tutava ngwetu Njambi akavethzikitha vaje vali na kumushakethzeka mu vuthunga mwafwa “likulahelo lyapwa kuvandamena na mbunge imo vyuma vije vi tuli na kulavelela.” (Heve. 11:1, NWT) Kukulahela kunambatethelela kutava ngwetu Njambi akatwana vivethzikitho vyanakulahetha. Lilavelelo lyetu lya vyuma vya kulutwe litukwatha vati? Yehova navethzikitha vati vangamba vendi va kuthañulu nava va matangwa ano? Tuchikengeni mwanalingila ngocho.

3. Chikulahetho muka chili ku Malakiya 3:10?

³ Yehova Njambi nakulahetha kuvethzikitha vangamba vendi va kulongwa, ngechi ali na kutulanya ngwendi tukanyame mangana tuwane evi vivethzikitho. Natuleka lalo ngwendi: “Kachinjethekeni tayi nga kunjikamishokolwela vinjanena vya mwilu na kumyana vyuma vyavingi vije mukajeneka kwa kuvitulikila.” (Mala. 3:10) Nga tutambula vyuma vyanatwana Yehova, cho tumwetha ngwetu twakandelela kuli ikeye.

4. Mwafwa vika tunapande kukulahela majwi a Yesu aje ali ku Mateo 6:33?

⁴ Yesu wakulahethele vandongethi vendi ngwendi nga vashakethzeka tayi Vumwene vwa Njambi, cho avavethzikitha. (Tandeni Mateo 6:33.) Majwi avakulahethele Yesu emanene ha vukaleho vuje vumwetha ngwavo Yehova navethzikitha vanu vendi kushwa kuthañulu. Yesu wathzivukile ngwendi Yehova kethi kwonwa kushulithilila viyongola vyendi. (Isaya 55:11) Netu nga tukulahela na mbunge yetu yoshe, cho tulimwena vuthunga vwa majwi anatukulahetha a kwendeka ngwavo: “Kunjikamithethze na lumo lwai, nambe kumivyana.” (Heve. 13:5) Twatha kwetheketha awa majwi a kuhwiminina, ku majwi endekele Yesu a kushakethzeka tayi Vumwene vwa Njambi na vuthunga vwendi.

5. Mwafwa vika chikumbolulo cha Yesu kuli Petulu chikatukanyametha ku sipilitu?

⁵ Thimbu imo, kapositolo Petulu wehwile Yesu ngwendi: “Yetu tunathethza vyuma vyoshe, tunakukava, choni chikandelela chikajo tukatambula?” (Mateo 19:27) Yesu katenukilile Petulu omwo wamwihwile, oloni walekele vandongethi vendi ngwendi vakavethzika omwo ya kulyana kwavo. Tupositolo va kulongwa na vakwavo veka, vakayula nendi mwilu. Na matangwa ano, vali na kuwana vivethzikitho. Yesu  wendekele ngwendi: “Woshe uje nathethza vinjuvo vyendi, nambe vandolome vendi, nambe vandokathzi vendi, nambe ishe, nambe vaina, nambe vana vendi, nambe mahya endi, omwo yange, akatambula vyuma 100 ku chuma chimo na chimo chije chathethzele, cho Njambi akamwana mwonyo wa myaka yoshe.” (Mateo 19:29) Vandongethi vendi vanethi kuwanene vyuma vyavingi omwo ya kulyana kwavo. Njambi navavethzikitha kukala na vaishavo na vaina na vandolome na vandokathzi na vana va ku sipilitu ha kushakethzeka tahi vumwene mu kuyoya kwavo.

6. Mwafwa vika Yehova nakulahetha kuvethzikitha vaka-kumulemetha?

⁶ Yehova akakwatha vaka-kumulemetha nga vali mu vyetheko mangana vakatambule vivethzikitho vyanavakulahetha. Nameme vali na kulikuwa vyuma vya ku sipilitu matangwa ano, vangamba va Yehova Njambi va kulongwa vanakulahela kukalikuwa vivethzikitho vyavingi kulutwe. (1 Tima. 4:8) Kutava ngwetu Yehova wapwa “muka-kwana chikandelela kuli vaje vamushakethzeka,” kutukwatha kukanyametha likulahelo lyetu.—Heve. 11:6.

7. Lilavelelo lyetu linapu vati ngwe ñovo?

⁷ Yesu wendekele mu ñanda yendi ya ha munkinda ngwendi: “Vwaheleleni na kujolela manene, omwo vanamitulikila chikandelela cheni chakama mwilu. Omwo omu mukemwo muvayandethelele vaka-kwimanena [tupolofweto] vaje valivangele kulutwe lweni.” (Mateo 5:12) Vaje vakayoya myaka yoshe mu palandaisi hano hathi, navo vanapande “kujolela manene.” (Myatho 37:11; Luka 18:30) Nameme tukayoya mwilu nambe hathi, lilavelelo lyetu lyatha kupwa ngwe “ñovo ya chikongo cha mbunge, ikeyo ya kukola, yaivwa.” (Heve. 6:17-20) Lilavelelo lyetu lya vivethzikitho vya kulutwe likatukwatha kukanyama ku sipilitu ngwe ñovo imika mbopolo nga kuli na kuhuwa lihundthzi lyakama. Lyatha kutwana ndthzili ya kukanyamena vukalu.

8. Lilavelelo lyatha kutukwatha vati kutepulula ku vishoti vyetu?

⁸ Lilavelelo lyetu lya mu Mbimbiliya likatwana ndthzili ya kulipika na vishoti vya matangwa ano. Vikulahetho vya Njambi vinapu ngwe vumbanda vwa ku sipilitu vuje vwatha kukangwitha mbunge yetu nga tuli mu vishoti. Nga ‘tukundika tuyando twetu kuli Yehova,’ cho ‘atukwatha.’ (Myatho 55:22) Twakulahela ngwetu Njambi “atha kupanga manene kutuvakana vije twatha kumulomba, nambe kutuvakana vije vitwatha kuyongola.” (Efeso 3:20) Tunakanyama mwafwa twathzivuka ngwetu Njambi “atha kupanga “manene kutuvakana” vyuma vyoshe.

9. Mwafwa vika twakulahela ngwetu chili vene Yehova atha kutuvethzikitha?

⁹ Tunapande kukulahela manene Yehova na kwononoka mashiko endi mangana tutambule vivethzikitho vyendi. Mosesa walekele Vaisalele ngwendi: “Shukulu Kalunga Njambi yeni akamivethzikitha mu lifuti lije lyakamyana, nga mwononoka lika lijwi lya Shukulu Kalunga Njambi yeni na kunyunga mashiko oshe awa njinamishiki ku litangwa lya lelo. Cho Shukulu Kalunga Njambi yeni akamivethzikitha ngwe mwamikulahethele.” (Kwitu. 15:4-6) Neni mwakulahela ngweni Yehova amivethzikitha nga mutwalelelaho kumupangela mu kulongwa ndi? Kuli vyuma vyavingi vyatha kumilingitha mukulahele ngweni chili vene amivethzikitha.

10, 11. Yehova wavethzikithile vati Yosefa?

¹⁰ Mbimbiliya vaithonene mangana itukwathe. Muli viñanda vyavingi vije vimwetha omwo Njambi wavethzikithililemo vangamba vendi. (Loma 15:4) Yosefa wapwile umo wavo. Yosefa  wakele mu kamenga mu Ingito mwafwa vandolome vendi vamulandethele mu vundungo, cho lalo munakathzi wa shukulu yendi wamuvangeyeye viñanda vya makuli. Kuma Njambi wamwivalele ndi? Embwe. “Shukulu Kalunga wakele hamo na Yosefa wamumwethele chithzemo chendi chije kuchethi kutenguluka .  . . Shukulu Kalunga wakele hamo nendi [Yosefa], cho mu vyuma vyoshe vije vyalingile Yosefa Shukulu Kalunga wavivethzikithile.” (Kusha. 39:21-23) Nameme Yosefa wakele mu vyetheko vyavingi, oloni wakulahelele kuli Njambi yendi.

¹¹ Omwo kwetile myaka yaingi, Falao watundithile Yosefa mu kamenga na kumupwitha mwata wakama mu Ingito. (Kusha. 41:1, 37-43) Munakathzi wendi mwamukitilile vana vavali, “Yosefa walukile munendi wa ntwatwa lithzina lyendi Manase, wendekele ngwendi, “Njambi nanjivaletha tuyando twange twoshe hamo na nanga yoshe ya tate.” Walukile lalo munendi wa mu chivali lithzina lyendi Efalime. Wendekele lalo ngwendi, “Njambi nanjana vana mu lifuti lya tuyando twange.” (Kusha. 41:51, 52) Omwo ya kutwalelelaho kupwa wa kulongwa, Njambi wavethzikithile Yosefa navivethzikitho vije vyovwele Vaisalele na Vaka-ingito. Yosefa wanangukile ngwendi Yehova ikeye wamuvethzikithile mu vyuma vyoshe.—Kusha. 45:5-9.

12. Yesu watwaleleleho vati kupwa wa kulongwa mu vyetheko?

¹² Yesu Kilisitu nendi watwaleleleho kwononoka kuli Njambi mu vyetheko vyavingi vya kukulahela kwendi, cho vamuvethzikithile. Vika vyamukwathele akanyame? Lijwi lya Njambi ngwalyo: “Kajukile omwo [chiti cha kuyandethela, NWT]. Omwo kujolela chije chamuvandamenene, kathzivile shwamwa omwo kuthsa ha [chiti cha kuyandethela, NWT]” (Heve. 12:2) Yesu wathzivile kuvwaha omwo ya kujeletha lithzina lya Njambi. Ngechi ishe wamushangalele na kumuvethzikitha. Mbimbiliya ngwayo “natumbama ku livoko lya chilyo lya litanda lya Njambi.” Yatuleka lalo ngwavo: “Njambi wamwimikile na kumwaka ha mwela wa hakamwa, na kumwana lithzina lyakama kuhyana lithzina lyoshe.”—Fili. 2:9.

13, 14. Yehova akalithzivi vati ha vyuma vitukalingi?

¹³ Twakulahela ngwetu Yehova akakandelela ku kufwitangana kwetu kwoshe mu kumupangela. Athzivuka vishoti na vukalu vutunatha kukala navwo. Akatuthzembeleka nga tuli mu vukalu vwa vimbongo nambe kujeneka kulikangula mwamuvwa kuje kunatha kutwonowetha kupanga vyavingi mu chipangi cha kujela. Twakulahela ngwetu Yehova akakwatha vangamba vendi mu vyuma vyoshe vivalinga mangana vatwaleleleho kupwa va kulongwa kuli ikeye.—Tandeni Vahevelu 6:10, 11.

¹⁴ Tunapande kukulahela lalo ngwetu Njambi atolilila ku malombelo etu, mwafwa ‘akakumbulula malombelo.’ (Myatho 65:2) “Tate wa mema ku mbunge, Njambi kuje kukatundu vukwathi vwoshe,” atukwatha ku sipilitu na ku muvila kupangetha vakwetu vaka-kulemetha. (2 Koli. 1:3) Yehova akalithzivi kuvwaha nga tukwatha vakwetu. Mbimbiliya ngwayo: “Uje akala na ngothzi na tuhutu ali na kukumwitha Shukulu kalunga, cho Shukulu Kalunga akamwana chikandelela ha vije vyanalingi.” (Vithi. 19:17; Mateo 6:3, 4) Nga tukwatha vakwetu vaje vali mu vukalu na mbunge yetu yoshe, cho tuli na kukumwitha Yehova. Cho lalo nakulahetha kutuvethzikitha.

15. Vivethzikitho muka vimunavandamena kukalikuwa? (Kengeni chikupulo ha liputa 24)

¹⁵ Vaka-kilisitu vakuvwavetha vanavakulahetha kukatambula ‘Chilongo cha vuthunga  chivanavandamena chije Mwene ikeye lyako wa Vuthunga akavanacho ha litangwa lije vene.’ (2 Tima. 4:7, 8) Kumwapandele kukathama nga Njambi namyana lilavelelo lyeka. Maundthzi a “vimanga veka” va Yesu vanavandamena kukatambula vivethzikitho vya kukayoya myaka yoshe mu palandaisi hano hathi. “Vakajolela na kukala mu kwoloka.”—Yowa. 10:16; Myatho 37:11.

16. Mukanda wa 1 Yowano 3:19, 20 ututhzembeleka vati?

¹⁶ Vithimbu vimo, tunatha kulithziva ngwetu vyayi vi tuli na kulinga nambe ngwetu hamo Yehova kethi na kumona kufwitangana kwetu. Tunatha kulithziva lalo ngwetu na chimo chivethzikitho chinatupande vene chayi. Oloni tunapande kulithziva ngwetu “Njambi ikeye wakama manene kutuvakana chitakutaku chetu [vimbunge vyetu], cho athzivuka vyuma vyoshe.” (Tandeni 1 Yowano 3:19, 20.) Akavethzikitha vipangi vyetu vyoshe vya ku sipilitu omwo ya kupanga mu kukulahela na ndthzili, nameme vipwe vati vyavindondo.—Mako 12:41-44.

17. Vivethzikitho muka vi tuli na kulikuwa ano matangwa?

¹⁷ Yehova achili na kuvethzikitha vanu vendi nameme vali muno mu kaye kakavi ka Satana. Akavwahethela vaka-kumulemetha va vuthunga vyakulya vyavingi vya ku sipilitu. (Isaya 54:13) Ngechi lika mwakulahethele Yesu, Yehova natuvethzikitha matangwa ano ha kukala mu nanga ya vandolome na vandokathzi va ku sipilitu va mu kaye koshe. (Mako 10:29, 30) Kutundaho lalo, Njambi akavethzikitha vaje vamushakethzeka ha kuvana vivethzikitho vya kukala na vithinganyeka vyavivwa na kujauka na vyuma vi vali navyo na kupwa va kuvwahelela.—Fili. 4:4-7.

18, 19. Vangamba va Yehova vakalithzivi vati ha vivethzikitho vivakatambula?

¹⁸ Mu kaye koshe, vangamba va Yehova vali na kumona omwo ali na kuvavethzikithilamo Njambi. Chakumwenako, Bianca wa ku Germany nendeka ngwendi: “Njakandelela manene kuli Yehova omwo ya kunjikwatha ha litangwa na litangwa nga njili mu vishoti. Kaye kali mu liwayanga lyakama. Oloni Yehova ali na kunjinyungilila omwo njili na kumupangela. Njambi akanjivethzikitha manene thimbu yoshe injikalyana mu kumupangela.

¹⁹ Achithinganyekeni lalo hali Paula wa ku Canada wa myaka 70 ya kukola uje wavinja mushongo wa mongo [spina bifida]. Nendeka ngwendi: “Nameme kunjatha kwenda, oloni kunjatha kulikela kwambulula. Njikapangetha vingila vyavingi vya kwambulwilamo vyakufwa ngwe kupangetha foni na kwambulula kwa chintulu. Njakala na kalivulu kange munjikathoneka Vithoneka na viñanda vya mu mavulu etu vije vikanjitakametha thimbu yoshe. Njakaluka ngwange ‘Kalivulu ka Kunjitakametha.’ Nga tuthinganyekethetha ha vyuma vyanatukulahetha Yehova, cho tutwalelelaho kupwa va kukanyama. Yehova atukwatha thimbu yoshe nga tuliwana mu vukalu.” Hamo vukalu vweni vunalithethze na vwa Bianca na Paula. Neni mwatha kuthinganyeka mwanamivethzikithilamo Njambi. Kunapu kwakuvwa lalo kuthinganyeka ha vivethzikitho vya namyana Yehova mu thimbu ino, nevi vya kamyana kulutwe.

20. Vika vitunavandamena kukatambula nga tutwalelelaho kupangela Yehova na mbunge yetu yoshe?

²⁰ Tunapanande kwanuka ngwetu Njambi akatwana “chikandelela chakama manene” omwo ya kulombela kuli ikeye na kwendeka mu kushuvuluka. Twakulahela ngwetu nga ‘tulinga chithzango cha Njambi, cho tukatambula vije vyanatukulahetha.’ (Heve. 10:35, 36) Ngechi, tutwaleleleniho kukanyametha likulahelo lyetu na kupangela Yehova na mbunge yetu yoshe. Twathzivuka ngwetu vyoshe vitulinga vinapu vya Yehova, cho akatuvethzikitha kulutwe.—Tandeni Kolose 3:23, 24.