1. Ndando ya kupatula inatukwatha vati?

CHILIKA cha kwanuka kuthsa kwa Kilisitu, chikatwanukitha vya ndando ya kupatula ije inanenetha ngwavo vana va Andama, vaje vathzema vuthunga veluke mu nanga ya Njambi. Ndando ya kupatula ikeyo lalo inanenetha ngwavo tukayoye myaka yoshe mu kuvwahelela. Oloni kuli vukwathi vwavwingi vwalivungila mu ndando ya Yesu Kilisitu ya kupatula, kethi kwana lika vanu lilavelelo lya vyuma vya kulutwe. Omwo Yesu walyanene kuthsila vanu na kwimanena vuthunga vwa Yehova, wamanethele vimata vije vyakundamene ku ñanda ya chiyulo cha Njambi.—Heve. 1:8, 9.

2. (a) Vyuma muka vimo vyakama vili mu lilombelo lya Yesu? (Kengeni chikupulo ha liputa 8.) (b) Vika vituthimutwiya muno mu chilongetha?

² Omwo kwathalele lika myaka ivali ngwavo Yesu athse na kwana mwonyo wendi kupwa ñombelo, walongethele vandongethi vendi valombele ngwavo: “Tatetu uli mwilu, valemethe lithzina lyove, Vumwene vwove vwije, chithzango chove vachilinge hano  hathi, ngwe omwo vakachilingi mwilu.” (Mateo 6:9, 10) Tuchithimutwiyeni omwo ndando ya kupatula inakundamena ku kujeletha lithzina lya Njambi na ku chiyulo cha Vumwene vwa Njambi na ku kulishulithilila kwa viyongola vya Njambi, mangana tumone theho ili mu ndando ya kupatula ivanatwana.

3. Lithzina lya Yehova limanena vika, cho Satana washawile vati eli lithzina lya kujela?

³ Cha kulivanga, Yesu wendekele vya kujeletha lithzina lya Njambi, mu lilombelo lyendi lya kutalelako. Lithzina lya Yehova limanena vukama vwendi na ndthzili yendi na kujela kwendi. Mu lilombelo limo, Yesu watumbwile Yehova ngwendi: “Tate wa Kujela.” (Yowa. 17:11) Ha kupwa Yehova wa kujela, vinangulo vyendi na mashiko endi nawo apwa a kujela. Oloni nameme ngocho, mu lihya lya Endeni Satana wombwanethele ndthzili ya Njambi ya kwana vanu mashiko. Satana washawile lithzina lya Njambi lya kujela omwo wendekele makuli hali Yehova.—Kusha. 3:1-5.

4. Yesu wajelethele vati lithzina lya Njambi?

⁴ Oloni Yesu ikeye wathzemene manene lithzina lya Yehova. (Yowa. 17:25, 26) Yesu wapangele na ndthzili mu kujeletha lithzina lya Njambi. (Tandeni Myatho 40:8-10.) Kuyoya kwa Yesu hano hathi mu kulumbunuka kwamwethele ngwavo Yehova ali na lithetha lya kwana mashiko ku vanu vendi va mwilu na hathi. Nameme Satana wanenethele ngwavo Yesu athse mu ngila yaivi, oloni watwaleleleho kupwa wa kulongwa kuli Ishe wa mwilu. Omwo walongwele, Yesu wamwethele ngwendi munu wa kulumbunuka atha kutwaleleho kwononoka mashiko a Njambi.

5. Twatha kujeletha vati lithzina lya Njambi?

⁵ Twatha kumwetha vati ngwetu twathzema lithzina lya Yehova mu futithi yetu. Yehova washaka ngwendi tupwe va kujela. (Tandeni 1 Petulu 1:15, 16.) Echi chilumbununa ngwavo tunapande kulemetha lika Yehova na kumwononoka na vimbunge vyetu vyoshe. Tunapande kulinga mutwathela mwoshe, kunyunga mashiko na vinangulo vyendi nameme vatupakethe vati. Nga tulinga vyuma vyavivwa mu kuyoya kwetu, cho tutwitha cheke chetu na kwana vumpau kuli Yehova. (Mateo 5:14-16) Ha kupwa na futithi ya kujela, tukamwetha ngwetu mashiko a Yehova apwa amavwa, cho Satana wendekele makuli kutaletha ku mashiko Njambi. Nga tunathevuka ha kupwa tu va kujeneka kulumbunuka, tukatenguluka mu vuthunga na kwechela kulinga vyuma vije vishawitha Yehova.—Myatho 79:9.

6. Mwafwa vika Yehova watumona kupwa va kulongwa nameme kutwalumbunukile?

⁶ Yehova akathambetha vuvi vya vanu vaje vali na likulahelo, kwitila mu ñombelo ya Kilisitu. Akatambula vanu vaje valikundika kuli ikeye na kuvatavetha kukala mu nanga yendi ya vaka-kumulemetha. Yehova wamona vaka-Kilisitu va kuvwavetha kupwa vana vendi. Cho wamona lalo vaje vali mu vutanga vwa “vimanga veka” kupwa vavuthamba vendi. (Yowa. 10:16; Loma 5:1, 2; Yako. 2:21-25) Ngechi na matangwa ano, ndando ya kupatula ichitukwatha kupwa va kulongwa kuli Tate yetu na ku kwimanena kujela kwa lithzina lyendi.

7. Ndando ya kupatula ikanena vivethzikitho muka mu Vumwene vwa Njambi?

⁷ Cha mu chivali, Yesu walombele kuli Njambi, mu lilombelo lyendi lya kutalelako ngwendi: “Vumwene vwove vwije.” Ndando ya kupatula inakundama vati ku Vumwene vwa Njambi? Ndando ya kupatula ikeyo inanenetha ngwavo vanu va kupwa 144,000 vakapwe vimyene na tupilisitu hamo lika na Kilisitu  mwilu. (Kujo. 5:9, 10; 14:1) Yesu hamo lika na vaje vakayula navo mu Vumwene vwa Njambi, vakanena vivethzikitho omwo ya ndando ya kupatula na kutwamenena vanu va kwononoka ha myaka 1000. Hano hathi hoshe hakatenguluka kupwa palandaisi, cho vanu voshe va kulongwa vakapwa va kulumbunuka na kulikwatathana hamo lika na vanu va Njambi va mwilu na hathi. (Kujo. 5:13; 20:6) Yesu akathanyothzola mutwe wa linyoka na kutunditha vuvi vwoshe vwanenele Satana mwafwa ya kutengulukila kwendi.—Kusha. 3:15.

8. (a) Yesu wakwathele vati vandongethi vendi vamone theho ya Vumwene vwa Njambi? (b) Tumwetha vati ngwetu tuli na kukundwiya Vumwene ano matangwa?

⁸ Omwo Yesu wakele hano hathi, wakwathele vandongethi vendi vamone theho ya Vumwene vwa Njambi. Munima ya kumumbwitika, Yesu wambulwile “viñanda vyavivwa vya Vumwene vwa Njambi” mu mitambela yaingi. (Luka 4:43) Thimbu kanda eluke mwilu, Yesu washikile vandongethi vendi ngwendi vapwe vakaleho vendi “na ku mamanethelelo a hathi.” (Vili. 1:6-8) Echi chipangi cha kwambulula vya Vumwene, chikecho chanenetha ngwavo vanu voshe valilongethe vya ndando ya kupatula mangana vakale mu Vumwene vwa Njambi. Ano matangwa netu tuli na kukundwiya ovu Vumwene mu kukwatha vandolome va Kilisitu vaje vachili hano hathi mu chipangi cha kwambulula muthzimbu wauvwa wa Vumwene mu kaye mwoshe.—Mateo 24:14; 25:40.

9. Mwafwa vika tukulahela ngwetu Yehova akashulithilila viyongola vyendi ku vanu?

⁹ Yesu walumbunwine vika omwo wendekele lalo ngwendi: “Chithzango chove vachilinge”? Yehova wapwa Ishamatanga. Ngechi, nga nendeka ha chuma chimo ngwendi chilingiwe, cho kunapu lika ngwe chinalingiwa laja. (Isaya 55:11) Kakechelela kutengulukila kwa Satana kwonowethe viyongola vyendi. Kushwa ku maputukilo, Yehova wayongwele ngwendi kaye kashule na vana va kulumbunuka va Andama na Eva. (Kusha. 1:28) Ngwe va Andama na Eva kuvakitile vana, ngwe viyongola vya Njambi vya kushulitha kaye na vana vavo ngwe vyapwile vyangocho. Mukemwo, Yehova watavethele va Andama na Eva kukita vana munima ya kulinga vuvi. Ndando ya kupatula inanenetha ngwavo Njambi, atavethe vaje vamukulahela kupwa va kulumbunuka na kukayoya lalo myaka yoshe mu palandaisi, hano hathi. Yehova wathzema vanu, cho washaka ngwendi voshe vaje vamwononoka vakayoye ngwe mwayongwelelemo.

10. Ndando ya kupatula ikakwatha vati vanu vaje vanathsi?

¹⁰ Vati cho ku vanu vavangi vaje vathsile te kanda vathzivuke Yehova na kumupangela? Ndando ya kupatula inanenetha ngwavo vathsi vakathanguke. Tate yetu wa chithzemo wa mwilu akavathangula na kuvana lalo thimbu ya kulilongetha vya chithzango chendi mangana vakayoye myaka yoshe. (Vili. 24:15) Yehova washaka ngwendi vanu vayoye. Ha kupwa Muka-kwana mwonyo, ikeye Ishe ya vanu voshe vaje vakathanguka. (Myatho 36:9) Ngechi, kunapande omwo Yesu watulongethele ngwendi tulombele ngwetu: “Tatetu uli mwilu.” (Mateo 6:9) Yehova nana Yesu chipangi cha kuthangula vathsi. (Yowa. 6:40, 44) Mu Palandaisi, Yesu akashulithilila echi chipangi chendi cha kupwa “chithangukilo na mwonyo.”—Yowa. 11:25.

11. Njambi washaka ngwendi “mbunga yakama” ilinge vika?

¹¹ Yehova nayongola kukwatha vanu vavangi, kethi vanu vavandondo lika vaje vanangula, mwafwa Yesu wendekele ngwendi: “Woshe  uje alinga chithzango cha Njambi ikeye vene napu ndolome yange, na ndokathzi yange, na vanana.” (Mako 3:35) Njambi washaka ngwendi “mbunga yakama” ya vanu va kutunda ku mafuti na miyati na vindaka vapwe nanga imo lika. Voshe vaje vamwetha likulahelo mu ndando ya kupatula ya Kilisitu na kulinga chithzango cha Njambi, vakevo vakatambeka ngwavo: “Kwamena kwatunda kuli Njambi yetu, uje natumbama ha litanda, na kuli Muna Manga.”—Kujo. 7:9, 10.

12. Viyongola vya Yehova ku vanu va kwononoka vinasholoka vati mu lilombelo lya kutalelako?

¹² Vyuma vyalombele Yesu mu lilombelo lyendi lya kutalelako, vimwetha viyongola vya Yehova ku vanu. Kwetheketha neli lilombelo, tushaka kupanga mutwathela mwoshe mangana tujelethe nambe ngwetu kuthingimika lithzina lya Yehova. (Isaya 8:13) Lithzina lya Yesu lilumbununa ngwavo Yehova ikeye muka-kwamena. Kwovoka kwetu kwitila mu ndando ya kupatula, kukanena kathingimiko na vumpau ku lithzina lya Yehova. Vanu va kwononoka vakalikuwa vivethzikitho vya ndando ya kupatula mu Vumwene vwa Njambi. Tunamono ngwetu lilombelo lya kutalelako lya Yesu limwetha ngwavo kukwethi chuma chatha kwonowetha chithzango cha Njambi kulingiwa.—Myatho 135:6; Isaya 46:9, 10.

13. Nga vatumbwitika, cho tumwetha ngwetu tushaka kulinga vyuma muka?

¹³ Ngila imo ya theho itumwethelamo ngwetu twakandelela ku ndando ya kupatula, inapu kutambula chilanyo cha kukala mu nanga ya vanu va Yehova. Tukalingi ngocho mu kulikundika kuli Yehova omwo ya kukulahela ndando ya kupatula na kutumbwitika. Nga vatumbwitika, cho tumwetha ngwetu tunapu “vanu va Mwene” Yehova. (Loma 14:8)  Echi chimwetha ngwavo tunalombo Yehova atwane chitakutaku chachivwa. (1 Petu. 3:21) Yehova akakumbulula eli lilombelo mu kupangetha maninga a munendi Kilisitu aje anene kupwa ñombelo. Twakulahela lalo ngwetu akatwana vyuma vyoshe vyanatukulahetha.—Loma 8:32.

14. Mwafwa vika vatushika kuthzema vakwetu?

¹⁴ Twatha kumwetha vati lalo kukandelela kwetu ku ndando ya kupatula? Yehova washaka ngwendi vanu voshe vali mu nanga yendi vamwethe chithzemo ku vakwavo, mwafwa chikecho chifwa cha Njambi cha kulitila, cho vyoshe vyakalingi Yehova akavilingi mu chithzemo. (1 Yowa. 4:8-11) Tumwetha ngwetu tushaka kupwa “vana va [Tatetu] ali mwilu” nga tuthzema vakwetu. (Mateo 5:43-48) Lishiko lya kuthzema vakwetu likelyo lyapwa lya mu chivali kutunda kuli lije lya kuthzema Yehova. (Mateo 22:37-40) Ngila imo itumwetha ngwetu twathzema vakwetu inapu ya kwononoka lishiko lya kwambulula muthzimbu wauvwa wa Vumwene vwa Njambi. Nga tuthzema vakwetu, cho tusholola vumpau vwa Njambi. Chithzemo cha Njambi chipwa “cha vuthunga muli yetu” nga twononoka lishiko lya kuthzema vakwetu, vunene vandolome vetu.—1 Yowa. 4:12, 20.

15. (a) Yehova ali na kutuvethzikitha vati ano matangwa? (b) Vivethzikitho muka vinatuvandamena kulutwe?

¹⁵ Nga tumwetha likulahelo ku ndando ya kupatula, cho Njambi atuthambetha. Lijwi lya Njambi lyatukulahetha ngwavo vuvi vwetu vatha ‘kuvuthambetha.’ (Tandeni Vilinga 3:19-21.) Ngechi lika mutunavanga kuthimutwiya, ndando ya kupatula yanenetha ngwavo Yehova angule vangamba vendi va kuvwavetha kupwa vana vendi. (Loma 8:15-17) Yetu tuli mu vutanga vwa “vimanga veka,” Yehova kakatwivala. Omwo tukapwa va kulumbunuka na kuhyana chetheko cha mamanethelelo, cho Yehova akatutambula kupwa vana vendi vathzema va hathi. (Loma 8:20, 21; Kujo. 20:7-9) Chithzemo cha Yehova kuli vana vendi vavavwa chapwa cha myaka yoshe. Ndando ya kupatula ikanena vivethzikitho vya myaka yoshe. (Heve. 9:12) Ovu vwana vukatwalelelaho kupwa vwa theho. Na umo wahi atha kututambulavwo.

16. Ndando ya kupatula inatupatula vati mu vuthunga?

¹⁶ Liyavolo katha kwonowetha vanu vaje vanatenguluka mu vuthunga vaje vashaka kulikwatathana na nanga ya Yehova. Yesu wethzile hano hathi na kuthsa “lumo lika.” Ngechi ndando ya kupatula, vanaifwete vene kunahu. (Heve. 9:24-26) Ikeyo yanenetha ngwavo vatunditheko vuvi vuje vutwatambwile kuli Andama. Twakandelela ku ñombelo ya Kilisitu, mwafwa yatupatula ku vundungo vwa kaye kano ka Satana, cho kutwethi na lyova lya kuthsa.—Heve. 2:14, 15.

17. Yehova natumwetha vati chithzemo?

¹⁷ Vikulahetho vya Njambi vyapwa vya vuthunga. Yehova kakonowa kushulithilila vyuma vyanatukulahetha mwafwa konowele kutwamenena vyuma vyanatanga. Kethi kutenguluka. (Mala. 3:6) Yehova katwanene lika kuyoya. Oloni natumwetha lalo chithzemo chendi. “Tunathzivuka na kukulahela chithzemo chije Njambi ali nacho hali yetu. Njambi wapwa chithzemo.” (1 Yowa. 4:16) Kaye koshe kakapwa palandaisi, cho vanu voshe vaje vakakalamo vakamwetha chithzemo cha Njambi. Tuvavoshe twimbileni hamo lika na vanu va Njambi va kulongwa va mwilu ngwetu: “Kushangathzala na vumpau na mana na kukandelela na kathingimiko na ndthzili na vukama vyapwa vya Njambi yetu ku myaka yoshe. Ewa.”—Kujo. 7:12.